شينحۋا اگەنتتىگىنىڭ 1 ـ ايدىڭ 6 ـ كۇنى بەيجيڭنەن بەرگەن حابارى. 1 ـ ايدىڭ 6 ـ كۇنى جۇڭگو كوممۋنيستىك پارتياسى ورتالىق كوميتەتى تەلەگرامما جولداپ، لاوس حالىق توڭكەرىستىك پارتياسى مەملەكەتتىك 12 ـ قۇرىلتايىنىڭ اشىلعاندىعىن قۇتتىقتادى. قۇتتىقتاۋ تەلەگرامماسىندا بىلاي دەلىندى:
لاوس حالىق توڭكەرىستىك پارتياسى — لاوس حالقىنىڭ جانە لاوس سوتسياليزم ىستەرىنىڭ پارمەندى باسشىلىق ۇيتقىسى. لاوس حالىق توڭكەرىستىك پارتياسى 11 ـ قۇرىلتايىنان بەرى، باس شۋجي تۇڭلۇن باسشىلىعىنداعى لاوس حالىق توڭكەرىستىك پارتياسى ورتالىق كوميتەتى پارتيانىڭ وزىندىك قۇرىلىسىن كۇشەيتۋگە، پارتيانىڭ باسشىلىق ورنىن بەكەمدەۋگە كۇش سالىپ، لاوستاعى ٴار ۇلت حالقىن ىنتىماقتاستىرىپ جانە باستاپ، ٴوز ەلىنىڭ مەملەكەت جاعدايىنا ۇيلەسەتىن سوتسياليستىك دامۋ جولىن بەلسەنە قاراستىرىپ، پارتيا مەن مەملەكەتتىڭ ٴتۇرلى ىستەرىن ىلگەرىلەتۋدە ٴبىر قىدىرۋ ماڭىزدى دامۋ تابىستارىنا قول جەتكىزدى. ٴبىز بۇعان شىن جۇرەكتەن قۋانامىز ٴارى ونى بەلسەندى باعالايمىز.
لاوس پارتياسىنىڭ 12 ـ قۇرىلتايى — لاوستىڭ سوتسياليزم ىستەرىنىڭ دامۋ ۇردىسىندە بەلەستىك ٴمان الاتىن ماڭىزدى ٴماجىلىس. قۇرىلتاي پارتيانىڭ 3 ـ ساياسي تۇعىرناماسى سياقتى ماڭىزدى ساياسي حۇجاتتاردى قاراپ ماقۇلداپ، الداعى ٴبىر مەزگىلدەگى لاوس پارتياسىنىڭ جانە مەملەكەتتىڭ ٴتۇرلى ىستەرىنىڭ دامۋىنا ستراتەگيالىق جوبا جانە ناقتى ورنالاستىرۋ جاسايدى. لاوس حالقىنىڭ لاوس پارتياسىنىڭ پارمەندى باسشىلىعىندا، قۇرىلتاي تۇراقتاندىرعان ٴتۇرلى نىسانا ـ مىندەتتەردى جەڭىسپەن جۇزەگە اسىرىپ، لاوستىڭ سوتسياليزم ىستەرىن تىڭ دامۋ كەزەڭىنە كوتەرەتىندىگىنە سەنەمىز.
جۇڭگو مەن لاوس ەكى ەل — كوممۋنيستىك پارتيا باسشىلىق ەتكەن سوتسياليستىك مەملەكەت. جۇڭگو پارتياسى مەن ۇكىمەتى جۇڭگو - لاوس ەكى پارتيانىڭ، ەكى ەلدىڭ قارىم ـ قاتىناسىنا ستراتەگيالىق دەڭگەيدەن جانە ۇزاق بولاشاقتىق تۇرعىدان قاراۋعا جانە يگەرۋگە باستان ـ اياق تاباندى بولىپ كەلەدى. جاڭا جاعدايدا جۇڭگو جاق لاوس جاقپەن بىرگە ەكى پارتيانىڭ، ەكى ەلدىڭ ەڭ جوعارى باسشىلارىنىڭ ماڭىزدى ورتاق تانىمىن ٴتۇبىرلى بويسۇنۋ ولشەمى ەتىپ، ستراتەگيالىق تىلدەسۋدى كۇشەيتىپ، بارىس ـ كەلىستى، سەلبەستىكتى تەرەڭدەتىپ، جۇڭگو - لاوس تاعدىرلاس ورتاق تۇلعا قۇرىلىسىن تىڭعىلىقتى ىلگەرىلەتىپ، جۇڭگو - لاوس جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ ۇزدىكسىز، اقاۋسىز، ورنىقتى دامۋىن ىلگەرىلەتىپ، ەكى ەل مەن ەكى ەل حالقىن باقىتقا كەنەلتىپ، دۇنيە ٴجۇزىنىڭ بەيبىتشىلىگىن، دامۋىن جانە العا باسۋ ىستەرىن جەبەۋگە تىڭ دا بەلسەندى ۇلەس قوسۋدى قالايدى.
