شينحۋا اگەنتتىگىنىڭ 3 - ايدىڭ 16 - كۇنى پاريجدان بەرگەن حابارى. جەرگىلىكتى ۋاقىت بويىنشا 3 - ايدىڭ 15 - كۇنىنەن 16 - كۇنىنە دەيىن جۇڭگو − امەريكا ەكونوميكا - ساۋدا ىستەرىنىڭ جۇڭگو جاق جەتەكشىسى، مەملەكەتتىك كەڭەستىڭ ورىنباسار زۇڭليى حى ليفىڭ مەن امەريكا جاقتىڭ جەتەكشىسى، امەريكانىڭ قازىنا مينيسترى بەسسەنت جانە ساۋدا ۋاكىلى گرەر فرانسيانىڭ پاريجىندا ەكونوميكا - ساۋدا كەڭەسىن وتكىزدى. ەكى جاق جۇڭگو − امەريكا ەكى ەلدىڭ مەملەكەت باسشىلارىنىڭ ماڭىزدى ورتاق تانىمىن جەتەكشى ەتىپ، كەدەن باجىسىن ورنالاستىرۋ، ەكى جاقتى ساۋدا، قارجى قوسۋدى جەبەۋ، بۇرىنعى بار كەڭەسكەن ورتاق تانىمدى قورعاۋ سياقتى ءوزارا كوڭىل ءبولىپ وتىرعان ەكونوميكا - ساۋدا كەڭەستىك تاقىرىپتارىن ارقاۋ ەتىپ، بۇكپەسىز، ىشكەرىلەي، سىندارلى پىكىر اۋىستىرىپ، كەڭەس وتكىزىپ، ءبىراز جاڭا ورتاق تانىم قالىپتاستىردى ءارى كەڭەسۋدى ۇزدىكسىز ساقتادى.
حى ليفىڭ مىنالاردى ءبىلدىردى: ەكى ەل مەملەكەت باسشىلارىنىڭ ماڭىزدى ورتاق تانىمىنىڭ ستراتەگيالىق جەتەكشىلىگىندە، بىلتىر 5 كەزەك ەكونوميكا - ساۋدا كەڭەسى ارقىلى جۇڭگو مەن امەريكا ەكونوميكا - ساۋدا سالاسىندا ءبىر قىدىرۋ كەڭەس جەتىستىكتەرىنە قول جەتكىزىپ، ەكى ەلدىڭ ەكونوميكا - ساۋدا قاتىناسى مەن دۇنيە ءجۇزى ەكونوميكاسىنا اناعۇرلىم كوپ ايقىندىلىق جانە ورنىقتىلىق ۇستەدى. تاياۋدا امەريكانىڭ ەڭ جوعارى سوت مەكەمەسى امەريكانىڭ «حالىقارالىق شۇعىل ەكونوميكالىق ۇقىق زاڭىنا» سايكەس ۇستەمەلەپ العان كەدەن باجىسى زاڭعا قايشى دەپ كەسىم جاسادى، ىلە - شالا امەريكا جاق «1974 - جىلعى ساۋدا زاڭىنىڭ» 122 - تارماعىنا نەگىزدەلىپ، بارلىق ساۋدا سەرىكتەرىنەن يمپورت قوسىمشا قاراجاتىن ％10 ۇستەمەلەپ الدى، ونىمەن قوسا ىركەس - تىركەس 301 - تارماق بويىنشا تەكسەرۋ، كاسىپورىنداردى جازالاۋ، بازارعا كىرۋ شەكتەمەسى سياقتى جۇڭگوعا ساياتىن كەرەناۋ شارالاردى شىعاردى. جۇڭگو جاقتىڭ امەريكا جاقتىڭ سىڭار جاقتى كەدەن باجىسىن ۇستەمەلەپ الۋىنا قارسى تۇرۋ جونىندەگى تۇرعىسى دايەكتى، امەريكا جاقتى سىڭار جاقتى كەدەن باجىسى سياقتى شەكتەۋ شارالارىن تۇبەگەيلى كۇشىنەن قالدىرۋعا قۋزايدى ءارى قاجەتتى شارالار قولدانىپ، ورىندى، زاڭدى ۇقىق - مۇدەسىن باتىل قورعايدى. امەريكا جاقتىڭ جۇڭگو جاقپەن بىردەي باعىتتا العا ىلگەرىلەپ، ەكى ەل مەملەكەت باسشىلارىنىڭ ماڭىزدى ورتاق تانىمىن بىرگە ويداعىداي تياناقتاندىرىپ، سەلبەستىك ءتىزىمىن ۇزدىكسىز ۇزارتىپ، ماسەلە ءتىزىمىن ىقشامداپ، جۇڭگو − امەريكا ەكونوميكا - ساۋدا قاتىناسىنىڭ اقاۋسىز، ورنىقتى، باياندى دامۋىن ىلگەرىلەتۋىن ءۇمىت ەتەمىز.
امەريكا جاق مىنالاردى ءبىلدىردى: جۇڭگو مەن امەريكانىڭ ورنىقتى ەكونوميكا - ساۋدا قاتىناسى ەكى ەل جانە دۇنيە ءجۇزى ءۇشىن توتەنشە ماڭىزدى، دۇنيە ءجۇزى ەكونوميكاسىنىڭ ارتۋىن، قامداۋ تىزبەگىنىڭ حاۋىپسىزدىگىن جانە فينانس ورنىقتىلىعىن ىلگەرىلەتۋگە ءتيىمدى. ەكى جاق كيكىلجىڭدى ازايتىپ، ماسەلەنىڭ ۋشىعۋىنان ساقتانىپ، الاۋىزدىقتاردى كەڭەسۋ ارقىلى شەشۋى كەرەك.
ەكى جاق ەكى جاقتى ساۋدا، قارجى قوسۋدى جەبەيتىن سەلبەستىك مەحانيزمىن زەرتتەپ ورناتىپ، جۇڭگو - امەريكا ەكونوميكا - ساۋدا كەڭەسى مەحانيزمىنىڭ رولىن ۇزدىكسىز ويداعىداي ساۋلەلەندىرىپ، تىلدەسۋدى، بايلانىستى كۇشەيتىپ، الاۋىزدىقتاردى ۇيلەسىمدى مەڭگەرىپ، ناقتى ىستەر سەلبەستىگىن كەڭەيتىپ، ەكى جاقتى ەكونوميكا - ساۋدا قاتىناسىنىڭ ۇزدىكسىز ورنىقتى جاقسارۋىن ىلگەرىلەتۋگە قوسىلدى.
