كورمەسە دە جۇگىردى، تىڭداپ ٴبىلدى جەڭىستى
انار بۇلت \شينجياڭ گازەتىنىڭ تىلشىلەرى لي جياني، گو ليڭ
كوزدى كولەگەيلەپ قويسا، قاراڭعى دۇنيەدە قالاي جۇگىرۋگە بولادى، ٴتىپتى قالاي فۋتبول تەبۋگە بولادى؟
2025 ـ جىلى 12 ـ ايدىڭ 7 ـ كۇنى جارىس باستالعاننان 12 ـ ايدىڭ 15 ـ كۇنى جارىس اياقتالعانعا دەيىن، شينجياڭنىڭ تۇڭعىش سوقىرلار فۋتبول كومانداسى تۇڭعىش رەت مەملەكەتتىك مۇگەدەكتەر سپورت جارىسى جانە ەرەكشە وليمپيادا سپورت جارىسىنىڭ سوقىرلار فۋتبول جارىسىندا بوي كورسەتىپ، 8 رەتكى قيان ـ كەسكى سايىستى باستان كەشىرىپ، ەڭ سوڭىندا 2 جەڭىس، 6 جەڭىلىسپەن ناتيجە جاعىندا 7 ـ ورىندى يەلەدى. ناتيجە كوز سۇرىندىرمەگەنىمەن، بۇل ولاردىڭ نەشە مىڭ كيلومەتر جول باسىپ قول جەتكىزگەن تابىسى، ارماندارىن رەالدىققا اينالدىرۋى.
ٴۇمىت شىڭدالىپ نۇر شاشتى
”ٴاي، ٴاي، سول جاعىڭدا ادام بار، ٴبىر قادام كەيىن شەگىن...“ 2025 ـ جىلى 12 ـ ايدىڭ 12 ـ كۇنى تۇستەن بۇرىن گۋاڭجوۋ داشۋە قالاشىعىنداعى مەملەكەتتىك مۇگەدەكتەر سپورت جارىسى جانە ەرەكشە وليمپيادا سپورت جارىسىنىڭ سوقىرلار فۋتبول جارىسى الاڭىندا شينجياڭ كومانداسى حىنان كومانداسىمەن بەلدەسىپ، سوقىرلار ولشەمدى فۋتبول جارىسى مايدانى كەڭىستىگىندە الاقايلاعان داۋىس كوتەرىلدى.
كوز بۇركەۋىشىن تاققاندىقتان ەشقانداي جارىقتى سەزە المايدى، جانىنداعى، الاڭ شەتىندەگى ايعايلاعان داۋىسقا سۇيەنىپ ريتىمى مەن باعىتىن بەلگىلەيدى، شينجياڭ كومانداسىنىڭ 4 ـ ٴنومىرلى سپورتشىسى ٴبىلال ياسىن قاپ ـ قاراڭعى دۇنيەدەن قوڭىراۋلى فۋتبولدى ىزدەدى، دوپ الىپ ٴجۇردى، دوپ تەپتى، قاقپاعا دوپ كىرگىزدى...
جارىس باستالىپ 7 ـ مينۋتتا شينجياڭ كومانداسى ورتا الاڭدا دوپتى ٴساتتى توسىپ، تەز ارادا ٴبىلالدىڭ اياعىنا جەتكىزدى، ول دىبىستىڭ جەتەكتەۋى مەن تابان استىنداعى جاناسۋ سەزىمىنە سۇيەنىپ ەكى ارتقى قورعاۋشىنى ارت ـ ارتىنان الداپ ٴوتىپ، دوپتى الىپ كىشكەنە شەكتەلگەن ٴوڭىردىڭ وڭ جاعىنان باسىپ كىرىپ، وتە كىشكەنە بۇرىشتان دوپتى الىس بۇرىشقا كىرگىزدى. 1:0 بولدى، بۇل شينجياڭ سوقىرلار فۋتبول كومانداسىنىڭ وسى كەزەكتى جارىستا كىرگەن تۇڭعىش دوبى ەدى.
جارىستىڭ اياقتالۋ ىسقىرىعى شالىندى، ٴنومىر تاقتاسى 2:0دى كورسەتتى، شينجياڭ كومانداسى جەڭىپ شىقتى.
4 جىلدىڭ الدىندا ٴبىلال ٴوزىنىڭ مەملەكەتتىك جارىس الاڭىندا كوسىلە جۇگىرە الاتىندىعىن ويلاماعان ەدى. ونىڭ سوقىرلار فۋتبولىمەن حيكاياسى 2021 ـ جىلعى كوكتەمنەن باستالعان.
سول كەزدە شينجياڭعا كومەكتەسۋ تاقىرىبىنداعى كينو سوقىرلار فۋتبولىن تەبەتىن ٴبىر توپ كىشكەنتاي ارتيستىڭ قاتىناسۋىن قاجەت ەتتى. ياركەن اۋداندىق ەرەكشە وقۋ ـ اعارتۋ مەكتەبىندەگى سوقىر وقۋشىلار وسىلايشا كينو گرۋپپاسىنىڭ نازارىنا ٴىلىندى. وسىدان باستاپ بالالار تۇڭعىش رەت فۋتبولعا جاناسۋ سىندى ساۋاتى اشۋ جاتتىعۋىن جاسادى. كەيىن كينو نىسانى بەلگىلى سەبەپپەن ۋاقىتشا توقتاتىلعانىمەن، فۋتبول تەبۋ ارمانى بالالاردىڭ جۇرەگىندە بىرتىندەپ تامىر تارتىپ وركەن جايدى.
”كينو تۇسىرمەيتىن بولساڭىزدار دوپتى ۇزدىكسىز تەبۋىمىزگە بولا ما“؟ بالالار قايراتتارىنا ٴمىنىپ وسى سۇراۋدى سۇرادى. بۇل سۇراۋ بالالاردىڭ فۋتبولعا سۇيىسپەنشىلىگى مەن تىلەگىن بەينەلەدى، سونداي ـ اق شينجياڭ سوقىرلار فۋتبول كومانداسىنىڭ ٴۇمىتىن بەينەلەپ، تۇتاس حيكايانىڭ بەتالىسىن ويلاماعان جەردەن وزگەرتتى. ۇلكەندەر بالالاردىڭ دوپ تەبۋدى جالعاستىرۋىن، كينو گرۋپپاسىن سول جەردىڭ وزىندە حۇجاتتى فيلم جاساۋ ۇيىرمەسى ەتىپ قۇرىپ، اپپارات كوزىن وسى جاڭادان ومىرگە كەلگەن قوسىننىڭ جەتىلۋ بارىسىن ەستەلىككە الۋعا قاراي بۇرۋدى ۇيعاردى.
2024 ـ جىلى 8 ـ ايدا بۇكىل شينجياڭداعى مۇگەدەك سپورتشىلاردى شوعىرلى جاتتىقتىرعاندا كورىنىسكە ٴتۇسىرۋ نىسانىنا قاتىناسقان بارلىق كوماندا مۇشەلەرى جاتتىعۋعا بىرگە قاتىناستى، اۆتونوميالى رايوندىق مۇگەدەكتەر بىرلەستىگى وسى شوعىرلى جاتتىعۋ اترەتىن نەگىز ەتىپ، شينجياڭداعى تۇڭعىش سوقىرلار فۋتبول كومانداسىنىڭ رەسمي قۇرىلعاندىعىن جاريالادى. 9 جىلدىق مىندەتتى وقۋ ـ اعارتۋدى تامامداعان سپورتشىلار تۇگەلدەي شينجياڭ ەرەكشە وقۋ ـ اعارتۋ كاسىپتىك ورتا تەحنيكۋم مەكتەبىنە قابىلداندى. مەكتەپتە بالالار كاسىپتىك جاتتىقتىرۋشىنىڭ جەتەكشىلىگىندە جۇگىردى، دوپ تەپتى. سونىمەن كوپشىلىك سوقىرلار فۋتبولى سەبەبىنەن تاعدىرلارىن وزگەرتتى ٴارى ارماندارىن جالعاستىردى.
”ماڭايىمدا سوقىرلار دا دوپ الاڭىندا جۇگىرىپ فۋتبول تەبە الاتىنىنا سەنەتىندەر وتە از“. ٴبىلال بىلاي دەدى: مۇلدە سوقىرلار، مەن جونىنەن العاندا، ٴاربىر ٴىستى ىستەۋدە تەك سەزىمىنە سۇيەنىپ عانا العا ىلگەرىلەيدى، باسقالاردىڭ دوپ الاڭىندا قالاعانىنشا دوپ تەبە الاتىنىنا قاتتى قىزىعامىن، ٴبىراق ٴوزىم كورە المايمىن، تەك دوپ الاڭىنىڭ جانىندا كوپشىلىكتىڭ الاقاي ٴۇنىن تىڭدايمىن، سوقىرلار فۋتبولىنا جاناسقاننان كەيىن بارىپ، ٴوزىمنىڭ دە دوپ الاڭىندا قالاعانىمشا جۇگىرە الاتىندىعىمدى ٴبىلدىم.
قاراڭعىدا دا جۇگىرۋگە بولادى
”دوپ كومانداسى جاس، دوپشىلاردىڭ جارىسقا قاتىناسۋ تاجىريبەسى از، دوپ كىرگىزىپ جارىستا جەڭۋ وڭاي ەمەس“. شينجياڭ سوقىرلار فۋتبول كومانداسىنىڭ جاتتىقتىرۋشىسى لو چىڭميان بىلاي دەدى: بۇل بالالار مەملەكەتتىك جارىس الاڭىنا بارۋ ٴۇشىن ٴار قادام سايىن بار كۇشتەرىن سارقا جۇمسادى.
لو چىڭميان ٴاسىلى جۇڭگو جانجياڭ لۇڭرىن فۋتبول كلۋبىنىڭ ٴبىر مۇشەسى بولاتىن، 2024 ـ جىلى فيلم ٴتۇسىرۋ گرۋپپاسىنىڭ تانىستىرۋىمەن ول الىستان شينجياڭعا كەلىپ، وسى جاس كوماندانىڭ جاتتىقتىرۋشىسىنىڭ ٴبىرى بولدى.
ٴبىلال بىلاي دەدى: دوپ تەبۋگە باتىلدىق ەتە الماۋدان دوپ الاڭىنا شىعىپ جۇگىرۋگە، دوپتى تارتىپ الۋعا دەيىن لو جاتتىقتىرۋشى سەرىك بولىپ جاتتىعىپ، دىبىستى تىڭداپ ورىندى پارىقتاۋدان دوپ تەبۋ تەبىنىنە دەيىن، از ـ ازدان بۇگە ـ شىگەسىنە دەيىن ٴبىر ـ بىردەن قاداعالادى، ىشكى قورقىنىشىمدى جەڭىپ، قورشاۋ ىشىندە جۇرەكتىلىكپەن جۇگىرىپ دوپ تارتىپ الىپ، دوپ تەبۋىمە مۇمكىندىك جاسادى. سول ساتتە بەتىمدى جەل وپكەندە ۇشىپ بارا جاتقانداي، ٴتۇس كورگەندەي بولدىم، قاراڭعىلىقتىڭ شىرماۋىنان قۇتىلىپ، فۋتبولدىڭ شاتتىعىنان بارىنشا ٴلاززاتتاندىم.
كوزى كورمەي جۇگىرۋدىڭ قانشالىق وڭاي ەمەس ەكەنىن بىلگەننەن كەيىن، مەيلى جارىس، الدە جاتتىعۋ بولسىن، كوماندا مۇشەلەرى تيتتەي دە بوساڭسىمادى، جىعىلىپ قالعاننان كەيىن دەرەۋ ورنىنان تۇرىپ، ايعايلاعان داۋىس ىشىندە ۇزدىكسىز ىزدەنىپ، سىناپ كورىپ، تالاسىپ ـ تارماستى.
سوقىرلار فۋتبول ەرەجەسىندە قاقپاشى مەن جەتەكشى كورۋ قۋاتىنا يە مۇشە بولىپ، بۇكىل كوماندانىڭ قورعانۋىنىڭ ىرگە تاسى جانە قاراڭعىلىقتاعى ”قولباسشىسى“. چىن جۇنجيە دە جۇڭگو جانجياڭ لۇڭرىن فۋتبول كلۋبىنىڭ ٴبىر مۇشەسى، ونىڭ كلۋبىندا دا سوقىرلار فۋتبول جاتتىعۋى بولعاندىقتان لو چىڭمياننىڭ تانىستىرۋىمەن ول شينجياڭ سوقىرلار فۋتبول كومانداسىنىڭ مەملەكەتتىك مۇگەدەكتەر سپورت جارىسى جانە ەرەكشە وليمپيادا سپورت جارىسىنىڭ ٴاربىر جارىسىنا كومەكتەسىپ، شينجياڭ كومانداسىنىڭ جاقسى قاقپاشىسى بولۋدى تاڭدادى.
چىن جۇنجيە قاقپانى ويداعىداي قورعاپ قانا قويماي، ۇزدىكسىز، اسقاق بۇيرىقپەن ساپتاستارىنا الاڭعا شىعاتىن ”ديناميكالىق كارتانى“ سالىپ بەرەدى. ”سول جاق بوس قالدى“، ”الدىعا باسىپ كىرىڭدەر“، ”دوپ سەنىڭ اياعىڭدا“، جارىستا ول الاڭداعى ٴاربىر قيمىلعا قاي ـ قاشان دا نازار اۋدارىپ، ٴاربىر بۇيرىعى ساپتاستارىنىڭ قاراڭعىدا سايىساتىن جول باستاۋشىعا اينالدى.
مەملەكەتتىك مۇگەدەكتەر سپورت جارىسى جانە ەرەكشە وليمپيادا سپورت جارىسىنىڭ شينجياڭ كومانداسى مەن شاڭحاي كومانداسىنىڭ جارىسىندا شينجياڭ كومانداسى 0گە قارسى 2 ۇپايمەن جەڭىلدى. جارىس اياقتاعاننان كەيىن، دەمالىس بولمەسىندە چىن جۇنجيە جالعىز وتىرىپ كوز جاسىن كولدەتتى. ”جۇنجيە، جىلاما، كەلەسى مايداندا جەڭىپ الامىز“. ”ۇپاي سالىستىرماسى ۇلكەن ەمەس، تاعى بىرنەشە رەت شابۋىلعا توتەپ بەردىڭ، وتە كەرەمەت بولدى“... دەمالىس بولمەسىندە جەتەكشىلەر، جاتتىقتىرۋشىلار، كوماندا مۇشەلەرى ٴبىرىن ـ ٴبىرى شابىتتاندىرىپ، كوپشىلىك ٴبىرىن ـ ٴبىرى قۇشاقتاپ، ساتسىزدىككە ۇشىراعان تورىعۋ مەيىر سۇيىسپەنشىلىك ىشىندە بىرتىندەپ سەيىلدى.
ارت ـ ارتىنان بىرنەشە مايدان ساتسىزدىككە ۇشىرادى، ولار مەملەكەتتىك جارىس الاڭىندا ٴبىر مايدان جەڭۋ ارقىلى وزدەرىن دالەلدەۋدى قاتتى ارماندادى.
12 ـ ايدىڭ 13 ـ كۇنى تۇستەن بۇرىن گۋاڭجوۋدا سەبەزگى جاڭبىر جاۋىپ تۇرعاندا، ”ۋاي، ۋاي“ دەپ الاقايلاعان داۋىس جاسىل الاڭدا تولاستامادى. ٴبىلالدىڭ الدىڭعى جارتى مايدان اياقتاۋدان بۇرىن ٴبىر دوپ كىرگىزۋىمەن شينجياڭ كومانداسى 0گە قارسى 1 ۇپايمەن گۋاڭدۇڭ ارتۋان كومانداسىن جەڭدى. سوڭعى ىسقىرىق ٴۇنى ەستىلگەندە، قاقپاشى چىن جۇنجيە تەبىرەنگەن كوڭىل كۇيىن جاسىرا الماي، كوزىنە جاس الدى. ول ساپتاسى ٴبىلالدىڭ ماڭدايىمەن ماڭدايىن ٴتيىستىردى، ىلە ـ شالا قىسقا دا قاتتى قۇشاقتاسىپ، ەكەۋى جەڭىستىڭ شاتتىعىنان بىرگە ورتاقتاستى.
”كوماندانىڭ قورعانىس جاعىندا بەينەسى كورنەكتى بولدى، كوماندا مۇشەلەرى ورنالاستىرعان مىندەتتەردى وتە تىڭعىلىقتى اتقاردى“. جارىستان كەيىن، شينجياڭ كومانداسىنىڭ باس جاتتىقتىرۋشىسى يە جىگاڭ كوپشىلىكتىڭ بەينەسىن تۇراقتاندىردى.
قامال الۋ ارماندى جارقىراتتى
وسى كەزەكتى مەملەكەتتىك مۇگەدەكتەر سپورت جارىسى جانە ەرەكشە وليمپيادا سپورت جارىسىنىڭ سوقىرلار فۋتبول ەرلەر گرۋپپاسىنىڭ جارىسىنا 9 كوماندا قاتىناستى، جارىستا اينالمالى ٴنومىر جيناۋ ٴتۇزىمى قولدانىلدى، ٴاربىر كوماندا 8 مايدان جارىسقا قاتىناسىپ، ٴنومىر جيناۋ بويىنشا قاتارعا تۇرعىزىلدى. يۇننان، گۋاڭدۇڭ، فۋجيان، لياۋنيڭ 4 مىقتى كوماندانىڭ الدىندا شينجياڭ كومانداسىنىڭ جاس كوماندا ەكەندىگى ٴشۇباسىز.
8 مايدان جارىستا 2 رەت جەڭىپ، 6 رەت جەڭىلۋدەي ناتيجەمەن 7 ـ ورىندى يەلەدى، بۇل شينجياڭ كومانداسىنىڭ ەڭ سوڭعى ناتيجەسى. ”سىرت ادامداردىڭ نازارىندا بۇل ناتيجە ايتارلىقتاي بولماعانىمەن، ٴبىراق بۇل بالالاردىڭ قۇلشىنۋىنىڭ ناتيجەسى، كوپشىلىككە شينجياڭدا سوقىرلاردىڭ دا فۋتبول تەبۋدى ۇناتاتىندىعىن، تەبە الاتىندىعىن كورسەتتى“، ـ دەدى يە جىگاڭ.
ەڭ العاشقى ساسقالاقتاۋدان جارىس ريتىمىنە بىرتىندەپ ۇيلەسۋگە دەيىن، ارت ـ ارتىنان جەڭىلۋدەن جەڭىسكە جەتۋگە دەيىن قيان ـ كەسكى سايىستاردا كوماندا مۇشەلەرىنىڭ كوڭىل كۇيىندە دە وراسان زور وزگەرىستەر تۋىلدى. ولار ٴتىپتى دە تولىسىپ، وزىنە سەنىم ارتىپ، دوپ الاڭىندا بارعان سايىن ىشتەي سايكەستى.
”جەڭىلىپ قالعاننان كەيىنگى اۋىرتپالىقتى جەڭىپ، بىرتىندەپ ساباسىنا تۇسكەننەن كەيىن، كوپشىلىكتىڭ سايكەسۋى دە بارعان سايىن جاقسى بولا ٴتۇستى“. ٴبىلال بىلاي دەدى: تۇڭعىش رەت دوپ كىرگىزگەندە ٴبىراز سەنىڭكىرەمەي قالدىم. ٴبىراق جارىستىڭ ىلگەرىلەۋىنە بايلانىستى ول جارىس ريتىمىنە بىرتىندەپ ۇيلەسىپ، دوپ الاڭىندا ٴتىپتى دە بايسالدى، سەنىمدى بولدى.
گۋاڭدۇڭ ارتۋان كومانداسىمەن جارىستا كىرگىزىلگەن شەشۋشى دوپ تۋرالى ايالداعاندا، ٴبىلال ونى ٴوزارا سايكەسۋدىڭ ناتيجەسى دەپ جيناقتادى: ”بۇل جارىستا مەن جۇنجيە اعامەن وتە تاماشا سايكەستىم، ول دوپتى اياعىما ٴدال لاقتىرىپ بەرگەندىكتەن وسى جەڭىسكە قول جەتكىزدىك“. مۇنداي ىشتەي ٴتۇسىنىسۋدى ولار سان رەتكى جاتتىعۋ مەن جارىستا بىرتىندەپ جەتىلدىرگەن.
سوقىرلار فۋتبولى، ٴىس جۇزىندە، ٴبىر كوماندا، ٴبىر مايدان جارىس عانا ەمەس، ونان دا ماڭىزدىسى، كورۋى كەدەرگىگە ۇشىراعان جاستار مەن ورەندەردىڭ سەنىم ورناتۋىنا، قوعاممەن توعىسۋىنا كومەكتەسەتىن كوپىر.
”فۋتبول تەبۋدەن بۇرىن مەن وتە تۇيىق ەدىم، باسقالارمەن ىرىقتى تۇردە سويلەسۋگە باتىلدىق ەتە المايتىنمىن، فۋتبول مەنىڭ بىرتە ـ بىرتە سەنىمىمدى ارتتىردى“، ـ دەدى شينجياڭ سوقىرلار فۋتبول كومانداسىنىڭ مۇشەسى ابدىرەيىم ابدىراحمان شىن پەيىلمەن.
”بۇرىن ٴوزىمدى قوراشسىناتىنمىن، دوپ تەپكەننەن كەيىن كەڭ پەيىل، اشىق ـ جارقىن بولا باستادىم“. كوماندا مۇشەسى ابدۇميجيت مامەت تە ٴوزىنىڭ وزگەرىستەرىن ٴبولىستى.
”ولاردىڭ كورە الماسا دا، دوپتى تارتىپ الۋعا باتىلدىق ەتە الاتىندىعىنا، بەلدەسۋگە باتىلدىق ەتە الاتىندىعىنا ەرەكشە سۇيىنەمىن“. شينجياڭ سوقىرلار فۋتبول كومانداسىنىڭ جەتەكشىسى ۋاڭ جيڭرۇڭ بىلاي دەدى: ورتاعا شىعىپ، ٴار مايدان دوپتى بار كۇشپەن جاقسى تەبەدى، ولار ٴتىپتى دە كوپ ادامعا كورۋى كەدەرگىگە ۇشىراعان جاستار مەن ورەندەر قاۋىمىنىڭ بويىنداعى كومەسكى كۇش پەن ىشكى كۇش ـ قۋاتتى كورسەتتى، مىنە بۇل جەڭىس، بۇل ٴبىزدى ناتيجەدەن ارمان اسەرلەندىردى.
ٴوزىن قوراشسىنۋدان، تۇيىق بولۋدان سەنىمدى، اشىق ـ جارقىن بولۋعا دەيىن، كورۋى كەدەرگىگە ۇشىراعان جاستار مەن ورەندەر فۋتبول ارقىلى ٴوزىن بەينەلەۋ جانە تۇراقتاندىرۋ ورايىن تاپتى. ولار ٴىس ـ ارەكەتى ارقىلى جارىقتى كورە الماسا دا، فۋتبول دۇنيەسىنەن جارىق تابا الاتىندىعىن دالەلدەدى. مىنە بۇل جەڭىس!
