انار بۇلت \ شينجياڭ گازەتىنىڭ ٴتىلشىسى چىن چياڭۋي 1 ـ ايدىڭ 7 ـ كۇنى ۇرىمجىدەن حابارلايدى. مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگىنەن ۇعىسۋىمىزشا، 2025 ـ جىلى 12 ـ ايدىڭ 31 ـ كۇنىنە دەيىن شينجياڭ ەلەكتر تورىنىڭ جاڭاشا ەنەرگيا ساقتاۋ گەنەراتورلار كولەمى 20 ميلليون 150 مىڭ 400 كيلوۆات \ 70 ميلليون 537 مىڭ 600 كيلوۆات ساعاتقا جەتىپ، 20 ميلليون كيلوۆاتتىق ٴىرى وتكەلدەن ٴوتىپ، گەنەراتورلار كولەمى بۇكىل ەل بويىنشا الدىڭعى قاتاردان ورىن العان.
مەملەكەتتىڭ ماڭىزدى ەنەرگيا بايلىعى ستراتەگيالىق قامتاماسىزدىق بازاسى رەتىندە، شينجياڭنىڭ تازا ەنەرگيانى اشۋ قادامى ۇزدىكسىز جەدەلدەدى. 2025 ـ جىلدىڭ سوڭىنا دەيىن شينجياڭ ەلەكتر تورىنىڭ جالپى گەنەراتورلار كولەمى 250 ميلليون كيلوۆاتتان استى، مۇنىڭ ىشىندە جاڭا ەنەرگيالى گەنەراتور كولەمى 161 ميلليون كيلوۆات بولىپ، 10 ميلليون كيلوۆات دارەجەلى 6 جاڭا ەنەرگيا بازاسى سالىنىپ، جاڭا ەنەرگيا گەنەراتورلار كولەمىنىڭ شينجياڭ ەلەكتر تورىنىڭ جالپى گەنەراتور كولەمىندە يەلەيتىن ارا سالماعى ۇزدىكسىز جوعارىلاپ، تازا ەنەرگيامەن قامداۋ قابىلەتى ورنىقتى كۇشەيتىلدى.
ەنەرگيا ساقتاۋ — جاڭاشا ەلەكتر قۋاتى جۇيەسىنىڭ شەشۋشى قۇرامداس بولىگى، جاڭا ەنەرگيا بويىنشا ەلەكتر تاراتۋداعى تولاستامالى، تولقىمالى قيىن ماسەلەنى شەشىپ، جاڭا ەنەرگيانى جوعارى ٴونىمدى قابىلداۋدى قامتاماسىز ەتۋدىڭ وزەكتى شاراسى. قازىر شينجياڭ ەلەكتر تورىنداعى جاڭاشا ەنەرگيا ساقتاۋ ورنالاسىمىندا جاڭا ەنەرگيا بويىنشا سايكەستى ەنەرگيا ساقتاۋ مەن دەربەس ەنەرگيا ساقتاۋعا بىردەي ٴمان بەرىلىپ، كوپ نەگىزدى، ٴوزارا تولىقتايتىن ەنەرگيا ساقتاۋدى دامىتۋ جۇيەسى قالىپتاستى.
2025 ـ جىلى شينجياڭ ەلەكتر تورىنىڭ جاڭاشا ەنەرگيا ساقتاۋ بويىنشا جىلدىق جالپى زاريادتاعان ەلەكتر مولشەرى 9 ميلليارد 100 ميلليون كيلوۆات ساعات، ەلەكتر تاراتۋ مولشەرى 7 ميلليارد 700 ميلليون كيلوۆات ساعات بولىپ، ەكۆيۆالەنتتى پايدالانۋ ساعات سانى 1733 ساعاتقا جەتىپ، جەل، جارىق ارقىلى ەلەكتر تاراتۋداعى تولقۋدى ٴونىمدى باسىپ، جاڭا ەنەرگيانىڭ قابىلدانۋ قابىلەتىن زور كولەمدە جوعارىلاتىپ، جاڭا ەنەرگيالى ەلەكتر قۋاتىنداعى ”تاراتا الۋعا، ساقتاي الۋعا، ورنىقتى جەتكىزە الۋعا“ شىنايى كەپىلدىك ەتتى.
”جاڭاشا ەنەرگيا ساقتاۋ گەنەراتورلار كولەمىندەگى سەرپىلىستىڭ جۇزەگە اسۋى شينجياڭنىڭ تازا ەنەرگيا وندىرەتىن ٴىرى رايون بولۋدان جەدەل تۇردە ەنەرگيا ساقتاۋ جانە ورنالاستىرۋداعى قۋاتتى رايون بولۋعا قاراي جەدەل بۇرىلىس جاساپ جاتقاندىعىن اڭعارتادى، ەنەرگيا قاينارىن، ەنەرگيا تورىن، ەنەرگيا ساقتاۋدى سايكەستى دامىتۋ جۇلگەسى ونان ارى كەمەلدەنىپ، تازا ەنەرگيانى اشۋ، پايدالانۋ ساپاسى، ونىمدىلىگى ۇزدىكسىز جوعارىلادى“، ـ دەدى مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى ەلەكتر قۋاتىن ورنالاستىرۋ ـ تىزگىندەۋ ورتالىعىنىڭ سۋ ـ ەلەكتر جانە جاڭا ەنەرگيا باسقارماسىنىڭ باستىعى لي گوچيڭ.
كەلەسى قادامدا مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى ەنەرگيا ساقتاۋ، جەلىگە قوسۋ بويىنشا قىزمەت وتەۋ مەحانيزمىن ۇزدىكسىز ساپالىلاندىرىپ، جاڭاشا ەنەرگيا ساقتاۋ تەحنولوگياسى بويىنشا ۇلگى كورسەتۋدى، قولدانۋدى ىلگەرىلەتىپ، ەنەرگيا ساقتاۋداعى بازارلاندىرىپ ساۋدالاۋ مەحانيزمىن كەمەلدەندىرىپ، جاڭاشا ەنەرگيا ساقتاۋ گەنەراتورلارىنىڭ كولەمىن ۇزدىكسىز ۇلعايتىپ، ەنەرگيا ساقتاۋ، پايدالانۋ ونىمدىلىگىن جانە كاسىپ سالاسى دامۋىنىڭ ساپاسى مەن ونىمدىلىگىن جوعارىلاتىپ، مەملەكەتتىڭ ەنەرگيا حاۋىپسىزدىگىن قامتاماسىز ەتۋگە، ەلىمىزدىڭ ەنەرگيا جاعىندا جاسىل، تومەن كومىر قىشقىل گازدى بولۋعا تيپ جاڭالاۋىن ىلگەرىلەتۋگە شينجياڭنىڭ كۇش ـ قۋاتىن قوسادى.
