لياۋ شيلۇڭ جولداستىڭ ناۋقاسى اۋىرلاعان كەزدە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ٴتۇرلى فورمالارمەن لياۋ شيلۇڭ جولداستىڭ قايتىس بولعاندىعىنا قايعىلى ازا ٴبىلدىردى ٴارى ونىڭ تۋىس ـ تۋعاندارىنان شىنايى حال سۇرادى
شينحۋا اگەنتتىگىنىڭ 1 ـ ايدىڭ 29 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، ارميامىزدىڭ تاڭداۋلى اسكەري قولباسشىسى، وسى زامانعى ارتقى شەپتى جاپپاي قۇرۋدىڭ كورنەكتى باسشىسى، ورتالىق اسكەري ىستەر كوميتەتىنىڭ بۇرىنعى مۇشەسى، جۇڭگو حالىق ازاتتىق ارمياسى باس ارتقى شەپ قامداۋ ٴبولىمىنىڭ بۇرىنعى باستىعى لياۋ شيلۇڭ جولداس ناۋقاس سەبەبىنەن 2026 ـ جىلى 1 ـ ايدىڭ 23 ـ كۇنى ساعات بىردەن 50 مينۋت وتكەندە بەيجيڭدە 85 جاسىندا قايتىس بولدى. 1 ـ ايدىڭ 29 ـ كۇنى لياۋ شيلۇڭ جولداستىڭ سۇيەگى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى.
لياۋ شيلۇڭ جولداس 1959 ـ جىلى 1 ـ ايدا گۇيجوۋ ولكەسىنىڭ سىنان اۋدانىنان اسكەري قوسىنعا قاتىناسقان، 1963 ـ جىلى 2 ـ ايدا جۇڭگو كوممۋنيستىك پارتياسىنا مۇشە بولعان. ىلگەرىندى ـ كەيىندى قۇرلىق ارمياسى 11 ـ جۇنىنىڭ جۇنجاڭى، چىڭدۋ اسكەري رايونىنىڭ ورىنباسار سىليڭيۋانى، سىليڭيۋانى بولعان. 2002 ـ جىلى 10 ـ ايدا جۇڭگو حالىق ازاتتىق ارمياسى باس ارتقى شەپ قامداۋ ٴبولىمىنىڭ باستىعى، سول جىلى 11 ـ ايدا ورتالىق اسكەري ىستەر كوميتەتىنىڭ مۇشەسى بولعان. جۇڭگو كوممۋنيستىك پارتياسى 15 ـ، 16 ـ، 17 ـ كەزەكتى ورتالىق كوميتەتىنىڭ مۇشەسى. 2000 ـ جىلى 6 ـ ايدا شاڭجياڭ اسكەري شەنى بەرىلگەن.
لياۋ شيلۇڭ جولداستىڭ ناۋقاسى اۋىرلاعان كەزدە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ٴتۇرلى فورمالارمەن لياۋ شيلۇڭ جولداستىڭ قايتىس بولعاندىعىنا قايعىلى ازا ٴبىلدىردى ٴارى ونىڭ تۋىس ـ تۋعاندارىنان شىنايى حال سۇرادى.
1 ـ ايدىڭ 29 ـ كۇنى تۇستەن بۇرىن باباۋشان توڭكەرىستىك قۇرباندار قابىرستانىنىڭ زالى ايبىندى جىم ـ جىرت كۇيگە شومىپ، قايعىلى مۋزيكا باسەڭ ەستىلىپ تۇردى. ورتاڭعى زالدىڭ تورىنە ”لياۋ شيلۇڭ جولداسقا قايعىلى ازا بىلدىرەمىز“ دەگەن اق ٴتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا لياۋ شيلۇڭ جولداستىڭ سۋرەتى قويىلعان. لياۋ شيلۇڭ جولداستىڭ سۇيەگى گۇل شوقتارىمەن جانە ارشالارمەن قورشالىپ، ۇستىنە جۇڭگو كوممۋنيستىك پارتياسىنىڭ نارت قىزىل پارتيا تۋى جابىلعان.
پارتيا مەن مەملەكەتتىڭ، ارميانىڭ قاتىستى باسشى جولداستارى سۇيەكپەن قوشتاسۋعا باردى نەمەسە ٴتۇرلى تاسىلدەرمەن ازا ٴبىلدىردى. اسكەري ىستەر كوميتەتى ورگانىنىڭ ٴارقايسى تاراۋلارىنداعى، ارميانىڭ بەيجيڭدە تۇراتىن قاتىستى ورىندارىنداعى باسشىلار مەن اسكەري بولىمدەردەگى وفيتسەر ـ اسكەرلەردىڭ ۋاكىلدەرى، لياۋ شيلۇڭ جولداستىڭ كوزى تىرىسىندەگى دوستارى جانە اۋىلداستارىنىڭ ۋاكىلدەرى دە سۇيەكپەن قوشتاسۋعا باردى.
