2 ـ ايدىڭ 22 ـ كۇنى جۇڭگو شەبەرلەرى گۋ ايليڭ (سولدا)، لي فاڭحۇي جارىستان كەيىن قۇشاقتاسىپ قۇتتىقتاۋدا.
□ سۋرەتتى شينحۋا اگەنتتىگىنىڭ ٴتىلشىسى ۋاڭ پىڭ تۇسىرگەن
شينحۋا اگەنتتىگىنىڭ 2 ـ ايدىڭ 22 ـ كۇنى يتاليا ليۆينودان بەرگەن حابارى (تىلشىلەر تيان گۋاڭيۇي، ليۋ ياڭ). زاڭعار قارلى تاۋلار اراسىندا باياۋ كوتەرىلگەن 2 بەس جۇلدىزدى قىزىل تۋ اپپاق قار، اشىق اسپاننىڭ ايشىقتاۋىندا ٴتىپتى دە كوز تارتادى، الاڭداعى 100دەن استام جۇڭگولىق كورەرمەن بىركەلكى داۋىسپەن مەملەكەت ٴانىن اسقاقتاتا شىرقادى، اسقاق ٴان اۋەنى ليۆينو اڭعارىندا جاڭعىردى.
2 ـ ايدىڭ 22 ـ كۇنى ميلان قىسقى وليمپيادا سپورت جارىسىنىڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك شەشۋشى جارىسى ليۆينو قار ٴۇستى باقشاسىندا اياقتالدى. جۇڭگو شەبەرى گۋ ايليڭ اعا جۇلدەگەرلىكتى ٴساتتى قورعادى، حاربين ازيا قىسقى سپورت جارىسىنىڭ اعا جۇلدەگەرى لي فاڭحۇي كۇمىس مەدالعا يە بولدى. جۇڭگو كومانداسى تۇڭعىش رەت وسى ٴتۇردىڭ التىن، كۇمىس مەدالىن قانجىعاسىنا بايلادى، جۇڭگو ۋاكىلدەر ۇيىرمەسى 5 التىن، 4 كۇمىس، 6 قولا مەدالمەن قىسقى وليمپيادا سپورت جارىسىندا شەتەلدە جارىسقا قاتىناسۋ تاريحىنداعى ەڭ جاقسى ناتيجەگە قول جەتكىزدى.
قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك شەشۋشى جارىسى ليۆينو جارىس رايونىنداعى ەڭ سوڭعى جارىسى ٴتۇرى، اسىلىندە 2 ـ ايدىڭ 21 ـ كۇنى كەشتە وتكىزىلەتىن بولعان، قالىڭ قار جاۋعاندىعى سەبەپتى 2 ـ ايدىڭ 22 ـ كۇنىنە كەشىكتىرىلدى. جۇڭگو كومانداسىنان 4 شەبەر 12 ادامدىق شەشۋشى جارىسقا قاتىناسىپ، جارىسقا قاتىناسقان كوماندالار اراسىندا سپورتشى سانى ەڭ كوبى بولدى. شەشۋشى جارىسقا قاتىناسقان شەبەرلەر 3 كەزەك سىرعاناۋ جارىسىنا ٴتۇسىپ، ەڭ جاقسى ناتيجەگە قول جەتكىزدى. جۇڭگو كومانداسىنىڭ ەڭ ۇلكەن قارسىلاسى 2025 ـ جىلعى دۇنيە جۇزىلىك جۇلدەلى جارىسىنىڭ اعا جۇلدەگەرى، انگليالىق ايگىلى ساڭلاق زوە اتكين ەدى، ول تولىمدىلىق جارىسىندا ٴبىرىنشى ورىندى يەلەگەن.
العاشقى سىرعاناۋدا گۋ ايليڭ وسى كەزەكتى جارىستاعى باياۋ قىزاتىن ەرەكشەلىگىن جالعاستىردى، U فورمالى الاڭعا كىرگەننەن كەيىن 1 ـ رەتكى 900 گرادۋس اينالىپ جەرگە تۇسكەندە ٴسال تانتىرەكتەپ، جىلدامدىعىن نەداۋىر شىعىنداپ العاندىقتان، امالسىزدان كەيىنگى ارەكەتتەن باز كەشىپ، نەبارى 30.00 ۇپاي الدى.
گۋ ايليڭنىڭ تولىمدىلىق جارىسى اياقتاعاننان كەيىن: ”مەن بەلگىلى قىسىمعا جەتكەندە عانا ەڭ تاماشا كۇيگە كەلە الاتىن سياقتىمىن“، ـ دەگەنىندەي بولدى.
ونىڭ ەڭ تاماشا كۇيى قىسىم ەرەكشە كۇشتى بولعان ەكىنشى اينالىمدا ٴساتتى جارىققا شىقتى. ٴبىر قاتار ارەكەتتەردى اسا تابيعي، ەمىن ـ ەركىن ورىندادى، بۇل ەكى باعىتتا دەنەنى 900 گرادۋس اينالدىرۋدى، ەكى باعىتتا دەنەنى 720 گرادۋس اينالدىرۋدى قامتيدى، تاقتاي ۇستاۋ ارەكەتىن كوپتەپ كىرىستىرىپ، ورتا ەسەپپەن 3 مەتر بيىككە، ەڭ جوعارى بولعاندا 3.8 مەتر بيىككە كوتەرىلدى. ول وسى ٴبىر قاتار قيىن ارەكەتتەردى ورىنداۋ ارقىلى 94.00 ۇپاي الىپ، ٴبىر جولدا الدىڭعى ورىنعا شىقتى.
گۋ ايليڭنىڭ جوعارى ۇپاي الۋى قىسىم تۇسىرگەن بولۋى كەرەك، اتكين ەكىنشى اينالىمدا اعاتتىق جىبەردى. تاعى ٴبىر جۇڭگولىق شەبەر لي فاڭحۇي دا گۋ ايليڭ سياقتى ەكىنشى اينالىمدا اسا جاقسى بەينە كورسەتتى، ٴبىر قاتار ارەكەتتى جوعارى ساپامەن ورىنداپ، 91.50 ۇپاي الىپ، اتكيننەن اسىپ ٴتۇسىپ، ۋاقىتشا 2 ـ ورىندى يەلەدى.
ەڭ سوڭعى اينالىمدا وسى 3 شەبەر ٴتىپتى دە تاماشا بەينە كورسەتتى. گۋ ايليڭ 4 مەترگە دەيىنگى بيىككە كوتەرىلگەن ٴبىر قاتار ارەكەتىمەن ٴوزىنىڭ العان ۇپايىن 94.75كە جوعارىلاتتى. لي فاڭحۇي مول مازمۇندى دەنە اينالدىرۋ جانە تاقتايدى ۇستاۋ ارقىلى 93.00 ۇپايعا يە بولدى. اتكين 2 جۇڭگولىق شەبەردىڭ قىسىمىنا توتەپ بەرىپ، قيىن ارەكەتتەرگە باتىلدىقپەن سايىس جاريالاپ، 92.50 ۇپايمەن ٴوزىنىڭ ەڭ جاقسى ناتيجەسىن جاڭالادى. 3 شەبەردىڭ قاتارى وزگەرمەدى، ەڭ اقىرىندا التىن، كۇمىس، قولا مەدالعا يە بولدى.
بارلىق سىرعاناۋ ارەكەتى اياقتاعاننان كەيىن، گۋ ايليڭ مەن لي فاڭحۇي قىزۋ قۇشاقتاستى، ەكى بويجەتكەن جۇڭگو ۋاكىلدەر ۇيىرمەسىنىڭ قورجىنىنا تاعى دا 2 مەدال سالدى! وسى ٴبىر التىن، ٴبىر كۇمىس مەدالدىڭ ارقاسىندا جۇڭگو ۋاكىلدەر ۇيىرمەسى وسى كەزەكتى قىسقى وليمپيادا سپورت جارىسىندا 5 التىن، 4 كۇمىس، 6 قولا مەدال الىپ، ۆانكوۋۆەر قىسقى وليمپيادا سپورت جارىسىنداعى 5 التىن، 2 كۇمىس، 4 قولا مەدالدان اسىپ ٴتۇسىپ، قىسقى وليمپيادا سپورت جارىسىندا شەتەلدە جارىسقا قاتىناسۋ تاريحىنداعى ەڭ جاقسى ناتيجەگە قول جەتكىزدى. سونىمەن بىرگە 15 مەدال بەيجيڭ قىسقى وليمپيادا سپورت جارىسىنداعى جۇڭگو ۋاكىلدەر ۇيىرمەسى العان جالپى مەدال سانىمەن تەڭەستى.
گۋ ايليڭ 2 كەزەكتى قىسقى وليمپيادا سپورت جارىسىندا 3 التىن، 3 كۇمىس، جيىنى 6 مەدال الىپ، قىسقى وليمپيادا سپورت جارىسىنىڭ قاردا ەركىن سىرعاناۋ تۇرىندە العان التىن مەدال جانە مەدال سانى ەڭ كوپ سپورتشىعا اينالدى.
گۋ ايليڭ جارىستان كەيىن بىلاي دەدى: ”بۇل 2 رەكوردتى جاڭالاۋىم تىم ەرەكشە بولدى، ويتكەنى ٴبىر مەدالعا قول جەتكىزۋدىڭ ٴوزى توتەنشە قيىن. مەن 6 رەت جارىسقا قاتىناسىپ، 6 مەدال الدىم، مەدالعا جۇزدە ٴجۇز قول جەتكىزۋىم، راسىندا، ادام نانعىسىز بولدى. ٴوزىمدى ەرەكشە ماقتانىش سانايمىن، ٴار كۇنىم وڭاي وتكەن ەمەس، ٴار كۇنى قۇلشىنامىن، ٴار كۇنى قۇلشىنۋدى شەگىنە جەتكىزەمىن، سوندىقتان دا وسى اراعا كەلە الدىم.
قالعان ەكى جۇڭگولىق شەبەر دە جالت قاراتارلىق بەينە بايقاتتى. جاڭ كىشين 83.25 ۇپاي الىپ، 6 ـ ورىنعا يە بولدى؛ ليۋ يشان 71.75 ۇپايمەن 9 ـ ورىندا تۇردى.
