تاعى ٴبىر جىلداعى چيڭميڭ. وتكەندەردى سالماقتىلىقپەن ەسكە الىپ، بۇرىنعىلاردى ەسكە تۇسىرەتىن وسى كوكتەمدە بىرەۋلەر قارتىن سۇيەپ، بالاسىن ەرتىپ الىپ اتا ـ باباسىنا ازا ٴبىلدىرىپ، توركىنىن ىزدەسە، بىرەۋلەر ٴۇنسىز ازا ٴبىلدىرىپ، ارداگەر قۇربانداردى ساعىنا ەسكە الدى، اينالا شەكسىز ساعىنىش پەن قايعىلى سەزىمگە شومدى. جەكە ادام جونىنەن العاندا، بۇل تۋعان جەردىڭ سارى توپىراعىن ۋىستاپ، وتباسىلىق ىستەرىن ايتىپ، اتا ـ باباسىنىڭ قامقورلىعىن ەسكە الىپ، جانۇياسىنىڭ باقىتىن تىلەۋ؛ مەملەكەت جونىنەن العاندا، كەلگەن جولىمىزعا قايىرىلا قاراپ، قاھارمانداردىڭ حيكاياسىن سويلەسۋ، ارداگەر قۇرباندار ەندىگارى وقۋلىقتارداعى مۇزداي سۋىق شارتتى تاڭبالار ەمەس، قايتا جۇڭحۋا ۇلتىنىڭ تاريحتان بۇگىنگە جەتكەن رۋحاني ەسكەرتكىشى بولادى.
چيڭميڭنىڭ الدىندا ”پامير قىرانى“ لاچين بايەكەنىڭ ارمانى ورىندالدى، پامير ٴۇستىرتىنىڭ قار سۋى ارانباۋتاي سۋ قويماسىنان اعىپ شىعىپ، ٴار ۇلت بۇقاراسىنىڭ جۇرەگىنە جول تارتتى؛ ”ۋىنيۇڭ جولىندا“ ادامدار جاياۋ ٴجۇرۋ تاسىلىمەن چىن شياڭرۇڭ قاتارلى 4 قۇربانعا ازا ٴبىلدىردى؛ 78 جاستاعى تۇرعىن ما لانجياۋ قۇربان بولعان قاراستى اۋماق ساقشى بولىمشەسىنىڭ باستىعى سۇي ۋىنلياڭنىڭ سۋرەتىنە قاراي ـ قاراي كوز جاسىن كولدەتتى؛ موڭعۇلكۇرە اۋدانىنداعى ماياك جاستار سارايىنىڭ جياۋلۇڭ زالىنداعى ٴسوز قالدىرۋ قابىرعاسىنا ساعىنىش پەن قۇرمەتكە تولى سوزدەر جىپىرلاتا جازىلدى...
بيىل _ جۇڭگو كوممۋنيستىك پارتياسى قۇرىلعاندىعىنىڭ 105 جىلدىعى، قىزىل ارميا ۇزاق جورىعى جەڭىسكە جەتكەندىگىنىڭ 90 جىلدىعى. قاھارماندار _ مەملەكەتتىڭ تىرەگى، ۇلتتىڭ رۋحى. جۇڭحۋا ۇلتىنىڭ ۇلى گۇلدەنۋى جولىندا سانسىز ارداگەر قۇرباندار جانىن پيدا ەتىپ، ىستىق قانىن توگىپ، جۇڭحۋا ۇلتىنىڭ رۋحاني بيىگىن قالىپتاستىردى. كەيبىرەۋلەرىنىڭ اتى قالسا، كەيبىرەۋلەرى اتسىز ەسكەرتكىشكە اينالدى، الايدا ولار ٴومىرى ارقىلى بىزگە ”وتان ادىلەتتىلىگىنىڭ نە ەكەنىن“ جەتكىزسە، ىستىق قانى ارقىلى بىزگە ”سەنىمنىڭ، ادالدىقتىڭ نە ەكەنىن“ ۇعىندىرىپ، ۇلت رۋحىنىڭ بۇلجىماس تىرەگىن ورناتتى.
”جاسىل تاۋلارعا ادال قاھارمانداردىڭ مۇردەسى كومىلگەن“، ”وتان مەن حالىق ۇمىتقان جوق“، ”سەندەردىڭ دە وسىندا بولىپ، بارلىق وتباسىنىڭ شامدارى جارقىراپ تۇرعانىن كورۋلەرىڭدى قانشاما ارماندايمىز دەسەڭشى“... الەۋمەتتىك جەلىلەردە توراپتاستاردىڭ شىن نيەتىمەن قالدىرعان سوزدەرى ادامداردىڭ شەكسىز ساعىنىشىن بەينەلەدى. قاھارمان قۇرباندار ارامىزدان اتتانعانىمەن، ولاردىڭ وشپەس رۋحى بەينە سانسىز ماياك سياقتى ٴبىزدى ۇزدىكسىز العا باسۋعا جەتەلەيدى.
ٴار ۇرپاقتىڭ وزىنە ٴتان بورىشى، ٴار ۇرپاقتىڭ وزىنە ٴتان ۇزاق جورىعى بولادى. قاراپايىم قىزمەت ورنىندا مىندەتىن ادا ەتىپ، قيىن ـ قىستاۋ ساتتە كەۋدە كەرىپ العا شىعىپ، ”ٴمولدىر ماحابباتىم تەك جۇڭگوعا ارنالادى“ دەگەن رۋحتى جالعاستىرۋ كەرەك، مىنە بۇل قاھارمان قۇرباندارعا ەڭ جاقسى ازا ٴبىلدىرۋ ٴارى چيڭميڭدى ەڭ جاقسى ٴتۇسىندىرۋ سانالادى.
(”جياڭ شياۋيان“ ماقالا جولداۋ حات ساندىعى: xjrbplb@126.com)
