شينحۋا اگەنتتىگىنىڭ 12 ـ ايدىڭ 26 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، پرولەتاريات توڭكەرىسشىسى، ەلىمىزدىڭ حالىق سانى جانە دەنساۋلىق ساقتاۋ قىزمەتىندەگى، ايەلدەر مەن بالالار قىزمەتىندەگى جانە سوتسياليستىك زاڭ ـ ٴتۇزىم قۇرىلىسىنداعى كورنەكتى باسشىسى، مەملەكەتتىك كەڭەستىڭ بۇرىنعى مۇشەسى، 9 ـ كەزەكتى مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى، جۇڭحۋا مەملەكەتتىك ايەلدەر بىرلەستىگىنىڭ بۇرىنعى ٴتوراعاسى، قۇرمەتتى ٴتوراعاسى پىڭ پەييۇن جولداستىڭ سۇيەگى 12 ـ ايدىڭ 26 ـ كۇنى بەيجيڭ باباۋشان توڭكەرىستىك قۇرباندار قابىرستاندىعىندا ورتەلدى.
پىڭ پەييۇن جولداس ناۋقاس سەبەبىنەن 2025 ـ جىلى 12 ـ ايدىڭ 21 ـ كۇنى ساعات 6دان 26 مينۋت وتكەندە بەيجيڭدە 96 جاسىندا قايتىس بولدى.
پىڭ پەييۇن جولداستىڭ ناۋقاسى اۋىرلاعان كەزدە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ٴتۇرلى فورمالارمەن پىڭ پەييۇن جولداستىڭ قايتىس بولعانىنا قايعىلى ازا ٴبىلدىردى ٴارى ونىڭ تۋىس ـ تۋعاندارىنان شىنايى حال سۇرادى.
جۇڭگو كوممۋنيستىك پارتياسى ورتالىق كوميتەتىنىڭ تاپسىرۋىمەن جاۋ لىجي، ساي چي، ديڭ شۋەشياڭ، حان جىڭ قاتارلىلار 12 ـ ايدىڭ 26 ـ كۇنى باباۋشان توڭكەرىستىك قۇرباندار قابىرستاندىعىنا بارىپ پىڭ پەييۇن جولداستىڭ سۇيەگىمەن قوشتاستى ٴارى ونىڭ تۋىس ـ تۋعاندارىنان شىنايى حال سۇرادى.
12 ـ ايدىڭ 26 ـ كۇنى تۇستەن بۇرىن باباۋشان توڭكەرىستىك قۇرباندار قابىرستاندىعىنىڭ زالى ايبىندى جىم ـ جىرت كۇيگە شومىپ، قايعىلى مۋزيكا باياۋ ەستىلىپ تۇردى. نەگىزگى زالدىڭ تورىنە ”پىڭ پەييۇن جولداسقا قايعىلى ازا بىلدىرەمىز“ دەگەن اق ٴتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا پىڭ پەييۇن جولداستىڭ سۋرەتى قويىلعان. پىڭ پەييۇن جولداستىڭ سۇيەگى گۇل شوقتارىمەن جانە ارشالارمەن قورشالىپ، ۇستىنە جۇڭگو كوممۋنيستىك پارتياسىنىڭ نارت قىزىل پارتيا تۋى جابىلعان.
تۇستەن بۇرىن ساعات 9 مولشەرىندە جاۋ لىجي، ساي چي، ديڭ شۋەشياڭ، حان جىڭ قاتارلىلار قايعىلى مۋزيكا ٴۇنى ىشىندە پىڭ پەييۇن جولداستىڭ سۇيەگىنىڭ الدىنا باياۋ كەلىپ ٴۇنسىز ازا ٴبىلدىرىپ، پىڭ پەييۇن جولداستىڭ سۇيەگىنە 3 رەت تاعزىم ەتتى ٴارى پىڭ پەييۇن جولداستىڭ تۋىس ـ تۋعاندارىمەن ٴبىر ـ بىردەن قول الىسىپ، باس شۋجي شي جينپيڭ قاتارلى ورتالىقتاعى باسشى جولداستاردىڭ شىنايى حال سۇراۋىن جەتكىزدى.
پارتيا مەن مەملەكەتتىڭ قاتىستى باسشى جولداستارى سۇيەكپەن قوشتاسۋعا باردى نەمەسە ٴتۇرلى تاسىلدەرمەن ازا ٴبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، پىڭ پەييۇن جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى دە سۇيەكپەن قوشتاستى.
