ميلۋتينوۆيچتىڭ كەلۋى كىمدەردىڭ جاستىق DNAىن وياتتى
□ حوۋ حۇي
ونىڭ اپپاق شاشى لوپتىڭ سامالىمەن جەلبىرەپ تۇرعان ساتتە، سانسىزداعان فۋتبول جان كۇيەرلەرىنىڭ كوز الدىنا جاستىق كوكتەمىنىڭ لەزدە كەلگەنى حاق.
5 - ايدىڭ 24 - كۇنى 82 جاسقا تاياپ قالعان ميلۋتينوۆيچ شينجياڭ فۋتبول ەرەن بىرلەسكەن جارىسىندا بوي كورسەتىپ، حوتان كومانداسىنىڭ ءوز الاڭىندا قىزىلسۋ وبلىسى كومانداسىمەن بەلدەسۋ جارىسنا ارناپ دوپ باستاپ بەردى. حابار تارالىسىمەن ينتەرنەت جەلىسىندە، جەلىدەن تىس، بەينە، تىنىپ جاتقان كولگە تاس لاقتىرعانداي، شەرىك عاسىرلىق ۋاقىت تولقىندانا اشىلىپ سالا بەردى.
ءبىر ۇرپاق دوپ جان كۇيەرلەرى جونىنەن ايتقاندا، ميلۋتينوۆيچ تەك شەتەلدىك جاتتىقتىرۋشى عانا ەمەس، تىپتەن، ەستەمەلەر كنوپكاسى سياقتى، باسىپ قالسا بولعانى، كورىنەتىننىڭ ءبارى قايتا ورالمايتىن جاستىق كوكتەمى.
ۋاقىتتى 25 جىلدىڭ الدىنا قايتا شەگىندىرسەك، مەملەكەتتىك فۋتبول كومانداسى 0گە قارسى 1 ۇپايمەن ومان كومانداسىن جەڭىپ، كورەيا − جاپونيا دۇنيە جۇزىلىك فۋتبول ساۋىتىنا تالاسۋ جارىسىنا ەكى كەزەك بۇرىن قادام تاستاپ، جۇڭگو فۋتبولىنىڭ شىرقاۋ شىڭىن تۇرعىزدى. 24 جىلدىڭ الدىنداعى دۇنيە جۇزىلىك فۋتبول ساۋىتىنا تالاسۋ جارىس الاڭىندا فان جى - ي، سۇن جيحاي قاتارلى ءبىر توپ ساڭلاقتىڭ جۇگىرگەن بەينەسى ءبىر ۇرپاق دوپ جان كۇيەرلەرىنىڭ جاستىق كوكتەمىنە ويىپ جازىلعان ەدى.
مەنىڭ ءبىر دوسىم ناعىز دوپ جان كۇيەرى ەدى، ءار جولىKTVدە جاڭ شيڭنىڭ «جول» اتتى ءانىن ايتقاندا كوزىنە ىستىق جاس الادى، ويتكەنى بۇل انگە 10 مىقتىعا تالاسۋ جارىسىنداعى مەملەكەتتىك فۋتبول كومانداسىنىڭ دۇنيە جۇزىلىك فۋتبول ساۋىتىنا تالاسۋ جارىسىنا جارىپ كىرگەن ءساتى ارتقى كورىنىس ەتىلگەن ەدى. نۇر - شۇعىلاعا بولەنگەن سول ساۋلەلى ساتتەر مەملەكەتتىك فۋتبول كومانداسىنىڭ داڭقىنا كۋا بولدى، سونداي - اق سان - ساناقسىز جاس ۇلانداردىڭ ەسەيىپ - ەرجەتۋىنە سەرىك بولدى، سونداعىلاردىڭ كوبىسىنىڭ سامايىن قىراۋ شالىپ ورتا جاستاعى اعايعا اينالدى. تۇرمىستىڭ سىن - سىناعىنان وتكەن ولاردان فۋتبول دا، بەينە، جاستىق كوكتەمى سياقتى الىستاپ كەتتى.
ەستەمەنىڭ شۇڭەتىنەن شىعىپ، قايتادان بۇگىنگى كۇنگە كوز جىبەرسەك، وسى ”كەرەمەت جاتتىقتىرۋشى“ نە ءۇشىن ۇشاقپەن نەشە مىڭ كيلومەتر جول باسىپ، شينجياڭنىڭ فۋتبول ەرەن بىرلەسكەن جارىس الاڭىنا كەلىپ وتىر؟
ويتكەنى ميلۋتينوۆيچتىڭ جۇڭگوعا سۇيىسپەنشىلىگى مەن وزگەشە كورەگەندىگى قاشاندا جۇڭگو فۋتبولىنىڭ ەڭ ءۇمىتتى جەرىنە تۇسەدى.
بىلتىر ول ”جياڭسۋ ولكەسىنىڭ فۋتبول ەرەن بىرلەسكەن جارىسىندا“ دا بوي كورسەتكەن، ويتكەنى ول قازىر جۇڭگونىڭ ”ولكەلىك فۋتبول ەرەن“ بىرلەسكەن جارىسىنىڭ ۇلگىسى؛ ءوتىپ كەتكەن اپتانىڭ سوڭىندا ول ”شىعىس سولتۇستىكتەگى ولكەلەر فۋتبول ەرەن جارىسىندا“ بوي كورسەتتى، ويتكەنى شىنياڭ 2001 - جىلى جۇڭگو كومانداسىنىڭ دۇنيە جۇزىلىك فۋتبول ساۋىتىنا تالاسۋ جارىسىنا جارىپ كىرگەن قۇتتى مەكەنى. ال كەلەسى كۇنى ول حوتانعا ۇشىپ بارىپ، شينجياڭنىڭ فۋتبول ەرەن بىرلەسكەن جارىس الاڭىندا بوي كورسەتتى، مۇنىڭ جاۋابى ايتپاسا دا تۇسىنىكتى، ويتكەنى شينجياڭ جۇڭگو فۋتبول كارتاسىنىڭ توتەنشە ماڭىزدى بولىگى.
شينجياڭ جۇڭگو فۋتبولىنىڭ قۇنارلى توپىراعى اتالعان. بۇكىل شينجياڭداعى 5000عا جۋىق ولشەمدەنگەن فۋتبول الاڭى ءار ۇلت ورەندەرىنىڭ فۋتبول ارمانىنا قانات ءبىتىردى. شينجياڭنىڭ وسپىرىمدەردى جاتتىقتىرۋ جۇيەسىندەگى دارىندىلار بۇكىل ەل مويىنداعان ”باي كەنىش“. ءباھىرام ابدۇۋالي، ءۇمىتجان ءيۇسۇپ، ءمۇتالىپ يمىنقارى، افيردەن اسقار قاتارلى تيانشان الابىنان كەلگەن نەشە ونداعان جىگىت جۇڭگو فۋتبول ساحناسىندا كوز سۇرىندىرەرلىك شينجياڭ حيكاياسىن جازدى. ءار جاس كەزەڭىندەگى مەملەكەتتىك كوماندالاردا دوپ تەۋىپ جۇرگەن وسىنداي شينجياڭ فۋتبولشىلارى تولىپ جاتىر، ولاردىڭ ەسىمدەرى وتە ۇزىن، جولى دا وتە ۇزاق.
ءىس جۇزىندە، بۇل ميلۋتينوۆيچتىڭ شينجياڭعا تۇڭعىش رەت كەلۋى ەمەس. سوناۋ 2018 - جىلى ميلۋتينوۆيچ جۇڭگو فۋتبول قوعامىنىڭ وسپىرىمدەردى جاتتىقتىرۋ اقىلشىسى سالاۋاتىمەن ءۇرىمجى قالالىق 121 - باستاۋىش مەكتەپكە ساپارمەن كەلگەن ەدى. بۇل باستاۋىش مەكتەپ سول كەزدە مەملەكەتتىك وسپىرىمدەر فۋتبول جارىسىندا اعا جۇلدەگەر بولعان. 8 جىل وتە شىقتى، ميلۋتينوۆيچ وسىناۋ مەكەندەگى فۋتبولدىڭ وشپەس ساۋلەسىن باستان - اياق ۇمىتقان ەمەس.
ميلۋتينوۆيچ قارتايدى، ءبىراق ونىڭ جانارىنداعى فۋتبول ساۋلەسى ەشقاشان وشكەن جوق.
فان جى - يلەردىڭ كوز جاسى مەن قۋانىشى ءالى دە ونىڭ ەسىندە، جۇڭگو فۋتبول جان كۇيەرلەرىنىڭ جۇڭگو كومانداسىنىڭ تۇڭعىش رەت دۇنيە جۇزىلىك فۋتبول ساۋىتىنا تالاسۋ جارىسىنا قاتىناسۋعا جولداما العاندىعى ءۇشىن بورىكتەرىن اسپانعا اتقانى ءالى ەسىندە. 20 نەشە جىل وتە شىقتى، جۇڭگو فۋتبولى تالاي تاسىپ، تالاي باسىلدى، ميلۋتينوۆيچ ەشقاشان الىستاپ كەتپەدى. ول ”جياڭسۋ ولكەسىنىڭ فۋتبول ەرەن بىرلەسكەن جارىسىندا“، ”شىعىس سولتۇستىكتەگى ولكەلەر فۋتبول ەرەن جارىسىندا“ جانە ”شينجياڭ فۋتبول ەرەن بىرلەسكەن جارىسىندا“ بوي كورسەتتى، فۋتبول الاۋىن تۇتاندىرۋعا بولاتىن بارلىق جەردەن بوي كورسەتتى.
لوپتىڭ سامالى ونىڭ اپپاق شاشىن سيپاپ ءوتتى ءارى سانسىز دوپ جان كۇيەرلەرىنىڭ شاڭ - توزاڭ باسقان ەستەمەلەرىن جەلپىپ اشتى. ەستەمەدەگى ”اينالمالى سەرە“ ءاربىر ادامنىڭ جۇرەگىنە ءدال ءتيىپ ازداپ اۋىرتقانىمەن، ءبىراق كوبىندە جىلىلىق سيلادى.
ويتكەنى ميلۋتينوۆيچ سول جەردە تۇرىپ، ”پوزيتسيا بارلىعىن بەلگىلەيدى“ دەگەن اقىليا سوزبەن بىزگە جاستىق كوكتەم قايتا ورالماسا دا، جاڭا جاستىق كوكتەمنىڭ قاناتتانىپ جاتقانىن ۇعىندىردى. شينجياڭ فۋتبول ەرەن جارىس الاڭىندا قارا تەرگە مالشىنعان جاستار، بالكىم، كەلەسى سۇن جيحاي بولۋى مۇمكىن. ول سول جەردە تۇرىپ بەلگى سيپاتتى ”كوڭىلدى فۋتبولداي“ كۇلىمسىرەي: جۇڭگو فۋتبولىنىڭ كەلۋ جولى ەسىمىزدە؛ شينجياڭ فۋتبولىنىڭ بولاشاق جولى ۇمىتكە تولى، - دەپ تۇرعانداي ەدى.
ءبىر ۇرپاق ادام قارتايعانىمەن، ءبىر ۇرپاق ادامنىڭ ءدال جاستىق شاعى. ميلۋتينوۆيچتىڭ شينجياڭ فۋتبول ەرەن بىرلەسكەن جارىسىنا كەلۋى جاستىعىمىزدىڭ DNAىن وياتتى، تىپتەن، ءبىزدى وسىناۋ مەكەندە شاپقىلاپ جۇرگەن جاس وسپىرىمدەردىڭ كۇندەردىڭ بىرىندە جۇڭگو فۋتبولىن تاعى ءبىر رەت شۇعىلاعا بولەيتىندىگىنە سەندىردى.
