ۋاڭ حۋنيڭ، ساي چي قاتارلىلار كەزدەسۋگە قاتىناستى
4 ـ ايدىڭ 10 ـ كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ بەيجيڭدە جىڭ لي ـ ۋىن ٴتوراعا باستاعان جۇڭگو گومينداڭ پارتياسىنىڭ ساپارلاۋ ۇيىرمەسىندەگىلەرمەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
4 ـ ايدىڭ 10 ـ كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ بەيجيڭدە جىڭ لي ـ ۋىن ٴتوراعا باستاعان جۇڭگو گومينداڭ پارتياسىنىڭ ساپارلاۋ ۇيىرمەسىندەگىلەرمەن كەزدەستى.
□سۋرەتتى شينحۋا اگەنتتىگىنىڭ ٴتىلشىسى لي شياڭ تۇسىرگەن
شينحۋا اگەنتتىگىنىڭ 4 ـ ايدىڭ 10 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ 4 ـ ايدىڭ 10 ـ كۇنى تۇستەن بۇرىن بەيجيڭدە جىڭ لي ـ ۋىن ٴتوراعا باستاعان جۇڭگو گومينداڭ پارتياسىنىڭ ساپارلاۋ ۇيىرمەسىندەگىلەرمەن كەزدەستى.
شي جينپيڭ جىڭ لي ـ ۋىننىڭ ۇيىرمە باستاپ ساپارلاي كەلگەندىگىن قارسى الدى. ول بىلاي دەپ اتاپ كورسەتتى: گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا باسشىلارىنىڭ اراعا 10 جىل سالىپ تاعى دا جۇزدەسۋى ەكى پارتيا قارىم ـ قاتىناسىنىڭ، ەكى جاعالاۋ قاتىناسىنىڭ دامۋى جونىنەن ماڭىزدى مانگە يە. ەكى جاعالاۋداعى باۋىرلاستار بىردەي جۇڭحۋا ۇلتىنا ٴتان، تايۋاندىق باۋىرلاستاردى قامتىعان ٴار ۇلت حالقى ٴبىر تۇتاس كوپ ۇلتتى مەملەكەتتى بىرگە قۇردى، ايبىندى جۇڭگو تاريحىن بىرگە جازدى، شۇعىلالى جۇڭحۋا وركەنيەتىن بىرگە جاراتتى، ۇلى ۇلت رۋحىن بىرگە جەتىلدىردى، سونداي ـ اق مەملەكەت تەرريتورياسى بولشەكتەنبەۋ، مەملەكەت بىلىقپاۋ، ۇلت ىدىراماۋ، وركەنيەت ۇزىلمەۋ سىندى ورتاق سەنىمدى سومداپ، جۇڭحۋا ۇلتىنىڭ ٴوزىن تالىقپاي الۋەتتەندىرۋىنە، جۇڭحۋا وركەنيەتىنىڭ ۇزىلمەي جالعاسۋىنا جەتەكشىلىك ەتتى.
شي جينپيڭ بىلاي دەپ باسا دارىپتەدى: حالىقارالىق جاعداي، تايۋان بۇعازى جاعدايى مەيلى قالاي وزگەرسە دە، جۇڭحۋا ۇلتىنىڭ ۇلى گۇلدەنۋى سىندى ۇلكەن بەتالىس وزگەرمەيدى، ەكى جاعالاۋداعى باۋىرلاستاردىڭ ەتەنە، ارالاس ـ قۇرالاس بولۋى، ٴبىر نىسانانى بەتكە الىپ ٴجۇرۋى سىندى ۇلكەن اۋقىم وزگەرمەيدى. ەكى جاعالاۋداعى باۋىرلاستاردىڭ بارلىعى تايۋان بۇعازىنىڭ بەيبىتشىلىگىن، تىنىشتىعىن اڭسايدى، ەكى جاعالاۋ قاتىناسىنىڭ جاقسارۋىن، دامۋىن اڭسايدى، تۇرمىستارىنىڭ ٴتىپتى دە جاقسى بولۋىن اڭسايدى، بۇل گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيانىڭ باس تارتۋعا بولمايتىن جاۋاپكەرشىلىگى ٴارى قول ۇستاسا سەلبەسۋىنىڭ قوزعاۋشى كۇشى. ٴبىز ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ سىندى ورتاق ساياسي نەگىزدە جۇڭگو گومينداڭ پارتياسىن قامتىعان تايۋانداعى ساياسي پارتيالارمەن، ۇيىمدارمەن جانە قوعامداعى ٴار سالا قايراتكەرلەرىمەن بىرگە اۋىس ـ كۇيىستى، تىلدەسۋدى كۇشەيتىپ، ەكى جاعالاۋدىڭ بەيبىتشىلىگى ٴۇشىن، باۋىرلاستاردىڭ قۇت ـ ىرىسى ٴۇشىن، ۇلتتىڭ گۇلدەنۋى ٴۇشىن، ەكى جاعالاۋ قارىم ـ قاتىناسىنىڭ بولاشاعىن جۇڭگولىقتاردىڭ ٴوز قولىندا مىقتاپ ۇستاۋىن قالايمىز.
شي جينپيڭ ەكى جاعالاۋ قارىم ـ قاتىناسىنىڭ دامۋى جونىندە 4 ٴتۇرلى پىكىردى ورتاعا قويدى.
ٴبىرىنشى، دۇرىس شىنايى مويىنداۋ ارقىلى جۇرەكتەردىڭ توعىسۋىن جەبەۋگە تاباندى بولۋ كەرەك. ەكى جاعالاۋداعى باۋىرلاستار − تامىرى ٴبىر، توركىنى ٴبىر، مادەنيەتى ٴبىر، تەگى ٴبىر، قان تامىرى جالعاسقان، بەينەت پەن زەينەتتى بىرگە وتكەرەتىن تاعدىرلاس ورتاق تۇلعا. ٴبىر ٴۇيلى جاندار بىرگە جاساعاندا، ٴسوز بولسا جاقسىراق اڭگىمەلەسسە، ٴىس بولسا كوبىرەك اقىلداسسا بولعانى، شەشىلمەيتىن قايشىلىق پەن الاۋىزدىق بولمايدى. قوعامدىق ٴتۇزىمىنىڭ ۇقساماۋى بولشەكتەنۋدىڭ سىلتاۋى بولا المايدى. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا، ەكى جاعالاۋداعى باۋىرلاستار ۇلتتىق تۇرعىدا بەرىك تۇرىپ، جۇڭحۋا مادەنيەتىن جالعاستىرىپ جانە اسقاقتاتىپ، جۇڭحۋا ۇلتى، جۇڭحۋا مادەنيەتى، ۇلى وتان جونىندەگى شىنايى مويىنداۋدى بەكەمدەپ، ناعىز جۇڭگولىق بولۋ ەركىن، جىگەرىن، بەكىمىن نىعايتۋى كەرەك.
ەكىنشى، بەيبىت دامۋ ارقىلى ورتاق مەكەندى قورعاۋعا تاباندى بولۋ كەرەك. ۇلى قۇرلىق پەن تايۋان بىردەي ٴبىر جۇڭگوعا ٴتان، جۇڭگو − جۇڭحۋا ۇلتىنىڭ ورتاق مەكەنى. ەكى جاعالاۋداعى باۋىرلاستاردىڭ وسى ورتاق مەكەندى ويداعىداي قورعاۋىنىڭ، ويداعىداي قۇرۋىنىڭ ٴتۇپ نەگىزى − ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ، ونىڭ وزەگى − ەكى جاعالاۋدىڭ ٴبىر جۇڭگوعا ٴتان ەكەندىگىن شىنايى مويىنداۋ. وتباسى بەرەكەلى بولسا، بارلىق ٴىس گۇلدەنىپ ـ كوركەيەدى. ەكى جاعالاۋ قارىم ـ قاتىناسىنىڭ بەيبىت دامۋىنا ٴتيىمدى قۋاتتامالار بولسا، ٴبىز تۇگەلدەي قارسى الامىز، ەكى جاعالاۋ قاتىناسىنىڭ بەيبىت دامۋىنا ٴتيىمدى ىستەر بولسا، ٴبىز كۇش سالا ىستەيمىز. ”تايۋاندى دەربەستەندىرۋ“ − تايۋان بۇعازىنىڭ بەيبىتشىلىگىن بۇلدىرەتىن پالە باسى، ٴبىز استە ىرقىنا جىبەرمەيمىز، استە جول بەرمەيمىز. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا، ەكى جاعالاۋداعى باۋىرلاستار ۇلتتىڭ اقيقات ىستەرىنە تاباندى بولىپ، ”تايۋاندى دەربەستەندىرۋدى“ كوزدەيتىن بولشەكتەۋشىلىك پەن سىرتتىڭ كيلىگۋىنە قارسى تۇرىپ، ەكى جاعالاۋ قارىم ـ قاتىناسىنىڭ بەيبىت دامۋىن ىلگەرىلەتىپ، جۇڭحۋا ۇلتىنىڭ ورتاق مەكەنىن باتىل قورعاۋى كەرەك.
ٴۇشىنشى، اۋىس ـ كۇيىس جاساۋ، توعىسۋ ارقىلى حالىق تۇرمىسى قۇت ـ ىرىسىن ارتتىرۋعا تاباندى بولۋ كەرەك. ەكى جاعالاۋ قارىم ـ قاتىناسىن دامىتۋدىڭ نىساناسى − ەكى جاعالاۋداعى باۋىرلاستاردى ٴتىپتى دە تاماشا تۇرمىسقا كەنەلتۋ. ٴبىز ەكى جاعالاۋداعىلار ٴبىر ٴۇيلى جاندار ۇستانىمىنان ۇزدىكسىز جازباي، تايۋاندىق باۋىرلاستار ٴۇشىن بەلسەنە ناقتى ىستەردى بىتىرەمىز، يگى ىستەردى ىستەيمىز، قيىنشىلىقتاردى شەشەمىز. وتانىمىز ۇلى قۇرلىعىنىڭ تاۋ ـ وزەندەرى كوركەم، بازارى كەڭ، تايۋاندىق باۋىرلاستاردىڭ ۇنەمى ۇيلەرىنە قايتىپ امانداسىپ تۇرۋىن قارسى الامىز، تايۋان جاستارىنىڭ ۇلى قۇرلىققا كەلىپ اۋىس ـ كۇيىس جاساپ، دامۋىن قارسى الامىز، تايۋاننىڭ اۋىل شارۋاشىلىعى، بالىقشىلىق ونىمدەرىنىڭ، ساپالى تاۋارلارىنىڭ ۇلى قۇرلىقتاعى سان مىڭداعان وتباسىلارىنا جەتكىزىلۋىن قارسى الامىز. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا، ەكى جاعالاۋداعى باۋىرلاستار ەكى جاعالاۋدىڭ ارالاسۋىن، ىشتەسۋىن، توعىسۋىن بىرگە كەڭەيتىپ، ەكى جاعالاۋداعى باۋىرلاستاردىڭ تۋىسقاندىق سۇيىسپەنشىلىگىن، قۇت ـ ىرىسىن ارتتىرۋى كەرەك.
ٴتورتىنشى، ىنتىماقتاسا كۇرەس جۇرگىزۋ ارقىلى جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا تاباندى بولۋ كەرەك. بيىل − سۇن جۇڭشان مىرزا دۇنيەگە كەلگەندىگىنىڭ 160 جىلدىعى، جۇڭحۋانى گۇلدەندىرۋ، مەملەكەتتى بىرلىككە كەلتىرۋ ونىڭ ومىرلىك تالپىنىسى بولدى. بۇگىنگى تاڭدا ٴبىز جۇڭگو ۇلگىسىندەگى وسىزامانداندىرۋ جولىن ٴساتتى اشتىق، جۇڭحۋا ۇلتىنىڭ ۇلى گۇلدەنۋى بوگەۋ بەرمەيدى. ٴبىز اناعۇرلىم كوپ تايۋاندىق باۋىرلاستاردىڭ ۇلى قۇرلىقتىڭ قوعامدىق ٴتۇزىمى مەن دامۋ جولىن دۇرىس تانيتىندىعىنا، تايۋاننىڭ دامۋ بولاشاعىنىڭ قۇدىرەتتى وتاندا ەكەندىگىن، تايۋاندىق باۋىرلاستاردىڭ مۇددەسىنىڭ، قۇت ـ ىرىسىنىڭ جۇڭحۋا ۇلتىنىڭ ۇلى گۇلدەنۋىمەن بايلانىستى ەكەندىگىن تەرەڭ تانيتىندىعىنا كامىل سەنەمىز. بيىل − ۇلى قۇرلىق ”15 ـ بەسجىلدىعىنىڭ“ باستاما جىلى، ٴبىز قالىڭ تايۋاندىق باۋىرلاستارمەن دامۋ ورايى مەن جەتىستىكتەرىنەن بىرگە يگىلىكتەنۋدى، جۇڭحۋا ۇلتى ەكونوميكاسىن بىرگە زورايتۋدى قالايمىز. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا ساياسي ٴوزارا سەنىمدىلىكتى بەكەمدەپ، ۇتىمدى ىقپالداستىقتى ساقتاپ، ەكى جاعالاۋداعى باۋىرلاستاردى ىنتىماقتاستىرىپ، قول ۇستاسا وتىرىپ وتاندى بىرلىككە كەلتىرۋ، ۇلتتى گۇلدەندىرۋ سىندى كوركەم بولاشاقتى بىرگە اشۋى كەرەك.
جىڭ لي ـ ۋىن مىنالاردى ٴبىلدىردى: ەكى جاعالاۋ حالقى بىردەي ياندي ـ حۋاڭدي ۇرپاقتارى، بىردەي جۇڭحۋا ۇلتىنا ٴتان، بارلىعى جۇڭحۋا مادەنيەتىنەن ٴنار العان، بارلىعى جۇڭگولىق، ٴبىر ٴۇيلى جاندار، سۇن جۇڭشان مىرزا العا قويعان جۇڭحۋانى گۇلدەندىرۋدى قول ۇستاسا ىلگەرىلەتۋى كەرەك. گومينداڭ پارتياسى مەن جۇڭگو كوممۋنيستىك پارتياسى سىندى ەكى پارتيا ”92 ـ جىلعى ورتاق تانىمعا“ تاباندى بولۋ، ”تايۋاندى دەربەستەندىرۋگە“ قارسى تۇرۋ سىندى ورتاق ساياسي نەگىزدە ساياسي ٴوزارا سەنىمدىلىكتى كۇشەيتىپ، بايلانىس تۇعىرىنىڭ يقۋاتىن ساۋلەلەندىرىپ، جۇڭحۋا تاريحىن قورعاۋعا، جۇڭحۋا مادەنيەتىن اسقاقتاتۋعا كۇش سالىپ، ەكى جاعالاۋدىڭ حالىقتىق، نەگىزگى ساتى، ەكونوميكا ـ ساۋدا، مادەنيەت سياقتى سالالارداعى اۋىس ـ كۇيىسىن، سەلبەستىگىن ىلگەرىلەتىپ، جاستاردىڭ اۋىس ـ كۇيىسىن، دامۋىن قولداپ، حالىقتىڭ ورتاق قۇت ـ ىرىسىن ارتتىرىپ، ەكى جاعالاۋ قارىم ـ قاتىناسىنىڭ بەيبىت دامۋىن ىلگەرىلەتىپ، ەكى جاعالاۋ قارىم ـ قاتىناسىنىڭ كوركەم بولاشاعىن اشىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋى كەرەك.
ۋاڭ حۋنيڭ، ساي چي قاتارلىلار كەزدەسۋگە قاتىناستى.
