التىن مەدالدى جايبىراقات جەڭىپ الدى
شينجياڭنىڭ دەسكى لاقتىرۋ بويىنشا 1 ـ ورىندا تۇراتىن شەبەرى مىعىم باسىمدىقپەن اعا جۇلدەگەرلىكتى ساقتادى
انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ
11 ـ ايدىڭ 20 ـ كۇنى شينجياڭ كومانداسىنىڭ شەبەرى ابدۇعيني تۇرعۇن جارىستا سىناق رەتىندە لاقتىرۋدا. ول 64 مەتر 40 سانتيمەترلىك ناتيجەمەن اعا جۇلدەگەرلىكتى ەنشىلەدى.
□ سۋرەتتى شينحۋا اگەنتتىگىنىڭ ٴتىلشىسى جياڭ حان تۇسىرگەن
4 جىلدىڭ الدىندا شي ـ ان وليمپيادا دەنە تاربيە ورتالىعىنىڭ دەنە تاربيە الاڭىندا جاڭبىر سەبەزگىلەپ جاۋىپ تۇرسا دا، ابدۇعيني تۇرعۇننىڭ اعا جۇلدەگەرلىكتى ەنشىلەگەننەن كەيىنگى تەبىرەنگەن كوز جاسىن جاسىرا المادى؛ 4 جىلدان كەيىن گۋاڭدۇڭ وليمپيادا دەنە تاربيە ورتالىعىنىڭ دەنە تاربيە الاڭىندا ابدۇعيني اعا جۇلدەگەرلىكتى العاننان كەيىنگى دۋماندى بەينە قىس باسىنداعى سۋىقتىڭ بەتىن قايتارعانداي بولدى.
11 ـ ايدىڭ 20 ـ كۇنى شينجياڭنىڭ قاشقارىنان شىققان 28 جاستاعى وسى سپورتشى 15 ـ كەزەكتى مەملەكەتتىك سپورت جارىسىنىڭ ەڭ سوڭعى كۇنىندەگى ەرلەر دەسكى ٴتۇرى جارىس الاڭىندا 64 مەتر 40 سانتيمەترلىك ناتيجەمەن التىن مەدالدى جايبىراقات جەڭىپ الىپ، مىعىم باسىمدىقپەن اعا جۇلدەگەرلىكتى ساقتادى. ”كەلەرگى ايالدامام ازيا سپورت جارىسى“، ـ دەدى ول باتىل تۇردە.
جارىس اياقتاپ، ٴتىلشى: وتباسىڭداعىلاردان جارىس كورۋگە كەلگەندەر بار ما؟ ـ دەپ سۇراعاندا، قايسار جىگىت ابدۇعيني بۋلىعا بىلاي دەدى: ”اكەمدى ساعىندىم، الدىڭعى كەزەكتى مەملەكەتتىك سپورت جارىسىندا اعا جۇلدەگەرلىكتى العاننان كەيىن، ول اۋرۋ توسەگىندە جاتسا دا ەرەكشە قۋانعان بولاتىن، وسى كەزەك اكەمدى تاعى ٴبىر دۇنيەدە تۇرىپ مەنىڭ ناتيجەمدى كورەدى دەپ ويلايمىن“.
ابدۇعيني كونە ٴشار اۋدانى وپال قالاشىعى باش ياعۇ قىستاعىنان. ول ٴۇيدىڭ ەكىنشىسى، بالا كەزىندە تۇرمىستارى تىم باياشاتتى بولماعانىمەن، اكەسى اعايىندى ـ قارىنداس ۇشەۋىنە ۇنەمى ازىن ـ اۋلاق اقشا بەرەتىن، ”اكە ـ شەشەمنىڭ مەيىرىنە بولەنىپ جۇرەمىز، تاعى اعام، قارىنداسىم ٴبارىمىز بىرگە وينايمىز، قىستاقتىڭ شەتىندەگى دۇكەننەن ۇساق ـ تۇيەك نارسەلەردى بىرگە الىپ جەيتىنبىز، قازىرگە دەيىن كىشكەنە كەزىمدى وتە باقىتتى كەزدەرىم ەكەن دەپ سەزىنەمىن“.
2011 ـ جىلدىڭ سوڭىندا قاشقار ايماقتىق دەنە تاربيە مەكتەبىنىڭ جاتتىقتىرۋشىسى وبۇلقاسىم بارات كونە ٴشار اۋدانىنا بارىپ ادام تاڭداعاندا 14 جاستاعى، بويىنىڭ بيىكتىگى ٴبىر مەتر 78 سانتيمەتر كەلەتىن وعان كوزى تۇسەدى.
ابدۇعينيدىڭ قىسقا بەينەجازبا نومىرىندە دەسكى لاقتىرۋعا ەندى باستاپ جاتتىققان كەزدەگى كەسكىن بار. سول كەزدە ول سارى ٴتۇستى جەيدە، قارا سىم كيگەن جۇدەۋ بالا بولىپ، مەكتەپ الاڭىنىڭ شەتىندە اينالۋ، لاقتىرۋ ارەكەتتەرىن قايتالاپ جاتقان ەدى. ”ول كەزدە دەسكى جوق، تەمىر تاياق لاقتىراتىنبىز“. ول بىلاي دەدى: ”شىنىمدى ايتسام، بالا كەزىمدە ۇستەل دوپ ويناۋدى ۇناتاتىنمىن، باستاۋىش مەكتەپتە ەشكىم مەنى جەڭە الماعان سوڭ، ورتالاۋ مەكتەپكە بارىپ وينايتىنمىن“.
2012 ـ جىلى ابدۇعيني قاشقار ايماقتىق دەنە تاربيە مەكتەبىنە كىرىپ دەسكى لاقتىرۋعا ماشىقتانادى. ەڭ باستاپقى ٴبىر جارىم جىلدا كىپ ـ كىشكەنتاي ول جاپالى جاتتىعۋ جاساعاننان سىرت، كەز كەلگەن جەردە ۋاقىتتىق جۇمىس ىستەپ تۇرمىس قاراجاتىن تابادى. ”سول كەزدە جاتتىعۋدان ناتيجە شىعارا الاتىن ـ المايتىنىمدى بىلمەگەن سوڭ، وتباسىمداعىلاردىڭ جۇگىن اۋىرلاتقىم كەلمەدى، اكەم سوندا دا تۇرمىس قاراجات بەرەتىن، ٴيا الماي قويامىن، السام دا ازىن ـ اۋلاعىن الاتىنمىن. اقشام جەتپەگەندە قاشقار قالاسىنىڭ ماڭىنا بارىپ ۋاقىتتىق جۇمىس ىستەيتىنمىن، قازىرگى جاپاعا شىداي الۋىم سول كەزدەگى شىنىعۋدان كەلگەن“.
سودان كەيىن ابدۇعيني اۆتونوميالى رايوندىق 13 ـ كەزەكتى سپورت جارىسىنىڭ ەرلەر دەسكى تۇرىندە اعا جۇلدەگەرلىككە يە بولىپ، شينجياڭ جەڭىل اتلەتيكا كومانداسىنا تاڭدالىپ، كاسىپتەس اعاسى نۇرمامەت تۇراقپەن بىرگە جاتتىعادى، قازىر نۇرمامەت ونىڭ جاۋاپتى جاتتىقتىرۋشىسى. ”نۇرمامەت اعام مەملەكەتتىك سپورت جارىسىنا 6 رەت قاتىناستى، ەڭ جاقسى ناتيجەسى كۇمىس مەدال بولدى، الدىڭعى كەزەكتى مەملەكەتتىك سپورت جارىسىندا مەن التىن مەدال العاندا ول ەرەكشە قۋاندى“. ابدۇعيني بىلاي دەدى: جاتتىقتىرۋشىم اعام ٴارى اكەم سياقتى قاپىسىز قامقورلىق كورسەتىپ جانە سەرىك بولىپ، 14 ـ كەزەكتى مەملەكەتتىك سپورت جارىسىنىڭ اعا جۇلدەگەرلىگىن الۋىما مۇمكىندىك جاسادى.
باسەكەلىك دەنە تاربيە سوڭعى شەكتەمەنى ۇزدىكسىز بۇزىپ ٴوتۋ دەگەندىك، الدىڭعى كەزەكتى مەملەكەتتىك سپورت جارىسىندا ابدۇعيني جالعىز ٴوزى 60 مەترلىك ۇلكەن وتكەلدەن ٴوتتى، ال وسى 2 جىلدا ەل ىشىندە سپورتشىلار ارت ـ ارتىنان 60 مەترلىك وتكەلدى بۇزىپ ٴوتتى، بۇل وعان قىسىم بولدى. 2023 ـ جىلى مەملەكەت كومانداسى مەن شينجياڭ كومانداسىنىڭ قولداۋىندا ابدۇعيني شالعايداعى امەريكاعا بارىپ جاتتىعۋ جاساپ، تەحنيكالىق ارەكەتتەرىن جاڭالاۋدى باستادى. الايدا 2 جىلداي ۋاقىتتا ول تولعانىس جانە ارپالىس ىشىندە ٴوتىپ، باستان ـ اياق جاڭا تەحنيكا ۇلگىسىن مەڭگەرۋگە السىزدىك ەتتى.
”جاڭا، كونە تەحنيكانىڭ ەكەۋى دە كۇش ۇستەمەدى، مەن ارالىقتا قالىپ، ىلگەرىلەۋگە دە، شەگىنۋگە دە امالسىز قالدىم“. ابدۇعيني ەسكە الىپ بىلاي دەدى: سول كەزدە اينالىپ بارىپ لاقتىراتىن ەڭ سوڭعى ساتتە دەنەم ۇنەمى السىرەپ كەتەتىن، دەسكىنى لاقتىرعان كەزدە بۇرىنعىداي شورت كۇش الا المادىم، ”جاتتىقتىرۋشىما: مىنا دەسكىعا ۇيرەنە المادىم... وسىلاي قۇريمىن با؟ دەدىم“.
قيىن ـ قىستاۋ كەزدەردىڭ مەيىرىمسىزدىگى ارت ـ ارتىنان كورىنىس بەردى: الدىمەن ول ازيا سپورت جارىسىنىڭ التىن مەدالىنان ايرىلدى، كەيىن پاريج وليمپيادا سپورت جارىسىنا قاتىناسا المادى. بۇرىلىس 2025 ـ جىلعى جارىس ماۋسىمىنىڭ الدىنداعى گەرمانياداعى قىسقى جاتتىعۋدا تۋىلدى، سول كەزدە ول كوپتەن بەرى تابا الماي كەلگەن دەسكىمەن اراسىنداعى ٴۇنسىز سايكەسۋدى اقىرى تاپتى.
”ٴبىز جاتتىعۋ ٴتاسىلىن رەتتەدىك، كۇشتى ٴتۇيىندى تۇردە لاقتىرۋ ارەكەتىنە ويىستىرىق“. ٴبىر قىستا ونىڭ دەنە سالماعى 10 نەشە كيلوگرام ارتتى، بۇل دا ونىڭ بوگەتتى بۇزۋىنىڭ بەرىك نەگىزىنە اينالدى. ”بۇرىن 117 كيلوگرام بولاتىنمىن، قازىر 132 كيلوگرامعا شىقتىم. دۇنيە جۇزىندەگى ەڭ ۇزدىك شەبەرلەردىڭ كوبى 150 - 140 كيلوگرام كەلەدى، وسى ٴتۇر دەنە سالماعى ارقىلى دەسكى لاقتىرۋدى قاجەت ەتەدى“. ول كۇلىمسىرەي: ”باسقالاردىڭ ٴبارى ارىقتاپ جاتسا، مەن كاسىپ ٴۇشىن سالماعىمدى ارتتىرۋدى تاڭدادىم“، ـ دەپ ٴتۇسىندىردى.
سول كۇنگى جارىس الاڭىندا شينجياڭ كومانداسىنىڭ ەندى ٴبىر ساڭلاعى شان چۇنچياڭ دا 53 مەتر 64 سانتيمەترلىك جەكەلىك جاقسى ناتيجەگە قول جەتكىزدى. شان چۇنچياڭ بۇرىن نۇرمامەتكە سەرىك بولىپ جاتتىعاتىن، قازىر شان چۇنچياڭ ابدۇعينيعا سەرىك بولىپ جاتتىعادى. ”مىنە بۇل ٴبىزدىڭ جالعاستىرۋىمىز“، ـ دەدى اۆتونوميالى رايوندىق دەنە تاربيە مەكەمەسى ارگۇڭ دەنە تاربيە جاتتىعۋ ورتالىعى جاتتىعۋ ٴبولىمىنىڭ باستىعى ياڭ ىنديان، ـ ”ٴبىر ۇرپاق ەندى ٴبىر ۇرپاقتى جەتەلەيدى، بۇل سوڭعى كومبەسى جوق كۇش جالعاۋ سياقتى، مۇندا تەك ۇزدىكسىز جالعاسقان سۇيىسپەنشىلىك پەن تاباندىلىق قانا بار“.
