باقىتتىڭ ءبارى كۇرەستەن كەلەدى
− باس شۋجي شي جينپيڭنىڭ كۇرەس رۋحى جونىندەگى ماڭىزدى بايىمداۋلارىن ىشكەرىلەي ۇيرەنۋ تۋرالى جەلىلەس شولۋ (1)
□ شينحۋا اگەنتتىگىنىڭ تىلشىلەرى جۋ جيچاي، حۋ حاۋ، گاۋ لەي
بيڭ - ۋ جىلقى جىلعى كوكتەم مەرەكەسىنىڭ شۇعىلاسى جۇڭگونىڭ بايتاق دالاسىن نۇرلاندىردى، بارلىق جەردەن كۇرەستىڭ بەينەسىن كورۋگە بولادى، بارلىق جەردەن جالىندى تىرشىلىك تىنىسى قاۋلادى −
ءتۇيىندى ينجەنەريا قۇرىلىسى جۇمىس باسىندا قۇرىلىسشىلار قيان - كەسكى شايقاس جۇرگىزۋدە؛ ءوندىرىس سەحىندا جۇمىسشىلار بار كۇشىن سالىپ تاپسىرىستى ۇلگىرتۋدە؛ تاجىريبەحانادا عىلمي زەرتتەۋ قىزمەتكەرلەرى تىنباي قامال الىپ، جاڭالىق اشۋدى توقتاتپادى...
”باقىتتىڭ ءبارى كۇرەستەن كەلەدى“، ”كۇرەستىڭ ءوزى باقىت“، ”ارمان ءۇشىن كۇرەسۋ، باقىت ءۇشىن شايقاسۋ“. كونە جىلعا قوش ايتىپ، جاڭا جىلدى قارسى الۋ قارساڭىندا، باس شۋجي شي جينپيڭ تالاي رەت ماركسيزمدىك اماليات كوزقاراسىنىڭ فيلوسوفيالىق اقىل - پاراساتىمەن ”باقىت“ پەن ”كۇرەستىڭ“ ديالەكتيكالىق بىرلىك قاتىناسىن بايىمدادى.
باسىپ وتكەن جولعا قايىرىلا قاراساق، باقىتتىڭ جاۋابى قاجىماي - تالماي سايىسۋ بارىسىنا ويىپ جازىلعان، بوران - شاشىندى ساپار بارىسىنا سىڭگەن.
سوعىس ءورتى لاۋلاعان توڭكەرىس جىلدارىندا ءدال ”ميلليونداعان جۇمىسشى - شارۋانى وياتىپ، ءبىر نيەتپەن ىستەۋدىڭ“ ارقاسىندا ”شىرقاسىمەن اتەشتىڭ نۇرلاندى استى اسپاننىڭ“؛
قاجىرلىلىقپەن شارۋاشىلىق قۇرعان سوتسياليستىك قۇرىلىس مەزگىلىندە ءدال ”ءار الاپتان باتىرلاردىڭ ىمىرت جابىلا قايتۋىنىڭ“ ارقاسىندا ”قوڭىر كۇز سامالى ەسىپ، ەل اراسىندا وزگەرىس تۋىلدى“؛
كوكتەم سامالى ەسىپ، رەفورما جاساعان، ەسىك اشقان مەزگىلدە ءدال ”شايقاسپەن جول اشىپ“ باتىلدىقپەن جاۋاپكەرشىلىك ارقالاۋدىڭ ارقاسىندا ”شىعىستان جەل ەسىپ كوكتەمدەي جاينادى“؛
وزگەرىسكە تولى جاڭا داۋىردە ءجۇز ميلليونداعان حالىق ”جاڭا ءداۋىر كۇرەسكەرلەردىڭ ءداۋىرى“ دەگەندى كوكەيدە بەرىك ساقتاپ، ارەكەتىندە ايگىلەگەندىكتەن، ”دۇنيەنى ءدۇر سىلكىندىرگەن“ تاريحي جەتىستىك پەن تاريحي وزگەرىستى قۇلشىنا جارىققا شىعاردى.
ءدال باس شۋجي شي جينپيڭ باسا دارىپتەگەندەي: ”جۇڭگو حالقى ەجەلدەن انىق بىلەدى، دۇنيەدە ەڭبەك ەتپەي ىرعىنعا كەنەلەتىن جاقسى ءىس جوق، باقىت ءۇشىن كۇرەسۋ كەرەك“. ”جاڭا داۋىردەگى ۇلى تابىستارعا پارتيا مەن حالىق بىرلىكتە ايانباي ەڭبەك ەتۋ، ىستەۋ، كۇرەس جۇرگىزۋ ارقىلى قول جەتكىزگەن“.
پارتيا 20 - قۇرىلتايى جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ جاڭا جورىعىنىڭ ەكپىندەي ىلگەرىلەۋ دابىلىن قاقتى. باس شۋجي شي جينپيڭ پارتيا 20 - قۇرىلتايىنان كەيىن، تۇڭعىش رەت بەيجيڭنەن شىعىپ قىزمەت تەكسەرگەندە، 100 مىڭ بۇقارا 10 جىل قاجىرلىلىقپەن ىستەپ، قۇلاما قۇزدار اراسىنان شاۋىپ اشقان ”جاساندى قۇس جولى“ حىنان قىزىلتۋ توعانىنا كەلدى، مۇندا ايتىلعان سوزدەر ادامدى جىگەرلەندىرەدى: ”سوتسياليزم سايىسۋمەن كەلگەن، ىستەۋمەن كەلگەن، قۇرباندىق بەرۋمەن كەلگەن، بۇرىندارى وسىلاي عانا ەمەس، جاڭا داۋىردە دە وسىلاي بولادى“.
اياعىمىزدىڭ استىنداعى جول ەجەلدەن تەگىس ەمەس.
2025 - جىلعا قايىرىلا قاراساق، جۇڭگو ەكونوميكاسى قاتاڭ قيىنشىلىقتار مەن سىن - سايىستارعا ءدوپ كەلدى، شي جينپيڭ جولداستى ۇيتقى ەتكەن پارتيا ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ، باستاپ، قيىندىقتان تايسالماي العا ۇمتىلىپ، قۇلشىنا شايقاسىپ، تاريحي ىرىقتىلىق رۋحىمەن قيىن وتكەلدەردەن ءوتىپ، حاۋىپ - قاتەردى جەڭىپ، سىن - سايىسقا قارسى اتتانىپ، كۇشتى شوعىرلاندىرا وتىرىپ ءوز ىستەرىن ويداعىداي ىستەدى، ەلىمىزدىڭ ەكونوميكالىق اينالىمى جالپى جاقتان ورنىقتى بولىپ، ورنىقتىلىق بارىسىندا ىلگەرىلەپ، جوعارى ساپالى دامۋدا تىڭ تابىستارعا قول جەتكىزدى. جۇڭگو ۇلگىسىندەگى وسىزامانداندىرۋدا تىڭ دا نىق قادام تاستادى.
قات - قابات قيىنشىلىق پەن حاۋىپ - قاتەر الدىندا، كۇرەسكەرلىك رۋح قالايشا باستان - اياق اسقاق بولىپ، كۇرەسكەرلەر قالاي قيىندىقتان تايسالماي العا ۇمتىلا الدى؟
باس شۋجي شي جينپيڭ بىلاي دەپ تەرەڭ اتاپ كورسەتتى: ”ماركسيزم جونىندەگى نانىم، جۇڭگوشا سوتسياليزم جونىندەگى ۇستانىم، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جونىندەگى سەنىم تۇگەلدەي جۇڭگو حالقىنىڭ ەڭسە كوتەرۋىنە، بايۋىنا، قۇدىرەتتەنۋىنە جەتەكشىلىك ەتكەن جانە تىرەك بولعان قۋاتتى رۋحاني كۇش“.
جۇڭگو ۇلگىسىندەگى وسىزامانداندىرۋ ءجۇز ميلليونداعان حالىقتىڭ ءوز ءىسى، ءاربىر ادام باس كەيىپكەر، ءاربىرى نۇر - شۇعىلا شاشادى.
ءدال عىلىم - تەحنولوگيا قىزمەتكەرلەرىنىڭ باس الماي قامال الۋى ەلىمىزدىڭ جاڭالىق اشۋ قۋاتى ەڭ تەز جوعارىلاعان ەكونوميكالىق تۇلعالاردىڭ بىرىنە اينالۋىنا دەم بەردى؛ ءدال قالىڭ شارۋالاردىڭ ءۇن - ءتۇنسىز ەڭبەكتەنۋى ەلىمىزدىڭ استىق وندىرىسىنەن جىل سايىن مول ءونىم الۋ نەگىزىن بەكەمدەدى؛ ءدال سانسىز كاسىپورىندار مەن جەكەلەردىڭ قاجىرلى ەڭبەگى ەلىمىزدىڭ ەكونوميكالىق جالپى مولشەرىنىڭ ۇزدىكسىز جاڭا وتكەلدەن ءوتۋىن بىرگە ىلگەرىلەتتى...
كۇرەس − جۇڭگو كەرەمەتتەرىن شەشەتىن كىلت ءارى باقىتقا، ارمانعا تۇتاساتىن باسپالداق. ”كۇرەسكەر − رۋحى ەڭ باي ادام ءارى باقىتتى ەڭ تۇسىنەتىن، باقىتتان ەڭ ءلاززات الاتىن ادام“.
ماركس «جاستاردىڭ كاسىپ تاڭداعان كەزدەگى ويلارى» دەگەن ماقالاسىندا بىلاي دەپ اتاپ كورسەتكەن: ”تاريح ورتاق نىسانا ءۇشىن ەڭبەك ەتىپ، ءوزىن ارداقتىعا اينالدىراتىن ادامداردى ۇلى ادامدار دەپ مويىندايدى؛ تاجىريبە باسىم كوپ ساندى ادامدارعا باقىت اكەلگەن ادامداردى ەڭ باقىتتى ادامدار دەپ ماداقتايدى“. ءومىر مۇراتىن پارتيا مەن حالىق ىستەرىنە ءسىڭىرىپ، حالىقتىڭ باقىتى ءۇشىن كۇرەسۋدى ءوزىنىڭ ەڭ ۇلكەن باقىتى ەتكەندە عانا وسكەلەڭ، كەمەلدى ومىرگە يە بولۋعا بولادى.
جول الىس، بوگەت كوپ ءارى ۇزاققا جالعاسقان بولسا دا، كۇرەس قادامى ەشقاشان دا توقتاپ كورمەدى .
باس شۋجي شي جينپيڭ كەزىندە «كەدەيلىكتەن ارىلۋ» اتتى كىتابىندا ”تامشى سۋ تاما بەرسە تاس تەسەدى“ رۋحىن القادى: ءبىر تامشى سۋ كىشكەنە ءارى ءالسىز، تاسقا تۇسسە، ءسوز جوق، جان - جاققا شاشىرايدى. ول بوداۋ بەرگەن ساتتە، ءوز قۇنى مەن تابىسىن كورە الماسا دا، ونىڭ قۇنى مەن تابىسى سانسىز سۋ تامشىلارىنىڭ الدىڭعىلاردىڭ ءىزىن كەيىنگىلەر باسىپ، تاراپ - تاراپقا شاشىراۋى بارىسىندا بەينەلەنەدى، سوڭىندا تابىستى تۇردە تاستى تەسۋ بارىسىندا بەينەلەنەدى.
كۇرەس − ۇزاق ۋاقىتتىق تاباندىلىق، ونان دا ماڭىزدىسى، كۇش جالعاۋ ساپارى.
”بارلىق ۇلى جەتىستىك ۇزدىكسىز كۇرەس جۇرگىزۋدىڭ ناتيجەسى، بارلىق ۇلى ءىس الدىڭعىلاردىڭ ءىزىن باسىپ، بولاشاققا جول اشۋ بارىسىندا ىلگەرىلەتۋدى قاجەت ەتەدى“. 2026 - جىل − ”15 - بەسجىلدىقتىڭ“ باستاما جىلى. باستاما جالپى جاعدايعا سايادى، باستاما سوڭعى جاعدايدى بەلگىلەيدى.
كۇردەلى دە قۇبىلمالى حالىقارالىق جاعداي مەن كۇن سايىن كوبەيىپ كەلە جاتقان ايقىنسىز، مەجەلەۋ قيىن فاكتورلار الدىندا قالىڭ پارتيا مۇشەلەرى، كادرلار، بۇقارا باستامادا - اق ۇمتىلعاندا، قادام تاستاعاندا - اق قامال العاندا عانا قايراتتانا العا ۇمتىلىپ، تاعى دا تىڭ تاراۋ جازا الادى.
”بۇكىل ەلدەگى ءار ۇلت حالقىنىڭ پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ءسوزسىز، جەڭىسكە جەتۋ سەنىمىن بەكەمدەپ، اسقاق كۇرەس جىگەرىن ساقتاپ، جۇڭگو ۇلگىسىندەگى وسىزامانداندىرۋدىڭ جاڭا جورىعىندا تاسقىنداعان قايراتپەن العا ىلگەرىلەپ، ەرلىكپەن العا تارتىپ، بىرگە اناعۇرلىم كوركەم بولاشاق جاراتۋىن ءۇمىت ەتەمىن“. 2026 - جىلعى كوكتەم مەرەكەسىن توپتىق قۇتتىقتاۋ ماجىلىسىندە باس شۋجي شي جينپيڭ جاڭا اتتانىسقا كەلتىرۋ بۇيرىعىن جاريالادى.
باقىتتى بەتكە الا كۇرەس جاساپ، ”ەرلىكپەن العا تارتاتىن جىگەر - قايراتقا كەلەيىك“.
جۇڭگو ۇلگىسىندەگى وسىزامانداندىرۋدى ىلگەرىلەتۋ بۇرىنعىلار ىستەپ كورمەگەن جاسامپازدىق ءىس، العا باسۋ جولى تەگىس بولمايدى. ”ارمان مەن سىن - سايىس ءبىزدىڭ ۋاقىتپەن جارىساتىن، ماڭگى بويكۇيەزدىككە سالىنبايتىن كۇرەسكەرلىك رۋحىمىزدى قاۋلاتادى“. مۇراتتى كوكەيدە ساقتاعان ۇزاق جورىق، اسىرەسە، تاۋ اسىپ، جول اشاتىن تەبىندى قاجەت ەتەدى، قاجىماي - تالماي شىنايى تياناقتاندىرۋعا ۇندەيدى.
باقىتتى بەتكە الا كۇرەس جاساپ، ”ارىنداعان ومىرشەڭ كۇشتى تاسقىنداتايىق“.
بۇل كۇرەسكەرلەردىڭ ءداۋىرى، قۇلشىنىستار بەينە اعىن سۋ تەڭىزگە قاراي اققانداي جوڭكىلۋدە. دۋماندى قالادان كەڭ كوسىلگەن اتىزعا، الەۋمەتتىك اۋماق، كوشەلەردەن زاۆود، مەكتەپتەرگە دەيىن، دۋماندى ءاربىر ”شاعىن وتباسىنان“ كۇننەن - كۇنگە كوركەيىپ كەلە جاتقان ”ۇلكەن شاڭىراققا“ دەيىن، ءجۇز ميلليونداعان كۇرەسكەر شايقاس جاساپ العا ۇمتىلىپ، ايانباي ەڭبەك ەتىپ، ۇلەس قوسىپ، گۇلدەنىپ - كوركەيگەن جۇڭگونى بىرگە سومدادى.
باقىتتى بەتكە الا كۇرەس جاساپ، ”ءبىر ءسات تە كىدىرمەيتىن تەبىندى ساقتايىق“.
ەرتەڭگى جۇڭگودا كۇرەس ارقىلى كەرەمەتتەر جاراتىلادى. كۇرەس اسقاق ۇران عانا ەمەس، قايتا ءاربىر ۇساق ءىستى ويداعىداي ىستەۋ، ءاربىر مىندەتتى ورىنداۋ، ءاربىر قىزمەت جاۋاپكەرشىلىگىن اتقارۋ بارىسىندا رۋحتى ايگىلەۋ بولماق. يۇيگۇڭنىڭ تاۋ كوشىرەتىن جىگەرىمەن، تامشى سۋدىڭ تاس تەسەتىن قايسارلىعىمەن تىڭعىلىقتى ىستەپ، قاجىرلىلىقپەن ىستەپ، بىرتىندەپ توقتاۋسىز ىلگەرىلەسەك، ۇلى نىسانانى، ءسوز جوق، تاماشا رەالدىققا اينالدىرا الامىز.
”تۋرا جولدى بويلاپ ءجۇرۋ، ورتا جولعا بارعاندا دا تىنباي قۇلشىنۋ قاجەت؛ رياسىز پيعىل مەن كوڭىل توعىساتىن كۇندەر الىستا ەمەس، شىڭنىڭ ۇشار باسىنا شىعۋ ءۇشىن،ءسوزسىز، جاپا - ماشاقاتتى جەڭىپ، تىنباي تالاپتانۋ كەرەك“.
ءداۋىر ۇقسامايدى، بورىش پەن مىندەتتە وزگەرىس تۋىلدى، ءبىراق قاجىرلىلىقپەن كۇرەس جۇرگىزۋ، ىنتىماقتاسا كۇرەس جۇرگىزۋ، قاجىماي - تالماي كۇرەس جۇرگىزۋ رۋحى ماڭگى وزگەرمەيدى. ۇدەرە العا تارتىپ، تيتتەي دە ايالداماي، باقىت ءۇشىن ۇزدىكسىز كۇرەس جۇرگىزەيىك!
(شينحۋا اگەنتتىگىنىڭ 2 - ايدىڭ 18 - كۇنى بەيجيڭنەن بەرگەن حابارى)
