2025 ـ جىلعى وقۋ ـ اعارتۋ مينيسترلىگىنىڭ اۆتونوميالى رايونمەن جانە بيڭتۋانمەن ستراتەگيالىق كەڭەسۋ ٴماجىلىسى اشىلدى
مينيسترلىك پەن رايوننىڭ (بيڭتۋان) ستراتەگيالىق سەلبەستىگىنىڭ تەرەڭدەۋىن، ناقتىلانۋىن ىلگەرىلەتىپ، شينجياڭنىڭ وقۋ ـ اعارتۋدا قۋاتتى رايون قۇرۋدى جەدەلدەتۋىنە دەم بەرۋ كەرەك
حۋاي جينپىڭ، چىن شياۋجياڭ ٴسوز سويلەدى، ەركىن تۇنياز باسقاردى، حى جۇڭيوۋ قاتىناستى
انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 12 ـ ايدىڭ 1 ـ كۇنى ۇرىمجىدەن حابارلايدى. 12 ـ ايدىڭ 1 ـ كۇنى 2025 ـ جىلعى وقۋ ـ اعارتۋ مينيسترلىگىنىڭ اۆتونوميالى رايونمەن جانە بيڭتۋانمەن ستراتەگيالىق كەڭەس ٴماجىلىسى ۇرىمجىدە اشىلدى. وقۋ ـ اعارتۋ مينيسترلىگى پارتيا باسشىلىق گرۋپپاسىنىڭ شۋجيى، مينيستر حۋاي جينپىڭ، اۆتونوميالى رايوندىق پارتكومنىڭ شۋجيى، بيڭتۋان پارتكومىنىڭ ٴبىرىنشى شۋجيى، ٴبىرىنشى جىڭۋي چىن شياۋجياڭ ماجىلىسكە قاتىناستى ٴارى ٴسوز سويلەدى.
اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز باسقاردى. اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى حى جۇڭيوۋ قاتىناستى.
حۋاي جينپىڭ بىلاي دەپ اتاپ كورسەتتى: وقۋ ـ اعارتۋ مينيسترلىگى باس شۋجي شي جينپيڭنىڭ شينجياڭ قىزمەتى جونىندەگى ماڭىزدى سوزدەرىنىڭ، ماڭىزدى نۇسقاۋلارىنىڭ، بەكىتۋلەرىنىڭ رۋحىن ىشكەرىلەي ۇيرەنىپ، دايەكتىلەندىرىپ، شينجياڭمەن ۇقساس ماسەلەگە بىرگە جاۋاپ قايتارىپ، ٴبىر باعىتتا كۇش سالىپ، شينجياڭنىڭ وقۋ ـ اعارتۋ ىستەرىنىڭ كورنەكتى ناتيجەگە قول جەتكىزۋىن ىلگەرىلەتتى. كەزەكتە وقۋ ـ اعارتۋ مينيسترلىگى پارتيا 20 ـ كەزەكتى ورتالىق كوميتەتى ٴتورتىنشى جالپى ٴماجىلىسىنىڭ رۋحىن مۇقيات دايەكتىلەندىرىپ، تياناقتاندىرىپ، ”15 ـ بەسجىلدىقتاعى“ وقۋ ـ اعارتۋدى دامىتۋ جوباسىن ىشكەرىلەي جوسپارلاۋدا. شينجياڭمەن بىرگە شينجياڭ وقۋ ـ اعارتۋىنىڭ جوعارى ساپالى دامۋىن جوعارى دەڭگەيدە جوبالاۋدى بار كۇشپەن ويداعىداي ىستەپ، نازاردى شينجياڭنىڭ ”بەس ۇلكەن ستراتەگيالىق ورنىنا“ شوعىرلاندىرىپ، كەلەلى نىسانا ـ مىندەتتەردى، كەلەلى ينجەنەريا نىساندارىن جانە كەلەلى رەفورما شارالارىن ىشكەرىلەي جوسپارلاپ، وقۋ ـ اعارتۋدىڭ سوتسياليستىك وسىزاماندانعان شينجياڭ قۇرۋداعى نەگىزدىك، جەتەكشىلىك، ستراتەگيالىق رولىن اناعۇرلىم ويداعىداي ساۋلەلەندىرۋدى ٴۇمىت ەتەمىن. جۇڭحۋا ۇلتى ورتاق تۇلعا تانىمىن بەكەمدەۋدى وقۋ ـ اعارتۋدىڭ تۇتاس بارىسىمەن، ٴار جاعىمەن ساباقتاستىرۋعا تاباندى بولىپ، ٴمورال ارقىلى تاربيەلەۋ ٴتۇبىرلى مىندەتىن بۇلجىماي تياناقتاندىرۋ؛ دارىندىلاردى باۋلۋدى ەكونوميكالىق، قوعامدىق دامۋمەن ۇيلەستىرۋ مەحانيزمىن كەمەلدەندىرىپ، جاڭاشا وندىرگىش كۇشتەردى دامىتۋعا قۋات ۇستەۋ؛ شينجياڭنىڭ جوعارى دارەجەلى زەرتتەۋ ورىندارىن ويداعىداي قۇرىپ، شينجياڭنىڭ ماڭىزدى وڭىرلىك وقۋ ـ اعارتۋ ورتالىعىن قۇرۋىنا دەم بەرۋ؛ جان سانىنىڭ وزگەرىسىنە ۇيلەسەتىن نەگىزدىك وقۋ ـ اعارتۋ بايلىعىن ٴبىر تۇتاس رەتتەۋ، ۇلەستىرۋ مەحانيزمىن اقاۋسىزداندىرىپ، الەۋمەتتىك قىزمەت وتەۋدىڭ ساپاسى مەن دەڭگەيىن جوعارىلاتۋ؛ شينجياڭعا باعىتتامالى كومەكتەسۋ مەحانيزمىن كەمەلدەندىرىپ، ”ۇيىرمە قۇراۋ ۇلگىسىندەگى“ كومەكتەسۋ ـ سۇيەمەلدەۋدى ۇزدىكسىز تەرەڭدەتۋ؛ حاۋىپسىزدىك تومەنگى شەگىن ساقتاپ، وقۋ ـ اعارتۋ جۇيەسىنىڭ حاۋىپسىزدىگىنە، ورنىقتىلىعىنا شىنايى كەپىلدىك ەتۋ كەرەك.
چىن شياۋجياڭ مىنالاردى ٴبىلدىردى: تاياۋ جىلداردان بەرى وقۋ ـ اعارتۋ مينيسترلىگى اۆتونوميالى رايونمەن جانە بيڭتۋانمەن ستراتەگيالىق سەلبەستىكتى ۇزدىكسىز تەرەڭدەتىپ، شينجياڭنىڭ وقۋ ـ اعارتۋدىڭ تۇتاس تۇلعالىق دەڭگەيىن جوعارىلاتۋىنا، وقۋ ـ اعارتۋدا سىرتپەن سەلبەستىكتى تەرەڭدەتۋىنە، وڭتۇستىك شينجياڭنىڭ جوعارى دارەجەلى وقۋ ـ اعارتۋىنىڭ دامۋىن ىلگەرىلەتۋدە كەلەلى ىلگەرىلەۋشىلىككە قول جەتكىزۋىنە قولداۋ كورسەتتى، اۆتونوميالى رايوندىق پارتكوم، ۇكىمەت جانە بيڭتۋان بۇعان العىس ايتادى. شينجياڭ پارتيا 20 ـ كەزەكتى ورتالىق كوميتەتى ٴتورتىنشى جالپى ٴماجىلىسىنىڭ ستراتەگيالىق ورنالاستىرۋىن جاپپاي ۇيرەنىپ، دايەكتىلەندىرىپ، باس شۋجي شي جينپيڭنىڭ اۆتونوميالى رايون قۇرىلعاندىعىنىڭ 70 جىلدىعىن قۇتتىقتاۋ قيمىلىنا قاتىناسقان كەزدەگى ماڭىزدى ٴسوزىنىڭ، ماڭىزدى نۇسقاۋىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، اۆتونوميالى رايوندىق 10 ـ كەزەكتى پارتكومنىڭ ون بەسىنشى جالپى ٴماجىلىسىن اشىپ، ”15 ـ بەسجىلدىق“ مەزگىلىندەگى شينجياڭنىڭ ەكونوميكالىق، قوعامدىق دامۋى جانە پارتيا قۇرىلىسىنىڭ ٴتۇرلى قىزمەتتەرى جونىندە جۇيەلى ورنالاستىرۋ جاسادى. وقۋ ـ اعارتۋ مينيسترلىگىنىڭ شينجياڭ قىزمەتىنە ۇزدىكسىز كوڭىل ٴبولىپ، قولداۋ كورسەتىپ، شينجياڭنىڭ وقۋ ـ اعارتۋدا قۋاتتى رايون قۇرۋىنا دەم بەرۋىن ٴۇمىت ەتەمىن. شينجياڭ جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، نازاردى قوعام ورنىقتىلىعى مەن باياندى تىنىشتىق قىزمەت باس نىساناسىنا شوعىرلاندىرىپ، جۇڭحۋا ۇلتى ورتاق تۇلعا تانىمىن بەكەمدەۋدى نەگىزگى جەلى ەتۋگە تاباندى بولىپ، تۇلعالىق رولىن تولىق ساۋلەلەندىرىپ، مينيسترلىك پەن رايوننىڭ (بيڭتۋان) ستراتەگيالىق سەلبەستىگىنىڭ ناقتى تياناقتانۋىن ىلگەرىلەتىپ، وقۋ ـ اعارتۋ جۇيەسىندە پارتيا باسشىلىعى مەن پارتيا قۇرىلىسىن كۇشەيتىپ، ٴمورال ارقىلى تاربيەلەۋ ٴتۇبىرلى مىندەتىن تياناقتاندىرىپ، نەگىزدىك وقۋ ـ اعارتۋدى كۇش سالا ويداعىداي جۇرگىزەدى، جوعارى دارەجەلى وقۋ ـ اعارتۋدىڭ، كاسىپتىك وقۋ ـ اعارتۋدىڭ ورنالاسۋ قۇرىلىمىن ساپالىلاندىرىپ، وقىتۋشىلار قوسىنى قۇرىلىسىن كۇشەيتىپ، حالىق رازى بولاتىن وقۋ ـ اعارتۋدى قۇلشىنا ويداعىداي جۇرگىزىپ، سوتسياليستىك وسىزاماندانعان شينجياڭ قۇرۋعا بەرىك تىرەك ازىرلەيدى.
ماجىلىستە اۆتونوميالى رايونداعى جانە بيڭتۋانداعى قاتىستى جاۋاپتى جولداستار جەكە ـ جەكە مينيسترلىك پەن رايوننىڭ، مينيسترلىك پەن بيڭتۋاننىڭ سەلبەستىك كەلىسىمىنىڭ تياناقتانۋ جاعدايىنان مالىمەت بەردى.
وقۋ ـ اعارتۋ مينيسترلىگى پارتيا باسشىلىق گرۋپپاسىنىڭ مۇشەسى، ورىنباسار مينيستر شيۇڭ سىحاۋ، اۆتونوميالى رايون مەن بيڭتۋاننىڭ باسشىلارىنان ۋاڭ جيانشين، قادەن كابەن، قايسار ابدۇكەرىم، لي شۇي، وقۋ ـ اعارتۋ مينيسترلىگىنىڭ قاتىستى مەڭگەرمە، مەكەمەلەرىندەگى جانە اۆتونوميالى رايوننىڭ، بيڭتۋاننىڭ قاتىستى ورىندارىنداعى، سونداي ـ اق ٴىشىنارا جوعارى مەكتەپتەردەگى جاۋاپتى جولداستار ماجىلىسكە قاتىناستى.
