جۇڭگو كوممۋنيستىك پارتياسى ورتالىق كوميتەتى جانە باس شۋجي شي جينپيڭ جۇڭگو گومينداڭ پارتياسىنىڭ ءتوراعاسى جىڭ لي - ۋىننىڭ ۇيىرمە باستاپ ساپارلاي كەلۋىن قارسى الدى ءارى ۇسىنىس ەتتى
جىڭ لي - ۋىن جۇڭگو كوممۋنيستىك پارتياسى ورتالىق كوميتەتىنىڭ جانە باس شۋجي شي جينپيڭنىڭ ءوزىن ۇيىرمە باستاپ ۇلى قۇرلىققا ساپارلاي كەلۋگە ۇسىنىس ەتكەندىگىنە العىس ايتتى ءارى ۇسىنىستى قابىلدادى
شينحۋا اگەنتتىگىنىڭ 3 - ايدىڭ 30 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى تايۋان قىزمەتى كەڭسەسىنىڭ مەڭگەرۋشىسى سۇڭ تاۋ 3 - ايدىڭ 30 - كۇنى بىلاي دەدى: جۇڭگو گومينداڭ پارتياسىنىڭ ءتوراعاسى جىڭ لي - ۋىن مىندەتكە وتىرعاننان بەرى، ۇلى قۇرلىققا ساپارلاي كەلۋ تىلەگىن تالاي رەت ءبىلدىردى. گومينداڭ پارتياسى مەن كوممۋنيستىك پارتيانىڭ قارىم - قاتىناسىنىڭ جانە ەكى جاعالاۋ قارىم - قاتىناسىنىڭ بەيبىت دامۋىن ىلگەرىلەتۋ ءۇشىن، مەن وكىلەتتى تۇردە مىنانى جاريالايمىن: جۇڭگو كوممۋنيستىك پارتياسى ورتالىق كوميتەتى جانە باس شۋجي شي جينپيڭ ءتوراعا جىڭ لي - ۋىننىڭ جۇڭگو گومينداڭ پارتياسىنىڭ ساپارلاۋ ۇيىرمەسىن باستاپ 4 - ايدىڭ 7 - كۇنىنەن 12 - كۇنىنە دەيىن جياڭسۋ، شاڭحاي، بەيجيڭگە كەلىپ ەكسكۋرسيادا، ساپاردا بولۋىن قارسى الادى ءارى ۇسىنىس ەتەدى.
سۇڭ تاۋ: ءبىز گومينداڭ جاقپەن ءتوراعا جىڭ لي - ۋىننىڭ ساپارلاي كەلۋ ىستەرى جونىندە پىكىرلەسىپ، ۇيلەسىمدى ورنالاستىرۋ جاسايمىز، - دەدى.
شينحۋا اگەنتتىگىنىڭ 3 - ايدىڭ 30 - كۇنى تايبەيدەن بەرگەن حابارى (تىلشىلەر حۋاڭ ياڭ، جياڭ جياڭ). جۇڭگو گومينداڭ پارتياسىنىڭ ءتوراعا كەڭسەسى 3 - ايدىڭ 30 - كۇنى مىنالاردى ءبىلدىردى: جۇڭگو كوممۋنيستىك پارتياسى ورتالىق كوميتەتى جانە باس شۋجي شي جينپيڭ ءتوراعا جىڭ لي - ۋىندى ۇيىرمە باستاپ ۇلى قۇرلىققا ساپارلاي كەلۋگە ۇسىنىس ەتتى، ءتوراعا جىڭ لي - ۋىن بۇعان العىس ايتتى ءارى ۇسىنىستى قۋانا قابىلدادى. ەكى پارتيانىڭ بىرگە قۇلشىنىپ، ەكى جاعالاۋ قارىم - قاتىناسىنىڭ بەيبىت دامۋىن ىلگەرىلەتىپ، ەكى جاعالاۋدىڭ اۋىس - كۇيىسىن، سەلبەستىگىن جەبەپ، تايۋان بۇعازىنىڭ بەيبىتشىلىگىن كوزدەپ، حالىق تۇرمىسى قۇت - ىرىسىن ارتتىرۋىن ءۇمىت ەتەمىز.
