بەيجيڭنەن ميلانعا دەيىن قار - مۇز داڭقى قىسقى وليمپيادا سپورت جارىسىندا شۇعىلا شاشتى
□ شينحۋا اگەنتتىگىنىڭ تىلشىلەرى ديڭ ۋىنشيان، ۋاڭ جۇنباۋ، يۋە ۋىنۋان
كوكتەم باسى، كالەنداردىڭ تاعى ءبىر پاراعى اشىلدى، ميلان قىسقى وليمپيادا سپورت جارىسى باستالۋعا تاياپ قالدى.
4 جىلدىڭ الدىندا ”قۇس ۇياسىندا“ جاڭعىرعان سالتانات ءۇنى قۇلاق تۇبىمىزدە ءالى جاڭعىرىپ تۇرعانداي. 2022 - جىلى 2 - ايدىڭ 4 - كۇنى دۇنيە ءجۇزى بەيجيڭگە كوز تىگىپ، اسقاق سەزىم مەن داڭق، ىنتىماق پەن ارمان جونىندەگى حيكايانىڭ بەتاشارى جازىلعان ەدى.
4 جىلدان بەرى وسىناۋ تەڭدەسسىز سالتاناتتى جينالىس جۇڭگونىڭ قىسقى سپورتىنىڭ بەت - بەينەسىندە تەرەڭ وزگەرىس تۋدىردى. ەلىمىزدىڭ سولتۇستىگىندەگى قارلى القاپتان جياڭنانداعى سۋلى مەكەنگە، كاسىپتىك ونەر باسەكەسى الاڭىنان مەكتەپتەگى قار - مۇز ساباعىنا، جابدىق ءوندىرىس جەلىسىنەن مادەنيەت - ساياحات تۇتىنۋ تىزبەگىنە دەيىن −2022 - جىلعى بەيجيڭ قىسقى وليمپيادا سپورت جارىسىنان شاشىراعان ۇشقىن لاۋلاعان جالىنعا اينالىپ، جۇڭگو قار - مۇز سپورتىنىڭ قارىشتاپ دامۋىن ىلگەرىلەتتى.
باس شۋجي شي جينپيڭ بىلاي دەپ اتاپ كورسەتتى: بەيجيڭ قىسقى وليمپيادا سپورت جارىسى ارقىلى جۇڭگودا 300 ميلليوننان استام ادام قار - مۇز سپورتىنا قاتىناسىپ، سالاماتتى جۇڭگو قۇرۋعا، حالىقتىڭ قۇت - ىرىسىن جەبەۋگە تىڭ قوزعاۋشى كۇش قوستى، سونداي - اق الەمدىك قار - مۇز سپورتىنىڭ دامۋىنا اناعۇرلىم كەڭ بولاشاق اشتى.
ونەر باسەكەسىنىڭ تىڭ بيىگى −
جۇڭگو ساڭلاقتارى دۇنيە ءجۇزىنىڭ قار - مۇز ساحناسىندا شۇعىلا شاشتى
”ەڭ سوڭعى ۇلكەن ەمتيحانعا نەبارى ءبىر ايعا جەتپەيتىن ۋاقىت قالدى، ءوزىمنىڭ اناعۇرلىم ۇستامدى دا بايسالدى، سابىرلى دا سەنىمدى بولىپ، ەڭ تاماشا كۇيمەن 2 - رەت قىسقى وليمپيادا سپورت جارىسىنىڭ ساحناسىنان كورىنۋىمدى ءۇمىت ەتەمىن“.
1 - ايدىڭ 19 - كۇنى قىسقى وليمپيادا سپورت جارىسىنىڭ الدىنداعى بارلىق جارىستاردى تامامداعان سۋ يميڭ نازارىن ميلانعا اۋداردى. ول ءۇرتىس 2 رەت سىڭار تاقتايمەن سىرعاناپ ۇلكەن تەكشەدەن سەكىرۋدەن دۇنيە ساۋىتىنا تالاسۋ جارىسىنىڭ اعا جۇلدەگەرلىگىنە قول جەتكىزىپ، داڭقتى تۇردە جىلدىق باس جۇلدەگەر بولدى ءارى قيا بەتتە كەدەرگىدەن ءوتۋ شەبەرلىگى بويىنشا دۇنيە ساۋىتىنا تالاسۋ جارىسىندا ءبىر كۇمىس، ءبىر قولا مەدال الىپ، ميلان قىسقى وليمپيادا سپورت جارىسىندا وسى 2 تۇردەن اعا جۇلدەگەرلىككە تالاساتىن كۇشتى باسەكەلەسكە اينالدى.
بەيجيڭ قىسقى وليمپيادا سپورت جارىسىندا ءبىر التىن، ءبىر كۇمىس مەدال الىپ، ءبىر جولدا بيىكتەن كورىنگەن ”2000 - جىلدان كەيىن تۋعان“ وسى جاس حالىقارالىق شاڭعى جانە سىڭار تاقتايمەن سىرعاناۋ بىرلەستىگى جاعىنان جاستار مەن ورەندەردىڭ قار - مۇز سپورتىمەن اينالىسۋىنا جەتەكشى بولاتىن جۇڭگو ۇلگىسى دەپ قارالىپ عانا قويماي، شاۋن ۋايت قاتارلى كوپتەگەن دۇنيە جۇزىنە ايگىلى ساڭلاقتاردىڭ دا نازارىن اۋداردى جانە القاۋىن الدى. تاياۋدا ول دۇنيە جۇزىندەگى تۇڭعىش ”ارقا ءتيىستىرىپ“ كەڭىستىكتە 1980 گرادۋس توڭقالاڭ اسۋ ارەكەتىن ىستەۋ ارقىلى گەننيس رەكوردىن جاراتتى.
دۇنيە ءجۇزىنىڭ قار - مۇز ساحناسىندا شۇعىلا شاشقان جۇڭگولىق جالعىز سۋ يميڭ عانا ەمەس. تاياۋدا گۋ ايليڭ ەركىن سىرعاناۋ بويىنشا قيا بەتتە كەدەرگىدەن ءوتۋ شەبەرلىگىنىڭ دۇنيە ساۋىتىنا تالاسۋ جارىسىنىڭ لاكس بەكەتىندە التىن مەدال الدى؛ ەركىن سىرعاناۋ بويىنشا كەڭىستىكتە ونەر كورسەتۋدىڭ ايگىلى شەبەرلەرى شۇي مىڭتاۋ، سۇن جياشۇي جەكە - جەكە ايەلدەردىڭ جانە ەرلەردىڭ دۇنيە ساۋىتىنا تالاسۋ جارىسىنىڭ جىلدىق باس جۇلدەگەرى بولدى؛ جاۋ دان مەن يىن جىڭ بولات سورەلى قار اربامەن دۇنيە ساۋىتىنا تالاسۋ جارىسىنىڭ سان - موريتز بەكەتىندە ارالاسپا توپتىق اعا جۇلدەگەر بولدى...
”بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋ ارقىلى ەلىمىزدىڭ قار - مۇز سپورتىنىڭ قارىشتاپ دامۋىن جەبەپ، ولقى سپورت تۇرلەرىن تولىقتاپ، ءالسىز سپورت تۇرلەرىن كۇشەيتىپ، باسەكەلىك دەنە تاربيەدە قۋاتتى، بۇقارالىق دەنە تاربيەدە ءالسىز بولۋ جانە ’جازعى سپورت تۇرلەرىندە قۋاتتى، قىسقى سپورت تۇرلەرىندە ءالسىز‘، ’مۇز سپورتىندا قۋاتتى، قار سپورتىندا ءالسىز‘ بولۋ ماسەلەسىن بىرتىندەپ شەشىپ، جاڭا داۋىردەگى دەنە تاربيە ىستەرىنىڭ جوعارى ساپالى دامۋىن ىلگەرىلەتۋ كەرەك“. باس شۋجي شي جينپيڭنىڭ تاپسىرماسى ميلليارد بۇقارانىڭ جاندى امالياتىنا اينالۋدا.
بەيجيڭ قىسقى وليمپيادا سپورت جارىسىن وتكىزۋدى ءوتىنىش ەتۋ ءساتتى بولعان العاشقى مەزگىلدە ەلىمىزدىڭ ۇشتەن بىرىنە جۋىق قىسقى سپورت تۇرلەرى ءالى دە اق تۇرعان ەدى. قىسقى وليمپيادا سپورت جارىسى وتكىزىلەتىن كەزگە جەتكەندە جۇڭگو بارلىق سپورت تۇرىنەن جارىسقا قاتىناسۋدى جۇزەگە اسىردى، سونداي - اق 9 التىن، 4 كۇمىس، 2 قولا مەدالمەن تاريحتاعى ەڭ تاماشا ناتيجەنى جاراتىپ، التىن مەدال تاقتاسىنىڭ الدىڭعى 3 ورنىنان كورىندى. مۇنىڭ ىشىندە قار ءۇستى سپورت تۇرلەرىنەن التىن مەدال سانى تۇڭعىش رەت مۇز ءۇستى سپورت تۇرلەرىنەن اسىپ، ۇزاق ۋاقىتتان بەرگى ”مۇز سپورتىندا قۋاتتى، قار سپورتىندا ءالسىز“ بولۋ جاعدايىن وزگەرتتى.
سۋ يميڭ، گۋ ايليڭ قاتارلى جاڭا ۇرپاق سپورتشىلار جارىس الاڭىندا داڭقىن اسىرىپ عانا قويماي، سەنىمدى دە سابىرلى، اشىق - جارقىن بەينەمەن دۇنيە جۇزىنە جۇڭگو جاستارىنىڭ كەلبەتىن ايگىلەپ، ءتىپتى دە كوپ جاستار مەن ورەندەردى قار - مۇز الاڭىنا شىعۋعا جىگەرلەندىردى.
وتكەن 4 جىلدا بەيجيڭ قىسقى وليمپيادا سپورت جارىسى پەريودىندا قۇرىلعان كاسىپتىك جاتتىعۋ جۇيەسى، حالىقارالىق اۋىس - كۇيىس تۇعىرى جانە زاپاس دارىندىلار ساتىلى قوسىنى جۇڭگونىڭ قار - مۇز سپورتىنىڭ دامۋىنا ۇزدىكسىز پارمەندى قوزعالىس قۋاتىن ۇستەدى.
2024 - جىلى 14 - كەزەكتى مەملەكەتتىك قىسقى سپورت جارىسىندا قىسقى وليمپيادا سپورت جارىسى تۇرلەرى ولشەمىنە جاپپاي تۋرالانىپ، 17 ولكە، اۆتونوميالى رايون، قالا تۇڭعىش رەت ۇيىرمە قۇراپ جارىسقا قاتىناستى. شاڭحاي، گۋاڭدۇڭ، جىجياڭ قاتارلى وڭتۇستىك جاقتىڭ ۋاكىلدەر ۇيىرمەلەرى التىن، كۇمىس مەدالداردى الا باستادى، حىنان، سىچۋان، گۋاڭشي، گۇيجوۋ قاتارلى جەرلەردىڭ دەربەس باۋلىعان سپورتشىلارى سيلىق ساحناسىنان كورىندى.
ءبىر جىلدان كەيىنگى حاربين ازيا قىسقى سپورت جارىسىندا جۇڭگو ۋاكىلدەر ۇيىرمەسى 32 التىن، 27 كۇمىس، 26 قولا مەدالمەن التىن مەدال تاقتاسىندا جانە مەدال تاقتاسىندا الدىڭعى ورىندى يەلەدى. قار ءۇستى سپورت تۇرلەرىنەن التىن مەدال سانى مۇز ءۇستى سپورت تۇرلەرىنەن تاعى دا اسىپ، قار، مۇز سپورتىنا تەڭ ءمان بەرىپ، كوپ تۇيىندە گۇل اشاتىن باسەكە جاعدايى ونان ارى بەكەمدەلدى.
”مۇز قالادا“ ساقا ساڭلاق شۇي مىڭتاۋ اقىرى ازيا قىسقى سپورت جارىسىنىڭ التىن مەدالىن الۋ ارمانىن ورىندادى؛ ميلاندا وسى ”بەس كەزەكتى قىسقى وليمپيادا سپورت جارىسىنىڭ ساقا ساڭلاعى“ قىسقى وليمپيادا سپورت جارىسىنىڭ ءۇرتىس ەكى رەت اعا جۇلدەگەرى بولۋعا ۇمتىلادى.
ميلان قىسقى وليمپيادا سپورت جارىسىنا قاتىناساتىن جۇڭگو سپورت ۋاكىلدەر ۇيىرمەسى 286 ادامنان قۇرالعان، بۇلاردىڭ اراسىندا سپورتشى 126 ادام بولىپ، 7 ۇلكەن ءتۇر، 15 ءبولىندى ءتۇر، 91 كىشى ءتۇر بويىنشا بەلدەسەدى، بۇل ەلىمىزدىڭ قىسقى وليمپيادا سپورت جارىسىنىڭ شەتەلدە قاتىناساتىن جارىس ءتۇرى ەڭ كوپ، سپورتشىلار كولەمى ەڭ ۇلكەن ءبىر كەزەك جارىسى بولماق.
ءىشىنارا جارىس تۇرلەرىنەن التىن مەدال الۋعا قۇلشىنۋدان بارلىق تۇردە جارىسقا قاتىناسىپ باق سىناۋعا دەيىن، جۇڭگونىڭ قار - مۇز سپورتى جەكە تۇرلەردە توپ جارۋدان تۇتاس اۋماقتىق قامال الۋ قابىلەتىنىڭ جوعارىلاۋىنا دەيىن الەمدىك قار - مۇز باسەكەلى جارىسىندا نەمقۇرايدى قاراۋعا بولمايتىن كۇشكە اينالدى.
وسى جولى سۋ يميڭ ياڭ ۋىنلۇڭ، گى چۇنيۇيمەن تىزە قوسا شايقاسقا شىعادى. كوكىرەكتە اسقاق ارمان تۇر، ول: وسى جولعى نىسانام ”بەس جۇلدىزدى قىزىل تۋدى بيىكتە جەلبىرەتۋ“! - دەدى.
ات سالىسۋدىڭ تىڭ ءورىسى −
”300 ميلليون ادام“ قىسقى سپورتتىڭ الەمدىك كارتاسىن جاڭالادى
حيلۇڭجياڭدا بيىلعى قىس بۇرىنعىدان وزگەرەك.
چيتايحىداعى تاۋشان كولىنىڭ مۇز قۇرسانعان بەتىندە شاڭعى دۇزىنەن سىزىلعان اسەم دوعاشا سىزىقتار قالىپ جاتىر؛ نەشە ءجۇز كيلومەتر شالعايداعى سۇڭحۋاجياڭ وزەنىندە تۇرلىشە ناسىلدەگى جۇرگىزۋشىلەر مۋزيكاعا ەلىتە قار ۇستىندە العا ىلگەرىلەۋدە؛ قالاداعى الەۋمەتتىك يگىلىك سيپاتتى مۇز الاڭدارىندا قار ۇستىندە ارقان تارتقانداردىڭ ۇرانى، نۇر سوققانداعى شارتىلداعان داۋىس پەن كورەرمەندەردىڭ الاقايلاعان ءۇنى ارالاسىپ كەتكەن...
”مۇز كەرەمەتى“ الەمدى جالت قاراتتى، تالايلاعان قىزىقتى جارىستار جەرگىلىكتى تۇرعىنداردىڭ ەسىنە اسەرلى ”بالالىق شاقتىڭ ەستەمەلەرىن“ ءتۇسىردى، وڭتۇستىكتەن كەلگەن ساياحاتشىلار ”قۇمارتىپ قالدىق“! - دەستى.
جيلين، ىشكى موڭعۇل جانە شينجياڭ سياقتى جەرلەردە بالالار تۇڭعىش ”قار دەمالىسىن“ وتكىزدى. مادەنيەت - ساياحات، وقۋ - اعارتۋ، ادام كۇشى بايلىعى جانە قوعامدىق قامتاماسىزداندىرۋ، دەنە تاربيە سياقتى تاراۋلار بىرلەسىپ قىزمەت جوباسىن باسىپ تاراتىپ، ”وقۋشىلارعا تەگىن بولۋ، اتا - انالارعا تيىمدىلىك جاساۋ، جۇمىسشى - قىزمەتكەرلەردىڭ دەمالىسىن رەتتەۋ“ سىندى ساياساتتىق كەشەندى شارالاردى اتقاردى.
مۇز ءۇستى، قار ءۇستى سپورتىن بالا كەزدەن باستاپ مىقتى يگەرىپ، جالپى حالىقتىڭ ات سالىسۋ ەكولوگياسى كۇننەن - كۇنگە تولىستى. حيلۇڭجياڭ ءار جىلدىڭ ەڭ سوڭعى اپتاسىن ”ورتا، باستاۋىش مەكتەپ وقۋشىلارىنىڭ قار - مۇز اپتالىعى“ ەتىپ بەلگىلەدى؛ بەيجيڭنىڭ يانچيڭى سابيلەردى قار - مۇز سپورتىن جالپىلاستىرۋ كولەمىنە ەنگىزدى؛ ىشكى موڭعۇلدىڭ كوكحوتى ۇلكەن شىعاناق رايونىنداعى مىڭداعان وقۋشى وتىرعان قار - مۇز زەرتتەۋ - ۇيرەنۋ ارناۋلى پويەزىن قارسى الدى...
سوڭعى جىلداردان بەرى، قار - مۇز سپورتى ۇزدىكسىز كۇشەيدى: «بۇقارالىق قار - مۇز تۇتىنۋ بازارىن زەرتتەۋ بايانداماسىندا (2024 -، 2025 - جىلعى قار - مۇز ماۋسىمى)» كورسەتىلۋىنشە، وسى قار - مۇز ماۋسىمىندا بۇكىل ەل بويىنشا قار - مۇز سپورتىنا قاتىناسقان ادام سانى 292 ميلليونعا جەتىپ، قاتىناسۋ مولشەرى ％61. 20 بولىپ، الدىڭعى ماۋسىمداعىدان شامامەن 27 ميلليون 440 مىڭ ادام ارتقان.
جۇڭگونىڭ قار - مۇز سپورتى ”شانحايگۋاننىڭ“ جاعراپيالىق شەكاراسىن الدەقاشان بۇزىپ ءوتىپ، ”وڭتۇستىككە ورىستەپ، باتىسقا كەڭەيىپ، شىعىسقا ىلگەرىلەۋدى“ جۇزەگە اسىردى. ساندى مالىمەتتە كورسەتىلۋىنشە، 2025 - جىلى 4 - ايعا دەيىن بۇكىل ەلدەگى 79 بولمە ءىشى شاڭعى الاڭىنىڭ 55ى وڭتۇستىكتەگى ولكەلەرگە ورنالاسقان.
شاڭعى تەبۋ بىرتىندەپ تۇرمىسقا ەنۋدە. بيىل جاڭا جىلدا گۋاڭجوۋلىق لي مىڭشى ۋحاندا ساياحاتتاپ جۇرگەندە ومىرىندە ”تۇڭعىش رەت سىرعانادى“. ”تۇستەن بۇرىن حۋاڭحىلوۋ عيماراتىن ارالاپ، تۇستە ساۋدا سارايىندا تۇستەنىپ، تۇستەن كەيىن ليفتپەن شىعىپ شاڭعى تەپتىم“. قولايلى سەزىنۋ ونى قاتتى قۋانتتى.
ۋحان دەنە تاربيە شۋەيۋانى اقپارات تاراتۋ شۋەيۋانىنىڭ پروفەسسورى جاڭ دىشىڭ بىلاي دەپ قارادى: بەيجيڭ قىسقى وليمپيادا سپورت جارىسى قار - مۇز قۇرىلعىلارىنىڭ جالپىلاسۋىن ىلگەرىلەتتى، اسىرەسە، وڭتۇستىك پەن باتىس بولىكتەگى وڭىرلەرگە تيىمدىلىك جەتكىزدى؛ قاتىناسۋ شارتىن تومەندەتىپ، قار - مۇز مادەنيەتىن جەتىلدىردى، بۇل ۇزاق ۋاقىت ءونىمدى دامۋ مەحانيزمىن قالىپتاستىرۋعا ءتيىمدى.
2022 - جىلى 1 - ايدا بەيجيڭ قىسقى وليمپيادا سپورت جارىسىن وتكىزۋگە نەلىكتەن ءوتىنىش بەرىلگەندىگىن تىلگە العاندا، باس شۋجي شي جينپيڭ بىلاي دەپ باسا دارىپتەدى: ”ەرتەدە وتكىزۋگە ءوتىنىش بەرگەن كەزدە، مەن جۇڭگونىڭ وسى رەت وليمپيادا سپورت جارىسىن وتكىزۋدەگى ەڭ ۇلكەن ماقساتى 300 ميلليون ادامدى قار - مۇز سپورتىنا قاتىناسۋعا باستاۋ دەگەندى العا قويعان ەدىم“.
حالىقارالىق وليمپيادا كوميتەتىنىڭ ومىرلىك قۇرمەتتى ءتوراعاسى باح تالاي رەت بىلاي دەپ ماداقتادى: ”300 ميلليون ادامدى قار - مۇز سپورتىنا قاتىناسۋعا باستاۋ“، ”الاڭ - سارايلاردى بۇقاراعا جاپپاي اشىق ۇستاۋ“ سياقتى قىسقى وليمپيادا مۇراسى ارقىلى بەيجيڭ قىسقى وليمپيادا سپورت جارىسى قىسقى سپورتتىڭ دۇنيە جۇزىلىك كارتاسىن اشتى، كوپتەگەن جاسامپازدىق شارالار وليمپيادا سپورتىنا ”جاڭا ۇلگى ورناتتى“.
بەيجيڭنىڭ جەلىلەس تاجىريبەلەرىن ميلان قىسقى وليمپيادا سپورت جارىسىن ۇيىمداستىرۋ كوميسسياسى دا قابىلداپ پايدالاندى. ميلان قىسقى وليمپيادا سپورت جارىسى باستالۋدىڭ الدىندا حالىقارالىق وليمپيادا كوميتەتىنىڭ ءتوراعاسى كاۆەنچۇي بەيجيڭ قىسقى وليمپيادا سپورت جارىسىنداعى ”سۋ تەكشەنى“ ”مۇز تەكشەگە“ وزگەرتۋدى عىلىم - تەحنولوگيالىق قۋات ۇستەيتىن الاڭ - سارايلاردىڭ وزىق ۇلگىسىنە مىسال ەتىپ، ميلاننىڭ دايىندىق قىزمەتتەرىنىڭ بەيجيڭ قىسقى وليمپيادا سپورت جارىسىنىڭ تابىستى تاجىريبەلەرىنەن ۇلگى العاندىعىن ءبىلدىردى −بۇل سونىمەن بىرگە جارىستى باياندى وتكىزۋ جاعىندا دا بەينەلەندى.
ول بىلاي دەپ باسا دارىپتەدى: ”بەيجيڭ قىسقى وليمپيادا سپورت جارىسى بىزگە قازىر بار قۇرىلعىلاردى قالاي جانداندىرۋ جونىندە ۇلگى كورسەتتى، بۇل ۇلگى امالياتتىڭ سىنىنان وتكەن، ناتيجەسى كورنەكتى، كەلەشەكتە ءبىز بۇعان ۇزدىكسىز تاباندى بولامىز“.
”جۇڭگو اقىل - پاراساتىن“ ايگىلەپ، ”جۇڭگو جوباسىن“ ۇسىنعان جۇڭگو قىسقى وليمپيادا سپورتىنىڭ بەلسەندى قاتىسۋشىسىنان ماڭىزدى ۇلەس قوسۋشىسىنا اينالۋدا.
كاسىپ سالاسىنىڭ جاڭا ىقىلاسى −
اق قار، كوك مۇزدى باعالى بايلىققا اينالدىردى
”بۇل ءبىزدىڭ مەملەكەتتىك كوماندا ءۇشىن ارنايى زەرتتەپ جاساعان شاڭعىمىز، تالاي رەت سىناقتان وتكىزىلدى، ميلان قىسقى وليمپيادا سپورت جارىسىندا كورىنسە دەگەن ۇمىتتەمىز“، - دەدى 1 - ايدا حاربين حالىقارالىق قار - مۇز ەكونوميكا كورمەسىندە حاربين چيانماۋ شۋەلۇڭ دەنە تاربيە بۇيىمدارى شەكتى سەرىكتەستىگىنىڭ باس ديرەكتورى لي جىبو ەكسكۋرسيالاۋشىلارعا تانىستىرىپ. وسى سەرىكتەستىك وندىرگەن قار شاڭعى تۇتاس جەلىلەس ونىمدەرى بۇكىل ەلدەگى 80 پايىز شاڭعى الاڭىن قامتىدى، بيىل قىسقى تاپسىرىس مولشەرى بۇرىنعى جىلدارداعى سول تۇستاعىدان زور مولشەردە ارتتى.
3000 كيلومەتر شالعايداعى شيامىندا كوپتەگەن حالىقتىق كاسىپورىندار دا قار - مۇز بازارىنىڭ ىقىلاسىن سەزىندى. وسى كەزەكتى قىسقى وليمپيادا سپورت جارىسىنىڭ تاۋ شاڭعى، دالالىق شاڭعى شەبەرلەرى پايدالاناتىن شاڭعى تاياعى، سولتۇستىك امەريكا كاسىپتىك حوككەي بىرلەسپە جارىسىنىڭ سپورتشىلارى پايدالاناتىن دۋلىعا، قولعاپ، قورعانۋ جابدىقتارى كوبىنەكي وسى جىلى تەڭىز جاعالاۋىنداعى قالادا وندىرىلەدى.
”بەيجيڭ قىسقى وليمپيادا سپورت جارىسىن وتكىزۋگە ءوتىنىش بەرۋ ءساتتى بولۋدان بۇرىن شاڭعى تەبۋ جابدىقتارى مەن بولشەكتەرىن جاسايتىن ساۋداگەرلەردى كوپ كەزىكتىرمەيتىنبىز. وليمپيادا سپورت جارىسىن وتكىزۋگە ءوتىنىش بەرۋ ءساتتى بولعاننان كەيىن قاتىستى ساۋداگەرلەر جاڭبىردان كەيىنگى كوكتەي قاۋلادى“، - دەدى يۋەيەرىن (شيامىن) ونەركاسىپ - ساۋدا شەكتى سەرىكتەستىگىنىڭ باس ديرەكتورى جىڭ جوۋياڭ اسەرلەنە.
”اق قار، كوك مۇز دا باعالى بايلىق“. بەيجيڭ قىسقى وليمپيادا سپورت جارىسى كۇشتى موتور سياقتى جۇڭگونىڭ قار - مۇز كاسىپ سالاسىنىڭ جارىس ارقىلى جەتەكتەۋدىڭ قىسقا مەرزىمدىك ورلەۋىنەن جابدىق جاساۋ، جارىس ىستەرىن جۇرگىزۋ، باۋلۋ قىزمەت وتەۋى، مادەنيەت پەن ساياحاتتى توعىستىرۋدى قامتىعان تۇتاس كاسىپ سالاسى تىزبەگىنىڭ جوعارى ساپالى دامۋ ارناسىنا قاراي ويىسىپ، دەنە تاربيە كاسىپ سالاسىىنىڭ، ءتىپتى، حالىق شارۋاشىلىعىنىڭ جاڭا ارتۋ تۇيىنىنە اينالۋىن ىلگەرىلەتتى.
«جۇڭگو قار - مۇز ەكونوميكاسىنىڭ دامۋى جونىندەگى باياندامادا (2025)» كورسەتىلۋىنشە، 2016 - جىلدان 2024 - جىلعا دەيىن ەلىمىزدىڭ قار - مۇز كاسىپ سالاسىنىڭ كولەمى 364 ميلليارد 700 ميلليون يۋاننان 980 ميلليارد يۋانعا جوعارىلاعان، 2025 - جىلى ءبىر تريلليون يۋاندىق وتكەلدەن وتەتىندىگى مەجەلەنگەن؛ قار - مۇز ساياحاتشىسى (رەت) ءۇرتىس ءۇش قار - مۇز ماۋسىمىندا 300 ميلليوننان اسقان.
شاڭعىنىڭ ءدۇزى ۇلپا قاردى ءتىلىپ ءوتتى، التاي توپ - توپ شاڭعى ”اۋەسكەرلەرىن“ قارسى الدى؛ قار - مۇز كوركەمونەرى شىعىس سولتۇستىكتىڭ حالىقتىق سالت - ساناسىمەن توعىسىپ، ”ىربين“ قۇبىلىس دەڭگەيىندەگى مادەنيەت - ساياحاتتىڭ كوزەۋلى جەرىنە اينالدى؛ دالالىق جارىس، مارافون جارىستارى قوسىلىپ، 2024 - جىلدىڭ جازىندا ساياحاتشىلاردىڭ سانى تۇڭعىش رەت قىس ماۋسىمىنداعىدان اسىپ ءتۇستى... ”ءبىر ماۋسىمدا جاندانۋدان“ ”ءتورت ماۋسىمدا شالقۋعا“، جالاڭ كاسىپ سالاسىنان توعىسقان كاسىپ كۇيىنە دەيىن ”قار - مۇز ورلەۋى“ بۇقارانىڭ تۇتىنۋ ىنتاسى مەن كومەسكى كۇشىن ۇزدىكسىز قاۋلاتتى.
قازىر شينجياڭعا بارىپ شاڭعى تەۋىپ، جيليندە قىراۋدى تاماشالاپ، سىگۋنياڭ تاۋىنا بارىپ قارلى تاۋدى، بۇلت تەڭىزىن تاماشالاۋ شەتەلدىك ساياحاتشىلاردىڭ قوعامدىق قارىم - قاتىناس تۇعىرىنداعى ءوتىمدى تانىستىرۋىنا اينالدى. تايلاندتىق ساياحاتشى شيليپون ۆانارا بالاسىن ەرتىپ حاربين مۇز شامى باقشاسىن مەيلىنشە تاماشالادى، ”تەگىن اشىلعان باقشادا سەيىلدەپ، قالانىڭ تىنىسىن سەزىندىك، ناعىز تۇرمىس مىنە وسى“.
”مەن بۇرىن بەيجيڭ قىسقى وليمپيادا سپورت جارىسى وتكىزىلۋدىڭ الدى - ارتىندا جۇڭگونىڭ قىسقى سپورتىندا وراسان زور وزگەرىس تۋىلادى دەگەن ەدىم، اماليات مۇنى دالەلدەدى“. وتكەن 4 جىلدى ەسكە العاندا، باح بىلاي دەپ قارادى: بەيجيڭ قىسقى وليمپيادا سپورت جارىسى جۇڭگونىڭ، اۋەلى، دۇنيە ءجۇزىنىڭ قار - مۇز سپورتىنىڭ جاڭا ءداۋىرىن اشتى.
جۇڭگونىڭ وراسان ۇلكەن بازارىنىڭ كومەسكى كۇشى مەن ۇزدىكسىز جاقسارعان جاڭالىق اشۋ ورتاسى دۇنيە ءجۇزىنىڭ قار - مۇز الپاۋىتتارىن ۇزدىكسىز باۋراۋدا. ال قىسقى وليمپيادا سپورت جارىسىنىڭ بەيجيڭدە جانە ميلاندا ىركەس - تىركەس وتكىزىلۋى جۇڭگو مەن يتاليا ەكى ەلدىڭ قار - مۇز كاسىپ سالاسىندا تىزە قوسا سەلبەستىك جاساسۋىنىڭ ورايىنا اينالدى.
قار - مۇز جابدىقتارىن جاساۋشى يتاليا تەحنو - الپين توبىنىڭ ونىمدەرى دۇنيە ءجۇزى بازارىنىڭ شامامەن ％60تەن استامىن ۇستايدى. توپتىڭ جۇڭگو ءوڭىرى بويىنشا بازار باس باقىلاۋشىسى شىن يۇيمەي بىلاي دەدى: الداعى ۋاقىتتا توپ جۇڭگودا دۇنيە جۇزىندەگى 4 - ۇلكەن جابدىق ورتالىعىن قۇرىپ، جۇڭگونىڭ قار - مۇز سپورتىنىڭ دامۋىنا دەم بەرۋدى، سونداي - اق شىعىس وڭتۇستىك ازيا جانە جاپونيا − كورەيا بازارىنا اناعۇرلىم ىقپال جاساۋدى جوسپارلاپ وتىر.
بەيجيڭنەن ميلانعا دەيىن ۋاقىت - كەڭىستىك اۋىسقانىمەن، وزگەرمەيتىنى دەنە تاربيەنىڭ ادامنىڭ جان - جاقتى دامۋىن جانە ەكونوميكانىڭ، قوعامنىڭ العا باسۋىن ۇزدىكسىز ىلگەرىلەتەتىن جاندى امالياتى.
بەيجيڭنەن ميلانعا دەيىن قار - مۇز تۇتاسىپ جاتقانىمەن، وزگەرمەيتىنى ارمان مەن داڭققا تالپىنۋدىڭ، ادامزاتتىڭ تاعدىرلاس ورتاق تۇلعاسىن قۇرۋدىڭ شۇعىلالى داستانىن جازۋ.
(شينحۋا اگەنتتىگىنىڭ 2 - ايدىڭ 5 - كۇنى ميلاننان بەرگەن حابارى)
