انار بۇلت \ شينجياڭ گازەتىنىڭ تىلشىلەرى
جاڭا جىل باستالىپ، بار الاپ شىت جاڭا تۇسكە ەندى. وڭتۇستىك شينجياڭداعى كۇننىڭ شۇلەن شۋاعىنا شومعان اۋىل ـ قىستاق بازارلارىنان سولتۇستىك شينجياڭنىڭ قار ـ مۇز الەمىندەگى الەۋمەتتىك اۋماقتىڭ شاعىن كوشەلەرىنە دەيىن رايونىمىزداعى ٴار دارەجەلى قىستاقتا تۇراتىن، الەۋمەتتىك اۋماقتا تۇراتىن قىزمەت اترەتتەرى قىستاق تۇرعىندارىمەن، جۇپ قۇراعان تۋىستارىمەن، ٴار ۇلت كورشى ـ قولاڭدارىمەن بىرگە كوپ ٴتۇرلى فورمامەن جاڭا جىلدى قارسى الىپ، دوستىق سۇيىسپەنشىلىكتى اڭگىمەلەپ، بولاشاقتى تىلگە تيەك ەتىپ، شات ـ شادىمان كۇلكى ىشىندە ”ۇلتتار ىنتىماعى بەرەكەلى شاڭىراعىنىڭ“ مەرەيلى ٴساتىن ەستەلىككە الدى، تيانشان الابىنىڭ بارلىق جەرى جاڭا جىل شاتتىعى مەن مەيىرىنە شومدى.
1 ـ ايدىڭ 2 ـ كۇنى حوتان قالاسى يلچى اۋىلى شولاق قىستاعىندا شاتتىق كۇلكىسى ەستى، اۆتونوميالى رايوندىق شۇعىل جاعدايعا توتەپ بەرۋدى باسقارۋ مەڭگەرمەسىنىڭ وسى قىستاقتا تۇراتىن قىزمەت اترەتى جاڭا جىلدى بىرگە قارسى الۋ قيمىلىن وتكىزىپ، قىستاق تۇرعىندارىمەن اڭگىمەلەسىپ، كىرىستى ارتتىرۋدى تىلگە تيەك ەتتى. قيمىل الاڭىندا قىستاق تۇرعىندارى جابال ونەر كورسەتىپ، اسەم ٴان مەن ويناقى بيگە جۇرتشىلىق دۇركىن ـ دۇركىن شاپالاق سوقتى. قىستاق تۇرعىنى يارمامەت انايات بىلاي دەدى: ”جاڭا جىلدى كوپشىلىكپەن بىرگە وتكىزگەنىمە وتە قۋانىشتىمىن، قىزمەت اترەتى بىزگە سۋىقتان قورعانۋ ماقتالى كيىمىن جانە وتباسىندا قولدانىلاتىن شۇعىل جاعدايدا ٴورت ٴسوندىرۋ جابدىعىن ۇسىندى، ەرەكشە تەبىرەندىم“. قىستاقتا تۇراتىن قىزمەت اترەتىنىڭ مۇشەسى چىن چۇنلي: ”جاڭا جىلدا ٴبىز اناعۇرلىم قۇلشىنىپ، اۋىلداستاردىڭ تۇرمىسىن جاقسارتا تۇسەمىز“، ـ دەدى.
تۋىستار باس قوسىپ، دوستىق سۇيىسپەنشىلىك قويۋلادى. تيانشان الابىندا جۇپ قۇراعان تۋىستار جاڭا جىل دەمالىسىنان پايدالانىپ ٴبىر ـ بىرىنە امانداسا بارىپ، ارالاسۋ، ىشتەسۋ بارىسىندا سۇيىسپەنشىلىكتى ونان ارى كۇشەيتتى.
1 ـ ايدىڭ 1 ـ كۇنى جەمسارى اۋدانىنىڭ 8 ـ كەزەكتى بەيتيڭ مەرەكەلىك بۇيىمدار جارمەڭكەسى ەرەكشە دۋماندى ٴوتتى. شيندي اۋىلىنىڭ كادرى ۋاڭ يۇييان جۇپ قۇراعان تۋىسى كاسيرا زۇلكاپىلمەن بىرگە كوزدىڭ جاۋىن الاتىن جايما ورنىن ارالاپ، كونسەرت تاماشالاپ، ٴدامدى تاعامداردان اۋىز ٴتيىپ، مەرەكەلىك بۇيىمداردى تاڭدادى. ”تۋىسىممەن بىرگە مەرەكەلىك بۇيىمدار جارمەڭكەسىن ارالاعانىما ەرەكشە قۋانىشتامىن، جاڭا جىلدا بىرگە قۇلشىنىپ، تۇرمىسىمىزدى شالقىتا تۇسەمىز“، ـ دەدى كاسيرا كۇلىپ.
مەيىرلى سەزىمدەر جۇپ قۇراعان تۋىستار اراسىندا عانا ەمەس، دۋماندى توپتىق قيمىل الاڭىندا دا ايگىلەندى. جاڭا جىل قارساڭىندا اقسۋ قالاسى ىگەرشى قالاشىعى جوعارعى بالدان قىستاعى ”شينجياڭعا كومەكتەسۋ سۇيىسپەنشىلىگىنە العىس ايتۋ · ٴبىر نيەتپەن بىرگە دامۋ“ جانە ”جاڭا جىلدى قۇتتىقتاۋ، كوكتەم مەرەكەسىن قارسى الۋ“ ۇلتتار ىنتىماعى بىرلەسكەن دوستىق قيمىلىن وتكىزدى، قىستاق تۇرعىندارى شينجياڭعا كومەككە كەلگەن كادرلارمەن، قىستاقتا تۇراتىن كادرلارمەن ٴبىر ارادا شاتتانا باس قوسىپ، كونسەرت نومىرلەرىن كورىپ، ويىن ويناپ، كىرىستى ارتتىرۋدى تىلگە تيەك ەتتى. قىستاق تۇرعىنى ميھىرگۇل موللاتۇردى «العىسقا تولى جۇرەك» اتتى بيگە قاتىناستى، ول تەبىرەنە بىلاي دەدى: ”قىستاقتا تۇراتىن كادرلار مادەنيەت زالىمىزدى وزگەرتۋىمىزگە، سۋ سىڭبەيتىن توعان سالۋىمىزعا كومەكتەسىپ، قىستاق تۇرمىسىن شىت جاڭا بەينەگە ەنگىزدى، ولارعا شىن جۇرەكتەن العىس ايتامىن“.
”باس شۋجيدىڭ جاڭا جىلدى قۇتتىقتاۋ سوزىندە ’كوپشىلىك ەرلىكپەن العا باسىپ، ەڭبەك ەتىپ ۇلەس قوسىپ، كۇن سايىن گۇلدەنىپ ـ كوركەيگەن جۇڭگونى سومدادى. مەن قاجىرلىلىقپەن ۇلەس قوسقان ٴاربىر كۇرەسكەرگە قۇرمەت بىلدىرەمىن‘! دەگەنى جۇرەگىمدى جىلى مەيىرگە بولەدى.“ 1 ـ ايدىڭ 1 ـ كۇنى كۇشار قالاسى رەستە ٴمالىسى رەستە الەۋمەتتىك اۋماعىنىڭ قيمىل ۇيىنەن جىلى لەپ ەستى، ٴار ۇلت تۇرعىندارى قورالانا وتىرىپ، جاڭا جىلدى قۇتتىقتاۋ ٴسوزىن بىرگە اڭگىمەلەپ، دۋماندى شاقتى بىرگە وتكىزدى. وتكەن ٴبىر جىلدا وسى الەۋمەتتىك اۋماقتان باۋىرمال تۇرعىندار كوپتەپ شىقتى، ولار الەۋمەتتىك اۋماق قيمىلدارىنا بەلسەنە قاتىناسىپ، ەرىكتى قىزمەت وتەۋشى قولعانات، حالىق جاعدايىن جيناۋشى، قايشىلىقتاردى جاراستىرۋشى، وركەنيەت ۇگىتشىسى مىندەتتەرىن ىرىقتىلىقپەن ارقالادى. ”وسى تۇرعىندار الەۋمەتتىك اۋماقتى باسقارۋدى سىرتتاي كورۋشىدەن قاتىناسۋشىعا اينالىپ، الەۋمەتتىك اۋماقتى باسقارۋدىڭ اناعۇرلىم ٴونىمدى، حالىق تۇرمىسىنا قىزمەت وتەۋدىڭ اناعۇرلىم مەيىرلى بولۋىنا مۇمكىندىك جاسادى“، ـ دەدى رەستە الەۋمەتتىك اۋماعى پارتيا ياچەيكاسىنىڭ شۋجيى ۋاڭ گوچياڭ.
2025 ـ جىلى 12 ـ ايدىڭ 31 ـ كۇنى ٴۇرىمجى قالاسى حيجياشان ٴمالىسى يۋەجين كوشەسى وڭتۇستىك الەۋمەتتىك اۋماعى ٴۇرىمجى قالالىق پارتكوم كەڭسەسىمەن بىرلەسىپ ادەبيەت ـ كوركەمونەر ويىن ـ ساۋىق قيمىلىن وتكىزدى، حور ۇيىرمەسى ورىنداعان «شاتتانا بيلەيىك» اتتى ٴان ٴاپ ـ ساتتە سول جەردى دۋمانعا بولەدى. تارتىمدى نومىرلەر ىركەس ـ تىركەس قويىلىپ، الەۋمەتتىك اۋماق تۇرعىندارى ٴالسىن ـ ٴالى قول تەلەفوندارىمەن تاماشا ساتتەردى ەستەلىككە الدى. ٴجۇز وتباسى قوناعاسىندا ٴتىپتى مارە ـ سارە بولىستى، تورەتاباق تاۋىق ەتى، پالاۋ، سامسا سياقتى ەرەكشەلىككە يە ٴدامدى تاعامداردىڭ حوش ٴيىسى بۇرقىرادى، الەۋمەتتىك اۋماق كادرلارى مەن تۇرعىندار وزدەرىنىڭ ەڭ ٴدامدى تاعامدارىن الىپ ٴبىر ارادا باس قوسىپ، ٴدامدى تاعامداردان اۋىز ٴتيىپ، اڭگىمە دۇكەنىن قۇرىپ، قىزىقتى ىستەردى اڭگىمەلەپ، شاتتىق ٴۇنى تولاستامادى. ”ٴبىر ٴۇيلى جاندارداي دۋماندى بولدىق، وتە كوڭىلدىمىز“، ـ دەدى تۇرعىن رايحانگۇل ابلەز.
جاڭا جىلدا جاڭا جورىق باستالدى، تيانشان الابىندا ٴار ۇلت كادرلارى مەن بۇقاراسى ارمان ٴۇشىن بىرگە كۇرەس جۇرگىزىپ، باقىت ٴۇشىن بىرگە قۇلشىنىپ، ۇلى ارماندى تاماشا رەالدىققا اينالدىرۋ جولىندا كۇرەسەدى.
(ٴتىلشى ٴرايدا، قاتىناسقان تىلشىلەر گى يوۋجۇن، جاڭ جىلي، يۇي شي، جاڭ دۇڭمەي، ەرىكتى تىلشىلەر ۋ شۇيچيڭ، ياڭ تيانۋىن، جاڭ يۇڭ)
