”15 - بەسجىلدىقتىڭ“ ستراتەگيالىق ورنالاستىرۋلارىن جان - جاقتى، تەرەڭ، دالمە - ءدال ءتۇسىنۋ جانە يگەرۋ كەرەك
− باس شۋجي شي جينپيڭنىڭ ولكە، مينيسترلىك دارەجەلى نەگىزگى باسشى كادرلاردىڭ ارناۋلى تاقىرىپتىق زەرتتەۋ - تالقى كۋرسىنىڭ وقۋ باستاۋ سالتىندا سويلەگەن ماڭىزدى ءسوزىن ۇيرەنۋ، دايەكتىلەندىرۋ جونىندە
□ حالىق گازەتىنىڭ شولۋشىسى
”پارتيا 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ مەزگىلىندەگى ەكونوميكالىق، قوعامدىق دامۋ جونىندە ستراتەگيالىق ورنالاستىرۋ جاسادى، جان - جاقتى، تەرەڭ، دالمە - ءدال ءتۇسىنۋ جانە يگەرۋ كەرەك“. ولكە، مينيسترلىك دارەجەلى نەگىزگى باسشى كادرلاردىڭ پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ۇيرەنۋ، دايەكتىلەندىرۋ جونىندەگى ارناۋلى تاقىرىپتىق زەرتتەۋ - تالقى كۋرسىنىڭ وقۋ باستاۋ سالتىندا باس شۋجي شي جينپيڭ جالپى ءماجىلىستىڭ رۋحىن قالاي ۇيرەنۋ، دايەكتىلەندىرۋ جونىندە ايقىن تالاپ قويىپ، ەل ءىشى - سىرتىنداعى جاعدايدىڭ وزگەرىسىن يگەرۋ، وسىزاماندانعان كاسىپ سالاسى جۇيەسىن قۇرۋ، جاڭا دامۋ ارناسىن قالىپتاستىرۋ، ەكونوميكا مەن قوعامنىڭ سايكەستى دامۋىن ىلگەرىلەتۋ سياقتى كەلەلى نازاريالىق جانە امالياتتىق ماسەلەلەردى تەرەڭ بايىمدادى.
وسىزاماندانعان كاسىپ سالاسى جۇيەسى − جۇڭگو ۇلگىسىندەگى وسىزامانداندىرۋدىڭ زاتتىق تەحنولوگيالىق نەگىزى، ونى ”15 - بەسجىلدىق“ مەزگىلىندەگى ءتۇرلى ستراتەگيالىق مىندەتتەردىڭ ءبىرىنشى ورنىنا قويۋ پارتيا ورتالىق كوميتەتىنىڭ جان - جاقتىلى ستراتەگيالىق تولعانىسى. جالپى ءماجىلىستىڭ ستراتەگيالىق ورنالاستىرۋىن قايتكەندە جان - جاقتى، تەرەڭ، دالمە - ءدال تۇسىنۋگە جانە يگەرۋگە بولادى؟ مۇنى مىسالعا الىپ تۇسىندىرۋگە بولادى.
دامۋ اۋقىمىنا كوز جىبەرسەك، ”14 - بەسجىلدىق“ مەزگىلىندە ەلىمىزدىڭ وسىزاماندانعان كاسىپ سالاسى جۇيەسى قۇرىلىسىندا نىق قادام تاستالدى. 2025 - جىلى ەلىمىزدىڭ جاساۋ كاسىبى كولەمىنىڭ ءۇرتىس 16 جىل دۇنيە ءجۇزى بويىنشا ءبىرىنشى ورىندا تۇرۋىنان ءۇمىت بار، كولەمنەن جوعارى جابدىق جاساۋ كاسىبىنىڭ، جوعارى تەحنولوگيالىق جاساۋ كاسىبىنىڭ ارتقان قۇنى سايكەس مەزگىلدەگىدەن جەكە - جەكە ％2. 9، ％4. 9 ارتىپ، جاساندى زەردە، بيولوگيالىق ءدارى - دارمەك، قۇلتەمىر سياقتىلاردى زەرتتەپ اشۋ، قولدانۋ دۇنيە جۇزىندە الدىڭعى قاتاردا ءجۇردى. اماليات ناقتى ەكونوميكانىڭ كۇشەيۋى ەلىمىزدىڭ دامۋ ارتىقشىلىعىنىڭ تياناعى، نەگىزى ەكەندىگىن دالەلدەدى. سوڭعى جىلدارى ەلىمىز ەكونوميكاسى داۋىلعا قارسى تولقىن جارا العا ىلگەرىلەپ، قۋاتتى سەرپىمدىلىك پەن ومىرشەڭدىكتى ساقتادى، ستراتەگيالىق سۇيەنىش كەمەلدى كاسىپ سالاسى جۇيەسى بولدى.
دامۋ جالپى جاعدايىنا كوز جىبەرسەك، قازىر ەلىمىزدىڭ دامۋىندا ستراتەگيالىق وراي مەن حاۋىپ - قاتەر، سىن - سايىس قاتار ءومىر ءسۇرىپ، ايقىنسىز، مەجەلەۋ قيىن فاكتورلار كوبەيىپ، جاساندى زەردە ۋاكىل بولعان جاڭا كەزەكتى عىلىم - تەحنولوگيا توڭكەرىسى مەن كاسىپ سالاسى وزگەرىسىندە جەدەل سەرپىلىس جاسالدى. جاعداي نەعۇرلىم كۇردەلى دە قۇبىلمالى بولعان سايىن، ناقتى ەكونوميكا سىندى وسى نەگىزدى سولعۇرلىم بەكەمدەۋ، وسىزاماندانعان كاسىپ سالاسى جۇيەسىن جەدەل قۇرۋ كەرەك. ”ەكىنشى 100 جىلدىق كۇرەس نىساناسىن جۇزەگە اسىرۋعا پارمەندى زاتتىق تىرەك ازىرلەۋ“، ”كۇن سايىن شيەلەنىسكەن حالىقارالىق باسەكەدە ستراتەگيالىق ىرىقتىلىققا قول جەتكىزۋ“ سىندى جالپى جاعداي كوز اياسىنان ونىڭ ورنىنا وي جۇگىرتكەندە پارتيا ورتالىق كوميتەتىنىڭ شەشىم جاساۋ ماقساتىن، ورنالاستىرۋ جاساۋ اۋەلگى ماقساتىن تەرەڭ تۇسىنۋگە بولادى.
وسىدان قاراعاندا، ”جان - جاقتى بولۋ“ دەگەنىمىز جالپى جاعداي كوز اياسىمەن جالپى ءماجىلىستىڭ رۋحىن ءتۇسىنىپ، ءتۇرلى ورنالاستىرۋلاردى تۇتاس تۇلعا رەتىندە يگەرۋ بولىپ تابىلادى. ءبىز ”15 - بەسجىلدىق“ مەزگىلىندەگى ەكونوميكالىق، قوعامدىق دامۋدىڭ كەلەلى ءمانى، ءدوپ كەلگەن جاعداي، جەتەكشى يدەيا، ماڭىزدى پرينسيپ، نىسانا - مىندەت، ساياسات - شارالار سياقتىلاردى جاپپاي ءتۇسىنىپ، ءتۇرلى قىزمەتتەردى جالپى جاعداي كوزقاراسى جانە جۇيە وي جەلىسى ارقىلى جوسپارلاپ ىلگەرىلەتۋىمىز كەرەك، بىرەۋىنە عانا ءمان بەرىپ، ەكىنشىسىن ەلەۋسىز قالدىرۋعا بولمايدى، ول جەر، بۇل جەرىنەن ءۇزىپ الۋعا ءتىپتى بولمايدى.
وسىزاماندانعان كاسىپ سالاسى جۇيەسىن قۇرۋدىڭ ءمانى نە؟ قالاي قۇرۋ كەرەك؟ وسى ماسەلەلەردى انىق ويلانىپ تۇسىنگەندە عانا تانىم جاعىندا اناعۇرلىم تياناقتى بولۋعا، ارەكەت جاعىندا اناعۇرلىم سانالى بولۋعا بولادى.
وسىزاماندانعان كاسىپ سالاسى جۇيەسىن قۇرۋدا كاسىپ سالاسى جۇيەسىنىڭ تۇتاس تۇلعالىق جاقتان جوعارىلاۋىن جۇزەگە اسىرۋ كەرەك. باس شۋجي شي جينپيڭ بىلاي دەپ باسا دارىپتەدى: ”وڭىرلەر، سالالار ورىندى ءدال تاۋىپ، زەردەلىلەندىرۋ، جاسىلداندىرۋ، توعىستىرۋ بەتالىسىنا تاباندى بولىپ، سالىستىرمالى باسىمدىقتى ساۋلەلەندىرىپ، جوعارعى - تومەنگى بۋىنداعى كاسىپ سالالارى ءوزارا ۇشتاسقان، ءارقايسىسى ارتىقشىلىقتارىن ايگىلەيتىن، ءبىر باعىتتا كۇش سالاتىن جاندى جاعداي قالىپتاستىرۋى كەرەك“. بۇل كاسىپ سالاسى جۇيەسىنىڭ تۇتاس تۇلعالىق جاقتان جوعارىلاۋىن ىلگەرىلەتۋگە امالياتتىق جول كورسەتتى. وسىزاماندانعان كاسىپ سالاسى جۇيەسىنىڭ تىرەگى وزىق جاساۋ كاسىبى. ”15 - بەسجىلدىق“ جوبا ۇسىنىسىندا ەكونوميكانى دامىتۋدىڭ كۇش سالۋ ءتۇيىنىن ناقتى ەكونوميكاعا اۋدارۋعا تاباندى بولۋ كەرەكتىگى العا قويىلدى، مۇندا جاساۋ كاسىبىنىڭ ۇيلەسىمدى ارا سالماعىن ساقتاۋ، وزىق جاساۋ كاسىبىن زور كۇشپەن دامىتۋ مەڭزەلىپ وتىر.
وسىدان قاراعاندا، ”تەرەڭ بولۋ“ دەگەنىمىز ”15 - بەسجىلدىق“ جوبا ۇسىنىسىنداعى ءتۇرلى ورنالاستىرۋلاردىڭ سولاي ەكەنىن بىلۋمەن بىرگە، نە ءۇشىن سولاي بولاتىنىن ءبىلۋ، ءارى نە ەكەندىگىن ءتۇسىنۋ، ءارى نە ءۇشىن ەكەندىگىن، قالاي ىستەۋ كەرەكتىگىن ءتۇسىنۋ بولىپ تابىلادى. ”15 - بەسجىلدىق“ جوبا ۇسىنىسىندا جاسالعان كەلەلى تۇجىرىمداردىڭ، العا قويىلعان جاڭالىق اشۋ شارالارىنىڭ ءبارى تولىق دالەلدەۋدەن وتكەن. ءبىز شىن مانىندە جەتە ۇعىنۋىمىز، تالعاۋسىز قابىلداي بەرۋدەن، شالا - شارپى تۇسىنۋدەن ساقتانۋىمىز كەرەك.
وسىزاماندانعان كاسىپ سالاسى جۇيەسىن قۇرۋدا جاڭاشا وندىرگىش كۇشتەردى دامىتۋ تابيعي تالاپ. باس شۋجي جاڭاشا وندىرگىش كۇشتەردى دامىتۋدا ”جەرگىلىكتى جاعدايعا قاراي ىستەۋدى“ تالاي رەت باسا دارىپتەدى، ورتالىقتىڭ ەكونوميكالىق قىزمەت ماجىلىسىندە ”كەيبىر جەرلەر ءىس جۇزىندىكپەن ساناسپاي، كورسوقىرلىقپەن اۋقىمعا ىلەسىپ، باسقالاردىڭ چيپ جاساعانىن كورىپ، ءوزى دە جاسادى، باسقالاردىڭ ’جاڭا ءۇش كاسىپپەن‘ اينالىسقانىن كورىپ، ارتتا قالعىسى كەلمەدى“ دەپ سىندادى.
”جاڭاشا وندىرگىش كۇشتەردى دامىتۋ − ءداستۇرلى كاسىپ سالالارىن ەلەۋسىز قالدىرۋ، ودان ءباز كەشۋ ەمەس، دۇرمەككە اينالۋدان، جەلكەۋەكتەنۋدەن ساقتانۋ ءارى ءبىر تۇردەگى ۇلگىمەن عانا جۇرگىزبەۋ كەرەك“ دەپ اتاپ كورسەتىپ،”ءوز جەرىنىڭ بايلىق ارتىقشىلىعى، كاسىپ سالاسى نەگىزى، عىلمي زەرتتەۋ شارت - جاعدايى سياقتىلارعا نەگىزدەلىپ، جاڭا كاسىپ سالاسىنىڭ، جاڭا ۇلگىنىڭ، جاڭا قوزعالىس قۋاتىنىڭ دامۋىن تالعامپازدىقپەن ىلگەرىلەتۋ كەرەك“ دەپ باسا دارىپتەدى... باس شۋجيدىڭ تەرەڭ تولعانىسىندا قاشاندا ”الدىمەن ورناتىپ، سوڭىنان كۇشىنەن قالدىرۋ“ سىندى سەرگەكتىك، بايسالدىلىق بار، وندا ”جەرگىلىكتى جاعدايعا قاراي ىستەۋ“ سىندى شىندىقتى ءىس جۇزىنەن ىزدەۋ ءادىسى قامتىلعان، ءبىزدى ءىس جۇزىندىكتى تياناق ەتىپ، عىلىم - تەحنولوگيادا جاڭالىق اشۋ مەن كاسىپ سالاسىندا جاڭالىق اشۋدىڭ ىشكەرىلەي توعىسۋىن ىلگەرىلەتۋگە جەتەكتەدى.
وسىدان قاراعاندا، ”دالمە - ءدال بولۋ“ دەگەنىمىز ”15 - بەسجىلدىق“ جوبا ۇسىنىسىنداعى ءتۇرلى ورنالاستىرۋلاردىڭ ساياسات شەگى مەن ولشەمىن دالمە - ءدال يگەرىپ، ىستەۋگە تيىستىلەرىن، ءسوز جوق، ىستەۋدى، ىستەۋگە بولاتىندارىن قۇلشىنا ىستەۋدى، ىستەمەۋگە تيىستىلەرىن استە ىستەمەۋدى ورىنداۋ بولىپ تابىلادى. پارتيا ورتالىق كوميتەتىنىڭ شەشىمدەرى مەن ورنالاستىرۋلارى بۇكىل ەلدىڭ دامۋ كەلەلى جاعدايىن تياناق ەتە وتىرىپ جاسالعان، جالپىلىق، جالپى جاعدايلىق، بەتالىستىق سيپات الادى. تۇرلىشە شارالاردىڭ قولدانىلۋ كولەمى، قارقىن تالابى، اتقارۋ ءتاسىلى جاعىندا ايىرماشىلىعى بار، ءبارىن ناقتى جاعدايعا قاراي ويداعىداي يگەرۋ كەرەك.
ۇيرەنۋ تەرەڭدەگەن سايىن، تانىم ايقىندالا، ارەكەت شىنايىلانا تۇسەدى. ءبىز تاباندىلىقپەن شي جينپيڭ جاڭا ءداۋىر جۇڭگوشا سوتسياليزم يدەياسىنان زاڭدىلىقتى ءتۇسىنىپ، بەتالىستى ايقىنداپ، ءادىس ۇيرەنىپ، اقىل - پاراساتتى ارتتىرىپ، پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ ستراتەگيالىق ورنالاستىرۋلارىن جاپپاي، تەرەڭ، دالمە - ءدال ءتۇسىنىپ جانە يگەرىپ، جالپى جاعدايدى كوكەيدە ساقتاپ، بيىكتە تۇرىپ الىسقا كوز جىبەرىپ، ۇيرەنگەندى قولدانىپ، تانىم مەن ارەكەتتى بىرلىككە كەلتىرىپ، ستراتەگيالىق جاقتا تاباندىلىقتى ساقتاپ، تاكتيكالىق جاقتا دەن قويا جوسپارلاپ، جۇڭگو ۇلگىسىندەگى وسىزامانداندىرۋ قۇرىلىسىنىڭ جاڭا جاعدايىن قۇلشىنا اشۋىمىز كەرەك.
(شينحۋا اگەنتتىگىنىڭ 1 - ايدىڭ 21 - كۇنى بەيجيڭنەن بەرگەن حابارى)
