شينحۋا اگەنتتىگىنىڭ 2 ـ ايدىڭ 22 ـ كۇنى ميلاننان بەرگەن حابارى (ٴتىلشى ۋاڭ چۇنيان). گۋ ايليڭ مەن لي فاڭحۇيدىڭ 2 ـ ايدىڭ 22 ـ كۇنى ميلان قىسقى وليمپيادا سپورت جارىسىنىڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك جارىسىندا اعا جۇلدەگەرلىكتى، جۇلدەگەرلىكتى ەنشىلەۋىنە ىلەسە، جۇڭگو ۋاكىلدەر ۇيىرمەسى وسى كەزەكتى قىسقى وليمپيادا سپورت جارىسىندا 5 التىن، 4 كۇمىس، 6 قولا مەدال الىپ، قىسقى وليمپيادا سپورت جارىسىندا شەتەلدە جارىسقا قاتىناسۋ تاريحىنداعى ەڭ جاقسى ناتيجەنى جاڭالادى.
جۇڭگو قىسقى وليمپيادا قۇراماسىنىڭ وسىدان بۇرىن شەتەلدە جارىسقا قاتىناسۋ تاريحىنداعى ەڭ جاقسى ناتيجەسى 2010 ـ جىلعى ۆانكوۋۆەر قىسقى وليمپيادا سپورت جارىسىنداعى 5 التىن، 2 كۇمىس، 4 قولا مەدال الۋى ەدى.
وسى كەزەكتى قىسقى وليمپيادا سپورت جارىسىندا جۇڭگو ۋاكىلدەر ۇيىرمەسىنىڭ قار ٴۇستى تۇرىندەگى تابىسى مول بولدى. 2 ـ ايدىڭ 7 ـ كۇنى اعا جۇلدەگەر سۋ يميڭ ەرلەردىڭ سىڭار تاقتايمەن سىرعاناپ ۇلكەن تەكشەدەن سەكىرۋ شەشۋشى جارىسىندا 168.50 نومىرمەن قولا مەدال الدى، بۇل جۇڭگو ۋاكىلدەر ۇيىرمەسىنىڭ وسى كەزەكتى جارىستاعى تۇڭعىش مەدالى.
2 ـ ايدىڭ 18 ـ كۇنى 22 جاسقا تولعان تۋعان كۇنىندە سۋ يميڭ سىڭار تاقتايمەن شاڭعى تەبۋ بويىنشا ەرلەردىڭ بەتكەيدە كەدەرگىدەن ٴوتۋ شەبەرلىك جارىسىندا التىن مەدال الدى، بۇل جۇڭگو ۋاكىلدەر ۇيىرمەسىنىڭ وسى كەزەكتى جارىستاعى تۇڭعىش التىن مەدالى ەدى. سول كۇنى ساقا سپورتشى شۇي مىڭتاۋ قاردا ەركىن سىرعاناۋ بويىنشا ايەلدەردىڭ كەڭىستىكتە ونەر كورسەتۋ جارىسىندا اعا جۇلدەگەر بولىپ، وسى تۇردەن اعا جۇلدەگەرلىكتى ٴساتتى ساقتاپ قالعان تۇڭعىش سپورتشىعا اينالدى. 2 كۇننەن كەيىن، ۋاڭ شيندي مۇلتىكسىز سەكىرۋ ارقىلى قاردا ەركىن سىرعاناۋ بويىنشا ەرلەردىڭ كەڭىستىكتە ونەر كورسەتۋ جارىسىنىڭ التىن مەدالىن الدى. 2 ـ ايدىڭ 22 ـ كۇنى گۋ ايليڭ، لي فاڭحۇي قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك جارىسىندا اعا جۇلدەگەرلىكتى، جۇلدەگەرلىكتى ەنشىلەدى.
مۇز ٴۇستى تۇرىندە قورجىنعا نەبارى ٴبىر التىن مەدال تۇسكەنىمەن، ٴبىراق بۇل التىن مەدالدىڭ سالماعى توتەنشە اۋىر. نيڭ جۇڭيان 2 ـ ايدىڭ 19 ـ كۇنى وتكىزىلگەن مۇزدا جىلدام سىرعاناۋ بويىنشا ەرلەردىڭ 1500 مەترلىك شەشۋشى جارىسىندا ٴبىر مينۋت 41 سەكۋند 98 تاقىلدىق ناتيجەمەن وليمپيادا سپورت جارىسى رەكوردىن جاڭالاپ اعا جۇلدەگەر بولىپ، ٴبىر عاسىردان بەرگى ەۆروپا _ امەريكا ساڭلاقتارىنىڭ وسى تۇردەگى جارىستا التىن مەدالدى جەكە يەمدەنىپ كەلۋىن اياقتاتتى.
جۇڭگو قۇراماسى وسى جولى جيىنى 15 مەدال الىپ، بەيجيڭ قىسقى وليمپيادا سپورت جارىسىنداعى جۇڭگو ۋاكىلدەر ۇيىرمەسىنىڭ العان جالپى مەدال سانىنا تەڭەستى. 2006 ـ جىلعى تۋرين قىسقى وليمپيادا سپورت جارىسى مەن 2010 ـ جىلعى ۆانكوۋۆەر قىسقى وليمپيادا سپورت جارىسىندا جۇڭگو ۋاكىلدەر ۇيىرمەسى جەكە ـ جەكە 11 مەدالعا يە بولعان ەدى.
