شينحۋا اگەنتتىگىنىڭ 11 ـ ايدىڭ 13 ـ كۇنى بەيجيڭنەن بەرگەن حابارى. 11 ـ ايدىڭ 13 ـ كۇنى مەملەكەت ٴتوراعاسى شي جينپيڭ كومورو زۇڭتۇڭى ازاليمەن ٴوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو — ٴبىرىنشى بولىپ كومورومەن ديپلوماتيالىق قارىم ـ قاتىناس ورناتقان مەملەكەت. جارتى عاسىردان بەرى، حالىقارالىق جاعداي قالاي وزگەرسە دە، جۇڭگو - كومورو قارىم ـ قاتىناسى باستان ـ اياق اقاۋسىز، ورنىقتى دامىدى. تاياۋ جىلدارى ەكى ەلدىڭ ساياسي ٴوزارا سەنىمدىلىگى ۇزدىكسىز بەكەمدەلىپ، ٴار سالاداعى اۋىس ـ كۇيىس، سەلبەستىك تابىسى مول بولىپ، ۇلكەن ـ كىشى ەلدەردىڭ تەڭ تۇرعىدا مامىلە جاساۋىنىڭ، ىنتىماقتاسىپ ٴوزارا كومەكتەسۋىنىڭ ۇلگىسىن ورناتتى. مەن جۇڭگو - كومورو قارىم ـ قاتىناسىنىڭ دامۋىنا ايرىقشا ٴمان بەرەمىن، ازالي زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن وراي ەتىپ، ٴداستۇرلى دوستىقتى جالعاستىرىپ، جۇڭگو - افريكا سەلبەستىك تالقى مىنبەرى بەيجيڭ باسشىلار ٴماجىلىسىنىڭ جەتىستىكتەرىن تياناقتاندىرۋدى ىلگەرىلەتىپ، جۇڭگو مەن كومورونىڭ ستراتەگيالىق سەرىكتەستىك قارىم ـ قاتىناسىنىڭ مازمۇنىن ۇزدىكسىز بايىتىپ، جاڭا داۋىردەگى بارلىق جاعدايدا بىردەي جۇڭگو - افريكا تاعدىرلاس ورتاق تۇلعاسىن قۇرۋعا اناعۇرلىم زور ۇلەس قوسۋدى قالايمىن.
ازالي مىنالاردى ٴبىلدىردى: ديپلوماتيالىق قارىم ـ قاتىناس ورناتقان 50 جىلدان بەرى، كومورو مەن جۇڭگو ەكى ەل ٴوزارا قۇرمەت ەتۋگە، ٴوزارا سەنىم ارتۋعا تاباندى بولىپ، باستان ـ اياق بىرگە بولىپ، بەرىك تە بەكەم دوستىق ورناتتى، ەكى جاقتى سەلبەستىكتىڭ سۇبەلى تابىستارى كومورو حالقىنىڭ تۇرمىسىن تەرەڭ وزگەرتتى. قازىرگى دۇنيە جۇزىندە وزگەرىس پەن بىلىقپالىق قاباتتاستى، ٴتوراعا شي جينپيڭ دارىپتەگەن يەلىك ۇقىققا قۇرمەت ەتۋ، ىشكى ىسىنە كيلىكپەۋ جانە سەلبەستىك جاساپ تەڭ يگىلىككە كەنەلۋ ۇستانىمى كومورونى قامتىعان جەر شارىنىڭ وڭتۇستىگىندەگى ەلدەرگە شابىت بەردى. كومورو جاق جۇڭگو جاق ورتاعا قويعان بەيبىت، ٴادىل، كوپ ۇيەكتى دۇنيە ٴجۇزىن قۇرۋ ارمانىن القايدى، ادامزاتتىڭ تاعدىرلاس ورتاق تۇلعاسى ۇستانىمىنىڭ جەتەكشىلىگىندە جۇڭگو جاقپەن بىرگە باياندى جانە سيىسىمدى دامۋدى ۇزدىكسىز ىلگەرىلەتىپ، افريكا مەن جۇڭگونىڭ ىنتىماعىن، سەلبەستىگىن، بىرگە گۇلدەنىپ ـ كوركەيۋىن جەبەۋگە ٴتيىستى ۇلەس قوسۋدى قالايدى.
