انار بۇلت \ شينجياڭ گازەتىنىڭ ٴتىلشىسى ران حۋ
جۋىقتا اۆتونوميالى رايوندىق قازىنا مەڭگەرمەسى «2025 ـ جىلى 1 ـ ايدان 10 ـ ايعا دەيىنگى اۆتونوميالى رايوننىڭ قازىنا مەجە ەسەبىنىڭ اتقارىلۋ جاعدايىن» جاريالادى، الدىڭعى 10 ايدا شينجياڭنىڭ ادەتتەگى الەۋمەتتىك مەجە ەسەپ كىرىسى جيىنى 217 ميلليارد 710 ميلليون يۋان بولىپ، سايكەس مەزگىلدەگىدەن %10.2 ارتقان؛ ادەتتەگى الەۋمەتتىك مەجە ەسەپ شىعىسى جيىنى 552 ميلليارد 570 ميلليون يۋان بولىپ، سايكەس مەزگىلدەگىدەن %7.7 ارتىپ، كىرىس ـ شىعىستىڭ ارتۋ مولشەرى بىردەي بۇكىل ەل بويىنشا 3 ـ ورىندى يەلەگەن. مۇندا سالىق كىرىسىنىڭ ارتۋ قارقىنى ٴبىرشاما تەز بولىپ، سالىققا جاتپايتىن كىرىستىڭ ادەتتەگى الەۋمەتتىك مەجە ەسەپ كىرىسىندە يەلەيتىن سالىستىرماسى ۇزدىكسىز تومەندەگەن، اۆتونوميالى رايوننىڭ ۇكىمەتتىك قور مەجە ەسەپ كىرىسى 2 ورىندى سان بويىنشا ارتىپ، كورنەكتى ساندى مالىمەتتەر شينجياڭ ەكونوميكاسىنىڭ ورنىقتى دامۋ جاعدايىن ايگىلەدى.
كىرىس قۇرىلىمى ۇزدىكسىز جاقساردى
الدىڭعى 10 ايدا بۇكىل شينجياڭنىڭ سالىق كىرىسى 127 ميلليارد 720 ميلليون يۋان بولىپ، سايكەس مەزگىلدەگىدەن %6.6 ارتقان، سالىققا جاتپايتىن كىرىس 89 ميلليارد 990 ميلليون يۋان بولىپ، سايكەس مەزگىلدەگىدەن %15.9 ارتقان، 7 ـ ايدان بەرى، سالىققا جاتپايتىن كىرىستىڭ ادەتتەگى الەۋمەتتىك مەجە ەسەپ كىرىسىندە يەلەگەن سالىستىرماسى ۇزدىكسىز تومەندەگەن.
”ٴبىر جوعارىلاۋ، ٴبىر تومەندەۋ“ شينجياڭنىڭ ادەتتەگى الەۋمەتتىك مەجە ەسەپ كىرىسىنىڭ كوبىنىڭ ارناعا تۇسكەن، باياندى سالىق ارناسىنان كەلگەندىگىن، شينجياڭنىڭ قازىنا كىرىسى قۇرىلىمىنىڭ ۇزدىكسىز جاقسارىپ جاتقاندىعىن بەينەلەيدى.
اۆتونوميالى رايوندىق قازىنا مەڭگەرمەسىنىڭ قاتىستى جاۋاپتىسى بىلاي دەپ تانىستىردى: بيىل جىل باسىنان بەرى، اۆتونوميالى رايوننىڭ سالىق ىستەرى تاراۋلارى سالىق الۋدى باسقارۋدى جانە سالىقتى زاڭ بويىنشا باسقارۋدى ۇزدىكسىز كۇشەيتىپ، ٴتۇيىندى سالالاردى، ٴتۇيىندى سالىق قاينارىن تەكسەرۋ تەبىنىن ارتتىرىپ، ٴار دارەجەلى قازىنا تاراۋلارى ىركىندى مال ـ مۇلىكتى بەلسەنە جانداندىرىپ، سالىققا جاتپايتىن كىرىستى باسقارۋدى ارناعا ٴتۇسىرۋ، مەملەكەت مەنشىگىندەگى مال ـ مۇلىكتىڭ تيجارات ونىمدىلىگىن جوعارىلاتۋ سياقتى كوپ ٴتۇرلى جولدارمەن قازىنالىق كىرىستىڭ ٴورىسىن جاپپاي كەڭەيتتى.
الدىڭعى 10 ايداعى شينجياڭنىڭ ادەتتەگى الەۋمەتتىك مەجە ەسەپ كىرىسىنە زەر سالساق، جارقىن تۇيىندەر ىركەس ـ تىركەس جارىققا شىقتى: ىشكى ارتقان قۇن سالىعى 45 ميلليارد 630 ميلليون يۋان بولىپ، سايكەس مەزگىلدەگىدەن %3 ارتىپ، ارتقان قۇن سالىعىنىڭ ”ورنىقتىرعىشتىق“ رولى كورنەكتى بولىپ، ەكونوميكانىڭ نەگىزگى جاعدايىنىڭ توزىمدىلىگىن بەينەلەدى؛ كاسىپورىنداردىڭ تابىس سالىعى 20 ميلليارد 190 ميلليون يۋان بولىپ، سايكەس مەزگىلدەگىدەن %8.1 ارتتى، شينجياڭنىڭ ٴوندىرىس، تيجارات قيمىلى جالىندى كۇيىن ساقتاپ، كاسىپورىننىڭ پايدا تابۋ قۋاتى ورنىقتى قالپىنا كەلدى؛ بايلىق سالىعى 16 ميلليارد 400 ميلليون يۋان بولىپ، سايكەس مەزگىلدەگىدەن %15.8 ارتىپ، سۋ بايلىعى اقىسىن سالىققا وزگەرتۋ ساياساتىنىڭ كورنەكتى ونىمدىلىككە قول جەتكىزگەندىگىن تىكە بەينەلەدى.
سالىققا جاتپايتىن كىرىس جاعىندا اۆتونوميالى رايونداعى ٴار دارەجەلى قازىنا تاراۋلارى مەملەكەت مەنشىگىندەگى بايلىقتى، مال ـ مۇلىكتى جانداندىرۋ تەبىنىن ارتتىرىپ، كەن شارۋاشىلىعى ۇقىعىن وتكەرمەلەۋ تەبىنىن ۇزدىكسىز ارتتىرىپ، كىرىستى ارتتىرۋدىڭ كومەسكى كۇشىن بەلسەنە اشتى.
الدىڭعى 10 ايدا مەملەكەت مەنشىگىندەگى بايلىقتى (مال ـ مۇلىكتى) اقىلى پايدالانۋ كىرىسى 48 ميلليارد 240 ميلليون يۋان بولىپ، سايكەس مەزگىلدەگىدەن %20.4 ارتتى؛ تۇتاس شينجياڭداعى كەن شارۋاشىلىعى ۇقىعىن وتكەرمەلەۋ كىرىسى 18 ميلليارد 160 ميلليون يۋان بولىپ، سايكەس مەزگىلدەگىدەن %35.8 ارتتى؛ مەملەكەت مەنشىگىندەگى كاپيتال تيجارات كىرىسى جيىنى 4 ميلليارد 960 ميلليون يۋان بولىپ، سايكەس مەزگىلدەگىدەن %122 ارتتى، شينجياڭنىڭ ادەتتەگى الەۋمەتتىك مەجە ەسەپ كىرىسىنىڭ ساپاسى اناعۇرلىم جاقساردى.
شىعىس حالىق تۇرمىسىن كۇش سالا قامتاماسىز ەتتى
الدىڭعى 10 ايدا شينجياڭنىڭ ادەتتەگى الەۋمەتتىك مەجە ەسەپ شىعىسى جيىنى 552 ميلليارد 570 ميلليون يۋان بولىپ، سايكەس مەزگىلدەگىدەن %7.7 ارتتى، قازىنالىق شىعىس قاجەتتى كۇشەمەلىلىكتى ساقتاپ، شىعىس قۇرىلىمى ۇزدىكسىز ساپالىلانىپ، ٴتۇيىندى سالالارداعى شىعىس قامتاماسىزدىعى پارمەندى بولدى.
”بيىل جىل باسىنان بەرى، بۇكىل شينجياڭنىڭ قازىنا تاراۋلارى قازىنالىق قارجىنى ٴبىر تۇتاس جوسپارلاۋدى كۇشەيتىپ، كەلەلى نىسانداردى قارجىمەن قامتاماسىز ەتۋدى كۇشەيتىپ، ’ٴۇشتى قامتاماسىز ەتۋدىڭ‘ (نەگىزگى حالىق تۇرمىسىن قامتاماسىز ەتۋ، ەڭبەكاقىنى قامتاماسىز ەتۋ، اينالىمدى قامتاماسىز ەتۋ) تومەنگى شەگىن شىنايى بەرىك ساقتاپ، جۇمىستاندىرۋ، وقۋ ـ اعارتۋ سياقتى حالىق تۇرمىسى ۇسىنىلىمىن بار كۇشپەن قامتاماسىز ەتىپ، بۇقارانىڭ ’شۇعىل، قيىن، ۋايىمداعان، ٴزارۋ‘ ماسەلەلەرىن شەشۋدى ماڭداي الدى ورىنعا قويىپ، دامۋ جەتىستىكتەرىنەن ٴار ۇلت بۇقاراسىنىڭ اناعۇرلىم كوپ، اناعۇرلىم ٴادىل يگىلىكتەنۋىنە مۇمكىندىك جاسادى“، ـ دەدى اۆتونوميالى رايوندىق قازىنا مەڭگەرمەسىنىڭ قاتىستى جاۋاپتىسى.
الدىڭعى 10 ايدا شينجياڭنىڭ حالىق تۇرمىسى شىعىسى 420 ميلليارد 30 ميلليون يۋانعا جەتىپ، سايكەس مەزگىلدەگىدەن %4.9 ارتىپ، ادەتتەگى الەۋمەتتىك مەجە ەسەپ شىعىسىنىڭ %76ىن يەلەدى، نەگىزگى حالىق تۇرمىسىن قامتاماسىز ەتۋ پارمەندى بولدى. مۇنىڭ ىشىندە قوعامدىق قامتاماسىزداندىرۋ جانە جۇمىستاندىرۋ شىعىسى 74 ميلليارد 710 ميلليون يۋان بولىپ، سايكەس مەزگىلدەگىدەن %8.2 ارتتى؛ دەنساۋلىق ساقتاۋ، سالاماتتىق شىعىسى 41 ميلليارد 140 ميلليون يۋان بولىپ، سايكەس مەزگىلدەگىدەن %4.5 ارتتى؛ قالا، اۋىلدىڭ الەۋمەتتىك اۋماق شىعىسى 41 ميلليارد 780 ميلليون يۋان بولىپ، سايكەس مەزگىلدەگىدەن %20.3 ارتتى. شينجياڭ حالىق تۇرمىسى ۇسىنىلىمىن ۇزدىكسىز ارتتىرىپ، جۇمىستاندىرۋدى ورنىقتىرۋعا، حالىق تۇرمىسىن قامتاماسىز ەتۋگە كۇش سالىپ، قوعامدىق قىسىمدى جەڭىلدەتىپ، قوعامنىڭ جاراسىمدىلىعىن جەبەدى.
بايلىق بارلاۋ ينفورماتسياسى شىعىسى سايكەس مەزگىلدەگىدەن %115.2 ارتتى، عىلىم ـ تەحنولوگيا شىعىسى سايكەس مەزگىلدەگىدەن %34.3 ارتتى، ەنەرگيا ۇنەمدەۋ، قورشاعان ورتانى قورعاۋ شىعىسى سايكەس مەزگىلدەگىدەن %15.5 ارتتى، وقۋ ـ اعارتۋ شىعىسى سايكەس مەزگىلدەگىدەن %7.9 ارتتى؛ شىعىستىڭ ارتۋ قارقىنى ادەتتەگى الەۋمەتتىك مەجە ەسەپ شىعىسىنىڭ ورتاشا ارتۋ قارقىنىنان جوعارى بولىپ، شينجياڭنىڭ بۇلجىماي ادام كۇشى، كاپيتال ۇسىنىلىمىن ارتتىرۋ، عىلىم ـ تەحنولوگيا ارقىلى جاڭالىق اشۋعا دەم بەرۋ، جاسىل دامۋدى ىلگەرىلەتۋ، كەن بايلىعىن جوعارى ونىمدىلىكپەن كادەگە جاراتۋدى جۇزەگە اسىرۋ سىندى بەلسەندى سيگنالىن جەتكىزدى.
ۇكىمەتتىك قور كىرىس ـ شىعىسى ورنىقتى ارتتى
الدىڭعى 10 ايدا شينجياڭنىڭ ۇكىمەتتىك قور مەجە ەسەپ كىرىسى جيىنى 43 ميلليارد 460 ميلليون يۋان بولىپ، سايكەس مەزگىلدەگىدەن %14.2 ارتتى؛ ۇكىمەتتىك قور مەجە ەسەپ شىعىسى جيىنى 141 ميلليارد 940 ميلليون يۋان بولىپ، سايكەس مەزگىلدەگىدەن %5.3 ارتتى.
”بيىل بۇكىل شينجياڭداعى ايماق، وبلىس، قالالار ساقتالعان جەر بايلىعىن بەلسەنە جانداندىرىپ، فوتوۆولت، جەل ەلەكتر نىساندارى بويىنشا جەر كىرىسىن ارتتىرۋدىڭ كومەسكى كۇشىن قۇلشىنا اشىپ، جەر بايلىعى بويىنشا ’ساۋداگەر شاقىرۋ، باسەكەلەستىرىپ ساتۋ، ماڭدايشالىق اسۋ‘ تەبىنىن ۇزدىكسىز ارتتىرىپ، جەر وتكەرمەلەۋ كىرىسىن زور مولشەردە ارتتىردى“، ـ دەپ ٴتۇسىندىردى اۆتونوميالى رايوندىق قازىنا مەڭگەرمەسىنىڭ قاتىستى جاۋاپتىسى.
ۇكىمەتتىك قور مەجە ەسەپ كىرىسىندە شينجياڭنىڭ مەملەكەت مەنشىگىندەگى جەردەن پايدالانۋ ۇقىعىن وتكەرمەلەۋ كىرىسى 32 ميلليارد 830 ميلليون يۋان بولىپ، سايكەس مەزگىلدەگىدەن %11.9 ارتتى. قورا ـ جاي سالىعى مەن قالا ـ قالاشىقتارداعى جەردەن پايدالانۋ سالىعىنىڭ جەكە ـ جەكە سايكەس مەزگىلدەگىدەن %10.5، %5.3 ارتۋىمەن ۇشتاستىرىپ قاراعاندا، بۇكىل شينجياڭنىڭ جەر بازارىنداعى قامداۋ مەن قاجەت بىرتىندەپ ۇيلەسىمدى كولەم دەڭگەيىنە بەت الىپ، جەر ساۋداسى ۇزدىكسىز جاقسارىپ، ۇكىمەتتىك قور مەجە ەسەپ كىرىسىنىڭ ارتۋىن جەبەگەن.
ۇكىمەتتىك قور مەجە ەسەپ شىعىسىنىڭ ارتۋى، باستىسى، ورتالىقتىڭ شينجياڭعا تۇسىرگەن اسا ۇزاق مەرزىمدى ەرەكشە زايوم قارجىسىنىڭ ارتۋىنىڭ، سايكەستى ورنالاستىرىلعان نىسان شىعىسى ارتۋىنىڭ ارقاسى.
مەملەكەتتىڭ ”ەكى ماڭىزدى“، ”ەكى جاڭا“ ساياساتىن تياناقتاندىرۋ ٴۇشىن، 10 ـ ايدىڭ سوڭىنا دەيىن ورتالىق قازىنا بيىل شينجياڭعا 43 ميلليارد 930 ميلليون يۋان اسا ۇزاق مەرزىمدى ەرەكشە زايوم قارجىسىن ٴبولىپ، كەلەلى ستراتەگيالارعا جانە ٴتۇيىندى سالالار قۇرىلىسىنا قولداۋ كورسەتىپ، كەڭ كولەمدە جابدىقتاردى جاڭالاۋدى جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋدى ىلگەرىلەتىپ، ٴونىمدى سۇرانىستى كەڭەيتۋدى جەبەپ، شينجياڭنىڭ جەرگىلىكتى ەكونوميكاسىنىڭ، قوعامىنىڭ ورنىقتى دامۋىن ىلگەرىلەتتى.
