شينحۋا اگەنتتىگىنىڭ 5 - ايدىڭ 24 - كۇنى جيۋچۋاننان بەرگەن حابارى (تىلشىلەر لي گولي، ليۋ ي). 5 - ايدىڭ 24 - كۇنى ساعات 23تەن 08 مينۋت وتكەندە شىنجوۋ − 23 عارىشكەرلى الەم كەمەسىن الىپ ۇشقان چاڭجىڭ 2 - ءنومىرلى F تيپتى الىستان مەڭگەرىلەتىن 23 بەلگىلى تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ ۇشىرىلدى، شامامەن 10 مينۋتتان كەيىن الەم كەمەسى راكەتادان ءساتتى اجىراپ، الدىن الا بەلگىلەنگەن وربيتاعا كىردى، عارىشكەرلەر توبىنىڭ جاعدايى جاقسى، ۇشىرۋ تولىق تابىستى بولدى.
جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنا قاراعاندا، الەم كەمەسى وربيتاعا ەنگەننەن كەيىن الدىن الا بەلگىلەنگەن ءتارتىپ بويىنشا كەڭىستىك بەكەتى قۇراما تۇلعاسىمەن وزدىگىنەن شاپشاڭ توعىسىپ، ءتۇيىلىسىپ، شىنجوۋ − 23تەگى عارىشكەرلەر توبى شىنجوۋ − 21دەگى عارىشكەرلەر توبىمەن وربيتادا كەزەك اۋىستىرادى ەكەن. كەڭىستىك بەكەتىندە ايالداعان مەزگىلدە شىنجوۋ − 23تەگى عارىشكەرلەر توبى كەڭىستىك تىرشىلىگى جانە ادام دەنەسىن زەرتتەۋ، ميكرو اۋىرلىق كۇش فيزيكا عىلىمى، كەڭىستىك جاڭا تەحنولوگياسى سياقتى سالالاردا كوپ ءتۇرلى تاجىريبەلەردى (سىناقتار) جانە قولدانىمداردى ورىستەتىپ، كوپ رەت بولمەدەن شىعىپ قيمىل جاساپ، بولمەنىڭ ءىشى - سىرتىنداعى جابدىقتاردى ورناتۋ، رەتتەۋ - سىناۋ، كۇتىمدەۋ - جوندەۋ سياقتى مىندەتتەردى ورىندايدى ەكەن.
بۇل رەتكى مىندەت − ينجەنەريا كەڭىستىك بەكەتىن ىسكە قوسۋ جانە دامىتۋ كەزەڭىنە وتكەننەن بەرگى 7 - رەتكى ادام الىپ ۇشۋ مىندەتى، سونداي - اق ينجەنەريا نىسانى بەلگىلەنىپ اتقارىلعاننان بەرگى 40 - رەتكى ۇشىرۋ مىندەتى. قازىرگە دەيىن ەلىمىزدەن 30 عارىشكەر، 47 ادام (رەت) الەم كەڭىستىگىنە ەنىپ ۇشۋ مىندەتىن اتقاردى.
بۇل رەتكى مىندەت تاعى چاڭجىڭ جەلىلەس تاسىمال راكەتاسىنىڭ 644 - رەتكى ۇشۋى، شىنجوۋ الەم كەمەسىنىڭ 23 - رەتكى ۇشۋى.
قازىر كەڭىستىك بەكەتىنىڭ قۇراماسى ءتۇيىلىسۋ وربيتاسىنا كىردى، قىزمەت جاعدايى جاقسى، شىنجوۋ − 23 ءنومىرلى عارىشكەرلى الەم كەمەسىمەن توعىسۋدى، ءتۇيىلىسۋدى جانە عارىشكەرلەردىڭ كىرىپ ورنالاسۋ شارتىن قاناعاتتاندىرادى.
