قىستاق كاسىپورىن قۇردى، ءبىر جىلدا 2 ميلليون يۋاننىڭ ۇستىندە جەرگىلىكتى ءونىم ساتتى
□ انار بۇلت \ شينجياڭ گازەتىنىڭ ءتىلشىسى ءجازيرا نەسىپبەك
4 - ايدىڭ 15 - كۇنى پوسكام اۋدانى ەكىسۋ اۋىلى تاعارشى قىستاعىنداعى پوسكام اۋدانى رۇنزى اۋىل شارۋاشىلىعى ساۋدا - ساتتىق ازىق - تۇلىك دامىتۋ شەكتى سەرىكتەستىگىندە جەمىس قاعىنىڭ حوش ءيىسى اڭقىدى.
”ءبىز كۇنىنە ورتا ەسەپپەن 1000 جاشىك قۇرعاق جەمىس ءونىمىن وندىرەمىز، نەگىزىنەن شينجياڭ سىرتىنداعى بازارعا ساتىلادى، بيىل قۇنى ءبىر ميلليون يۋاننىڭ ۇستىندەگى تاپسىرىستى ورىندادىق، قانت قۇرامى تومەن، قوسپا بولماۋ تەحنولوگياسىنىڭ ارقاسىندا تۇتىنۋشىلاردىڭ قارسى الۋىنا بولەندىك“، - دەدى وسى سەرىكتەستىكتىڭ جاۋاپتىسى ياسىن توحتىيۇسۇپ.
2025 - جىلى تاعارشى قىستاعىنىڭ شىلان، جاڭعاق سياقتى قۇرعاق جەمىس ونىمدەرىنىڭ ساتىلۋ ارناسىن كەڭەيتۋ ءۇشىن، قىستاق پارتيا ياچەيكاسى مەن شينجياڭ اۋىل شارۋاشىلىعى ساۋدا بانكەسىنىڭ تاعارشى قىستاعىندا تۇراتىن قىزمەت اترەتى بەلسەندىلىكپەن قىستاق كادرلارىن، پارتيا مۇشەلەرىن جانە بۇقارا ۋاكىلدەرىن باستاپ ”سىرتقا شىعىپ“، جەرگىلىكتى ورىننىڭ كاسىپ سالاسىن دامىتۋداعى وزىق تاجىريبەلەرىن ۇيرەنىپ ۇلگى الدى. كوپشىلىك قايتا - قايتا دالەلدەۋ جانە كوللەكتيۆ شەشىم جاساۋ ارقىلى ەڭ سوڭىندا بوس تۇرعان بايلىقتى ىسكە قوسىپ، مەملەكەت مەنشىگىندەگى كاسىپورىندى ەنگىزىپ، جىنتىكتەي وڭدەۋدى دامىتۋ وي جەلىسىن ايقىندادى.
”قىستاق پارتيا ياچەيكاسى ءبىزدى باستاپ قايتا - قايتا ءماجىلىس اشىپ، اقىلداستى، سىرت جەرلەرگە بارىپ كورگەننەن كەيىن، ءبىزدىڭ وي جەلىسىمىز ايقىندالا ءتۇستى، كوپشىلىك بۇل جولمەن جۇرۋگە بولاتىندىعىن ىشتەي سەزىندى“، - دەدى قىستاق پارتيا ياچەيكاسىنىڭ مۇشەسى قاھار ءماتقۇربان.
سول جىلى 7 - ايدا پوسكام اۋدانى ەكىسۋ اۋىلى تاعارشى قىستاعى جارنا ەكونوميكالىق سەلبەستىك كووپەراتيۆى مەن پوسكام اۋدانىنداعى مەملەكەت مەنشىگىندەگى كاسىپورىن − پوسكام اۋداندىق رۇنزى اۋىل شارۋاشىلىعى كاسىپ سالاسىن دامىتۋ شەكتى سەرىكتەستىگى بىرلەسىپ قارجى قۇراپ، پوسكام اۋداندىق رۇنزى اۋىل شارۋاشىلىعى ساۋدا - ساتتىق ازىق - تۇلىك دامىتۋ شەكتى سەرىكتەستىگىن قۇردى، مۇندا رۇنزى اۋىل شارۋاشىلىعى كاسىپ سالاسىن دامىتۋ شەكتى سەرىكتەستىگى جارنانىڭ ％51ىن، قىستاق كوللەكتيۆ جارنانىڭ ％49ىن يەلەدى.
”بۇل ۇلەس سالىستىرماسى جاقسى جوبالانعان، كاسىپورىننىڭ ولشەمدى جۇمىس جۇرگىزۋىنە كەپىلدىك ەتۋمەن بىرگە، ءبىزدىڭ قىستاق كوللەكتيۆىمىزدىڭ سويلەۋ ۇقىعى مەن تابىس ۇقىعىنان تولىق يگىلىكتەنۋىنە مۇمكىندىك جاسادى، قايراتىمىز دا تاسقىنداي ءتۇستى“، - دەدى ياسىن توحتىيۇسۇپ.
سەرىكتەستىكتىڭ جۇمىس باستاۋ قارجىسى سىندى قيىن ماسەلەنى ءونىمدى شەشۋ ءۇشىن، قىستاقتا تۇراتىن قىزمەت اترەتى ارتقى سۇيەنىش مەكەمە - ورىن اۆتونوميالى رايوندىق اۋىل - قىستاق امانات - قارىز كووپەراتيۆى بىرلەسكەن كووپەراتيۆىنەن ءبىر ميلليون 470 مىڭ يۋان قارجى سايكەستىرىپ، قىستاق كوللەكتيۆىنىڭ جارنا قوسۋىنا جۇمسادى. پوسكام اۋدانىنداعى ءار دارەجەلى ۇكىمەتتەر دە نىساندى قاراپ بەكىتۋ، نەگىزدىك قۇرىلعىلاردى جاقسارتۋ سياقتى جاقتاردا زور قولداۋ كورسەتتى.
”بوس تۇرعان زاۆود ۇيلەرىن ىسكە قوسىپ، كاسىپورىننىڭ تەحنولوگياسى مەن باسقارۋ ۇستانىمىن ەنگىزۋ ارقىلى قىستاقتىڭ دامۋىنا جاڭا ءورىس اشتىق“، - دەدى تاعارشى قىستاعى پارتيا ياچەيكاسىنىڭ شۋجيى ياسىن تۇرۇپ.
بازارلاندىرۋ ءتاسىلى اۋىل - قىستاقتىڭ بايلىعىن جەدەل جانداندىردى. پوسكام اۋدانى رۇنزى اۋىل شارۋاشىلىعى كاسىپ سالاسىن دامىتۋ شەكتى سەرىكتەستىگى ىلگەرىندى - كەيىندى 3 ميلليون يۋان قوسىپ وزىق ءوندىرىس جەلىسىن ەنگىزىپ، جوعارى ولشەمدى توزاڭسىز سەح قۇردى؛ جەرگىلىكتى ورىنداعى ساپالى جەمىس ورمانىنا سۇيەنىپ، دۋريان بادام، بۇلدىرگەن جاڭعاق سياقتى دامدەگى ۇساق تاعامداردى زەرتتەپ اشىپ، سونىمەن بىرگە ءداستۇرلى جاڭعاق قىستىرىلعان شىلان سياقتى ونىمدەردى ساپالىلاندىرىپ، دارەجەسىن جوعارىلاتىپ، شىلان ءدانى قاتتاماسى، كۇلگىن ءمولدىر شىلان، وزگەشە قاتتى قابىقتى جەمىس سياقتى 13 ءتۇرلى ەرەكشە ءونىمدى شىعاردى.
”جاڭعاق شىلانىنىڭ زاماناۋي ۇساق تاعامعا اينالارىن كىم بىلگەن، ينتەرنەتتەگى ساتىلىمى دا وتە جاقسى“، - دەدى سەرىكتەستىك سەحىنداعى ونىمدەردى سۇرىپتاۋ جۇمىسشىسى ايگۇل مامەت.
2025 - جىلى سەرىكتەستىك ينتەرنەت جەلىسىندە جانە جەلىدەن تىس ساتۋ ارناسى ارقىلى ساتىلىم كىرىسىن 2 ميلليون يۋاننان استامعا جەتكىزدى. ”بۇرىندارى جاڭعاق، شىلاندى جاقسى باعادا ساتا الماۋشى ەدىك، قازىر جىنتىكتەي وڭدەلگەن سوڭ ساتۋدان ۋايىمدامايتىن بولدىق“، - دەدى وسى قىستاقتاعى ەگىنشى قاسىم ھەيىت.
جىنتىكتەي وڭدەۋ ءوندىرىس جەلىسى قىستاقتىڭ ”شيكىزات ساتۋدان“ ”ءونىم ساتۋعا“، ”ماركا ساتۋعا“ قاراي تيپ جاڭالاپ دارەجەسىن جوعارىلاتۋىن جەبەدى، سونىمەن بىرگە تەحنولوگيالىق باۋلۋ جانە باسقارۋ امالياتىنىڭ ناتيجەسىندە، ءبىر توپ قىستاق تۇرعىنى ونەركاسىپ جۇمىسشىسىنا، اۋەلى، تەحنولوگيالىق تىرەكتىگە اينالىپ، اۋىل - قىستاقتىڭ ىشكى قوزعاۋشى كۇشى كورنەكتى ارتتى.
قازىرگە دەيىن سەرىكتەستىك 15 قىستاق تۇرعىنىنا ۇزاق ۋاقىتتىق جۇمىس ورنىن ازىرلەدى، 200دەن استام قىستاق تۇرعىنىن ەگىمشىلىك، تاسىمال، قوراپتاۋ سياقتى بۋىنداردا جۇمىسقا ورنالاسۋعا جانامالاي جەتەكتەدى.
4 - ايدىڭ 9 - كۇنى تاعارشى قىستاعى جارنا ەكونوميكالىق سەلبەستىك كووپەراتيۆىنىڭ 2025 - جىلدىق پايدا ءبولۋ سالتىن وتكىزىپ، بۇقاراعا تابىس پايداسىن ۇلەستىردى. ماجىلىستە ياسىن تۇرۇپ قۋانىشپەن كوپشىلىككە 2025 - جىلى قىستاق كوللەكتيۆى كاسىپورىننان 200 مىڭ يۋاننان استام پايدا ءبولىسىن العاندىعىن، قىستاق كوللەكتيۆىنىڭ ەكونوميكالىق جالپى كىرىسى 2 ميلليون يۋاننان اسىپ، قىستاق تۇرعىندارىنىڭ جان باسىندىق قولداعى تابىسى سايكەس مەزگىلدەگىدەن ％8. 6 ارتقاندىعىن ايتتى.
”قىستاق كوللەكتيۆىنىڭ ەكونوميكاسى ۇزدىكسىز زورايۋدا، سەلبەستىك كووپەراتيۆىنەن پايدا ءبولىسىن العانىما ەرەكشە قۋانىشتامىن، بۇدان كەيىنگى تۇرمىسىمىزدىڭ بارعان سايىن جاقسارا تۇسەتىندىگىنە سەنەمىن“، - دەدى قىستاق تۇرعىنى بۇحالچام حوجىمات.
