ەركىن تۇنياز جۇندۇڭ ەكونوميكالىق، تەحنولوگيالىق اشۋ رايونىندا تەكسەرۋ ـ زەرتتەۋ جۇرگىزگەندە بىلاي دەپ باسا دارىپتەدى
قايراتتى تاسقىنداتىپ، ٴبىرىنشى ماۋسىمدا ”جاقسى باستامانى“ بار كۇشپەن جۇزەگە اسىرۋ كەرەك
انار بۇلت \ شينجياڭ گازەتىنىڭ ٴتىلشىسى لي ياڭ 1 ـ ايدىڭ 11 ـ كۇنى سانجىدان حابارلايدى. 1 ـ ايدىڭ 10 ـ كۇنى اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز جۇندۇڭ ەكونوميكالىق، تەحنولوگيالىق اشۋ رايونىنا كەلىپ، قاتىستى كاسىپورىنداردى ىشكەرىلەي ارالاپ، كاسىپ سالاسىنىڭ دامۋى، كەلەلى نىسان قۇرىلىسى، ”كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ“ نىساناسىن تياناقتاندىرۋ سياقتىلاردى تەكسەردى، زەرتتەدى ٴارى اڭگىمە ٴماجىلىسىن اشتى. ول بىلاي دەپ باسا دارىپتەدى: پارتيا 20 ـ كەزەكتى ورتالىق كوميتەتى ٴتورتىنشى جالپى ٴماجىلىسىنىڭ رۋحىن جانە ورتالىقتىڭ ەكونوميكالىق قىزمەت ٴماجىلىسىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، اۆتونوميالى رايوندىق پارتكومنىڭ تالابى بويىنشا، جالپى جاعداي تانىمى مەن جۇيەلى وي جەلىسىن كۇشەيتىپ، ارتۋ ٴتۇيىنىن، سەرپىلىس ٴتۇيىنىن، تىرەك ٴتۇيىنىن ٴدال تاۋىپ، قايراتتى تاسقىنداتىپ، قولايلى ساتتەن پايدالانىپ العا ۇمتىلىپ، ٴبىرىنشى ماۋسىمدا ”جاقسى باستامانى“ بار كۇشپەن جۇزەگە اسىرۋ كەرەك.
شينجياڭ گى ـ ىنسى ەنەرگيا عىلىم ـ تەحنولوگياسى شەكتى سەرىكتەستىگىندە ەركىن تۇنياز سەرىكتەستىكتىڭ دامۋ جوباسى، ٴوندىرىس تيجاراتى جانە ٴوندىرىس حاۋىپسىزدىگى جاعدايىنان بەرىلگەن مالىمەتتى تىڭداپ، 300 مىڭ كيلوۆاتتىق جاسىل ەلەكتردى تىكە جالعاۋ نىسانىن ۇعىستى. ول بىلاي دەدى: قازىر فوتوۆولتتىق كاسىپ سالاسى ٴدال تەحنولوگيالىق وزگەرىس جانە كاسىپ سالاسىنىڭ دارەجەسىن ٴوسىرۋ سىندى شەشۋشى مەزگىلدە تۇر، كاسىپورىنداردىڭ سەنىمدى بەكەمدەپ، ورايدى مىقتى يگەرىپ، عىلىم ـ تەحنولوگيالىق جاڭالىق اشۋ ارقىلى وزىندىك قۇندى تومەندەتىپ ونىمدىلىكتى ارتتىرۋىن ٴۇمىت ەتەمىن. جاسىل ەلەكتردى تىكە جالعاۋ نىسان قۇرىلىسىنىڭ اياق الىسىن جەدەلدەتىپ، ەلەكتر كوزى، تور، كوتەرىمدىلىك، ەنەرگيا ساقتاۋدى جوعارى ٴونىمدى سايكەستىرۋ ۇلگىسى جونىندە ىزدەنىس جاساپ، كاسىپتىڭ جاسىل دامۋ ولشەمىن بار كۇشپەن تۇلعالاۋ كەرەك.
مەملەكەتتىك ەنەرگيا توبى شينجياڭ حۇڭشاچۋان ەنەرگيا شەكتى جاۋاپكەرشىلىك سەرىكتەستىگى حۇڭشاچۋان 1 ـ ٴنومىرلى اشىق كومىر كەنىندە ەركىن تۇنياز ٴوندىرىس، تيجارات، سىرتقا تاسىمالداۋ قۋاتى، جۇمىستانۋعا جەتەكتەۋ، زەردەلى كەن قۇرىلىسى سياقتى جاعدايلاردى ۇعىستى، مەملەكەتتىك ەنەرگيا توبى جۇندۇڭ جىلىنا كومىردەن 2 ميلليارد تەكشەمەتر تابيعي گاز الۋ نىسانىنىڭ قارجى قوسۋ جانە قۇرىلىس اياق الىسى جاعدايىن تىڭدادى. ول كاسىپورىنداردىڭ ورتالىق كاسىپورىندارى باسىمدىعىن تولىق ساۋلەلەندىرىپ، نازاردى كومىردەن تازا، جوعارى ٴونىمدى پايدالانۋعا شوعىرلاندىرىپ، زەردەلىلەندىرۋ، تومەن كومىر قىشقىل گازدى بولۋ، جاسىل بولۋ جاعىندا ۇلگى كورسەتۋىن ٴۇمىت ەتتى. قۇرىلىس ۋاقىتىن الدىعا ىلگەرىلەتىپ، قىسقى سايابىرلىقتى قىسقى قاربالاستىققا وزگەرتىپ، نىساننىڭ مۇمكىندىگىنشە تەز ارادا وندىرىسكە قوسىلۋىن ىلگەرىلەتۋ كەرەك.
ەركىن تۇنياز شينجياڭ شينليانشين حيميا ونەركاسىپ شەكتى سەرىكتەستىگىنىڭ جىلىنا 320 مىڭ توننا مەلامين الۋ، 500 مىڭ توننا كۇردەلى تىڭايتقىش الۋ نىسانىنىڭ جۇمىس باسىندا تەكسەرۋ جۇرگىزىپ، بىلاي دەپ باسا دارىپتەدى: نىسان قۇرىلىسى اياق الىسىن، ساپاسىن جانە حاۋىپسىزدىگىن ويداعىداي ٴبىر تۇتاس جوسپارلاپ، نىساننىڭ ەرتەرەك وندىرىسكە قوسىلىپ ونىمدىلىك كورسەتۋىن ىلگەرىلەتۋ كەرەك. ول كاسىپورىنداردى عىلىم ـ تەحنولوگيادا جاڭالىق اشۋ تەبىنىن ۇزدىكسىز ارتتىرىپ، ”جاساندى زەردە +“ ارەكەتىنە بەلسەنە قاتىناسىپ، سيفرلاندىرۋ ارقىلى كاسىپ سالاسىنىڭ دارەجەسىن وسىرۋگە قۋات ۇستەۋگە جىگەرلەندىردى.
ەركىن تۇنياز ەرەكشە ترانسفورماتور شينجياڭ جۇننىڭ حيميا ونەركاسىبى شەكتى سەرىكتەستىگىنىڭ عىلمي زەرتتەۋ تاجىريبەحاناسىنا كەلىپ، ٴبىرىنشى شەپتەگى عىلمي زەرتتەۋ قىزمەتكەرلەرىمەن اڭگىمەلەسىپ، تيانچى ەنەرگياسى جۇندۇڭ جىلىنا كومىردەن 2 ميلليارد تەكشەمەتر تابيعي گاز الۋ نىسانى سياقتىلاردىڭ قۇرىلىس اياق الىسى احۋالىن تىڭداپ، قيىنشىلىق ماسەلەلەرىن سول جەردىڭ وزىندە سايكەستىردى، شەشتى. ول مىنانى اتاپ كورسەتتى: ”كومىر حيميا ونەركاسىبى + جاڭا ەنەرگيا“ بويىنشا بايلانىستىرا دامىتۋدى تەرەڭ جوسپارلاپ، ناقتى ىستەپ، جوعارى ساپالى دامۋدىڭ ۇلگىلىك نىسانىن تۇلعالاۋ كەرەك.
ەركىن تۇنياز سانجى حۇيزۋ اۆتونوميالى وبلىسىنداعى، جۇندۇڭ ەكونوميكالىق، تەحنولوگيالىق اشۋ رايونىنداعى جاۋاپتى جولداستار قاتارلىلارمەن اڭگىمە ٴماجىلىسىن وتكىزگەندە بىلاي دەپ باسا دارىپتەدى: نازاردى باقشا رايونى فۋنكتسيالىق ورنىنا شوعىرلاندىرىپ، كومىر، كومىر ەلەكتر، كومىر حيميا ىستەرىن ويداعىداي ىستەپ، ۇزدىكسىز تىزبەكتى ۇزارتۋ، تىزبەكتى تولىقتاۋ، تىزبەكتى كۇشەيتۋ كەرەك. ٴبىر توپ كەلەلى نىسانداردى جوعارى ساپالى جوبالاپ، زاپاس ساقتاپ، سالىنۋ ۇستىندەگى نىسانداردى جەدەل ىلگەرىلەتىپ، كوكتەم مەرەكەسى كەزىندە جۇمىستى توقتاتپايتىن كاسىپورىنداردى الدىن الا اداقتاپ، قىزمەت وتەۋمەن قامتاماسىز ەتۋدى شىن مانىندە ويداعىداي ىستەۋ كەرەك. مەملەكەتتىڭ كومىر قىشقىل گازىنىڭ شىعارىلۋىن قوس تىزگىندەۋ ساياساتىن ىشكەرىلەي زەرتتەپ، تياناقتاندىرىپ، ”ٴبىر كاسىپورىنعا ٴبىر شارا“ بويىنشا ەنەرگيانى ۇنەمدەپ، كومىر قىشقىل گازىن ازايتۋ، كومەسكى كۇشتى اشۋ جوباسىن جاساپ، كومىر قىشقىل گازىن شىعارمايتىن باقشا رايونى قۇرىلىسىن ىلگەرىلەتۋ جونىندە ىزدەنىس جاساۋ كەرەك. دامۋ مەن حاۋىپسىزدىكتى ويداعىداي ٴبىر تۇتاس جوسپارلاپ، لاستانۋدان ساقتانۋدان جانە ونى وڭاۋدان قامال الۋ شايقاسىن ۇزدىكسىز ويداعىداي جۇرگىزىپ، اشۋ رايونىنىڭ جاسىل تيپ جاڭالاۋىن جۇزەگە اسىرۋدى ىلگەرىلەتۋ كەرەك.
