□ انار بۇلت \ شينجياڭ گازەتىنىڭ تىلشىلەرى لۋ فىڭباۋ، كاڭ حاۋيان
”1 ـ مامىر“ دەمالىسىندا شينجياڭنىڭ ٴتۇيىندى نىسان قۇرىلىستارىنىڭ جۇمىس باسى اۋەلگىدەي دابىرالى قاربالاس كۇيدە بولدى، مۇنارا كراندار قاز ـ قاتار ٴتىزىلىپ، ماشينالار گۇرىلدەپ، تاسىمال اۆتوكولىكتەرى ارلى ـ بەرلى قايشالىستى، قۇرىلىسشىلار قىزمەت ورىندارىنان تاپجىلماي، قۇرىلىستىڭ التىن مەزگىلىن مىقتى يگەرىپ، شەشۋشى تۇيىندەرگە كۇش سالا ۇمتىلدى، بارلىق جەردە ناقتى ىستەپ ەكپىندەي ىلگەرىلەۋ ورلەۋى كوتەرىلدى.
5 ـ ايدىڭ 3 ـ كۇنى G30 ليانيۇنگاڭ − قورعاس جوعارى قارقىندى تاس جولىنىڭ قۇمىل − تۇيىق بولىگىن وزگەرتىپ، كەڭەيتىپ سالۋ ينجەنەرياسىنىڭ 9 ـ مەردىگەرلىك بولىگى (تومەندە قىسقارتىلىپ ”قۇمىل − تۇيىق 9 ـ مەردىگەرلىك بولىگى“ دەلىنەدى) جۇمىس باسىندا اسفالت جاتقىزۋ جۇمىسى تارتىپپەن ورىستەتىلدى، 400دەن استام قۇرىلىسشى ٴبىرىنشى شەپتەن تاپجىلماي، كولىك قاتىناتۋ نىساناسىنا بار كۇشپەن ۇمتىلىپ، ۇشى ـ قيىرسىز قۇبا تۇزدە قاۋىرت ىستەۋ، جىلدام جۇرگىزۋ سىندى قامال الۋ ورلەۋىن كوتەردى.
قۇمىل − تۇيىق 9 ـ مەردىگەرلىك بولىگى 100 شاقىرىمدىق جەلدى اۋماقتىڭ وزەكتى بەلدەۋىنە ورنالاسقان، جىل بويى بوران ازىناپ تۇرادى، ورتاسى ناشار، تۇتاس جەلىدەگى ماڭىزدى، قيىن مەردىگەرلىك بولىگى. بيىل جىل باسىنان بەرى ينجەنەريا نىسان ٴبولىمى بايلىقتى ۇيلەسىمدى ورنالاستىرىپ، قۇرىلىس تۇيىندەرىن ەگجەي ـ تەگجەيلىلەندىرىپ، جاۋاپكەرشىلىكتى ناقتىلاندىرىپ، قارقىندى كۇش سالا مىقتى يگەردى. ”بارلىق ادام 6 ـ ايدىڭ 30 ـ كۇنى نەگىزگى جەلىدە اۆتوكولىك قاتىناتۋ نىساناسىن بۇلجىماي كوزدەپ، ەرلىكپەن شايقاس جاسادى، قازىر نىسان قۇرىلىسىنىڭ جالپى تۇلعالىق اياق الىسى %90تەن اسىپ، سوڭعى قامال الۋدىڭ شەشۋشى كەزەڭىنە ٴوتتى، اسفالتتىڭ ۇستىڭگى قاباتىن توسەۋ جانە قاتىناس حاۋىپسىزدىگى جابدىعىن ورناتۋ قىزمەتىن جەدەل ىلگەرىلەتۋدەمىز“، ـ دەدى جۇڭگو تەمىر جول 1 ـ مەكەمەسى توبى شەكتى سەرىكتەستىگى قۇمىل − تۇيىق 9 ـ مەردىگەرلىك بولىگى نىسانىنىڭ جاۋاپتىسى ليۋ شيانجۇن.
دانەكەرلەۋ ۇشقىندارى شاشىراپ، ماشينالار گۇرىلدەپ، 68 جابدىق جوعارى ونىمدىلىكپەن جۇمىس جۇرگىزىپ، 400دەن استام قۇرىلىسشى ٴبىرىنشى شەپتە ەرلىكپەن شايقاس جاسادى، شىحىزى ٴماجىلىس ـ كورمە ورتالىعىنىڭ قۇرىلىس الاڭى قاربالاستىققا ٴتۇستى. ”ٴبىز ’حاۋىپسىزدىككە كەپىلدىك ەتۋ، ساپاعا كەپىلدىك ەتۋ، قارقىنعا كەپىلدىك ەتۋ‘ بويىنشا ٴۇش ٴبىر تۇلعالانعان جوبا جاساپ، ’كۇندە شارلاپ تەكسەرۋ، اپتا سايىن بىرلەسىپ تەكسەرۋ، ارناۋلى تۇردە قۋزاۋ‘ مەحانيزمىن ورناتىپ، ماڭىزدى تۇيىندەردى شەگەرىپ ساناۋ بويىنشا ورنالاستىرىپ، قاريتا اسىپ شايقاس جۇرگىزىپ، شەشۋشى تۇيىندەردىڭ ۋاعىندا ورىندالۋىنا شىنايى كەپىلدىك ەتتىك“. جۇڭگو تەمىر جول 14 ـ مەكەمەسى توبى شەكتى سەرىكتەستىگى شىحىزى ٴماجىلىس ـ كورمە ورتالىعى نىسانىنىڭ جاۋاپتىسى لۋ شينلي بىلاي دەدى: قازىر نىسان سوڭعى كەزەڭگە ٴوتتى، 5 ـ ايدىڭ ورتا شەنىنەن بۇرىن جابدىقتاردى سىناقتان وتكىزۋ اياقتاپ، الاڭ ـ سارايلاردىڭ ”اشىلىسىمەن ورنىقتى بولۋىنا، العاشقى كورمەدە، ٴسوز جوق، جەڭىسكە جەتۋىنە“ بار كۇشپەن كەپىلدىك ەتەمىز.
وڭتۇستىك شينجياڭ تەمىر جولىنىڭ اقسۋدان مارالباسىنا دەيىنگى بولىگىنىڭ يقۋاتىن ارتتىرۋ، جاڭالاۋ ينجەنەرياسىنىڭ (تومەندە قىسقارتىلىپ ”اقسۋ − مارالباسى نىسانى“ دەلىنەدى) جۇمىس باسىندا ٴىرى تۇرپاتتى ماشينالار تولىق كوتەرىمدىلىكپەن جۇمىس جۇرگىزىپ، قۇرىلىسشىلار كۇش ـ قايراتتى تاسقىنداتىپ، ينجەنەريانىڭ اياق الىسىن ىلگەرىلەتتى.
”شارباقتىڭ شىعىسى، يجيانفاڭنىڭ شىعىسى، كەلپىننىڭ شىعىسى، اشالى سىندى 4 بەكەت ٴبىر ۋاقىتتا جۇمىس باستادى، ٴبىز قۇرىلىس جۇرگىزۋ مىندەتتەرىنەن كۇش سالا قامال الىپ، تۇيىندەردى شوعىرلى اشۋعا بەرىك نەگىز قالاۋدامىز“، ـ دەدى جۇڭگو تەمىر جول 15 ـ مەكەمەسى توبى شەكتى سەرىكتەستىگى اقسۋ − مارالباسى نىسانى S2 مەردىگەرلىك بولىگى نىسان ٴبولىمىنىڭ جاۋاپتىسى نيڭ ليچۇن.
التىن تاۋدىڭ قويناۋىندا چارقىلىق − ليڭياڭ (حۋاتۋگوۋدىڭ شىعىسى) 750 كيلوۆولتتىق ەلەكتر جەتكىزۋ، كەرنەۋ وزگەرتۋ ينجەنەرياسى قۇرىلىسىنىڭ جۇمىس باسىندا ماشينالار گۇرىلدەپ، جۇمىسشىلار تەمىر مۇنارا تاعانىن قازۋ جانە قۇيۋ جۇمىسىن ىستەۋدە.
”ٴىرى تۇرپاتتى ماشينالاردىڭ تاۋلى وڭىرگە كىرۋى قيىن، ٴبىز 121 ارقان جول سالىپ، 22 مىڭ 700 تەكشەمەترلىك بەتون شيكىزاتىن تاسىمالدادىق، ادام كۇشىمەن جۇمىس جۇرگىزۋ مەن ماشينا ارقىلى جۇمىس جۇرگىزۋدى ۇشتاستىرۋ ٴتاسىلى ارقىلى قۇرىلىس قارقىنىنا كەپىلدىك ەتتىك“. مەملەكەت ەلەكتر تورى شينجياڭ قۇرىلىس بولىمشە سەرىكتەستىگى 1 ـ نىسان باسقارۋ ورتالىعىنىڭ نىسانداردى باسقارۋ ـ تىزگىندەۋ ارناۋلى جاۋاپتىسى ۋ شىپيڭ بىلاي دەدى: مەجەمەن 5 ـ ايدىڭ اياق شەنىندە ينجەنەريا تەمىر مۇنارا قۇرۋ كەزەڭىنە وتەدى، بيىل تۇتاس جەلى بويىنشا تۇتاستىرىلادى.
وسى ەلەكتر جەتكىزۋ، كەرنەۋ وزگەرتۋ ينجەنەرياسى شينجياڭ ەلەكترىن سىرتقا جەتكىزۋدەگى 3 ـ اينىمالى توك ارناسى، شينجياڭدا سالىنىپ بولعان چارقىلىق 750 كيلوۆولتتىق كەرنەۋ وزگەرتۋ پۋنكتىنەن باستالىپ، سالىنىپ جاتقان چىمان 750 كيلوۆولتتىق كەرنەۋ وزگەرتۋ پۋنكتىن باسىپ ٴوتىپ، چيڭحاي ماڭيا قالاسىندا سالىنىپ بولعان ليڭياڭ 750 كيلوۆولتتىق كەرنەۋ وزگەرتۋ پۋنكتىندە اياقتالادى، جەلىنىڭ جالپى ۇزىندىعى شامامەن 723.68 كيلومەتر، مۇنىڭ ىشىندە شينجياڭ بولىگىنىڭ ۇزىندىعى شامامەن 486.73 كيلومەتر، جاڭادان 1054 تەمىر مۇنارا سالىنادى.
كۇنلۇن تاۋىنىڭ سولتۇستىك بوكتەرىندەگى يۇرۇڭقاش سۋ يگىلىگى تورابى ينجەنەرياسىنىڭ قۇرىلىس ورنىندا 90 مىڭ شارشى مەتردەن استام كەلەتىن توسپا تۇلعاسى جۇمىس بەتىندە تاسىمال اۆتوكولىكتەرى گرانيت تاستاردى جارىپ، پارشالانعان ماتەريالداردى تەگىس جايىپ، تاپتاۋ جابدىقتارى ارلى ـ بەرلى قايشالىسىپ ”تۇعىردى“ نىعايتۋدا، قۇرىلىس جۇرگىزۋشىلەر ۇلكەن توسپانى تىندىرۋ جانە بەتون قۇيۋ قىزمەتىنە قاداعالاي نازار اۋدارىپ، قارقىندى تەزدەتۋگە بار كۇشىن سالدى.
”نىساننىڭ تۇلعالىق ينجەنەرياسىنىڭ تاس ـ توپىراق قازۋ، تىرەك قويۋ جۇمىسى ورىندالىپ بولدى، توسپا 114 مەترگە دەيىن تىندىرىلىپ، جوباداعى مولشەردىڭ %49ى ورىندالدى“. شينجياڭ گىجوۋبا يۇرۇڭقاش سۋ يگىلىگى تورابى اشۋ شەكتى سەرىكتەستىگىنىڭ باس ينجەنەرى سۇي انجى بىلاي دەپ تانىستىردى: جوعارى سىلكىنىستى ٴوڭىر، بيىك ۇلكەن توسپا، بيىك جار، تەڭىز دەڭگەيىنەن بيىك بولۋ، سۋ قويماسىنىڭ ٴتۇسۋ تەرەڭدىگى ۇلكەن بولۋ، وزەن اڭعارىنىڭ تار بولۋى، قۇمدى بالشىق كوپ بولۋ سياقتى سىن ـ سايىستاردى جەڭۋ ٴۇشىن، نىسان توبى كوپ ٴتۇرلى جاڭا تەحنولوگيالاردى، جاڭا جابدىقتاردى قولدانىپ، قۇرىلىس جۇرگىزۋ حاۋىپسىزدىگى مەن ساپاسىن جان ـ جاقتى قامتاماسىز ەتتى. مەجەمەن بيىل توسپانىڭ تىندىرىلعان بيىكتىگى 188 مەترگە جەتىپ، كەلەر جىلى 9 ـ ايدا تيەكتى بەكىتىپ سۋ ساقتاۋدى جۇزەگە اسىرۋعا كۇش سالىنادى، 2028 ـ جىلى 6 ـ ايدا العاشقى توپتاعى گەنەراتور اگراگاتتارى ەلەكتر تاراتادى.
