− مەملەكەتتىك ساياسي كەڭەس 14 ـ كەزەكتى كوميتەتى 4 ـ ٴماجىلىسىنىڭ جەڭىسپەن جابىلعاندىعىن قىزۋ قۇتتىقتايمىز
□حالىق گازەتى باسماقالاسى
ىنتىماق ارقىلى كۇش ـ قۋات ۇيىستىردى، دەموكراتيا ارقىلى كەڭ كولەمدە اقىل ـ پاراسات توپتادى. مەملەكەتتىك ساياسي كەڭەس 14 ـ كەزەكتى كوميتەتىنىڭ 4 ـ ٴماجىلىسى ٴتۇرلى كەڭەستىك تارتىپتەرىن تابىسپەن ورىنداپ، 3 ـ ايدىڭ 11 ـ كۇنى بەيجيڭدە جەڭىسپەن جابىلدى. ٴبىز ٴماجىلىستىڭ تابىستى بولعاندىعىن قىزۋ قۇتتىقتايمىز!
بۇل تۋدى بيىك ۇستاعان، زەيىن ـ زەردەنى شوعىرلاندىرىپ، كۇش ـ قۋاتتى ۇيىستىرعان، شىندىققا جۇگىنىپ ناقتى ٴىس ىستەگەن، ىنتىماقتاسا ەكپىندەي ىلگەرىلەگەن ٴماجىلىس بولدى. ٴماجىلىس كەزىندە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ قاتارلى پارتيا مەن مەملەكەتتىڭ باسشى جولداستارى ٴماجىلىستىڭ اشىلۋ جينالىسىنا جانە جابىلۋ جينالىسىنا قاتىناسىپ، ماجىلىسكە قاتىناسقان مۇشەلەرگە امانداستى ٴارى بىرىككەن گرۋپپا تالقىسىنا قاتىناسىپ، كەڭ كولەمدە پىكىرلەر مەن ۇسىنىستاردى تىڭدادى. قالىڭ ساياسي كەڭەس مۇشەلەرى وسكەلەڭ ساياسي جاۋاپكەرشىلىك سەزىممەن جانە تاريحي بورىشتىلىق سەزىممەن مەملەكەتتىك ساياسي كەڭەس تۇراقتى كوميتەتىنىڭ قىزمەت بايانداماسى مەن ۇسىنىس جوبا قىزمەتىنىڭ جاعدايى جونىندەگى باياندامانى تىڭداپ جانە قاراپ، 14 ـ كەزەكتى مەملەكەتتىك حالىق قۇرىلتايىنىڭ 4 ـ ماجىلىسىنە سىرتتاي قاتىناسىپ، ۇكىمەت قىزمەتىنەن باياندامانى، سونداي ـ اق باسقا دا قاتىستى باياندامالاردى تىڭداپ ٴارى تالقىلاپ، ”15 ـ بەسجىلدىق“ جوبا باعدارلاماسى جوباسىن تالقىلاپ، كەڭەسىپ ۇكىمەت ٴىسىن اقىلداسىپ، بىرىككەن كۇش ۇيىستىرىپ، مىندەت وتەپ جاۋاپكەرشىلىكتى ادا ەتىپ، جاۋاپكەرشىلىك ارقالاۋدى ايگىلەپ، ۇكىمەت ٴىسىن كەڭەسۋدە سۇبەلى جەتىستىككە قول جەتكىزدى. ٴماجىلىستىڭ تابىستى بولۋى ”15 ـ بەسجىلدىقتا“ جاقسى باستاما اشۋدى، جاقسى قادام تاستاۋدى ىلگەرىلەتۋگە اقىل ـ پاراسات پەن كۇش ـ قۋات قوسىپ، ەلىمىزدىڭ جالپى بارىستىق حالىق دەموكراتياسىنىڭ جالىندى ومىرشەڭ كۇشى مەن حالىق ساياسي كەڭەسىنىڭ كورنەكتى ساياسي ابزالدىلىعىن تولىق ايگىلەدى.
2026 ـ جىل − جۇڭگو كوممۋنيستىك پارتياسى قۇرىلعاندىعىنىڭ 105 جىلدىعى، ”15 ـ بەسجىلدىقتىڭ“ باستاما جىلى. قۇلاشىن كەڭ جايعان، ايبىنى اسقاق جورىققا قايىرىلا قاراساق، پارتيامىز حالىقتى ىنتىماقتاستىرىپ جانە باستاپ، دۇنيەنى جالت قاراتقان دامۋ تابىستارىن جاراتتى، اسىرەسە، ”14 ـ بەسجىلدىق“ ٴساتتى اياقتالدى، ەلىمىزدىڭ ەكونوميكالىق ناقتى قۋاتى، عىلىم ـ تەحنولوگيالىق ناقتى قۋاتى، مەملەكەت قورعانىسى ناقتى قۋاتى، جالپىلىق مەملەكەت قۋاتى تىڭ ساتىعا كوتەرىلىپ، پارتيا 20 ـ قۇرىلتايىندا بەلگىلەنگەن 2035 ـ جىلعا بارعاندا سوتسياليستىك وسىزامانداندىرۋدى نەگىزىنەن جۇزەگە اسىرۋ نىساناسىن ورىنداۋعا بەرىك نەگىز قالاندى. اماليات جۇڭحۋا ۇلتىنىڭ ۇلى گۇلدەنۋىنىڭ ەشكىم دە بوگەي المايتىن تاريحي اۋقىم ەكەنىن تالاسسىز دالەلدەدى. سوتسياليستىك وسىزامانداندىرۋدى نەگىزىنەن جۇزەگە اسىرۋ نەگىزدى بەكەمدەيتىن، جاپپاي كۇش سالاتىن شەشۋشى كەزەڭگە وتكەندە، ۇلى جوبانى تاماشا رەالدىققا اينالدىرۋ ٴۇشىن ستراتەگيالىق تاباندىلىقتى ساقتاپ، ٴسوزسىز، جەڭىسكە جەتۋ سەنىمىن كۇشەيتىپ، تەلەگەي كۇش ۇيىستىرىپ، نىق قاداممەن العا باسۋ ايرىقشا قاجەت. ٴىستى ٴساتتى باستاۋ ٴۇشىن، ٴسوز جوق، ونىڭ ناتيجەسىن ويلاستىرۋ كەرەك، تابىسقا جەتۋ ٴۇشىن الدىمەن جوسپار جاساۋ كەرەك. جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى كۇش سالا ىلگەرىلەتىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، اناعۇرلىم بەلسەندى، ۇتىمدى ماكرولىق ساياسات اتقارىپ، ەكونوميكانىڭ ساپاسىنىڭ ٴونىمدى جوعارىلاۋى مەن مولشەرىنىڭ ۇيلەسىمدى ارتۋىن جۇزەگە اسىرۋدى ىلگەرىلەتىپ، قوعامنىڭ جاراسىمدىلىعى مەن ورنىقتىلىعىن ساقتاعاندا، ”15 ـ بەسجىلدىقتىڭ“ تاماشا باستاماسىن، ٴسوزسىز، جۇزەگە اسىرۋعا بولادى.
حالىق ساياسي كەڭەسى − جۇڭگو كوممۋنيستىك پارتياسىنىڭ ماركسيزم ـ لەنينيزمنىڭ بىرلىكساپ نازارياسىن، ساياسي پارتيا نازارياسىن، دەموكراتيالىق ساياسي نازارياسىن جۇڭگونىڭ ناقتى ٴىس جۇزىندىگىمەن ٴوزارا ۇشتاستىرۋىنىڭ، جۇڭحۋانىڭ تاڭداۋلى ٴداستۇرلى مادەنيەتىمەن ٴوزارا ۇشتاستىرۋىنىڭ ۇلى جەتىستىگى، جۇڭگو كوممۋنيستىك پارتياسىنىڭ دەموكراتيالىق پارتيا ـ توپتارعا، پارتيادا، توپتا جوق قايراتكەرلەرگە، حالىقتىق ۇيىمدارعا جانە ٴار ۇلت، ٴار سالا قايراتكەرلەرىنە باسشىلىق ەتىپ، ساياسي تۇزىمدە جاساعان ۇلى جاسامپازدىعى. بولاشاقتى بەتكە العاندا حالىق ساياسي كەڭەسى شي جينپيڭ جاڭا ٴداۋىر جۇڭگوشا سوتسياليزم يدەياسىمەن زەيىن ـ زەردەنى ۇيىستىرىپ، رۋحتى سومداۋعا تاباندى بولىپ، پارتيا باسشىلىعىن، بىرلىكساپتى، كەڭەستىك دەموكراتيانى ورگانيكالى ۇشتاستىرۋعا تاباندى بولىپ، جۇڭگو كوممۋنيستىك پارتياسى ورتالىق كوميتەتىنىڭ شەشىمدەرىن، ورنالاستىرۋلارىن جانە حالىق ساياسي كەڭەسى قىزمەتى جونىندەگى تالاپتارىن تياناقتاندىرۋ، ەل ٴىشى ـ سىرتىنداعى جۇڭحۋا ۇلاندارىنىڭ اقىل ـ پاراساتىن جانە كۇش ـ قۋاتىن ۇيىستىرۋ ساياسي جاۋاپكەرشىلىگىن شىنايى ارقالاپ، جۇڭگو ۇلگىسىندەگى وسىزامانداندىرۋ قۇرىلىسىنىڭ جاڭا جاعدايىن اشۋعا تىڭ دا اناعۇرلىم زور ۇلەس قوسۋى كەرەك.
جالپى بارىستىق حالىق دەموكراتياسىن دامىتۋ − جۇڭگو ۇلگىسىندەگى وسىزامانداندىرۋدىڭ ماندىك تالابى. جالپى بارىستىق حالىق دەموكراتياسىنىڭ ماڭىزدى قۇرامداس بولىگى رەتىندە، كەڭەستىك دەموكراتيا − ەلىمىزدىڭ سوتسياليستىك دەموكراتيالىق ساياسيىنىڭ وزىنە ٴتان فورماسى مەن وزگەشە ابزالدىلىعى، پارتيانىڭ بۇقارالىق لۋشيانىنىڭ ساياسي سالاداعى ماڭىزدى ايگىلەنۋى. ”15 ـ بەسجىلدىقتا“ ەكپىندەي ىلگەرىلەپ، دەموكراتيانى ساۋلەلەندىرۋ مەن ىنتىماقتى كۇشەيتۋدىڭ ٴوزارا ساباقتاسۋىنا، ۇكىمەت ىسىنە اقىل ـ كەڭەس بەرۋ مەن ورتاق تانىم ۇيىستىرۋ سىندى قوس باعىتتا كۇش سالۋعا تاباندى بولىپ، حالىق ساياسي كەڭەسىنىڭ سوتسياليستىك كەڭەستىك دەموكراتياسىنىڭ ماڭىزدى ارناسى جانە ارناۋلى كەڭەس قۇرىلىمى رەتىندەگى رولىن تولىق ساۋلەلەندىرىپ، ىشكەرىلەي كەڭەسۋ، ٴوزارا ىقپالداسۋ، پىكىردى تولىق بەينەلەۋ، ورتاق تانىمدى كەڭ كولەمدە ۇيىستىرۋ دەڭگەيىن جوعارىلاتىپ، كەڭەسۋ بارىسىندا ٴادىس ـ امال كورسەتىپ، ورتاق تانىم ۇيىستىرىپ، سۇيىسپەنشىلىكتى بەينەلەپ، ىنتىماقتى ايگىلەگەندە، ٴسوز جوق، ەلىمىزدىڭ ساياسي ابزالدىلىعىن، تۇزىمدىك ابزالدىلىعىن مەملەكەتتى باسقارۋدىڭ ونىمدىلىگى مەن دامۋ ابزالدىلىعىنا اناعۇرلىم ويداعىداي اينالدىرىپ، جۇڭگو ۇلگىسىندەگى وسىزامانداندىرۋ جالپى جاعدايىنا ساياتىن ستراتەگيالىق مىندەتتى ىلگەرىلەتۋدە كەلەلى سەرپىلىستەرگە قول جەتكىزۋگە بولادى.
كەزەكتە ەلىمىزدىڭ دامۋىندا ٴدوپ كەلىپ وتىرعان ايقىنسىز، مەجەلەۋ قيىن فاكتورلار كوبەيدى، بەلگىلەنگەن نىسانانى جۇزەگە اسىرۋدا، حاۋىپ ـ قاتەرلەر مەن سىن ـ سايىستاردى جەڭۋدە جۇڭگو ۇلگىسىندەگى وسىزامانداندىرۋدى ىلگەرىلەتۋ ٴۇشىن كەڭ كولەمدە جۇرت تىلەگىن ۇيىستىرۋعا، ورتاق تانىم ۇيىستىرۋعا، اقىل ـ پاراسات ۇيىستىرۋعا، كۇش ـ قۋات ۇيىستىرۋعا تۋرا كەلەدى. حالىق ساياسي كەڭەسى پارتيا مەن مەملەكەتتىڭ وزەكتى مىندەتىمەن تىعىز بايلانىستىرىپ، دارىندىلار توپتالۋ، پاراسات شوعىرلانۋ سىندى ارتىقشىلىعىن ساۋلەلەندىرىپ، نازاردى ”15 ـ بەسجىلدىق“ جوبا باعدارلاماسىنىڭ اتقارىلۋىنا شوعىرلاندىرا وتىرىپ ۇكىمەت ٴىسىن ىشكەرىلەي كەڭەسىپ، بەلسەنە اقىل ـ كەڭەس بەرىپ، دەموكراتيالىق باقىلاۋ ورىستەتىپ، وسىزاماندانعان كاسىپ سالاسى جۇيەسىن قۇرۋ، جەرگىلىكتى جاعدايعا قاراي جاڭاشا وندىرگىش كۇشتەردى دامىتۋ، سالاماتتى جۇڭگو قۇرۋ سياقتى كەلەلى تاقىرىپتاردى كوزدە ۇستاي وتىرىپ ىشكەرىلەي تەكسەرۋ ـ زەرتتەۋ جۇرگىزىپ، ناقتى، جارامدى شارالار مەن ۇسىنىستاردى العا قويىپ، جوعارى ساپالى كەڭەسۋ، جوعارى دەڭگەيدە ۇسىنىس قويۋ ارقىلى عىلمي شەشىم جاساۋعا، ٴونىمدى شارا قولدانۋعا اناعۇرلىم ويداعىداي قىزمەت وتەپ، بىرلىكساپتىڭ حالىق تىلەگىن ۇيىستىرۋ، كۇش ـ قۋات توپتاۋ ساياسي رولىن ساۋلەلەندىرۋ سىندى قىزمەت مەحانيزمىن كەمەلدەندىرىپ، مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ ەڭ ۇلكەن سەنترلەس شەڭبەرىن كۇش سالا ويداعىداي سىزۋى كەرەك.
كوكتەمدە اتتانىپ، ۇمىتكە قاراي قادام تاستايىق! شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ٴداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ەكىنى قورعاۋدى“ باتىل ورىنداپ، قايراتتانا ەكپىندەي ىلگەرىلەپ، ەرلىكپەن تايسالماي العا باسىپ، سوتسياليستىك وسىزامانداندىرۋدى نەگىزىنەن جۇزەگە اسىرۋدا شەشۋشى ىلگەرىلەۋشىلىككە قول جەتكىزۋگە شىنايى كەپىلدىك ەتىپ، جۇڭگو ۇلگىسىندەگى وسىزامانداندىرۋدىڭ جاڭا كارتيناسىن ٴبىر نيەتپەن سالايىق!
(شينحۋا اگەنتتىگىنىڭ 3 ـ ايدىڭ 11 ـ كۇنى بەيجيڭنەن بەرگەن حابارى)
