شينحۋا اگەنتتىگىنىڭ 12 ـ ايدىڭ 15 ـ كۇنى شىنجىننان بەرگەن حابارى. جۇڭحۋا حالىق رەسپۋبليكاسىنىڭ 12 ـ كەزەكتى مۇگەدەكتەر سپورت جارىسى جانە 9 ـ كەزەكتى ەرەكشە وليمپيادا سپورت جارىسى 12 ـ ايدىڭ 15 ـ كۇنى كەشتە شىنجىندا اياقتادى، بۇل گۋاڭدۇڭ، شياڭگاڭ، اۋمىن سىندى 3 جەردىڭ مەملەكەتتىك مۇگەدەكتەر سپورت جارىسىن جانە ەرەكشە وليمپيادا سپورت جارىسىن تۇڭعىش رەت بىرلەسىپ وتكىزۋى بولىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ مۇگەدەكتەر ىسىنە ايرىقشا ٴمان بەرگەندىگىن، مۇگەدەكتەرگە ەرەكشە كوڭىل بولگەندىگىن تولىق ايگىلەدى.
كەشكى ساعات 8دە سپورت جارىسىنىڭ اياقتاۋ قيمىلى شىنجىن دەنە تاربيە ورتالىعىنىڭ دەنە تاربيە سارايىندا وتكىزىلدى. مەملەكەتتىك كەڭەستىڭ مۇشەسى شىن يچين جۇڭحۋا حالىق رەسپۋبليكاسىنىڭ 12 ـ كەزەكتى مۇگەدەكتەر سپورت جارىسى جانە 9 ـ كەزەكتى ەرەكشە وليمپيادا سپورت جارىسى اياقتاعاندىعىن جاريالادى. حۋاڭ كۇنميڭ اياقتاۋ قيمىلىنا قاتىناستى.
اياقتاۋ قيمىلىندا گۋاڭدۇڭ ولكەسىنىڭ باستىعى مىڭ فانلي، شياڭگاڭ ەرەكشە اكىمشىلىك رايونى اكىمشىلىك ىستەر مەكەمەسىنىڭ باستىعى چىن گوجي، اۋمىن ەرەكشە اكىمشىلىك رايونى قوعامدىق مادەنيەت مەكەمەسىنىڭ باستىعى كى لان، جۇڭگو مۇگەدەكتەر بىرلەستىگىنىڭ ٴتوراعاسى چىڭ كاي ىلگەرىندى ـ كەيىندى ارناۋ ٴسوز سويلەدى. مەملەكەتتىك دەنە تاربيە باس مەكەمەسىنىڭ باستىعى گاۋ جىدان اياقتاۋ قيمىلىنا قاتىناستى.
وسى كەزەكتى مۇگەدەكتەر سپورت جارىسى مەن ەرەكشە وليمپيادا سپورت جارىسىندا جيىنى 46 ۇلكەن ٴتۇر ورنالاستىرىلدى، بۇكىل ەلدەگى 34 ۋاكىلدەر ۇيىرمەسىندەگى 7824 سپورتشى جارىسقا قاتىناسۋعا تىزىمدەلدى، ۋاكىلدەر ۇيىرمەسىنىڭ كولەمى مەن بۇقارالىق تۇرلەر بويىنشا جارىسقا قاتىناسۋعا تىزىمدەلگەن سپورتشىلار سانى تۇگەلدەي تىڭ دەڭگەيگە كوتەرىلدى. جارىس ”14 ـ بەسجىلدىق“ مەزگىلىندەگى ەلىمىزدىڭ مۇگەدەكتەر دەنە تاربيە ىستەرى دامۋىنداعى جاڭا تابىستاردىڭ ٴبىر رەتكى شوعىرلى ايگىلەنۋى، جيىنى 15 تۇردە دۇنيە جۇزىلىك رەكوردتان اسىپ، 156 تۇردە مەملەكەتتىك رەكوردتى جاڭالادى، مۇگەدەك سپورتشىلاردىڭ وزىنەن وزىپ، ەرلىكپەن شىڭعا شىعاتىن باسەكەلىك بەينەسى جانە تالىقپاي تالپىناتىن، ۇمىتكەرلىكپەن العا ۇمتىلاتىن رۋحاني كەلبەتى ٴاربىر ادامدى شابىتتاندىردى ٴارى اسەرلەندىردى.
اياقتاۋ قيمىلىندا گۋاڭدۇڭ ولكەلىك پارتكومنىڭ تۇراقتى مۇشەسى ۋاڭ شي، چىن گوجي، كى لان مۇگەدەكتەر سپورت جارىسىنىڭ، ەرەكشە وليمپيادا سپورت جارىسىنىڭ جارىس تۋىن جۇڭگو مۇگەدەكتەر بىرلەستىگىنىڭ القا باستىعى جوۋ چاڭكۇيگە، مەملەكەتتىك دەنە تاربيە باس مەكەمەسىنىڭ ورىنباسار باستىعى تۇڭ ليشينگە قايتارىپ بەردى، جوۋ چاڭكۇي جارىس تۋىن كەلەسى كەزەكتى مۇگەدەكتەر سپورت جارىسىن، ەرەكشە وليمپيادا سپورت جارىسىن وتكىزەتىن جەردىڭ ۋاكىلى، حۋنان ولكەلىك پارتكومنىڭ تۇراقتى مۇشەسى ۋاڭ داۋشيعا تاپسىرىپ بەردى. كەلەسى كەزەكتى مۇگەدەكتەر سپورت جارىسى، ەرەكشە وليمپيادا سپورت جارىسى 2029 ـ جىلى حۋناندا وتكىزىلەدى.
