ۋىنيۇڭ الاڭىندا ”كىرشىكسىز سۇيىسپەنشىلىك“ جالعاستى
□ انار بۇلت \ شينجياڭ گازەتىنىڭ ءتىلشىسى ءپاريزات ابدۇل، ەرىكتى ءتىلشى حان لي
4 - ايدىڭ 3 - كۇنى كوكتەم سامالى ەسىپ تۇر، حوتان اۋدانىنداعى حىمەي الاڭىندا مەملەكەت تۋى جەلبىرەپ، حوتان ايماعىنىڭ ايماققا توتە قاراستى ورىندارىنىڭ، اۋدانعا توتە قاراستى ورگانداردىڭ پارتيا ياچەيكالارىنان، قوعام حاۋىپسىزدىگى، وقۋ - اعارتۋ، دەنساۋلىق ساقتاۋ، سالاماتتىق جۇيەلەرىنەن جانە باتىس بولىك جوسپارى ەرىكتىلەرىنەن 500دەن استام پارتيالى كادر قاتار تۇزەپ، ىززەتپەن تۇردى.
سول كۇنى حوتان ايماعىنىڭ ايماققا توتە قاراستى ورگاندارىنداعى پارتيا مۇشەلەرىنىڭ چيڭميڭدە جاياۋ ءجۇرۋ نەگىزگى تاقىرىپتىق قيمىلى حوتان اۋدانىندا وتكىزىلدى، ولار جاياۋ ءجۇرۋ ارقىلى اۋەلگى ماقساتتى شىڭداپ، قاھارمان قۇرباندارعا ساعىنىشپەن قۇرمەت ءبىلدىردى، قىزىل گەندى جالعاستىرىپ، ەكپىندەي ىلگەرىلەۋ كۇشىن ۇيىستىردى.
ساعات 10دا مەملەكەت ءانى اۋەنى شارىقتادى. بەس جۇلدىزدى قىزىل تۋ حىمەي الاڭىنىڭ اسپانىندا باياۋ كوتەرىلدى. بارلىق ادام ىززەتپەن تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.
”اتتانايىق“! دەگەن بۇيرىق بەرىلىسىمەن قوسىن بەلگىلەنگەن جولمەن حىمەي الاڭىنان ۋىنيۇڭ الاڭىنا قاراي جاياۋ جولعا شىقتى، جالپى ۇزىندىعى شامامەن 3 كيلومەتر ەدى. جولدا كوپشىلىك ”كوممۋنيستىك پارتيا بولماسا، جاڭا جۇڭگو بولماق ەمەس“، ”ىنتىماق − كۇش“ سياقتى اندەردى بىركەلكى داۋىسپەن اسقاقتاتا شىرقادى، ءان اۋەندەرى اسقاق، قادامدارى نىق، رۋحتارى كوتەرىڭكى بولدى.
جول - جونەكەي اۋىق - اۋىق ءتۇسىندىرۋشىنىڭ داۋىسى ەستىلەدى: ”چىن حۇڭجۇن، چىن شياڭرۇڭ، شياۋ سىيۋان، ۋاڭ جوران سىندى 4 شەكارا قورعاۋ قاھارمانى مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋ جولىندا ەرلىكپەن قۇربان بولدى، قۇربان چىن شياڭرۇڭ وتان قورعاۋ اۋىر مىندەتىن جاستىق كوكتەمىمەن ارقالاپ، ’كىرشىكسىز سۇيىسپەنشىلىك تەك جۇڭگو ءۇشىن‘ دەگەن ايبىندى سەرتىن ومىرىمەن امالياتتا ايگىلەدى“.
حوتان اۋدانى باقچي قالاشىعى ورتا مەكتەبىنىڭ وقىتۋشىسى ياڭ رۇي قوسىن قاتارىندا كەلە جاتىپ ەرەكشە مۇقيات تىڭدادى: ”جاياۋ ءجۇرۋ بارىسىندا قاھارمان قۇربانداردىڭ ىزگى ىستەرىن قايتا ەسكە الىپ، تەرەڭ اسەر الدىم. پارتيالى كادر رەتىندە، مەن وسى تەبىرەنىستى ارەكەتىمە اينالدىرىپ، قاھارمان قۇربانداردى ۇلگى ەتىپ، ءبىلىم بەرىپ ادام تاربيەلەۋ قىزمەتىن تاباندىلىقپەن ىستەيمىن“، - دەدى.
قوسىن ۋىنيۇڭ الاڭىنا كەلگەندە، كۇن نۇرى مۇسىندەردى نۇرعا بولەپ تۇرعان ەدى. 2025 - جىلى 9 - ايدا تۇرعىزىلعان وسى ”ۋىنيۇڭ − كۇنلۇن شەكارانى قورعاپ، وتان ءۇمىتىن اقتاعان قورعاۋشىلار ءمۇسىنى“ − چيڭحۋا داشۋەسى اسەمونەر شۋەيۋانىنداعى وقىتۋشى - وقۋشىلاردىڭ كوللەكتيۆ تۋىندىسى. الدىڭعى كورىنىسى الاڭنىڭ ورتاسىنا ورنالاستىرىلعان بولىپ، چىن شياڭرۇڭ قۇرباننىڭ قولا ءمۇسىنى ەدى، جانارىنان نۇر شاشىپ، جۇزىنە كۇلكى ءۇيىرىلىپ، قاسقايا العا ادىمداپ كەلەدى؛ ارتقى كورىنىسىندە 4 قۇرباننىڭ توپتىق ءمۇسىنى تاۋ جاقپارىنا ساڭلاۋلاپ ويىلعان، قاھارمان رۋحى اسقار كۇنلۇنمەن قاتار ءومىر سۇرەدى، ۇلان - بايتاق تاۋ - وزەندەرمەن بىرگە جاسايدى دەگەن ماعىنانى بىلدىرەدى.
”چىن شياڭرۇڭنىڭ اناسى ۇلىم ەرلىك كورسەتتى مە، جوق پا دەپ سۇراعاندا، ول ارميا بويىنشا ەڭ ەرجۇرەك، جۇڭگو جەرىنە شۇعىلاسىن شاشقان دەپ جاۋاپ بەرىلدى...“. ۋىنيۇڭ حور ۇيىرمەسى ”چىن شياڭرۇڭنىڭ اناسىنىڭ ۇلىنىڭ ەرلىك كورسەتكەن - كورسەتپەگەنىن سۇراۋى“ ءانىن تەرەڭ سۇيىسپەنشىلىكپەن اسقاقتاتا شىرقادى، ءان اۋەنى الاڭ اسپانىندا جاڭعىردى. ءار سالا ۋاكىلدەرى الدىعا باياۋ قادام تاستاپ، قۇرباندارعا گۇل شارباق قويدى. 3 رەت تاعزىم ەتكەن كەزدە بۇكىل الاڭ جىم - جىرتتىققا شومدى، تەك كوكتەم سامالى عانا گۇل شارباقتى سيپاپ ءوتتى.
”قوعام حاۋىپسىزدىگى حالىق ساقشىسى رەتىندە، مەكەندى قورعاۋ، تىنىشتىقتى قورعاۋ − ءبىزدىڭ شەكارانى قورعاۋشى قاھارماندارمەن ورتاق بورىشىمىز“. حوتان اۋداندىق قوعام حاۋىپسىزدىگى مەكەمەسىنىڭ حالىق ساقشىسى ءىلمينۇر يميرابدۇللا: ”ولار ومىرلەرى ارقىلى شەكارا ءوڭىردىڭ حاۋىپسىزدىك قالتقىسىن ورناتتى، ءبىز تاباندىلىقپەن تىنىشتىقتى ۇزدىكسىز قورعاپ، ءىس جۇزىندىك ارەكەتىمىز ارقىلى قاھارمان قۇربانداردى جۇباتىپ، تاۋ - وزەندى قورعاۋىمىز كەرەك“، - دەدى ءدىرىل ارالاس ۇنمەن.
حوتان اۋداندىق پارتكوم ۇيىمداستىرۋ ءبولىمىنىڭ ورىنباسار باستىعى جاڭ كاڭميڭ ءمۇسىننىڭ جانىندا تۇرىپ، گۇل ارناعان قوسىنعا قاراپ تەبىرەنە بىلاي دەدى: ”چيڭميڭدە قاھارمان قۇرباندارعا ازا بىلدىرەمىز، جالعاستىرۋ − ەڭ جاقسى ەسكە الۋ. وسى رەتكى قيمىلدى وتكىزۋدە ءاربىر پارتيا مۇشەسىنىڭ، كادردىڭ شەكارانى قورعاۋشى قاھارمانداردىڭ ەڭبەگىن ەستە بەرىك ساقتاپ، ولاردىڭ وسكەلەڭ رۋحىن جالعاستىرىپ، ’كىرشىكسىز سۇيىسپەنشىلىكتى‘ جاڭا داۋىردەگى پارتيا مۇشەلەرىنىڭ، كادرلاردىڭ رۋحاني تالپىنىسىنا اينالدىرۋ ءۇمىت ەتىلگەن“.
بۇگىنگى تاڭدا، ۋىنيۇڭ الاڭى، ۋىنيۇڭ جولى جەرگىلىكتى ورىننىڭ ماڭىزدى وتانشىلدىق تاربيە شەبىنە اينالدى، مەرەكە، دەمالىس كۇندەرى بۇقارا، وقۋشىلار وزدىكتەرىنەن كەلىپ قاھارماندارعا ازا بىلدىرەدى.
