قار شاتتىعىنا شومعان شينجياڭ جاقسى شارالار شىعاردى
قىسقى ساياحات ”ۇلكەن سي ـ تارتۋىنان“ قۋانىشتى حابارلار تارالدى
انار بۇلت \ شينجياڭ گازەتىنىڭ ٴتىلشىسى ياۋ گاڭ 11 ـ ايدىڭ 14 ـ كۇنى ۇرىمجىدەن حابارلايدى. 11 ـ ايدىڭ 14 ـ كۇنى 19 ـ كەزەكتى شينجياڭ قىسقى ساياحات كاسىپ سالاسى ساۋدا كورمەسىندە شينجياڭ قىسقى ساياحات تيىمدىلىك ساياساتى ”ۇلكەن سي ـ تارتۋى“ جانە تۇتىنۋدى جەبەۋ قيمىلى جاريالاندى.
بۇگىننەن باستاپ 2026 ـ جىلى 2 ـ ايعا دەيىن 45 مىڭ پارشا تۇتىنۋ بەلەتى 6 كەزەككە ٴبولىپ تاراتىلادى، تۇڭعىش كەزەكتە 20 يۋاندىق 10 مىڭ پارشا تۇتىنۋ بەلەتى تاراتىلىپ، تۇتىنۋ بەلەتى 4S دارەجەلىدەن جوعارى 11 قار شاڭعى الاڭىن قامتيدى. ساياحاتشىلاردىڭ ”شينجياڭدا ٴبىر كودپەن ساياحاتتاۋ“ ۋيشين شاعىن باعدارلاماسىنان شىن اتى ـ ٴجونى بويىنشا كۋالاندىرىپ الۋىنا بولادى، ٴىشىنارا سەلبەستىك جاساعان قار شاڭعى الاڭدارىنا ٴبىر ۋاقىتتا 20 يۋاندىق ارناۋلى قوسىمشا قاراجات قوسا بەرىلەدى، تۇتىنۋشىلار ەڭ جوعارى بولعاندا 100 يۋانعا تولسا 40 يۋان تومەندەتۋ يگىلىگىنەن يگىلىكتەنە الادى. ساياحاتشىلار ”شينجياڭدا ٴبىر كودپەن ساياحاتتاۋ“ ۋيشين شاعىن باعدارلاماسىنان ٴار كەزەكتى تۇتىنۋ بەلەتىن تاراتۋ جونىندەگى ينفورماتسياعا يە بولا الادى. مۇنان سىرت، شينجياڭنىڭ جەر ـ جەرى دە ساياحات تۇتىنۋ بەلەتىن العا قويدى، حوتان، اقسۋ، قاشقار ايماعى جەكە ـ جەكە 2 ميلليون 500 مىڭ يۋاندىق، 6 ميلليون 400 مىڭ يۋاندىق، 4 ميلليون يۋاندىق مادەنيەت ـ ساياحات تۇتىنۋ بەلەتىن تاراتادى، قۇمىل قالاسى شيەچىڭ تۇعىرى ارقىلى قونالقىلىق تۇتىنۋ بەلەتىن تاراتادى.
بۇكىل شينجياڭداعى A دارەجەلى 150دەن استام ساياحات كورىنىس ٴوڭىرى اقىسىز بەلەت، جارتى باعا، ارزانداتۋ يگىلىگىن شىعاردى. ٴۇرىمجى قالاسىندا ”قار دەمالىسى“ كەزىندە (11 ـ ايدىڭ 29 ـ كۇنىنەن 12 ـ ايدىڭ 7 ـ كۇنىنە دەيىن) تۇز كولى كورىنىس وڭىرىندە ەسىك بەلەتى كەشىرىم ەتىلەدى، تيانشان ۇلكەن اڭعارى كورىنىس ٴوڭىرى سياقتىلاردا ورتا، باستاۋىش مەكتەپ وقۋشىلارى ٴۇشىن ەسىك بەلەتى اقىسى كەشىرىم ەتىلەدى؛ ىلە قازاق اۆتونوميالى وبلىسىنداعى قاراجون، نارات سياقتى 4A دارەجەلىدەن جوعارى 10 نەشە ساياحات كورىنىس ٴوڭىرى تەگىن اشىلادى؛ بايىنعولين موڭعۇل اۆتونوميالى وبلىسىنداعى بارلىق A دارەجەلى ساياحات كورىنىس وڭىرىندە ”بىر بەلەتپەن بىرنەشە كۇن ساياحاتتاۋ ٴتۇزىمى“ اتقارىلادى، تارىم توراڭعى ورمانى باقشاسى سياقتى كورىنىس وڭىرلەرىنە ينتەرنەت جەلىسىندە بەلەت ساتىپ السا %25تىك تيىمدىلىك جاسالادى، تۇتاس وبلىستاعى A دارەجەلى ساياحات كورىنىس وڭىرلەرىندە قۇمدى شولدەگى دالالىق اۆتوكولىك، مۇزدا سەرۋەندەۋ تۇرلەرىندە %20تىك تيىمدىلىك جاسالادى؛ حوتان ايماعىنداعى A دارەجەلى 32 ساياحات كورىنىس وڭىرىندە ەسىك بەلەتى اقىسى كەشىرىم ەتىلەدى، A دارەجەلى 47 ساياحات كورىنىس ٴوڭىرى وقۋشىلار، شينجياڭعا كومەكتەسەتىن ولكە، قالالاردان كەلگەن ساياحاتشىلار سياقتىلارعا تيىمدىلىك ساياساتىن اتقارادى.
بۇكىل شينجياڭداعى 200 قوناق ٴۇي باعانى تومەندەتىپ تيىمدىلىك جاساۋ قيمىلىن ورىستەتتى، بۇكىل شينجياڭداعى 100دەن استام اس ـ سۋ كاسىپورنى باعادا جەڭىلدىك جاساۋ تيىمدىلىگىن العا قويدى. تۇڭچىڭ ساياحات سەرىكتەستىگى شينجياڭعا ساياحاتتاي كەلسە ۇشاق بەلەتىندە، قونالقىدا، كورىنىس وڭىرلەرىنىڭ ەسىك بەلەتىندە تيىمدىلىك جاساۋ قيمىلىن قاتار العا قويدى.
شينجياڭنىڭ قىسقى ساياحاتىنىڭ ومىرشەڭ كۇشىن ونان ارى قاۋلاتۋ ٴۇشىن، ايماق، وبلىس، قالالار تاعى ”ساياحاتشىلاردى شينجياڭعا كەلۋگە باۋراۋ“ سيلىق قوسىمشا قاراجاتى ساياساتىن العا قويدى. ىلە وبلىسى شارتقا ۇيلەسەتىن ساياحات كووپەراتيۆتەرىنە ادام باسىنا 300 - 500 يۋان ساياحاتشىلاردى باۋراۋ قوسىمشا قاراجاتىن بەرەدى، وزمەديالار ساپالى مازمۇندار شىعارسا 2000 يۋاننان 20 مىڭ يۋانعا دەيىن سيلىققا يە بولادى؛ سانجى حۇيزۋ اۆتونوميالى وبلىسى ساياحاتشىلار ۇشاق جالداسا، ارناۋلى پويەزبەن كەلسە ەڭ جوعارى بولعاندا ۇيىرمە سايىن 50 مىڭ يۋان، ٴوزى كولىك جۇرگىزگەن اۆتوكولىك اترەتى، زەرتتەۋ ـ ۇيرەنۋ ۇجىمى سياقتىلارعا ەڭ جوعارى بولعاندا ۇيىرمە سايىن 20 مىڭ يۋان، ساياحات ويىندارىن، تاڭداۋلى جارىستاردى ەنگىزگەندەرگە مايدان سايىن 200 مىڭ يۋان سيلىق بەرەدى؛ حوتان ايماعى حوتانعا ارناۋلى پويەزبەن، ۇشاق جالداپ كەلگەن ساياحات كووپەراتيۆىنە ساياحاتشىلاردى باۋراۋ سيلىق قوسىمشا قاراجاتىن بەرەدى، ساياحاتشىلار ٴبىر ٴتۇن ارتىق تۇنەسە، ٴار بولمەگە ۇستەمە 100 يۋان سيلىق بەرىلەدى.
وسى قىستا شينجياڭنىڭ جەر ـ جەرى 500 رەتتەن استام ەرەكشە مادەنيەت ـ ساياحات قيمىلىن ورىستەتەدى. اۆتونوميالى رايوندىق مادەنيەت جانە ساياحات مەڭگەرمەسىنىڭ قاتىستى باسقارما ـ كەڭسەسىنىڭ جاۋاپتىسى مىنالاردى ٴبىلدىردى: تۇتىنۋ بەلەتىن تاراتۋ، كورىنىس وڭىرلەرىنىڭ ەسىك بەلەتى اقىسىن ارزانداتۋ، كەشىرىم ەتۋ، قونالقىدا، اس ـ سۋدا باعانى ارزانداتىپ تيىمدىلىك جاساۋ، ەرەكشە مادەنيەت ـ ساياحات قيمىلدارىن وتكىزۋ سياقتى ساتۋدى جەبەۋ تاسىلدەرى ارقىلى قىسقى ساياحات تۇتىنۋىنىڭ ومىرشەڭ كۇشىن ونان ارى جانداندىرىپ، شينجياڭنىڭ مادەنيەت ـ ساياحات كاسىپ سالاسىنىڭ دامۋىنا دەم بەرۋدى ٴۇمىت ەتەمىز.
