− جۇڭگو مۇناي توبى باتىس بولىك بۇرعىلاۋ ـ بارلاۋ ينجەنەرياسى شەكتى سەرىكتەستىگى بايىنعولين وبلىستىق بولىمشە سەرىكتەستىگىنىڭ 120001 ـ بۇرعىلاۋ اترەتى جونىندە
□ انار بۇلت \ شينجياڭ گازەتىنىڭ ٴتىلشىسى يۇي جياڭيان
4 ـ ايدىڭ 30 ـ كۇنى مەملەكەتتىك جۇمىسشىلار ۇزدىگى اتاعىن العان جۇڭگو مۇناي توبى باتىس بولىك بۇرعىلاۋ ـ بارلاۋ ينجەنەرياسى شەكتى سەرىكتەستىگى بايىنعولين وبلىستىق بولىمشە سەرىكتەستىگىنىڭ 120001 ـ بۇرعىلاۋ اترەتى تيانشان تاۋىنىڭ وڭتۇستىك باۋرايىندا جىنتان 1 ـ قۇدىعىن بۇرعىلاپ جاتتى.
”جىنتان 1 ـ قۇدىعىنىڭ جوباداعى بۇرعىلاۋ تەرەڭدىگى 8450 مەتر، قازىرگە دەيىن 5465 مەتر بۇرعىلاندى.“ 120001 ـ بۇرعىلاۋ اترەتى پارتيا ياچەيكاسىنىڭ شۋجيى لين نان قازىر بارلىق اترەت مۇشەلەرىنىڭ شوعىرلى قامال الىپ جاتقاندىعىن تانىستىردى.
جىنتان 1 ـ قۇدىعىنىڭ جوباداعى بۇرعىلاۋ تەرەڭدىگى 8450 مەتر بولعانىمەن، ەڭ سوڭىندا بۇرعىلاناتىن نىسانالى قاباتى سيناستانا جۇيەسى، بۇل 10 مىڭ 910 مەتر تەرەڭدىكتەگى بۇرعىلاۋ مىندەتى ورىندالعان شىندي تاكى 1 ـ قۇدىعىنىڭ جەر قاباتىنان دا بايىرعى جەر قاباتى. ”گەولوگيالىق شارت ـ جاعدايى توتەنشە كۇردەلى بولعاندىقتان، شىندي تاكى 1 ـ قۇدىعىن بۇرعىلاۋ مىندەتىن سيناستانا جۇيەسىنە نەبارى نەشە ون مەتر قاشىقتىقتاعى كەمبري جۇيەسىندە توقتاتۋعا تۋرا كەلدى. جىنتان 1 ـ قۇدىعىن بۇرعىلاۋداعى ماقسات ٴتىپتى دە بايىرعى جەر قاباتىن بۇرعىلاپ، سيناستانا جۇيەسىندە مۇناي ـ گاز بار ـ جوقتىعى جونىندە ىزدەنىس جاساۋ“، ـ دەدى لين نان.
تارىم ويپاتىنداعى ەرەكشە تەرەڭ قاباتتاعى مۇناي ـ گازدى بارلاۋدا 120001 ـ بۇرعىلاۋ اترەتى اتى ـ زاتىنا ساي ”ەڭ قيىن تۇيىندەردى“ بويسۇندىرۋعا باتىلدىق ەتكەن قوسىن بولدى. ولار بۇكىل جەر شارى مەن ازياداعى 5 ٴىرى ينجەنەريانىڭ رەكوردىن جاڭالاعان شىندي تاكى 1 ـ قۇدىعىن بۇرعىلاپ شىقتى، ونان بۇرىن تاعى ازيا قۇرلىعىنداعى ەڭ تەرەڭ قۇدىق بۇرعىلاپ شىعۋ سياقتى 7 رەكوردتى جاڭالاعان لۇنتان 1 ـ قۇدىعىن قازىپ شىققان، بۇل قۇدىقتىڭ بۇرعىلانعان تەرەڭدىگى 8882 مەتر، چومولاڭما شىڭىنىڭ بيىكتىگىنەن دە تەرەڭ، وسىدان باستاپ تارىم ويپاتىندا ”جەر استى چومولاڭما شىڭى“ دەگەن اتى تارالدى.
باس شۋجي شي جينپيڭ بىلاي دەپ اتاپ كورسەتتى: ”جەر شارىنىڭ تەرەڭ قويناۋىنا شەرۋ تارتۋ − ٴبىز، ٴسوز جوق، شەشۋگە ٴتيىستى ستراتەگيالىق عىلىم ـ تەحنولوگيا ماسەلەسى.“ 120001 ـ بۇرعىلاۋ اترەتى باس شۋجيدىڭ ىقىلاستى تاپسىرماسىن ەستە بەرىك ساقتاپ، تارىم ويپاتىندا جەر شارىنىڭ تەرەڭ قويناۋىنا قاراي توقتاۋسىز شەرۋ تارتىپ، ەلىمىزدىڭ ەرەكشە تەرەڭ قاباتتى بۇرعىلاۋداعى ”تىڭ يگەرۋشىسىنە“ اينالدى.
ٴبىراق كىمنىڭ ويىنا كەلسىن، قۇرىشتاي بەرىك جىگەرى بار وسى بۇرعىلاۋ اترەتىنىڭ مۇشەلەرى نەبارى 45 ادام، ولاردىڭ ورتاشا جاسى 35كە دە جەتپەيدى، الايدا ولاردىڭ ەرەكشە قۇدىق بۇرعىلاۋ تاجىريبەسى مول، تارىم ويپاتىنان كوپتەگەن ”جەر استى چومولاڭما شىڭىن“ بۇرعىلاپ قانا قويماي، تاكلاماكان ٴشولىنىڭ قويناۋىنان دا ”ٴىرى ەل تەرەڭدىگىن“ بۇرعىلاپ شىعىپ، ىلگەرىندى ـ كەيىندى اۆتونوميالى رايوندىق جۇمىسشىلار ۇزدىگى اتاعىنا، ورتالىق كاسىپورىندارىنداعى وزات كوللەكتيۆ جانە جۇڭگو مۇناي توبى وزات نەگىزگى ساتى پارتيا ۇيىمى، ۇلگىلى كوللەكتيۆ قاتارلى داڭقتارعا يە بولدى.
شىندي تاكى 1 ـ قۇدىعى جۇڭگو مۇناي توبىنىڭ تارىم ويپاتىنا ورنالاستىرعان ەلىمىزدەگى تۇڭعىش 10 مىڭ مەتردەن اسقان عىلمي ىزدەنۋ قۇدىعى. شىندي تاكى 1 ـ قۇدىعىن بۇرعىلاپ تەكسەرۋدە شاڭ ـ توزاڭ، جوعارى تەمپەراتۋرا سياقتى ناشار كليمات ورتاسىن جەڭىپ قانا قويماي، 220 سەلتسي گرادۋستىق جوعارى تەمپەراتۋرانىڭ سىناعىنا توتەپ بەرىپ، 145 مەگاپاسكال ەرەكشە كۇشتى قىسىمعا توتەپ بەرۋگە تۋرا كەلەدى. ەرەكشە تەرەڭ، ەرەكشە جوعارى تەمپەراتۋرالى، ەرەكشە جوعارى قىسىمدى، كۇكىرت قۇرامى جوعارى بولۋداي ”ٴۇش ەرەكشە، ٴبىر جوعارى“ سىندى ەڭ جوعارى شەك سايىسى الدىندا، 120001 ـ بۇرعىلاۋ اترەتى باتىلدىقپەن بورىش ارقالاپ، ٴىرى ەلدىڭ ماڭىزدى جابدىعى − ەلىمىز دەربەس زەرتتەپ جاساعان، جوبالاعان الەمدەگى تۇڭعىش 12 مىڭ مەترلىك تەرەڭ قۇدىقتى اۆتوماتتى بۇرعىلاۋ ماشيناسىنان قامال الىپ قيىندىقتاردى جەڭىپ، سان بوگەتتەردى بۇزىپ، جەر شارىنىڭ تەرەڭ قويناۋىنا شەرۋ تارتتى.
اسپانعا شىعۋ قيىن، جەر استىنا ٴتۇسۋ ٴتىپتى قيىن. شىندي تاكى 1 ـ قۇدىعىنىڭ بۇرعىلانعان تەرەڭدىگى 10 مىڭ 910 مەتر، ول كوزگە كورىنبەيتىن جەر استىنداعى ”ەلسىز وڭىردە“ تىك باعىتتا 11 كيلومەتردەي تەرەڭدىكتە ارنا قازعانمەن بارابار. شىندي تاكى 1 ـ قۇدىعىن بۇرعىلاۋدا 12 ۇقساماعان جىنىس قاباتىن، ۇقساماعان قىسىمدى جەر قاباتىن بۇرعىلاۋعا تۋرا كەلەدى، 10 مىڭ مەترگە جەتكەننەن كەيىن، ”بۇرعىلاۋدا قادام سايىن كىسىنى تىكسىندىرىپ وتىردى“: بۇرعىلاپ 10 مىڭ 6 مەترگە جەتكەندە قۇدىق ٴتۇبى وپىرىلىپ ٴتۇستى؛ بۇرعىلاپ 10 مىڭ 289 مەترگە جەتكەندە قاتەرلى دارەجەدە سۋ قاشتى... 10 مىڭ مەترگە جەتكەننەن كەيىنگى ٴاربىر كۇندە بۇرعىلاۋ اترەتىندەگىلەردىڭ نەرۆى قاربالاستانىپ، ٴاربىر مەتر قازعان سايىن شىتاداي جۇقا مۇز بەتىنەن ٴوتىپ بارا جاتقانداي سەزىلدى دەۋگە بولادى.
شىندي تاكى 1 ـ قۇدىعى 2025 ـ جىلى بۇرعىلانىپ بولعاننان كەيىن، تاعى دا مۇناي الۋ سىناعى سياقتى قىزمەتتەر ىستەلدى. 2025 ـ جىلى 12 ـ ايدا 120001 ـ بۇرعىلاۋ اترەتى شىندي تاكى 1 ـ قۇدىعىنان جىنتان 1 ـ قۇدىعىنا كوشىپ كەلىپ، جىنتان 1 ـ قۇدىعىن بۇرعىلاۋدىڭ شىمىلدىعىن اشتى.
جۇڭگو مۇناي توبى باتىس بولىك بۇرعىلاۋ ـ بارلاۋ ينجەنەرياسى شەكتى سەرىكتەستىگىنىڭ كاسىپورىن باس مامانى ۋان يۇنشياڭ مىنالاردى ٴبىلدىردى: 10 مىڭ مەترلىك ەرەكشە تەرەڭ قاباتتا شىندي تاكى 1 ـ قۇدىعىندا كەلەلى بارلاۋ، بايقاۋ ارقىلى مۇناي ـ تابيعي گازدىڭ ساقتالۋ نازارياسى قايتا قالىپتاسىپ، گەولوگيالىق تانىمداعى بوستىق تولتىرىلدى. بۇرعىلاپ الىنعان ازياداعى 10 مىڭ مەتر تەرەڭدىكتەگى 540 ميلليون جىلدىڭ الدىنداعى كەمبري جۇيەسىندەگى تاۋ جىنىستارىنىڭ تۇڭعىش ۇلگىسىمەن ەلىمىزدىڭ تۇڭعىش 10 مىڭ مەترلىك گەولوگيالىق قيما بەت سۋرەتى سىزىلىپ، سيناستانا كەزەڭى مەن كەمبري كەزەڭىندەگى تارىم ويپاتىنىڭ بايىرعى قۇرىلىمىن، ەجەلگى ورتاسىن جانە بۇرىنعى تەتيس مۇحيتىنىڭ وزگەرۋىن اشىپ كورسەتۋگە توتە دالەل ازىرلەندى.
سونىمەن بىرگە شىندي تاكى 1 ـ قۇدىعى تاعى ەلىمىزدىڭ 220 سەلتسي گرادۋستىق جوعارى تەمپەراتۋرالى بۇرعىلاۋ سۇيىقتىعى، جوعارى ٴونىمدى تاۋ جىنىسىن تالقانداۋ بۇرعىسى، جوعارى كۇشەمەلى بۇرعى سابى سياقتى 10 ۇلكەن تەحنولوگيالىق قارپىمدى جابدىقتى دەربەس زەرتتەپ اشۋىنا باستاماشىلدىق ەتىپ، قۇدىق بۇرعىلاۋ، قۇدىقتى بەكەمدەۋ، قۇدىق ولشەۋ سياقتىلاردى قامتىعان تۇتاس تىزبەكتى وزەكتى تەحنولوگيا شوعىرىن قالىپتاستىرىپ، نازاريا، جابدىقتان تەحنولوگياعا دەيىن جاپپاي ەلىمىزدە ٴوندىرۋدى جۇزەگە اسىردى.
”عىلىم ـ تەحنولوگيانىڭ شىڭىنا ەرلىكپەن شىعىپ، جەر شارىنىڭ تەرەڭ قويناۋىنا قاراي توقتاۋسىز شەرۋ تارتامىز.“ 120001 ـ بۇرعىلاۋ اترەتى تۇعىرىنىڭ ديرەكتورى جاڭ جىشۋە بىلاي دەدى: بولاشاقتا قۇرىش ادام رۋحىمەن ۇزدىكسىز تەرەڭ قاباتتا ارمان قۋىپ، تارىم ويپاتىنان اناعۇرلىم كوپ ”جەر استى چومولاڭما شىڭىن“ بۇرعىلاپ شىعىپ، مەملەكەتتىڭ ەنەرگيا حاۋىپسىزدىگىن قامتاماسىز ەتۋگە تاعى دا تىڭ ۇلەس قوسامىز.
