تيانشان حالىقارالىق اۋەجايىنداعى مەيىرگە تولى ساپارعا اتتانۋ
□ انار بۇلت \ شينجياڭ گازەتىنىڭ ءتىلشىسى ما ينيڭ
2 - ايدىڭ 2 - كۇنى 2026 - جىلعى كوكتەم مەرەكەسى تاسىمالىنىڭ شىمىلدىعى رەسمي اشىلدى، ءۇرىمجى تيانشان حالىقارالىق اۋەجايىندا ادامدار سەڭدەي سوعىلىسقانىمەن ءبارى دە ءتارتىپتى ءجۇرىلدى، اۋىلعا اتتانۋ قادامى مەن مەيىرلى قىزمەت وتەۋ توعىسىپ، كوكتەم مەرەكەسى تاسىمالىنىڭ العاشقى كۇنىندەگى مەيىرگە تولى كورىنىستى سۇلبالادى.
ءۇرىمجى تيانشان حالىقارالىق اۋەجايىنىڭ تەرمينالىندا جۇڭگو وڭتۇستىك اۆياتسياسىنىڭ قىزمەتكەرلەرى ەرمەك حايۋانداردى اۆياتسيا ساندىعىنا دەن قويا قوراپتاۋدا، ءاربىر ارەكەتىنەن كاسىبيلىك پەن ەتەنە جان اشىرلىق مەن مۇندالايدى. سول كۇنى جيىنى 9 ”ەرمەك بالاقاي“ يەسىمەن بىرگە وڭتۇستىك اۆياتسيا توبىنىڭ ۇشاعىنا وتىرىپ ساپارعا اتتاندى.
”اسىلىندە 2 ەرمەك حايۋاندى الىپ ءجۇرۋدىڭ اۋرەشىلىك تۋدىرۋىنان الاڭداعان ەدىم، مۇنداي ءساتتى بولارىن ويلاماپپىن، قىزمەت وتەۋ ادامدى مەيىرگە بولەيدى ەكەن“. ۇرىمجىدەن شاڭحايعا باراتىن جۇڭ مىرزا ۇشاققا شىعۋ راسمياتتارىن قولىنا الىپ، جۇزىنەن قۋانىش لەبى ەستى.
ۇشاق كۇتۋ عيماراتىندا وڭتۇستىك اۆياتسيا ءۇرىمجى − سان - يا جەلىسى ۇشاعىنا شىعۋ اۋزىنىڭ الدىندا جولاۋشىلار ۇزىننان - ۇزاق قاتارعا تۇردى. ”اكە - شەشەمدى ەرتىپ حاينانعا بارىپ قىستى سول جەردە وتكىزبەكپىن، چەمودانىمىزعا شينجياڭنىڭ كەپتىرىلگەن جەمىسى مەن قازىسى تولتىرىلعان، ءبارى دە تۋىستارعا الىپ بارا جاتقان مەرەكەلىك بۇيىم“، - دەدى اكە - شەشەسىن ەرتىپ ساپارعا شىعۋ الدىندا تۇرعان جولاۋشى جاڭ لي كۇلىپ.
كوكتەم مەرەكەسى تاسىمالى كەزىندە وڭتۇستىك اۆياتسيانىڭ شينجياڭ مەن حاينان اراسىنداعى اۋە جەلىسى ”سۋىقتان اۋاشا كەتۋ كەزەكشى ۇشاعىنىڭ“ كۇندىك ورتاشا كەزەكشى ۇشاق سانى 6 كەزەككە جەتىپ، جالپى ورىن سانى وتكەن جىلعى سايكەس مەزگىلدەگىدەن ％16 ارتىپ، ”جىل قۇسى ۇلگىسىندەگى“ ساپارعا شىققان جولاۋشىلارعا جەتكىلىكتى ءارى قولايلى كەزەكشى ۇشاق تاڭداۋىن ازىرلەدى. سونىمەن بىرگە شينجياڭنىڭ قىسىنىڭ قاتتى سۋىق بولۋ ەرەكشەلىگىنە مەڭزەس، وڭتۇستىك اۆياتسيا ”مەيىر جەتكىزۋ قالتاسىن“ تاراتىپ، جولاۋشىلاردىڭ قالىڭ كيىم - كەشەگىن سالۋىنا قولايلىلىق جاسادى؛ ءجۇرىس - تۇرىسى قولايسىز جولاۋشىلارعا ”اۆتوكولىك ەسىگىنەن ۇشاق ەسىگىنە دەيىنگى“ جىكسىز قىزمەت وتەۋدى العا قويدى.
ادامدار اراسىندا قىزىل كۇرمە كيگەن ءبىر توپ ەرىكتى ەرەكشە كوزگە تۇسەدى. بيىل ءۇرىمجى جوعارى، جاڭا تەحنولوگيا كاسىپ سالاسىن اشۋ رايونى (جاڭا قالا رايونى) الاۋ ەرىكتىلەر قوعامى قابىلداعان ”شۋاقتى قىس ارەكەتىنىڭ“ ءبىر مۇشەسى رەتىندە، قىزمەتكە شىعۋدان بۇرىنعى باۋلۋدى ەندى عانا اياقتاتقان ۋاڭ فاڭ كوكتەم مەرەكەسى تاسىمالىنىڭ العاشقى كۇنى قىزمەت وتەۋگە كىرىستى. ۇلكەندى - كىشىلى سومكە كوتەرگەن ءبىر قارتتىڭ حاۋىپسىزدىك تەكسەرۋ ەسىگىنە قاراي تالتىرەكتەي كەتىپ بارا جاتقانىن كورگەن ول دەرەۋ جىلدام باسىپ قاريانىڭ جانىنا بارىپ جۇكتەرىن الىپ: ”اپاي، مەن كوتەرىسىپ جىبەرەيىن، مىنا جاقتاعى مەيىر جەتكىزۋ ارناسىمەن جۇرسەڭىز ءتىپتى قولايلى“، - دەدى. ونىڭ جەتەكشىلىگىندە قاريا ”مەيىر جەتكىزۋ ارناسىنان“ ءساتتى ءوتتى.
شينجياڭ اۋەجاي (توبى) شەكتى جاۋاپكەرشىلىك سەرىكتەستىگى ءۇرىمجى حالىقارالىق اۋەجاي بولىمشە سەرىكتەستىگى وداق كوميتەتىنىڭ شۋجيى حان جيڭ بىلاي دەپ تانىستىردى: وسى رەتكى ”جاستىق كوكتەم ەرىكتىلەر ساپارى · ۇيگە قايتۋ جولىن مەيىرگە بولەۋ − شۋاقتى قىس ارەكەتىن“ ءۇرىمجى تيانشان حالىقارالىق اۋەجايى ءۇرىمجى جوعارى، جاڭا تەحنولوگيالىق كاسىپ سالاسىن اشۋ رايونى (جاڭا قالا رايونى) الاۋ ەرىكتىلەر قوعامىمەن بىرلەسىپ جۇرگىزىپ، قوعامنان، سونداي - اق جوعارى مەكتەپتەردەن تۇڭعىش توپتا 160 ەرىكتى قابىلداپ، ”ۇكىمەت − كاسىپورىن − مەكتەپ“ ەرىكتىلەر قىزمەت وتەۋ ۇلگىسىن تۇڭعىش رەت ورناتتى. ەرىكتىلەر تەرمينالدىڭ تۇس - تۇسىندا قاربالاس قىزمەت وتەپ، ەرىكتىلەردىڭ قىزىل ءتۇسى ارقىلى جولاۋشىلاردىڭ ۇيىنە قايتۋ جولىن نۇرلاندىردى.
جولاۋشىلار حاۋىپسىزدىگىن تەكسەرۋ رايونىندا جاڭادان ىسكە قوسىلعان ەلىمىزدە وندىرىلگەن A3 دارەجەلى ميلليمەتر تولقىندى حاۋىپسىزدىك تەكسەرۋ جابدىقتارى زور مولشەردە پايدالانىلدى. جولاۋشىلار تەك تەكسەرۋ تۇعىرىنا شىعىپ، قوس بىلەگىن جازسا بولعانى، نەشە سەكۋند ىشىندە جالپى بەتتىك حاۋىپسىزدىكتى تەكسەرۋ مىندەتى ورىندالادى، مۇندا مەتال بۇيىمدار دالمە - ءدال تەكسەرىلىپ عانا قويماي، مەتالعا جاتپايتىن تيىم سالىنعان بۇيىمدار دا تەز پارىقتالىپ، تەكسەرۋ بارىسىن ءارى حاۋىپسىز، ءارى ىركىلىسسىز ەتىپ، كوكتەم مەرەكەسى تاسىمالىنىڭ العاشقى كۇنىندە جولاۋشىلار تىلگە تيەك ەتكەن ”ىركىلىسسىز باستان كەشىرۋ“ بولدى.
اۋەجايدىڭ ۇدايىلانعان اشىق ”مەيىر جەتكىزۋ ارناسى“ قارتتارعا، جۇكتى ايەلدەرگە، بالا ەرتىپ جۇرگەن جولاۋشىلارعا جانە ءجۇرىس - تۇرىسى قولايسىز ادامدارعا ارناۋلى جول اشتى. كەشىگىپ كەلگەن جولاۋشىلار ءۇشىن اۋەجاي ”كەشىگىپ كەلگەندەر ارناسى“ جولىن اشىپ، جولاۋشىلاردىڭ ۇشاققا ءساتتى شىعۋىن بار كۇشپەن قامتاماسىز ەتتى؛ مەيىرگە تولى ”وتباسىلىق اتا - انا - بالا ارناسى“ اتا - انالاردىڭ بالالارىن ەرتىپ تەكسەرۋدەن قينالماي وتۋىنە مۇمكىندىك جاساپ، قاتارعا تۇرۋ، ءيىن تىرەسۋ ۋايىمىن ازايتتى.
كوكتەم مەرەكەسى تاسىمالىنىڭ العاشقى كۇنى ۇرىمجى تيانشان حالىقارالىق اۋەجايىندا ساپارعا اتتانار ساتتە مەيىرگە تولى ىستەر كورىنىس بەردى: حالىققا قولايلى قىزمەت وتەۋ تۇعىرىندا ىستىق سۋ، قاعاز ورامال جانە شۇعىل جاعدايعا توتەپ بەرۋ دارىلەرى بار؛ ەرىكتىلەر ادامدار اراسىندا ارى - بەرى ءوتىپ، ۋاعىندا جول باستاپ جاۋاپ قايتارىپ، جولاۋشىلاردىڭ كەرەك - جاراقتارىن تاسۋىنا كومەكتەستى... مەيىرگە تولى ءاربىر ۇساق - تۇيەك ىستەر قىستى كۇنگى جىلى اعىسقا اينالىپ، وتباسىلىق باس قوسۋعا اتتانۋدىڭ وسى رەتكى كوكتەم مەرەكەسى تاسىمالى ساپارىن قارقىندى ەتتى، اسىرەسە، شۋاقتى مەيىرگە بولەدى.
