شي جينپيڭ استانادا مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى
تاۋ - وزەندەرگە، بايتاق دالاعا كورىك قوسىپ، جۇڭگو ۇلگىسىندەگى وسىزامانداندىرۋدىڭ نەگىزگى ءتۇسىن اناعۇرلىم جايناتۋ كەرەك
لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتىناستى
3 - ايدىڭ 30 - كۇنى پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتارلىلار بەيجيڭ قالاسى چاڭپيڭ رايونى بايشان قالاشىعىنا بارىپ، استاناداعى مىندەتتى اعاش ەگۋ قيمىلىنا قاتىناستى. سۋرەتتە: شي جينپيڭ كوپشىلىكپەن بىرگە اعاش ەگۋدە.
□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگىنىڭ 3 - ايدىڭ 30 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 3 - ايدىڭ 30 - كۇنى تۇستەن بۇرىن استانادا مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى: تاماشا ەكولوگيادان بارلىق ادام تەڭ يگىلىكتەنەدى ءارى ول كۇش بىرىكتىرىپ بىرگە قۇرۋدى قاجەت ەتەدى. بۇكىل قوعامدى اعاش ەگىپ ورمان وسىرۋگە كەڭ كولەمدە ات سالىسۋعا ۇيىمداستىرىپ، جۇمىلدىرىپ، تاۋ - وزەندەرگە، بايتاق دالاعا كورىك قوسىپ، جۇڭگو ۇلگىسىندەگى وسىزامانداندىرۋدىڭ نەگىزگى ءتۇسىن اناعۇرلىم جايناتۋ كەرەك.
استانا بەيجيڭدە كوكتەم سامالى ەسىپ، كۇللى تىرشىلىك جانداندى. تۇستەن بۇرىن ساعات 10نان 40 مينۋت وتكەن مولشەردە پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتارلىلار توپتىق اۆتوكولىككە وتىرىپ، چاڭپيڭ رايونى بايشان قالاشىعىنا كەلىپ، كادرلارمەن، بۇقارامەن بىرگە مىندەتتى اعاش ەگۋگە قاتىناستى.
اعاش ەگۋ ورنى باقشاعا پايدالانۋعا جوسپارلانعان جەر، باقشا سالىنىپ بولعاننان كەيىن بۇقاراعا ەكولوگيالىق سەيىل - سەرۋەن كەڭىستىگىن ازىرلەيدى.
باس شۋجيدىڭ كەلگەنىن كورىپ، اعاش ەگىپ جاتقان كادرلار مەن بۇقارا باس شۋجيگە ىستىق ىقىلاسپەن امانداستى. شي جينپيڭ كوپشىلىككە قول بۇلعاپ قۇرمەت ءبىلدىرىپ، قولىنا كۇرەك الىپ اعاش ەگۋ ورنىنا بارىپ، سول جەردەگى بەيجيڭ قالاسىنداعى، مەملەكەتتىك ورمان شارۋاشىلىعى جانە جايلىم مەكەمەسىندەگى جاۋاپتى جولداستارمەن، كادرلارمەن، بۇقارامەن، پيونەرلەرمەن بىرگە قاربالاس جۇمىسقا كىرىستى.
كۇرەك سەرمەپ توپىراق كۇرەپ، توپىراق قومداپ قىر جاساپ، سۋ تاسىپ اعاش سۋاردى... شي جينپيڭ ماي قاراعاي، بەيجيڭ مۋدانى، بالشەگىرشىن، ەۋكومميا، ۇيەڭكى تال سياقتى كوپتەگەن اعاش قالامشالارىن ىركەس - تىركەس ەكتى. ول اعاش ەگە ءجۇرىپ بالالاردىڭ ۇيرەنۋ، تۇرمىس، ەڭبەكپەن شىنىعۋ جانە اعاش ەگۋگە قاتىناسۋ جاعدايىن سۇرادى. شي جينپيڭ بىلاي دەپ باسا دارىپتەدى: جاستار مەن ورەندەر بەينە قالامشا سياقتى ومىرشەڭ كۇشكە جانە ۇمىتكە تولى، كىشكەنتايىنان ۇلى مۇرات ورناتىپ، بىلىمگە قۇشتار بولۋى، ەڭبەكتى ءسۇيۋى، تابيعاتتى ءسۇيۋى، احىلاق، اقىل - وي، دەنە، ەستەتيكا، ەڭبەك جاعىنان جان - جاقتى جەتىلۋى، تىرەكتى دارىندى بولىپ شىعۋعا قۇلشىنۋى كەرەك. جۇمىس باسى دۋمانعا بولەنىپ، قاربالاس كورىنىس جارىققا شىقتى.
شي جينپيڭ سول جەردەگى كادرلارمەن، بۇقارامەن ىقىلاسپەن اڭگىمەلەستى. ول بىلاي دەدى: پارتيا 18 - قۇرىلتايىنان بەرى ەلىمىزدىڭ ورمان اۋدانى مەن زاپاس قورى بىردەي ءۇرتىس ارتىپ، شولەيتتەنگەن جانە قۇمايتتانعان جەر اۋدانى بىردەي ءۇرتىس ازايىپ، دۇنيە ءجۇزى بويىنشا جاسىلدانۋى ەڭ كوپ، ەڭ تەز مەملەكەت بولدى، اسپانى اشىق، جەرى جاسىل، سۋى تۇنىق بولۋ قالىپتى جاعدايعا اينالدى. تاياۋدا ەلىمىز ەكولوگيالىق ورتا زاڭناماسىن جاريالاپ، كورىكتى جۇڭگو قۇرىلىسىنىڭ زاڭمەن باسقارىلۋ ىرگە تاسىن ونان ارى بەكەمدەدى. اعاش ەگىپ ورمان ءوسىرۋ − كورىكتى جۇڭگو قۇرىلىسىنداعى ماڭىزدى مىندەت، جاسىلداندىرۋدا العان بەتتەن قايتپاي، قازىرگى جاعدايدى تياناق ەتىپ، ۇزاق بولاشاقتى كوزدەپ، كۇش جالعاپ ەكپىندەي ىلگەرىلەپ، مەملەكەتكە، حالىققا پايدالى وسى ءىرى ءىستى تىڭعىلىقتى، ويداعىداي ىستەۋ كەرەك.
شي جينپيڭ بىلاي دەپ باسا دارىپتەدى: بيىل − ”15 - بەسجىلدىقتىڭ“ باستاما جىلى، سونداي - اق جالپى حالىقتىق مىندەتتى اعاش ەگۋ ناۋقانى ورىستەتىلگەندىگىنىڭ 45 جىلدىعى. جاڭا جاعدايدا مەملەكەت جەرىن جاسىلداندىرۋدى ىلگەرىلەتۋدە ساپانى جوعارىلاتۋعا، كاسىپ سالاسىن گۇلدەندىرۋگە، حالىققا پايدا جەتكىزۋگە اناعۇرلىم ءمان بەرىپ، ەگۋ مەن باپتاۋدى بىرگە يگەرىپ، ەكولوگيا مەن كاسىپ سالاسىن بىرگە جەبەپ، ادام مەن تابيعاتتىڭ قاتار ءومىر ءسۇرۋىن جۇزەگە اسىرۋ كەرەك. جاسىلداندىرۋ كەڭىستىگىن ءبىر تۇتاس جوسپارلاپ پايدالانىپ، جەر ارقىلى جاسىل القاپتى تۇراقتاندىرىپ، سۋ ارقىلى جاسىل القاپتى تۇراقتاندىرىپ، جاسىلدىقتى ارتتىرۋ جۇمىسىن جەرگىلىكتى جاعدايعا قاراي ويداعىداي ىستەۋ، ورمان وسىرۋگە وڭتايلى بولسا ورمان ءوسىرۋ، ءشوپ ەگۋگە وڭتايلى بولسا ءشوپ ەگۋ كەرەك. باپتاۋ مەن قورعاۋدى اناعۇرلىم زور كۇشپەن كۇشەيتىپ، ورمان شارۋاشىلىعىن وڭىرلەر، تۇرلەر بويىنشا باياندى جۇرگىزىپ، جايلىمدى قورعاۋدى، قالپىنا كەلتىرۋدى پارمەندى، ءونىمدى ىلگەرىلەتىپ، ورماننىڭ، جايلىمنىڭ ساپاسىن جانە يقۋاتىن جاپپاي جوعارىلاتىپ، ورتتەن، زياندى جاندىكتەن ساقتانىپ، جاسىلداندىرۋ جەتىستىكتەرىن ويداعىداي قورعاۋ كەرەك. ەكولوگيالىق ونىمدەردىڭ قۇنىن كادەگە جاراتۋ ارناسىن ىركىلىسسىزدەندىرىپ، ورمان، جايلىم شارۋاشىلىعىن زورايتىپ، ەكونوميكالىق قۇن مەن ەكولوگيالىق ونىمدىلىكتى قاتار جوعارىلاتۋ كەرەك. قالا مەن اۋىلدى جاسىلداندىرۋدى، كورىكتەندىرۋدى سايكەستى ىلگەرىلەتىپ، بوس جەردەن تولىق پايدالانىپ، بۇقارانىڭ ماڭايىنداعى جاسىل جەرلەردى مولايتىپ، قالا مەن اۋىل تۇرعىندارىن اناعۇرلىم كوپ جاسىل تابىس سەزىمىنە بولەۋ كەرەك.
بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك كەڭەستىڭ مۇشەلەرى قاتارلىلار اعاش ەگۋ قيمىلىنا قاتىناستى.
