قىزىل قاعازعا حات جازىپ، ”اليدى“ الىستان ىزدەدى
□ انار بۇلت \ شينجياڭ گازەتىنىڭ ءتىلشىسى جاۋ شييا
”ەگەر وسى ساباقتاس بولماعاندا، سول كۇنى كەشتە قانداي جاعداي تۋىلارىن ويلاۋعا باتىلىم بارمايدى...“ 4 - ايدا شينجياڭ اۋىل شارۋاشىلىق داشۋەسىنىڭ مەكتەپ اۋلاسى كوكتەم شۋاعىنا شومدى. نەشە مىڭ شاقىرىم جول باسىپ، لياۋنيڭنىڭ لياۋياڭىنان جىبەرىلگەن ەرەكشە حات مەكتەپ اۋلاسىنداعى مەيىردى ونان ارى تەرەڭدەتتى.
كونۆەرتتەگى ەكى جاپىراق قىزىل قاعاز اسا ىجداعاتتىلىقپەن قاتتالىپ العىس تۋى فورماسىنا كەلتىرىلىپتى. حاتتى جازعان ۋاڭ مين ەسىمدى 74 جاستاعى قارت ەدى. ول قاراپايىم تىلمەن 2 ايدان استام ۋاقىتتىڭ الدىندا وزىنە ءومىر بويى ۇمىتىلماس مەيىرىم سيلاعان كەزدەسۋدى اڭگىمەلەدى.
1 - ايدىڭ 22 - كۇنى ءتۇن ورتاسىندا شي - ان شيانياڭ حالىقارالىق اۋەجايىنىڭ ۇشاق كۇتۋ زالىندا ۋاڭ مين اۆتوماتتى باسپالداقتا ابايسىزدا جىعىلىپ، ورنىنان تۇرا الماي قالادى. ءدال وسى كەزدە ءبىر جاس جىگىت جەتىپ كەلەدى...
”جىگىت قاراپايىم كيىنگەن، كەم ءسوزدى بولعانىمەن، وتە قارۋلى ەكەن“. ۋاڭ مين ەسكە الىپ بىلاي دەدى: جىگىت ءارى - ءسارى بولماستان مەنى باس سالىپ كوتەرىپ الدى ءارى اۋەجايدىڭ ەمدەۋ قىزمەتكەرى كەلگەنشە جانىمدا بولىپ، جاراقاتىمدى وراپ، قاندى تيىپ، سۋ اكەلىپ، ءدارى بەرىپ، اۋدەم ۋاقىت اۋرە - سارساڭعا ءتۇسىپ، ۇلكەن اقاۋ جوقتىعىنا كوز جەتكىزگەننەن كەيىن، اسىعىس - ۇسىگىس كەتىپ قالدى. قوشتاساردا ۋاڭ مين ونىڭ ەسىمىن نەشە قايتارا سۇراسا دا، جىگىت ەسىمىن ايتپايدى. سوڭىنان ول اۋەجايداعى ەمدەۋ قىزمەتكەرلەرى ارقىلى جىگىتتىڭ شينجياڭ اۋىل شارۋاشىلىق داشۋەسىنىڭ وقۋشىسى، اتى ”الي“ ەكەندىگىن بىلەدى.
ۋاڭ مين ”شينجياڭ اۋىل شارۋاشىلىق داشۋەسى“ دەگەن ءسوزدى ەسىنە ساقتادى. لياۋنيڭگە قايتىپ بارعاننان كەيىن، ول بويى تىم بيىك ەمەس، توستاعان كوزدى جىگىتتى ۇنەمى كوز الدىنا ەلەستەتە بەرەتىن بولدى. كوپ ۋاقىت ويلانىپ - تولعانعان ول قولىنا قالام الىپ العىس حات جازىپ، ءنومىر الىپ، شينجياڭ اۋىل شارۋاشىلىق داشۋەسىنە جولدايدى.
حاتتى تاپسىرىپ العاننان كەيىن، مەكتەپ قىزمەتكەرى ۋاڭ مينگە تەلەفون جالعايدى. اڭگىمەلەسۋ بارىسىندا قاريا: ”مەكتەپتىڭ كومەكتەسىپ مىنا ساباقتاستى تاۋىپ بەرۋىن، مەنىڭ اتىمنان اۋىز ەكى راقىمەت ايتۋىن وتىنەمىن. مۇنداي ىزگى نيەتتى بالا اناعۇرلىم كوپ ادامعا تانىس بولۋعا ءتيىس“، - دەگەن ءسوزدى قايتالاي بەردى.
مەكتەپ ”ادام ىزدەۋ جوسپارىن“ دەرەۋ ىسكە قوسىپ، ۋاڭ مين بەرگەن ۋاقىت جانە ۇشاق ينفورماتسياسىنا نەگىزدەلىپ، ەڭ سوڭىندا وسى مەكتەپتىڭ كومپيۋتەر جانە ينفورماتسيا ينجەنەرياسى شۋەيۋانىنىڭ كومپيۋتەر عىلىمى جانە تەحنولوگيا ماماندىعى 2201 - كلاسىنىڭ وقۋشىسى الىمجان ابدۇعوپۇر ەكەندىگىن تۇراقتاندىردى.
مۇعالىمنىڭ قايتا - قايتا سۇراۋىمەن الىمجان سول تۇنگى جاي - جاپساردى ەسىنە الدى. سول كەزدە ول اۋەجايدا ۇشاق اۋىستىرۋدى كۇتىپ وتىرعان ەدى، تاڭ سارىدە ۇشاق كۇتۋ زالىندا جولاۋشىلار سيرەك بولاتىن، ءبىر اپايدىڭ اۆتوماتتى باسپالداقتا جىعىلىپ قالعاندىعىن، جانىندا نەمەرە قىزى بار ەكەندىگىن، جۇگىنىڭ ءار جەردە شاشىلىپ جاتقاندىعىن الىستان كورەدى.
”سول ساتتە كوپ ويلانىپ - تولعانباستان دەرەۋ جۇگىرىپ باردىم. اپايدىڭ ءوڭ الپەتى تىم تۇسىڭكى، باسى بىردەڭەگە ءتيىپ جارالانعان كورىنەدى، قان اعىپ تۇر، تۇلا بويى قالتىراپ، ورنىنان تۇرا الماي وتىر ەكەن“. الىمجان دەرەۋ ۋاڭ ميندى كوتەرىپ تۇرعىزىپ، حاۋىپسىز جەرگە اپارىپ ورىندىققا وتىرعىزادى، ”مەن ودان قۇتقارۋ اۆتوكولىگىن شاقىرايىن با دەپ سۇراعانىمدا، ول قاجەتى جوقتىعىن ايتتى، سونىمەن مەن دەرەۋ اۋەجايدىڭ ەمدەۋ قىزمەتكەرلەرىنە حابارلاستىم ءارى وعان ءبىر ستاكان قايناعان سۋ اكەلىپ بەردىم“.
الىمجان ۋاڭ ميننىڭ قاسىندا ءبىر ساعاتتاي وتىرىپ، ول وتباسىنداعىلارمەن حابارلاسقاننان، حاۋىپسىز ەكەندىگىنە كوز جەتكىزگەننەن كەيىن عانا ءوز جونىنە كەتەدى. باسقالاردىڭ نازارىنا توسىننان تۇسكەن الىمجان ىڭعايسىزدانا: ”ەشقانداي تاڭ قالارلىق جايت ەمەس، اكە - شەشەم باسقالاردىڭ قيىنشىلىققا جولىققاندىعىن كورگەندە قول ۇشىن بەرۋدى بالا كەزىمنەن قۇلاعىما قۇيعان“، - دەدى.
كلاس جەتەكشىسى جاڭ شىحاۋ بىلاي دەدى: الىمجان جايشىلىقتا وتە باۋىرمال جان. كلاستاعى ساباقتاسى اۋىرىپ قالسا، ول ىرىقتىلىقپەن كومەكتەسىپ شيپاحاناعا جەتكىزەدى؛ جاتاق عيماراتىنىڭ الەۋمەتتىك اۋماعىن ول ۇنەمى ءلام دەمەستەن تازالاپ قويادى؛ ول تاعى مەكتەپ ءبي ۇيىرمەسىنىڭ مۇشەسى رەتىندە ادەبيەت - كوركەمونەر قيمىلدارىنا قاتىناسىپ، وقىتۋشى - وقۋشىلار اراسىندا قىزۋ قارسى الىنعان دا بولاتىن.
ۋاڭ مينگە ايتارىڭ بار ما دەپ سۇراعاندا، الىمجان ءبىر ءسات ويلانىپ: ”اپاي، دەنساۋلىعىڭىزعا كوڭىل ءبولىڭىز. بۇدان بىلاي سىرتقا شىققاندا حاۋىپسىزدىككە ءمان بەرىڭىز، سىزگە مىقتى دەنساۋلىق تىلەيمىن“، - دەدى مۇقياتتىلىقپەن.
