2025 ـ جىلى شينجياڭنىڭ ماقتا جالپى ٴونىمى تۇڭعىش رەت 6 ميلليون توننالىق ٴىرى وتكەلدەن ٴوتتى
جالپى ٴونىمى، بىرلىك ٴونىمى ٴۇرتىس 32 جىل بۇكىل ەل بويىنشا 1 ـ ورىندا تۇردى
انار بۇلت \ شينجياڭ گازەتىنىڭ ٴتىلشىسى ليۋ ي 1 ـ ايدىڭ 7 ـ كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل ـ قىستاق مەڭگەرمەسىنەن ۇعىسۋىمىزشا، 2025 ـ جىلى شينجياڭنىڭ ماقتا جالپى ٴونىمى 6 ميلليون 165 مىڭ تونناعا جەتىپ، الدىڭعى جىلداعىدان 479 مىڭ توننا مولايىپ، تۇڭعىش رەت 6 ميلليون توننالىق ٴىرى وتكەلدەن ٴوتىپ، بۇكىل ەل ٴونىم مولشەرىنىڭ %92.8ىن يەلەپ، جالپى ٴونىمى، بىرلىك ٴونىمى ٴۇرتىس 32 جىل بۇكىل ەل بويىنشا 1 ـ ورىندا تۇرعان.
2025 ـ جىلى شينجياڭدا ماقتا ٴوندىرىسى مەزگىلىندە تەمپەراتۋرا جوعارىلاۋ، كۇن نۇرى، جىلۋ جەتكىلىكتى، كليمات شارت ـ جاعدايى جالپى جاقتان ٴتيىمدى بولدى، ماقتانىڭ باسىم كوبى مەرزىمنەن بۇرىن ٴوستى، اسىرەسە، شەشەك اتقان مەزگىلدە شينجياڭنىڭ اۋا رايى نەگىزىنەن اشىق بولىپ، ماقتانىڭ قاۋاشاق اشۋىنا، جيناۋعا ٴتيىمدى بولدى. مۇنان سىرت، سورتتى ساپالىلاندىرۋ، اتىزدى قۇنتتاپ باسقارۋ سياقتى شارالاردىڭ جاپپاي قولدانىلۋى شينجياڭنىڭ ماقتا بىرلىك ٴونىمى دەڭگەيىن ٴونىمدى جوعارىلاتتى. ساندى مالىمەتتەردە كورسەتىلۋىنشە، 2025 ـ جىلى شينجياڭدا ماقتانىڭ مۋ باسىندىق بىرلىك ٴونىمى 158.6 كيلوگرامعا جەتىپ، سايكەس مەزگىلدەگىدەن %2.4 ارتقان.
2025 ـ جىلدان بەرى شينجياڭ ”ساپالى ورنالاستىرۋ، بىرلىك ٴونىمدى جوعارىلاتۋ، ساپانى كۇشەيتۋ“ دامۋ وي جەلىسى بويىنشا، ماقتا ٴوندىرىسىنىڭ ماقتادا باسىمدىققا يە 34 نەگىزگى ٴوندىرىس اۋدانىنا (قالا، رايون) جانە شينجياڭ ٴوندىرىس ـ قۇرىلىس بيڭتۋانىنىڭ 73 تۋان الاڭىنا (ەگىس الاڭى) شوعىرلانۋىن ىلگەرىلەتتى. اۋىل شارۋاشىلىعى، اۋىل ـ قىستاق تاراۋلارى ماقتانى جوعارى ٴونىمدى، ساپالى ٴوسىرۋ تەحنولوگيا جوباسىن جاسادى، ماقتانى ماشينامەن جيناۋعا ۇيلەسەتىن ٴوندىرۋ، ٴوسىرۋ تەحنولوگيا جولىن بەلگىلەپ، شينجياڭدا ماقتانىڭ ماشينالاسقان، شوعىرلانعان، ولشەمدەنگەن وندىرىسكە ويىسۋىن ىلگەرىلەتتى.
سونىمەن بىرگە شينجياڭنىڭ اۋىل شارۋاشىلىعى عىلىم ـ تەحنولوگيا قىزمەتكەرلەرى ماقتا ٴوسىرۋ تەحنولوگياسىندا عىلىم ـ تەحنولوگيالىق جاڭالىق اشۋ تەبىنىن ۇزدىكسىز كۇشەيتىپ، ۇلكەن ساندى مالىمەت جانە جاساندى زەردە تەحنولوگياسىنا سۇيەنىپ تۇيىندەردە سىناق ەتىپ ”زەردەلى ماقتا اتىزىن“ تۇلعالاپ، ماقتانىڭ ٴوسۋ جاعدايىن باقىلاۋ ـ ولشەۋدى، سۋ مەن تىڭايتقىشقا تۇجىرىم جاساۋدى، دەرت ـ دەربەز جانە زياندى جاندىكتەردەن ساقتانۋ، تىزگىندەۋدى دالمە ـ ٴدال باسقارىپ، ماقتا ٴوندىرىسىنىڭ وزىندىك قۇندى ۇنەمدەپ ونىمدىلىكتى ارتتىرۋىن ىلگەرىلەتتى.
قازىر جول نۇسقاۋ جۇيەسىمەن دالمە ـ ٴدال تۇقىم ٴسىڭىرۋ، سۋ مەن تىڭايتقىش ٴبىر تۇلعالاندىرىلعان تامشىلاتىپ سۋارۋ، ۇشقىش اپپاراتپەن وسىمدىك باپتاۋ سياقتى اۆتوماتتانۋ دەڭگەيى جوعارى، دالمە ـ ٴدال جۇمىس جۇرگىزۋ قابىلەتى كۇشتى زەردەلىلەنگەن تەحنولوگيا جابدىعى شينجياڭنىڭ ماقتا وندىرىسىندە كەڭ كولەمدە قولدانىلىپ، ماقتا ٴوندىرىسىنىڭ جالپىلىق قۋاتى ونان ارى جوعارىلاتىلدى.
