سپورت ەرەكشە كلاسى
بالالاردىڭ قار ـ مۇز ارمانىن جەبەدى
انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ
12 ـ ايدىڭ 24 ـ كۇنى تۇستە ٴۇرىمجى اۋدانى مياۋىرگوۋ ورتا مەكتەبى تەز سىرعاناۋ كومانداسىنداعى بالالار كونكيلەرىن ارقالاپ، شينجياڭ قىسقى سپورت جاتتىعۋ ورتالىعىنا كەلدى. كونكيلەر اپپاق مۇزدىڭ بەتىن سىزىپ وتكەندە سىرىلداعان ٴارى تەبىندى دىبىس شىعارادى.
”ٴبىز ’سۇتتەي اپپاق مۇزدا‘ سىرعانايمىز، ساپاسى توتەنشە جاقسى. قۇرىلعىلارى وسىنداي وزىق مۇز ايدىنىندا جاتتىعۋ جاساپ جۇرگەنىمە ٴوزىمدى وتە باقىتتى سەزىنەمىن“، ـ دەدى 16 جاستاعى ەرزادا.
شينجياڭ قىسقى سپورت جاتتىعۋ ورتالىعىنىڭ مۇز ساپاسى تاماشا، قۇرىلعىلارى جاقسى، 13 ـ كەزەكتى مەملەكەتتىك قىسقى سپورت جينالىسى وسى ارادا وتكىزىلگەن، قازىرگە دەيىن ەل ٴىشى ـ سىرتىنداعى كوپتەگەن قار ـ مۇز سپورتى كوماندالارىن وسىندا كەلىپ جاتتىعۋ جاساۋعا باۋراپ وتىر.
وسى مەكتەپتىڭ 1 ـ كەزەكتى ورتا مەكتەپ قار ـ مۇز سپورتى ەرەكشە كلاسىنىڭ وقۋشىسى رەتىندە، ەرزادا ٴار كۇنى تۇستەن بۇرىن مادەنيەت ساباقتارىن وقىسا، تۇستەن كەيىن مۇز ۇستىندە جاتتىعۋ جاسايدى، ٴار اپتادا 6 كۇن جاتتىعۋ جاسايدى، بۇل كەسىلمەيتىن شورە. ”مەن كىشكەنتايىمنان ٴۇرىمجى اۋدانىندا ەرجەتتىم، 2 ـ جىلدىقتا وقىپ جۇرگەن كەزىمنەن كونكي تەبەمىن“. قار ـ مۇز جايلى ٴسوز بولعاندا، ونىڭ كوزدەرى جايناپ كەتتى.
2024 ـ جىلى مياۋىرگوۋ ورتا مەكتەبى اۆتونوميالى رايوننىڭ ادەتتەگى ورتا مەكتەپتەردىڭ قار ـ مۇز سپورتى ەرەكشە كلاسىنا وقۋشى قابىلداۋ تولىمدىلىعىنا يە بولىپ، تۇتاس شينجياڭنان (وڭتۇستىك شينجياڭداعى 4 ايماق، وبلىستان سىرت) قار ـ مۇز سپورتىندا ەرەكشەلىگى بار وقۋشىلاردى قابىلدادى. ەرزادانىڭ شەشەسى مۇنى بىلگەننەن كەيىن، ٴارى ـ ٴسارى بولماستان ۇلىن تىزىمگە الدىردى. ”قار ـ مۇز سپورتى ەرەكشە كلاسىنا كىرىپ مۇزدا سىرعاناۋدى جالعاستىرا الدىم ٴارى بۇل ورتا مەكتەپتەگى وقۋىمدى اقساتقانى جوق. مەن قۇلشىنا جاتتىعۋ جاساپ، مەملەكەتتىك 1 ـ دارەجەلى سپورتشى دەڭگەيىنە جەتۋگە ۇمتىلامىن“، ـ دەدى ەرزادا.
مۇز الاڭنىڭ ٴبىر شەتىندە 15 جاستاعى بي شيحاۋ دەن قويا دەنە قىزدىرىپ جاتىر. قارامايلى قالاسىنان كەلگەن ول اۆتونوميالى رايوندىق دەنە تاربيە مەكەمەسىنىڭ ”جۇلدىز تاڭداۋ جوسپارى“ ارقىلى باپكەردىڭ نازارىنا ٴىلىنىپ، تەز سىرعاناۋ كاسىپتىك جاتتىعۋىنا اۋىستى. ”باستابىندا اكە ـ شەشەم مەنىڭ كاسىپتىك جولعا ٴتۇسۋىمدى تىم قولدامادى، ولار مەنىڭ بەرىلە وقىپ جوعارى مەكتەپكە ٴوتۋىمدى كوبىرەك ٴۇمىت ەتەدى، ٴبىراق مەن، شىنىمەن دە، مۇزدا سىرعاناۋدى توتەنشە جاقسى كورەمىن، كوپكە دەيىن كەلىسپەي جۇردىك“. بي شيحاۋ بۇكپەسىزدىكپەن: ”وسى ەرەكشە كلاستىڭ ارقاسىندا عانا مەن ارمانىما قۇلاش سەرمەدىم“، ـ دەدى.
كۇندەلىكتى جاتتىعۋدىڭ كۇشەمەلىلىگى توتەنشە زور، ارا ـ تۇرا قاتتى بولدىرعانداي سەزىنگەنىمەن، بي شيحاۋدىڭ جۇزىنەن ۇنەمى كۇلكى ەسىپ تۇرادى: ”ٴار كۇنىمدى وتە كوڭىلدى وتكىزەمىن، اسىرەسە، ناتيجەم جوعارىلاعان كەزدە“. نەبارى ٴبىر جىلدا ونىڭ 500 مەترگە تەز سىرعاناۋ ناتيجەسى 41 سەكۋندتان 37.8 سەكۋندقا تەزدەپ، مەملەكەتتىك 1 ـ دارەجەلى سپورتشىلار ولشەمىنە جەتتى.
الاڭنىڭ شەتىندە دەن قويا جەتەكشىلىك ەتىپ تۇرعان باپكەر ما تاۋ ٴۇرىمجى اۋدانىنىڭ تۋماسى. داشۋە بىتىرگەننەن كەيىن، ول اۋىلىنا قايتىپ وقىتۋشى بولۋدى تاڭدادى.
”سول جىلدارى ورتالاۋ مەكتەپتى بىتىرگەننەن كەيىن تەك دەنە تاربيە مەكتەبىنە عانا بارا الدىم، ادەتتەگى تولىق ورتا مەكتەپتى وقىماعاندىعىمنان داشۋەگە ەمتيحان تاپسىرۋ تاڭداۋىم شەكتەمەگە ۇشىرادى“. مۇز ۇستىندە زىمىراپ بارا جاتقانداردىڭ بارانىنا قاراپ تۇرعان ما تاۋ تەبىرەنە: ”قازىر بالالار ٴارى كادىمگىدەي ورتا مەكتەپتە وقي الادى، ٴارى كاسىپتىك جاتتىعۋدى قابىلداي الادى. وسى تۇعىر بولعاندىقتان، اتا ـ انالار دا بالالارىنىڭ قار ـ مۇز سپورتىمەن كوبىرەك اينالىسۋىن قولداۋعا پەيىل بولىپ وتىر“، ـ دەدى.
”وسى كلاس بولماسا، ولاردىڭ اراسىنداعى كوپ ادام ورتا تەحنيكۋم جانە تەحنيكالىق مەكتەپتەرگە كىرىپ وقۋىن جالعاستىرۋى مۇمكىن، بالا كەزىندەگى قار ـ مۇز سپورتى ارمانى وسىلايشا ورىندالماي قالۋى دا مۇمكىن ەدى“. مياۋىرگوۋ ورتا مەكتەبىنىڭ ورىنباسار مەكتەپ باستىعى گۋ شينشياڭ بىلاي دەدى: وسى ارنا ارقىلى وقۋشىلار بولاشاقتا داشۋەگە بارىپ ىشكەرىلەي ٴبىلىم تولىقتىرۋىنا بولادى، ونىڭ ۇستىنە قايتا اينالىپ نەگىزگى ساتىعا بارىپ قار ـ مۇز سپورتىن دامىتىپ، ٴتىپتى دە كوپ بالانى قار ـ مۇز سپورتىن سۇيۋگە، كاسىپتىك جاتتىعۋعا قاتىناسۋعا باستاي الۋى مۇمكىن.
قازىر وسى مەكتەپتىڭ تولىق ورتا 1 ـ جىلدىعىندا، تولىق ورتا 2 ـ جىلدىعىندا جەكە ـ جەكە قار ـ مۇز ەرەكشە كلاسى اشىلدى، جيىنى 80 وقۋشى بار، تەز سىرعاناۋ، مۇز دوپ، سىڭار تاقتايلى شاڭعى، قوس تاقتايلى تاۋ شاڭعى جانە دالالىق شاڭعى سياقتى تۇرلەردى قامتيدى. مەكتەپتەن 4 ادام مەملەكەتتىك 1 ـ دارەجەلى سپورتشى كۋالىگىن، 10 ادام مەملەكەتتىك 2 ـ دارەجەلى سپورتشى كۋالىگىن الدى ٴارى شينجياڭ قار ـ مۇز سپورتى كاسىپتىك كومانداسىنا 7 تاڭداۋلى سپورتشى جونەلتىلدى.
سوڭعى جىلدارى شينجياڭ وزگەشە قار ـ مۇز بايلىعى مەن كليمات باسىمدىعىنا سۇيەنىپ، ٴۇرىمجى قالاسى، التاي ايماعى، شينجياڭ ٴوندىرىس ـ قۇرىلىس بيڭتۋانىنىڭ 7 ـ شىسى سياقتى جەرلەردە بىرتىندەپ سىناق تۇيىندەرىن قۇردى ٴارى قار ـ مۇز سپورتى ەرەكشە كلاسىن اشىپ، قار ـ مۇز سپورتىن قىزۋ سۇيەتىن جاستار مەن ورەندەر ٴۇشىن ”دەنە تاربيە + وقۋ ـ اعارتۋ“ سىندى قوس جۇيەلى ەسەيۋ ارناسىن اشتى.
