انار بۇلت \ شينجياڭ گازەتىنىڭ ٴتىلشىسى ما ينيڭ 12 ـ ايدىڭ 6 ـ كۇنى ۇرىمجىدەن حابارلايدى. 12 ـ ايدىڭ 5 ـ كۇنى جۇڭگو وڭتۇستىك اۆياتسيا توبى شەكتى سەرىكتەستىگى شينجياڭ اۋەجايى (توبى) شەكتى جاۋاپكەرشىلىك سەرىكتەستىگىمەن بىرگە ۇرىمجىدەن بەيجيڭ داشيڭ اۋەجايىنا بارىپ ـ قايتاتىن اۋە جەلىسىندە ”15 مينۋتتا ۇشاققا شىعۋ“ قىزمەت وتەۋىن اتقاردى، ٴۇرىمجى تيانشان حالىقارالىق اۋەجايى باتىس سولتۇستىك وڭىردەگى ”15 مينۋتتا ۇشاققا شىعۋدى“ تۇڭعىش جۇزەگە اسىرعان اۋەجايعا اينالدى.
”15مينۋتتا ۇشاققا شىعۋ“ قىزمەت وتەۋى زەردەلىلەندىرۋ تەحنولوگياسىنىڭ دارەجەسىن جوعارىلاتۋ جانە جۇمىس تارتىبىنە وزگەرىس ەنگىزۋ ارقىلى ەل ىشىندەگى حالىقتىق اۆياتسيالارداعى جالپى بەتتىك 40 - 30 مينۋت بۇرىن ۇشاققا شىعۋ راسمياتىن ٴبىتىرۋدى توقتاتۋ سىندى ٴداستۇرلى ۇلگىنى بۇزدى، جولاۋشىلار ۇشاققا شىعۋ ەسىگى جابىلاردان بۇرىن (ياعني كەزەكشى ۇشاقتىڭ ۇشۋ ۋاقىتىنان 15 مينۋت بۇرىن) حاۋىپسىزدىك تەكسەرۋىنەن ٴوتىپ ۇشاققا شىعىپ ۇلگىرسە بولعانى.
سول كۇنى تاڭەرتەڭ CZ6901 كەزەكشى ۇشاعى ۇشاردان 20 مينۋت بۇرىن جولاۋشى دۋ جۋان ٴۇرىمجى تيانشان حالىقارالىق اۋەجايىندا بەيجيڭگە باراتىن ۇشاققا شىعۋعا دايىندالدى. ول بىزگە الگىندە عانا ساتىپ العان شينجياڭ ەرەكشە ونىمدەرىن كورسەتتى: ”بۇرىن ۇشۋدان جارىم ساعاتتان استام بۇرىن ۇشاققا شىعۋعا دايىندالاتىنبىز، قازىر ۇشۋعا 15 مينۋت قالعاندا بارىپ ۇشاققا شىعۋدى توقتاتادى، دوستارىمىزعا تارتۋ تاڭدايتىن ۋاقىتىمىز كوبەيدى، ساپارىمىز ٴتىپتى دە ەمىن ـ ەركىن، جوعارى ٴونىمدى بولدى“.
قازىر وڭتۇستىك اۆياتسيا سەرىكتەستىگىنىڭ ٴۇرىمجى - بەيجيڭ داشيڭ اۋە جەلىسىندە كۇنىنە قاتىنايتىن ۇشاق 7 كەزەككە جەتتى. وسى رەت ٴۇرىمجى - بەيجيڭ داشيڭ ”15 مينۋتتا ۇشاققا شىعۋ“ قىزمەت وتەۋىنىڭ شىعارىلۋى جوعارى جيىلىكتەگى ساۋدا ىستەرى ساپارى، ۋاقىتشا ۋاقىت وزگەرتۋ، توسىن ٴىسساپار جانە تاڭەرتەڭگى، كەشكى كەزەكشى ۇشاققا ۇلگىرۋ سياقتى جولاۋشىلاردىڭ وزەكتى قاجەتىنە دالمە ـ دال ۇيلەستى. ”جوعارى جيىلىكتەگى جەدەل جەلى + ۇشاققا توتەنشە تەز شىعۋ“ سىندى قوس ابزالدىلىق ەكى جەردىڭ ادامدارىنىڭ كەلىپ ـ كەتۋىنە اناعۇرلىم زور قولايلىلىق ازىرلەيدى.
