2 - ايدىڭ 3 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆاي زۇڭتۇڭى ورسيمەن كەڭەس وتكىزدى. □ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 2 - ايدىڭ 3 - كۇنى بەيجيڭنەن بەرگەن حابارى (ءتىلشى دۇڭ شۋە). 2 - ايدىڭ 3 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆاي زۇڭتۇڭى ورسيمەن كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن ۋرۋگۆايدىڭ اراسىن تەڭىز - مۇحيت ءبولىپ تۇرعانىمەن، ۇستانىمى قارايلاس، دوستىعى تەرەڭ. 38 جىلدىڭ الدىنداعى بۇگىنگى كۇنى جۇڭگو مەن ۋرۋگۆاي ديپلوماتيالىق قارىم - قاتىناس ورناتتى. 38 جىلدان بەرى، حالىقارالىق جاعداي مەيلى قالاي وزگەرسە دە، ەكى ەل باستان - اياق ءوزارا قۇرمەت ەتۋ، ءوزارا پايدا جەتكىزىپ سەلبەسۋ سىندى وتاسۋ جولىنا تاباندى بولدى. جاڭا جاعدايدا ەكى جاق ءداستۇردى جالعاستىرىپ، جالپى بەتتىك ستراتەگيالىق سەرىكتەستىك قارىم - قاتىناستى تەرەڭدەتىپ، ەكى ەل دوستىق بايتەرەگىنىڭ بارعان سايىن ماۋەلەپ وسۋىنە مۇمكىندىك جاساۋى كەرەك.
شي جينپيڭ بىلاي دەپ باسا دارىپتەدى: جۇڭگو مەن ۋرۋگۆاي ەكى ەل ءبىر - ءبىرىنىڭ وزەكتى مۇددەسى جانە ءجىتى قاداعالاپ وتىرعان كەلەلى ىستەرى جونىنەن ءبىرىن - ءبىرى ۇزدىكسىز باتىل قولداپ، ءار جىكتەگى، جان - جاقتى دوستىق بارىس - كەلىستى جيىلەتىپ، ەل باسقارۋ تاجىريبەلەرى اۋىس - كۇيىسىن كۇشەيتىپ، ستراتەگيالىق ءوزارا سەنىمدىلىكتى ۇزدىكسىز تەرەڭدەتۋى كەرەك. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ جوبا ۇسىنىسىن ماقۇلداپ، الداعى 5 جىلداعى جۇڭگونىڭ ەكونوميكالىق، قوعامدىق دامۋىنا جوبا جاسادى ءارى ۋرۋگۆايدى قامتىعان ءار ەلدى ءتىپتى دە كوپ ورايمەن قامدادى. ەكى جاق دامۋ ستراتەگيالارىن ءتۇيىلىستىرۋدى كۇشەيتىپ، ەكونوميكا - ساۋدا، فينانس، ەگىن، مال شارۋاشىلىعى، نەگىزدىك قۇرىلعىلار قۇرىلىسى، ينفورماتسيا، حابارلاسۋ سياقتى جاقتارداعى سەلبەستىكتى تەرەڭدەتىپ، جاسىل دامۋ، سيفرلى ەكونوميكا، جاساندى زەردە، تازا ەنەرگيا سياقتى جاڭادان گۇلدەنگەن سالالارداعى سەلبەستىك كومەسكى كۇشىن اشىپ، ەكونوميكانىڭ ارتۋىن، تيبىن جاڭالاپ دارەجەسىن ءوسىرۋدى ىلگەرىلەتۋى كەرەك. جۇڭگو مەن ۋرۋگۆاي حالقىنىڭ تابيعي جاقىندىق سەزىمى بار، ەكى جاق مادەنيەت، وقۋ - اعارتۋ، دەنە تاربيە، مەديا، جەرگىلىكتى ورىن سياقتى جاقتاردا اۋىس - كۇيىستى ۇزدىكسىز تەرەڭدەتىپ، ادامداردىڭ بارىس - كەلىسىنە قولايلىلىق جاساپ، حالىق تىلەگىنىڭ توعىسۋىن جەبەۋى كەرەك.
شي جينپيڭ بىلاي دەپ اتاپ كورسەتتى: بۇگىنگى تاڭداعى دۇنيە ءجۇزى 100 جىلدا بولماعان زور وزگەرىس جاعدايىندا تۇر، حالىقارالىق جاعدايدا وزگەرىس پەن بىلىقپالىق قاباتتاسىپ، سىڭار جاقتىلىق، زورەكەرلىك بارعان سايىن ورشۋدە، جۇڭگو جاق ۋرۋگۆايدىڭ ”77 ەل توبى جانە جۇڭگو“ كەزەكتى ءتوراعا ەلى مىندەتىن وتكىزىپ الۋىن قولدايدى، ۋرۋگۆاي جاقپەن بىرگە جەر شارىنىڭ وڭتۇستىگىنىڭ ىنتىماعىن، سەلبەستىگىن نىعايتىپ، تەرەزەسى تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، قول ۇستاسا قاتار ىلگەرىلەپ، دامۋدى بىرگە كوزدەپ، ادامزاتتىڭ تاعدىرلاس ورتاق تۇلعاسىن قۇرۋعا اناعۇرلىم زور ۇلەس قوسۋدى قالايدى. جۇڭگو جاق باستان - اياق جۇڭگو − لاتىن امەريكاسى جانە كارايب ەلدەرى قارىم - قاتىناسىنا ءمان بەرىپ، لاتىن امەريكاسى جانە كارايب ەلدەرىنىڭ ءوز يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى، ۋرۋگۆايدىڭ لاتىن امەريكاسى جانە كارايب ەلدەرى ورتاق تۇلعاسىنىڭ جانە وڭتۇستىك جاق ورتاق بازارىنىڭ كەزەكتى ءتوراعا ەلى مىندەتىن وتكىزىپ الۋىن قولدايدى، ۋرۋگۆاي جاقپەن جانە وڭىردەگى ەلدەرمەن جۇڭگو − لاتىن امەريكاسى جانە كارايب ەلدەرى تاعدىرلاس ورتاق تۇلعاسىن بىرگە قۇرۋدىڭ تەرەڭدەۋىن، ناقتىلانۋىن ىلگەرىلەتۋدى قالايدى.
ورسي مىنالاردى ءبىلدىردى: جۇڭگو ءتوراعا شي جينپيڭنىڭ باسشىلىعىندا ۇلى تابىسقا قول جەتكىزدى، ادامدى سۇيىندىرەدى، ”15 - بەسجىلدىق“ جوبانىڭ دۇنيە جۇزىنە اناعۇرلىم زور وراي اكەلۋىن ءۇمىت ەتەمىز. بۇگىن ءدال ۋرۋگۆاي مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 38 جىلدىعى، ەكى ەلدىڭ جالپى بەتتىك ستراتەگيالىق سەرىكتەستىك قارىم - قاتىناسى تاريحتاعى ەڭ جاقسى مەزگىلدە تۇر. جۇڭگو ۋرۋگۆايدىڭ ماڭىزدى سەلبەستىك سەرىگى، ۋرۋگۆايدىڭ ەكونوميكالىق، قوعامدىق دامۋى ءۇشىن قالتقىسىز كومەك كورسەتتى. جۇڭگومەن قارىم - قاتىناستى دامىتۋ ۋرۋگۆايدىڭ مەملەكەت ساياساتىنا اينالىپ، ءارقايسى پارتيا - توپتار مەن قوعامنىڭ ءار سالاسىنىڭ ءبىر اۋىزدان قولداۋىنا يە بولدى. ۋرۋگۆاي جاق ءبىر جۇڭگو پرينسيبىن باتىل قولدايدى، ”ءبىر ەل، ەكى ءتۇزىم“ باعىتىن قولدايدى. ۋرۋگۆاي جاق جۇڭگو جاقپەن جالپى بەتتىك ستراتەگيالىق سەرىكتەستىك قارىم - قاتىناستى تەرەڭدەتىپ، ەكى جاقتى سەلبەستىكتى اناعۇرلىم جوعارى دەڭگەيگە كوتەرۋدى ءۇمىت ەتەدى. ەكى جاق دامۋ ستراتەگيالارىن ءتۇيىلىستىرۋدى كۇشەيتىپ، ساۋدا، قارجى قوسۋ، عىلىم - تەحنولوگيا، كەدەيلىكتى ازايتۋ، جاسىل ەكونوميكا، سيفرلى ەكونوميكا سياقتى سالالاردا سەلبەستىكتى تەرەڭدەتىپ، وقۋ - اعارتۋ، دەنە تاربيە، ساياحات سياقتى سالالارداعى گۋمانيتارلىق اۋىس - كۇيىستى جەبەپ، ەكى ەل قارىم - قاتىناسىنا ءتىپتى دە قۋاتتى قوزعاۋشى كۇش ۇستەپ، ەكى ەل حالقىنا اناعۇرلىم كوپ قۇت - ىرىس اكەلۋى كەرەك. ۋرۋگۆاي جاق ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسى ۇستانىمىن ايرىقشا القايدى، سىن - سايىسقا تولى حالىقارا جانە ءوڭىر جاعدايى الدىندا جۇڭگو جاقپەن قول ۇستاسا سەلبەسىپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىنە قۇرمەت ەتىپ، كوپ جاقتىلىققا تاباندى بولىپ، حالىقارالىق ساۋدا ءتۇزىلىسىن قورعاپ، لاتىن امەريكاسى جانە كارايب ەلدەرى − جۇڭگو قارىم - قاتىناسىنىڭ ۇزدىكسىز دامۋىن ىلگەرىلەتىپ، جەر شارىنىڭ وڭتۇستىگىنىڭ ورتاق مۇددەسىن قورعاۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى قارجى قوسۋدى جەبەۋ، ساۋدا سياقتى سالالارداعى 10 نەشە سەلبەستىك حۇجاتىنا قول قويىلۋىنا بىرگە كۋا بولدى.
كەڭەستەن بۇرىن شي جينپيڭ حالىق سارايىنىڭ سولتۇستىك زالىندا ورسيگە ارناپ قارسى الۋ سالتىن وتكىزدى.
ورسي جەتكەن كەزدە قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن ۋرۋگۆاي ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. ورسي شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.
سول كۇنى تۇستە شي جينپيڭ حالىق سارايىنىڭ جينسى زالىندا ورسيگە ارناپ قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
ساپار كەزىندە ەكى جاق «جۇڭحۋا حالىق رەسپۋبليكاسى مەن ۋرۋگۆاي شىعىس جاعالاۋ رەسپۋبليكاسىنىڭ جۇڭگو − ۋرۋگۆاي جالپى بەتتىك ستراتەگيالىق سەرىكتەستىك قارىم - قاتىناسىن تەرەڭدەتۋ جونىندەگى بىرلەسكەن مالىمدەمەسىن» جاريالادى.
