عىلم - تەحنولوگيا ارقىلى توزاڭداندىرۋ مول ءونىم الۋعا قالاي كۇش ۇستەدى
□ انار بۇلت \ شينجياڭ گازەتىنىڭ ءتىلشىسى سارنا
كەزەكتە شينجياڭنىڭ جەر - جەرىندەگى جەمىس ورمانى ءوندىرىس وڭىرلەرىندە گۇلدەر قۇلپىرا اشىلدى. ورىك گۇلى اپپاق قارداي، المۇرت گۇلى اقشا بۇلتتاي قۇلپىردى، بادام گۇلى بۇتاقتا سامسىپ تۇر، الۋان گۇلدەر تالاسا - تارماسا جايقالا اشىلىپ، اۋىل - قىستاقتاردا تىرشىلىك تىنىسى قاۋلادى. ورمان اراسىندا گۇلدەردىڭ حوش ءيىسى اڭقىپ، ادام كۇشىمەن توزاڭداندىرۋ قىزمەتى دە باستالدى. باعباندار جاپا - تارماعاي گۇل اشۋ مەزگىلىن مىقتى يگەرىپ ادام كۇشىمەن توزاڭداندىرىپ، ەرەكشە جەمىس ورمانىنىڭ ءساتتى ءدان الۋىنا، مول ءتۇسىم، مول ءونىم الۋعا بەرىك نەگىز قالادى.
توزاڭداندىرۋ جەمىس اعاشىنا ”ۇرپاق جالعاتۋدى“ مەڭزەيدى: گۇلدەگى اتالىق بۇرشىك گۇل توزاڭىن قالىپتاستىرادى، گۇل توزاڭىن انالىق بۇرشىكتىڭ ۇشىنا جاعۋ ارقىلى توزاڭداندىرعاندا عانا گۇل بىرتىندەپ جەتىلىپ جەمىسكە اينالادى.
بۇرىندارى ءداستۇرلى ادام كۇشىمەن توزاڭداندىرعاندا گۇلدەردى ءبىر - بىردەپ توزاڭداندىراتىن، ۋاقىت تا، كۇش تە كوپ جۇمسالۋمەن قويماي، توزاڭدانۋدىڭ بىركەلكى بولۋىنا دا كەپىلدىك ەتۋ قيىن ەدى، وقىستان بوران سوعىپ، كۇن سۋىتسا، توزاڭداندىرۋدىڭ ەڭ جاقسى مەزگىلىن وڭاي قولدان جىبەرىپ الىپ، جەمىس ورمانىنىڭ تۇسىمىنە تىكە ىقپال جەتەتىن.
ال قازىر ماشينالاسقان، زەردەلىلەنگەن توزاڭداندىرۋ تەحنولوگياسىنىڭ جالپىلاسۋى وسى ولقىلىقتى ءونىمدى تولىقتادى، ءتۇرلى ماشينالاسقان توزاڭداندىرۋ جابدىقتارى جەمىس ورمانى بازاسىندا كەڭىنەن قولدانىلدى. جەڭىل دە ەبدەيلى ەلەكتر توزاڭداندىرعىش جوعارى جيىلىكتە تەربەلىپ، گۇل توزاڭىن تابيعي تۇردە ۇشىرىپ گۇل بۇرشىگىنە تەگىس قوندىرادى، قولدانۋعا ەبدەيلى ءارى توزاڭداندىرۋ ونىمدىلىگى كورنەكتى جوعارى؛ ارناۋلى توزاڭ بۇرىككىش گۇل توزاڭى مەن قوسىمشا زاتتى تولىق ارالاستىرعاننان كەيىن ءبىر قالىپتى قارقىنمەن بۇركىپ شاشادى، بۇل ورتاشا، شاعىن كولەمدى جالعاسقان جەمىس باقشالارىندا قولدانىلادى؛ كولەمدەنگەن جەمىس ورمانى ەگىنشىلىك بازاسىندا وسىمدىك قورعاۋ ۇشقىش اپپاراتى تومەن كەڭىستىكتە جوعارى ءونىمدى جۇمىس ىستەيدى، توزاڭداندىرۋ ونىمدىلىگى ءداستۇرلى ادام كۇشىمەن توزاڭداندىرۋدىڭ نەشە ون ەسەسىندەي.
جۇڭگو اۋىل شارۋاشىلىق عىلىم اكادەمياسى بال اراسىن زەرتتەۋ ورنىنىڭ زەرتتەرمەنى، شينجياڭ تىڭ يگەرۋ عىلىم اكادەمياسى بيوتەحنولوگيا زەرتتەۋ ورنىنىڭ ورىنباسار باستىعى لو شۋدۇڭ مىنانى ءبىلدىردى: ماشينالاسقان، زەردەلىلەنگەن توزاڭداندىرۋ ۇلگىسى ادام كۇشى وزىندىك قۇنىن زور مولشەردە ۇنەمدەپ، باعبانداردىڭ ەڭبەك كۇشەمەلىلىگىن تومەندەتۋمەن بىرگە، جەمىس ورمانىنىڭ ەڭ جاقسى توزاڭدانۋ مەزگىلىن ءدال يگەرىپ، گۇل توزاڭىن اناعۇرلىم بىركەلكى شاشىپ، ءدان الۋ مولشەرى مەن جەمىستىڭ بىركەلكىلىگىن ءونىمدى جوعارىلاتادى.
لو شۋدۇڭ باستاعان عىلىم - تەحنولوگيا ۇجىمى شينجياڭنىڭ جەمىس ورمانىن توزاڭداندىرۋ تەحنولوگياسىن زەرتتەۋمەن جانە جالپىلاستىرۋمەن ۇزاق جىل شۇعىلدانعان، ولار ءساتتى زەرتتەپ جاساعان بال اراسى مەن ماشينا سايكەستىرىلگەن سۇيىقتىقپەن جوعارى ءونىمدى توزاڭداندىرۋ تەحنولوگياسى جەمىس ورمانىن توزاڭداندىرۋ تەحنولوگياسىندا كەلەلى سەرپىلىستى جۇزەگە اسىردى. بۇل تەحنولوگيا بال اراسىنىڭ اكتيۆتىگى كۇشتى گۇل توزاڭىن جيۋ ەرەكشەلىگىنە ارناۋلى قورەكتىك سۇيىقتىق قوسۋ ارقىلى گۇل توزاڭىنىڭ ومىرشەڭدىگىن ارتتىرىپ، ودان ۇشقىش اپپارات ارقىلى دالمە - ءدال بۇركىپ، توزاڭداندىرۋ ونىمدىلىگى مەن ءدان الۋ ساپاسىن بىردەي قامتاماسىز ەتەدى.
قازىر ۇشقىش اپپاراتپەن توزاڭداندىرۋ، ەلەكترلى توزاڭداندىرۋ، بال اراسى مەن ماشينا سايكەستىرىلگەن توزاڭداندىرۋ سياقتى وزىق تەحنولوگيالار شينجياڭنىڭ جەمىس ورمانى نەگىزگى ءوندىرىس وڭىرلەرىندە كەڭىنەن قولدانىلۋدا.
