1 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن كورەيا زۇڭتۇڭى لي زايميڭمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان لي زايميڭمەن جانە ونىڭ حانىمى جين حۇيجيڭمەن بىرگە سۋرەتكە ءتۇستى.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگىنىڭ 1 ـ ايدىڭ 5 ـ كۇنى بەيجيڭنەن بەرگەن حابارى. (تىلشىلەر فىڭ شينران، ساۋ جيايۋە). 1 ـ ايدىڭ 5 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن كورەيا زۇڭتۇڭى لي زايميڭمەن كەڭەس وتكىزدى.
شي جينپيڭ كورەيا حالقىنا ىقىلاستى جاڭا جىلدىق تىلەك ٴبىلدىردى. شي جينپيڭ بىلاي دەپ اتاپ كورسەتتى: لي زايميڭ زۇڭتۇڭ ەكەۋىمىز ەكى رەت كەزدەستىك ٴارى ٴوزارا ساپاردا بولدىق، بۇل ەكى جاقتىڭ جۇڭگو - كورەيا قارىم ـ قاتىناسىنا باسا ٴمان بەرەتىندىگىن ايگىلەيدى. دوس جانە كورشى رەتىندە، جۇڭگو مەن كورەيا كوبىرەك ارالاسۋى، ۇنەمى بارىس ـ كەلىس جاساۋى، ٴجيى بايلانىس جاساۋى كەرەك. جۇڭگو جاق جۇڭگو - كورەيا قارىم ـ قاتىناسىن باستان ـ اياق توڭىرەكتىك ديپلوماتيادا ماڭىزدى ورىنعا قويادى، كورەياعا قاراتىلعان ساياساتتىڭ ۇلاسپالىلىعىن، ورنىقتىلىعىن ساقتايدى. جۇڭگو جاق كورەيا جاقپەن بىرگە دوستىق، سەلبەستىك باعىتىن مىقتاپ يگەرىپ، ٴوزارا پايدا جەتكىزىپ تەڭ يگىلىككە كەنەلۋ باس ماقساتىنان جازباي، جۇڭگو - كورەيا ستراتەگيالىق سەلبەستىك سەرىكتەستىك قارىم ـ قاتىناسىنىڭ اقاۋسىز ارنامەن العا باسۋىن ىلگەرىلەتىپ، ەكى ەل حالقىنىڭ قۇت ـ ىرىسىن شىن مانىندە ارتتىرىپ، ٴوڭىردىڭ، اۋەلى، دۇنيە ٴجۇزىنىڭ بەيبىتشىلىگى مەن دامۋىنا وڭ باعىتتا قۋات ۇستەۋدى قالايدى.
شي جينپيڭ بىلاي دەپ باسا دارىپتەدى: جۇڭگو - كورەيا ەكى ەل ”تاتۋلىقتى بارىنەن باعالى ساناۋعا“، ”جاراسىمدى بولۋمەن بىرگە، ٴوز ەرەكشەلىگىن ساقتاۋعا“ ۇزاق ۋاقىت تاباندى بولدى، قوعامدىق ٴتۇزىم جانە يدەولوگيا جاعىنداعى ايىرماشىلىقتان اتتاپ ٴوتىپ، ٴبىر ـ ٴبىرىن تابىسقا جەتكىزىپ، بىرگە دامىدى. ەكى جاق وسى تاماشا ٴداستۇردى جالعاستىرىپ، ٴوزارا سەنىمدىلىكتى ۇزدىكسىز ارتتىرىپ، ٴبىرى ٴبىرىنىڭ تاڭداعان دامۋ جولىنا قۇرمەت ەتىپ، ٴبىرى ٴبىرىنىڭ وزەكتى مۇددەسىنە جانە ٴجىتى قاداعالاپ وتىرعان كەلەلى ىستەرىنە كوڭىل ٴبولىپ، الاۋىزدىقتى تىلدەسۋ، كەڭەسۋ ارقىلى ۇيلەسىمدى شەشۋگە تاباندى بولۋى كەرەك. جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴتورتىنشى جالپى ٴماجىلىسى ”15 ـ بەسجىلدىق“ جوبا ۇسىنىسىن قاراپ ماقۇلداپ، الداعى بەس جىلداعى جۇڭگونىڭ دامۋىنا جوبا جاسادى ٴارى دۇنيە جۇزىندەگى ەلدەرگە كەڭ وراي ازىرلەدى. جۇڭگو مەن كورەيا ەكونوميكاسىنىڭ بايلانىسى تىعىز، كاسىپ سالاسى تىزبەگى، قامداۋ تىزبەگى تەرەڭ كىرىككەن، سەلبەستىكتە ٴوزارا تيىمدىلىك جاساپ، ٴبىر ـ بىرىنە پايدا جەتكىزەدى. دامۋ ستراتەگيالارىن ٴتۇيىلىستىرۋدى جانە ساياساتتى سايكەستىرۋدى كۇشەيتىپ، ورتاق مۇددە بالكۇلشەسىن ۇلكەن جاساپ، جاساندى زەردە، جاسىل كاسىپ سالاسى، قارتتار ەكونوميكاسى سياقتى جاڭادان گۇلدەنگەن سالالاردا اناعۇرلىم كوپ سەلبەستىك جەتىستىگىن جاراتۋ كەرەك. ەكى جاق ادامداردىڭ بارىس ـ كەلىسىن كۇشەيتىپ، جاستار مەن ورەندەر، مەديا، دەنە تاربيە، اقىل ـ پاراسات قويماسى، جەرگىلىكتى ورىندار سياقتى جاقتاردا بارىس ـ كەلىس ورىستەتىپ، ۇنامدى جاقتان اڭگىمەلەۋدى حالىق رايىنىڭ نەگىزگى اعىمىنا اينالدىرۋ كەرەك.
شي جينپيڭ بىلاي دەپ اتاپ كورسەتتى: قازىر دۇنيە جۇزىندە 100 جىلدىق وزگەرىس جەدەل قۇبىلىپ، حالىقارالىق جاعدايدا وزگەرىس پەن بىلىقپالىق ٴتىپتى دە قاباتتاسۋدا. جۇڭگو - كورەيا ٴوڭىردىڭ بەيبىتشىلىگىن قورعاۋ، دۇنيە ٴجۇزىنىڭ دامۋىن جەبەۋ جاعىندا ماڭىزدى جاۋاپكەرشىلىك ارقالاپ وتىر، كەڭ كولەمدەگى مۇددە توعىسۋى بار، تاريحتىڭ دۇرىس جاعىندا بەرىك تۇرىپ، دۇرىس ستراتەگيالىق تالعام جاساۋى كەرەك. 80 نەشە جىلدىڭ الدىندا جۇڭگو - كورەيا ەكى ەل زور ۇلتتىق قۇرباندىق بەرىپ، جاپون ميليتاريزمىنە قارسى تۇرۋدىڭ جەڭىسىنە قول جەتكىزدى. بۇگىنگى تاڭدا دۇنيە جۇزىلىك 2 ـ سوعىس جەڭىسىنىڭ جەتىستىگىن ٴتىپتى دە قول ۇستاسا قورعاپ، شىعىس سولتۇستىك ازيانىڭ بەيبىتشىلىگىن، ورنىقتىلىعىن قورعاۋى كەرەك. ەكونوميكانىڭ جاھاندانۋىنىڭ پايداسىن كورۋشى رەتىندە، جۇڭگو مەن كورەيا قورعامپازدىققا بىرگە قارسى تۇرىپ، ناعىز كوپ جاقتىلىقتى امالياتتا ايگىلەپ، تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن ىلگەرىلەتۋگە ۇلەس قوسۋى كەرەك.
لي زايميڭ جۇڭگو حالقىنا جاڭا جىلدىق تاماشا تىلەك ٴبىلدىردى. لي زايميڭ مىنالاردى ٴبىلدىردى: كورەيا مەن جۇڭگو جاقىن كورشى، ەكى ەل قارىم ـ قاتىناسى ارىدان جالعاسىپ كەلەدى. كورەيا مەن جۇڭگو كەزىندە جاپون ميليتاريزمىنىڭ شاپقىنشىلىعىنا بىرگە قارسى تۇرعان، كورەيا جاق جۇڭگو جاقتىڭ كورەيانىڭ جۇڭگوداعى تاۋەلسىزدىك قوزعالىسى ەسكى جۇرتىن قورعاعاندىعىنا العىس ايتادى. ەكى ەل ديپلوماتيالىق قارىم ـ قاتىناس ورناتقاننان كەيىن، تىعىز سەلبەستىك قارىم ـ قاتىناسىن ورناتىپ، مول جەتىستىككە قول جەتكىزدى. كورەيا جاق جۇڭگومەن قارىم ـ قاتىناسىنا ايرىقشا ٴمان بەرەدى، جاڭا جىلداعى تۇڭعىش مەملەكەت باسشىسى ديپلوماتياسىن وراي ەتىپ، كورەيا - جۇڭگو قارىم ـ قاتىناسىنىڭ جاپپاي قالپىنا كەلۋ، دامۋ بەتالىسىن نىعايتىپ، پارىقتاردى ساقتاپ ورتاقتىققا ۇمتىلىپ، كورەيا - جۇڭگو ستراتەگيالىق سەلبەستىك سەرىكتەستىك قارىم ـ قاتىناسىن تەرەڭدەتىپ، ەكى ەل قارىم ـ قاتىناسى دامۋىنىڭ جاڭا جاعدايىن بىرگە اشۋدى قالايدى. كورەيا جاق جۇڭگونىڭ وزەكتى مۇددەسىنە جانە ٴجىتى قاداعالاپ وتىرعان كەلەلى ىستەرىنە قۇرمەت ەتەدى، ٴبىر جۇڭگو پرينسيبىنە تاباندى بولادى. كورەيا - جۇڭگو ەكونوميكا ـ ساۋدا سەلبەستىگى ٴوز ـ وزدەرىنىڭ ەكونوميكالىق، قوعامدىق دامۋىندا بەلسەندى رول اتقاردى، كورەيا جاق جۇڭگونىڭ ”15 ـ بەسجىلدىق“ جوباسى اكەلگەن ورايدى يگەرىپ، ەكى ەلدىڭ ناقتى ىستەر سەلبەستىگىنىڭ اناعۇرلىم كوپ جەتىستىككە قول جەتكىزۋىن ىلگەرىلەتۋدى ٴۇمىت ەتەدى. ەكى ەل حالىقتاردىڭ بارىس ـ كەلىسىن جەبەپ، تۇسىنىستىكتى، ٴوزارا سەنىمدىلىكتى ارتتىرۋى كەرەك. كورەيا جاق جۇڭگو جاقپەن كوپ جاقتى سايكەسۋدى كۇشەيتىپ، دۇنيە ٴجۇزىنىڭ گۇلدەنۋىنە، دامۋىنا ۇلەس قوسۋدى قالايدى. جۇڭگونىڭ بيىلعى ازيا ـ تىنىق مۇحيت ەكونوميكالىق سەلبەستىك ۇيىمى باسشىلار بەيرەسمي ٴماجىلىسىن وتكىزۋىنىڭ تولىق تابىستى بولۋىنا تىلەكتەستىك بىلدىرەدى.
كەڭەستەن كەيىن، ەكى ەل مەملەكەت باسشىلارى عىلىم ـ تەحنولوگيادا جاڭالىق اشۋ، ەكولوگيالىق ورتا، قاتىناس ـ تاسىمال، ەكونوميكا ـ ساۋدا سەلبەستىگى سياقتى سالالارداعى 15 سەلبەستىك حۇجاتىنا قول قويىلۋىنا بىرگە كۋا بولدى.
كەڭەستەن بۇرىن، شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا لي زايميڭ مەن حانىمى جين حۇيجيڭگە ارناپ قارسى الۋ سالتىن وتكىزدى.
لي زايميڭ جەتكەن كەزدە قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن كورەيا ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت قۇرمەت ساليۋتى اتىلدى. لي زايميڭ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى سالتانات قاتارىن كوردى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا لي زايميڭ مەن حانىمىنا ارناپ قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
