انار بۇلت \ شينجياڭ گازەتىنىڭ ٴتىلشىسى حي حۇڭۋي 4 ـ ايدىڭ 8 ـ كۇنى ۇرىمجىدەن حابارلايدى. ٴتىلشىنىڭ جۇڭگو − ازيا − ەۆروپا كورمەسىنىڭ حاتشىلار باسقارماسىنان ۇعىسۋىنشا، ”جىبەك جولىنداعى جاڭا وراي، ازيا − ەۆروپانىڭ تىڭ ومىرشەڭدىگى“ تاقىرىبىنداعى 9 ـ كەزەكتى جۇڭگو − ازيا − ەۆروپا كورمەسى 6 ـ ايدىڭ 25 ـ كۇنىنەن 29 ـ كۇنىنە دەيىن ۇرىمجىدە وتكىزىلەدى ەكەن.
جۇڭگو − ازيا − ەۆروپا كورمەسى − ساۋدا ىستەرى مينيسترلىگى، سىرتقى ىستەر مينيسترلىگى، جۇڭگو ساۋدانى جەبەۋ قوعامى، شينجياڭ ۇيعۇر اۆتونوميالى رايوندىق حالىق ۇكىمەتى ۇيىمداستىرعان، ازيا − ەۆروپا وڭىرىنە باعىتتالعان مەملەكەت دارەجەلى، حالىقارالىق سيپاتتى امبەباپ ٴماجىلىس ـ كورمە، ول جۇڭگونىڭ ازيا − ەۆروپا ەلدەرىمەن جوعارى جىكتەگىلەر ديپلوماتياسىن ورىستەتۋىنىڭ، توڭىرەكتەگى ەلدەرمەن سەلبەستىكتى ىلگەرىلەتۋىنىڭ، جىبەك جولى ەكونوميكالىق بەلدەۋى وزەكتى رايونىن قۇرۋىنىڭ، شينجياڭ وبرازىن ايگىلەۋىنىڭ ماڭىزدى تەرەزەسىنە اينالدى. 2011 ـ جىلدان بەرى، كورمە 8 كەزەك ٴساتتى وتكىزىلىپ، ورتا ازياعا تەرەڭ تامىر تارتىپ، ازيا − ەۆروپانى شارپىدى، كورمە كولەمى تۇڭعىش كەزەكتەگى 80 مىڭ شارشى مەتردەن 140 مىڭ شارشى مەترگە كەڭەيىپ، جيىنى 120 نەشە مەملەكەت پەن رايون، 70تەن استام جۇڭگو − شەتەل باسشىلارى مەن حالىقارالىق ۇيىمداردىڭ جاۋاپتىلارى، جۇڭگولىق جانە شەتەلدىك مينيستر دارەجەلى 1000نان استام سيلى قوناق، شەكارا ٴىشى ـ سىرتىنان 15 مىڭنان استام كاسىپورىن مەن 140 مىڭ ساۋداگەر كورمەگە، ماجىلىسكە قاتىناستى، كورمەنى ۇستىندە تاماشالاعاندار 2 ميلليونعا جۋىق ادام (رەت) بولدى، كورمە ـ ٴماجىلىس ازيا − ەۆروپا ٴوڭىرى ٴۇشىن سەلبەستىك ورتاق تانىمىن ۇيىستىرۋدا، سەلبەستىك كەڭىستىگىن كەڭەيتۋدە ماڭىزدى رول اتقاردى.
وسى كەزەكتى كورمە ـ ٴماجىلىستىڭ جوبا اۋماعى 140 مىڭ شارشى مەتر، ”جالپىلىق كورمە، كاسىبي وتكىزۋ“ پرينسيبىنە تاباندى بولىپ، ”ٴبىر ساراي، كوپ اۋماق“ ورنالاستىرىلىپ، نازار قارجى قوسۋ سەلبەستىگى، جاڭاشا وندىرگىش كۇش، ەرەكشە، ابزال كاسىپ سالاسى، جاسىل دامۋ، مادەنيەت پەن ساياحاتتى توعىستىرۋ، جىبەك جولى سەلبەستىگى سىندى 6 ۇلكەن ەرەكشە تاقىرىپقا شوعىرلاندىرىلىپ، ٴتۇرلى كورمە اۋماقتارى دالمە ـ ٴدال ورنالاستىرىلىپ، كورمەگە قاتىناسۋدىڭ، كورمەنى تاماشالاۋدىڭ اقىل ـ پاراساتتىق اسەرى جوعارىلاتىلادى.
كورمە ـ ٴماجىلىستىڭ جوعارى ساپالى وتكىزىلۋىنە شىنايى كەپىلدىك ەتۋ ٴۇشىن، وسى كەزەكتى كورمە سيلى قوناقتاردى ۇسىنىس ەتۋ، ەكونوميكا ـ ساۋدا قيمىلى، قىزمەت وتەۋدى قامتاماسىزداندىرۋ جاقتارىندا دالمە ـ ٴدال كۇش سالادى. سيلى قوناقتاردى ۇسىنىس ەتۋدە نازار ”ٴبىر بەلدەۋ، ٴبىر جولدى“ بىرگە قۇرۋ سەلبەستىك قاجەتىنە شوعىرلاندىرىلىپ، ورتا ازياداعى 5 ەلدىڭ، ت، ب ساۋداگەرلەرى ٴتۇيىندى ۇسىنىس ەتىلەدى؛ ەكونوميكا ـ ساۋدا قيمىلىندا ساۋدانى جەبەۋ، قارجى قوسۋ سەلبەستىگى، تۇتىنۋدى كەڭەيتۋ، جاڭالىق اشۋ سەلبەستىگى سىندى 4 سالا ارقاۋ ەتىلىپ، قارجى قوسۋ، ساۋدانى جەبەۋ جانە سايكەستى جەلىلەس قيمىلدار جوسپارلانىپ وتكىزىلەدى، سونىمەن بىرگە وقۋ ـ اعارتۋ، عىلىم ـ تەحنولوگيا، مادەنيەت سياقتى سالالاردا حالىقارالىق اۋىس ـ كۇيىس ورىستەتىلەدى.
قازىر كورمە ـ ٴماجىلىستىڭ كورمەگە شاقىرۋ، كورمە ۇيىمداستىرۋ سياقتى ٴتۇرلى دايىندىق قىزمەتتەرى جوعارى ونىمدىلىكپەن ىلگەرىلەتىلۋدە، شەكارا ٴىشى ـ سىرتىنداعى كاسىپورىندار مەن كاسىپتىك ساۋداگەرلەر بەلسەنە تىزىمدەلۋدە، كوپتەگەن باستاماشى كاسىپورىندار، كاسىپ سالاسىنىڭ كوشباسشى قۇرىلىمدارى كورمەگە قاتىناسۋ ويىن بىلدىرۋدە، الدىڭعى لەكتەگى تەحنولوگيا، زەردەلى جابدىق، ساپالى نىسان سياقتىلار جەدەل تۇيىلىسۋدە. كورمە ـ ٴماجىلىس اناعۇرلىم جوعارى ولشەممەن، اناعۇرلىم ناقتى شارامەن، اناعۇرلىم ساپالى قىزمەت وتەۋمەن ازيا − ەۆروپا سەلبەستىگىنىڭ جاڭا قوزعالىس قۋاتىن ۇيىستىرىپ، ”ٴبىر بەلدەۋ، ٴبىر جولدى“ جوعارى ساپالى قۇرۋعا قۋاتتى قوزعاۋشى كۇش ۇستەيدى.
