مەملەكەت بويىنشا تۇڭعىش زەردەلى قان ءسۇزۋ اۆتوكولىگى وڭتۇستىك شينجياڭداعى اۋىل - قىستاقتارعا جەتتى
انار بۇلت \ شينجياڭ گازەتىنىڭ ءتىلشىسى ءجازيرا نەسىپبەك
5 - ايدىڭ 23 - كۇنى مارالباسى اۋدانى ساربۇيا قالاشىعى سەنترلى شيپاحاناسىنداعى شىنار اعاشىنىڭ تۇبىندە ”زەردەلى جىلجىمالى قان ءسۇزۋ اۆتوكولىگى“ دەگەن جازۋ جازىلعان اق ءتۇستى اۆتوكولىك توقتاپ تۇر.
اۆتوكولىكتە 42 جاستاعى ءالي ابلەز ەمدەلۋدە. قاشقار ايماقتىق 2 - حالىق شيپاحاناسى بۇيرەك اۋرۋلارى ءبولىمى قان ءسۇزۋ ءبولىمىنىڭ سەسترالار باستىعى ۋاڭ لي قولىنا تاقتا كومپيۋتەرىن الىپ، سوناۋ شاڭحاي قاتىناس داشۋەسى مەديتسينا شۋەيۋانىنا قاراستى رىنجي شيپاحاناسى بۇيرەك اۋرۋلارى ءبولىمىنىڭ سەسترالار باستىعى جاڭ حايفىنمەن بەينە ەكران ارقىلى ءاليدىڭ دياگنوز قويۋ، ەمدەۋ رەتسەبىن بىرگە سالىستىردى.
ءاليدىڭ قاسىنداعى قان ءسۇزۋ جابدىعى ونىڭ قان قىسىمى، جۇرەك سوعۋى جانە ەمدەۋ ۋاقىتى سياقتى ساندى مالىمەتتەردى دەر كەزىندە كورسەتىپ تۇر. ونىڭ الدىڭعى جاعىنداعى تاعى ءبىر ەكراندا سۋمەن وڭدەۋىشتىڭ سۋ تەمپەراتۋراسى، سۋ قىسىمى سياقتى ينفورماتسيالار كورىنىپ تۇر. بۇل ساندى مالىمەتتەر ارتقى تۇعىرعا دەر كەزىندە جەتكىزىلەدى، ەكى شيپاحاناداعى قاتىستى ەمدەۋ قىزمەتكەرلەرىنىڭ تۇگەل جۇيەگە شىعىپ تەكسەرۋىنە بولادى.
عىلىم - تەحنولوگيالىق اسەرگە تولى وسى ەمدەۋ جابدىعى قالايشا وڭتۇستىك شينجياڭداعى اۋىل - قالاشىق شيپاحانالارىندا بوي كورسەتتى؟
جاڭا ەمدەۋ ۇلگىسى جونىندەگى ىزدەنىس
5 - ايدىڭ 23 - كۇنى شاڭحاي قاتىناس داشۋەسى مەديتسينا شۋەيۋانىنا قاراستى رىنجي شيپاحاناسى بۇيرەك اۋرۋلارى ءبولىمىنىڭ اعا شيپاگەرى لۋ رىنحۋا ۇشاقتان تۇسە سالا ساربۇيا قالاشىعىنىڭ سەنترلى شيپاحاناسىنا باردى.
”مەملەكەت بويىنشا تۇڭعىش جىلجىمالى زەردەلى قان ءسۇزۋ اۆتوكولىگى ونى ەڭ قاجەت ەتەتىن ناۋقاستاردىڭ جانىنا اكەلىندى، بۇل ءبىزدىڭ وسى اۆتوكولىكتى جوبالاۋداعى العاشقى ماقساتىمىز“، - دەدى لۋ رىنحۋا.
2021 - جىلى بۇكىل ەلدەگى قان سۇزدىرەتىن ناۋقاستاردىڭ ％99تەن استامى شيپاحانادا ەمدەلۋ، ەمدەۋ قولايسىز بولۋ سىندى رەالدىققا ساي، شاڭحاي قاتىناس داشۋەسى مەديتسينا شۋەيۋانىنا قاراستى رىنجي شيپاحاناسى جىلجىمالى قان ءسۇزدىرىپ ەمدەۋ ۇلگىسى جونىندە ىزدەنىس جاساي باستادى. ”ەمدەۋ بايلىعىنىڭ تارالۋى بىركەلكى بولماعان وڭىرلەر مۇنداي ۇلگىنى ءتىپتى دە قاجەت ەتەدى. مەن بۇرىن قاشقار ايماقتىق 2 - حالىق شيپاحاناسىنا شينجياڭعا كومەكتەسۋ بويىنشا بارعان ەدىم، شەت - شالعاي وڭىرلەردەگى ناۋقاستاردىڭ اۋدان دارەجەلى ەمدەۋ قۇرىلىمدارىنا بارىپ ەمدەلۋىنە كوپ ۋاقىت جانە اقشا جۇمسالاتىندىعىن ابدەن بىلەمىن“، - دەدى لۋ رىنحۋا.
قاشقار ايماقتىق 2 - حالىق شيپاحاناسى بۇيرەك اۋرۋلارى ءبولىمىنىڭ ورىنباسار مەڭگەرۋشىسى گو جيە مىناداي ءبىر ەسەپ جاسادى: ”ساربۇيا قالاشىعىنان ەڭ الىس قىستاق مارالباسى اۋدانى ورتالىعىنان 100 نەشە كيلومەتر قاشىقتىقتا، ەگەر وسى قىستاقتاعى ناۋقاستار اپتاسىنا 3 رەت قان ءسۇزدىرىپ ەمدەلسە، ءار رەتكى قاتىناس قاراجاتى مەن تاماق قاراجاتىنا 200 يۋاننان استام جۇمسايدى، ال ءبىر رەتكى قان ءسۇزدىرىپ ەمدەۋدى ەمدەۋ قامسىزداندىرۋى ەسەبىنەن كوتەرگەننەن كەيىنگى قاراجات تەك 50 يۋان اينالاسىندا عانا، ەمدەلۋدەن سىرت جۇمسالاتىن قاراجات ەمدەۋ قاراجاتىنىڭ 4 − 5 ەسەسىندەي بولادى“. گو جيەنىڭ ءسوزى نەگىزگى ساتىداعى ناۋقاستاردىڭ جىلجىمالى قان ءسۇزىپ ەمدەۋ جابدىقتارىنا بولعان كوكەي تەستى قاجەتىن كورسەتتى.
2025 - جىلى شاڭحاي قاتىناس داشۋەسى مەديتسينا شۋەيۋانىنا قاراستى رىنجي شيپاحاناسى مەن گوشين ۋاڭ - ان (شاڭحاي) ۇلكەن ساندى مالىمەت عىلىم - تەحنولوگيا شەكتى سەرىكتەستىگى بىرلەسىپ زەرتتەپ جاساعان جىلجىمالى زەردەلى قان ءسۇزۋ اۆتوكولىگى كلينيكالىق سىناق كەزەڭىنە ءوتىپ، 20 قان سۇزدىرەتىن ناۋقاستى ەمدەدى. ناتيجە بۇل جابدىقتىڭ ەمدەۋ ونىمدىلىگى مەن حاۋىپسىزدىگى شيپاحانادا ەمدەۋمەن بىردەي ەكەندىگىن كورسەتتى.
سول جىلى 12 - ايدا جىلجىمالى زەردەلى قان ءسۇزۋ اۆتوكولىگىن كلينيكالىق قولدانۋ ساتىسىنا وتكىزۋگە رۇقسات ەتىلىپ، شيپاحانا ”جىلجىمالى زەردەلى قان ءسۇزۋ تۇعىرىنىڭ كلينيكالىق قولدانىلۋىن باعالاۋ نىسانى ورتالىعى“ قۇرىلدى. بيىل جىل باسىندا شاڭحاي قالاسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابى ونى جاڭا كەزەكتى ەمدەۋ ارقىلى شينجياڭعا كومەكتەسۋ قىزمەتى ورنالاستىرۋىنا ەنگىزىپ، وسى اۆتوكولىكتىڭ اناعۇرلىم كەڭ قولدانىلمالى جاعدايعا يە بولۋىن ىلگەرىلەتتى.
اۆتوكولىكتى ناۋقاسقا ءتىپتى دە جاقىن جەرگە اپاردى
بيىل 1 - ايدا قاشقار ايماقتىق 2 - حالىق شيپاحاناسى ”جىلجىمالى زەردەلى قان ءسۇزۋ تۇعىرىنىڭ كلينيكالىق قولدانىلۋىن باعالاۋ نىسان ورتالىعى“ بولىمشە ورتالىعىن ماڭدايشالىق اسىپ قۇردى. 4 - ايدىڭ 21 - كۇنى وسى جىلجىمالى زەردەلى قان ءسۇزۋ اۆتوكولىگى قاشقار قالاسىنا جەتكىزىلىپ، وسى شيپاحانا 16 ناۋقاسقا كلينيكالىق سىناق جۇرگىزدى.
”ەمدەلۋدە مۇنداي قولايلىلىق بولارىن ويلاپ كورمەگەن ەكەنمىن“، - دەدى قاشقار قالاسىنداعى ناۋقاس بۇايشام مامۇت.
گوشين ۋاڭ - ان (شاڭحاي) ۇلكەن ساندى مالىمەت عىلىم - تەحنولوگيا شەكتى سەرىكتەستىگىنىڭ باس اتقارۋشىسى چيۋ لانتيڭ تانىستىرىپ بىلاي دەدى: بۇل جابدىققا اۆتوكولىككە تيەلگەن جابدىقتاردى شوعىرلاندىرۋ جۇيەسى مەن الىس ارالىقتى باسقارۋ ينفورماتسيا جۇيەسىن ءبىر تۇلعالاندىرۋ تەحنولوگياسى قولدانىلىپ، ءسۇزۋ جابدىعى، جۇرەك قىزمەتىن باقىلاۋ اسپابى، قانداعى وتتەگىن ولشەۋ اسپابى سياقتى 20عا جۋىق جابدىق ورنالاستىرىلدى. الىس ارالىقتى باسقارۋ ينفورماتسيا جۇيەسى قان ءسۇزۋ جابدىعى، سۋمەن وڭدەۋىش ماشيناسى، تىرشىلىك ناۋقاستىق بەلگىسىن باقىلاۋ - ولشەۋ جابدىعى، بولمە ءىشى ورتاسى سەنزورى سياقتى ساندى مالىمەتتەرگە جالعانىپ، شيپاحانا سىرتىندا ەمدەۋ بارىسىنداعى سەزىنە الۋ، سايكەسە الۋ جانە قۋزاستىرا الۋ قابىلەتىن جوعارىلاتتى.
نىساندى زەرتتەۋشى مۇشە رەتىندە، ءار جولى ناۋقاس اۆتوكولىككە شىعىپ ەمدەلگەندە، ۋاڭ لي ناقتى ورىنعا بارىپ باقىلاۋ جۇرگىزەدى، ”ءبىز شيپاحانانىڭ قان ءسۇزىپ ەمدەۋ بارىسىن اۆتوكولىككە تولىق كوشىرىپ، قاتاڭ تۇردە جۇيەلى جۇمىس جۇرگىزدىك، سونداي - اق شاڭحايداعى شيپاگەرلەر ينتەرنەت جەلىسىندە ناۋقاستارعا الدىن الا تەكسەرۋ جۇرگىزەدى جانە دياگنوز قويادى“.
ورنىقتى 5G تورى ەمدەۋ اۆتوكولىگىنىڭ رولىن ساۋلەلەندىرۋىنە نەگىز قالاپ، قاتاڭ عىلمي دالەلدەۋ ونىڭ جاپپاي قولدانىلۋىنا تىرەك بولدى. ەندەشە، بۇل اۆتوكولىك تاعى ءبىر قادام العا باسىپ، ناۋقاستاردىڭ ەسىك الدىنا بارا الا ما؟
5 - ايدىڭ 23 - كۇنى قاشقار ايماقتىق 2 - حالىق شيپاحاناسى مەديتسينالىق ەتيكا كوميتەتىنىڭ بەكىتۋىمەن، بۇل اۆتوكولىك قاشقار قالاسىنان اتتانىپ، مارالباسى اۋدانىنا باراتىن جوعارى قارقىندى تاس جولعا شىقتى.
اۋىل - قىستاقتا ”عىلىم - تەحنولوگيانىڭ تۇرمىستى وزگەرتكەندىگىن“ سەزىندى
”قالاي سەزىنىپ وتىرسىز؟“ لۋ رىنحۋا ساربۇيا قالاشىعى سەنترلى شيپاحاناسىنا بارعاننان كەيىن، دەرەۋ اۆتوكولىككە شىعىپ ەمدەلىپ جاتقان ءاليدىڭ حالىن سۇرادى.
”وتە جاقسىمىن، بۇل اۆتوكولىكتى قاتتى ۇناتىپ قالدىم“، - دەپ جاۋاپ بەردى ءالي كۇلىپ.
ءىس جۇزىندە، ءاليدىڭ ۇناتقانى وسى اۆتوكولىك ۋاكىلدىك ەتكەن جاڭاشا ەمدەۋ ۇلگىسى ەدى.
ءاليدىڭ ءۇيى ساربۇيا قالاشىعىنان 2 كيلومەتر قاشىقتىقتاعى قىستاقتا. بۇرىن ءار جولى ەمدەلگەندە نەشە ون كيلومەتر شالعايداعى مارالباسى اۋدانى ورتالىعىنا باراتىنبىز، كوپ ۋاقىت سارىپ ەتۋدەن سىرت، بارىپ - كەلۋگە قاتىناس، اس - سۋ قاراجاتىن دا جۇمسايتىنبىز. ”قازىر ەمدەۋ تۇيىنىنە 10 مينۋتتا جەتەمىز، ەمدەلىپ بولا سالا ۇيگە قايتاسىڭ، وتە جاقسى“، - دەدى ول.
28 جاستاعى ناۋقاس گۇلميرا مامەت ايىنا 3 − 4 رەت شيپاحاناعا بارىپ ەمدەلەدى. ساياحاتتى قىزۋ سۇيەتىن ول اناعۇرلىم قولايلى ەمدەۋ قىزمەت وتەۋىن اڭسادى، مۇنداي بولعاندا سىرتقى دۇنيەنى كورۋگە ۋاقىت شىعارا الار ەدى، ”ەگەر وسىنداي ەمدەۋ قىزمەت وتەۋى اناعۇرلىم كوپ بولسا، ءبىزدىڭ تۇرمىس ساپامىز بارىنشا جوعارىلايتىن ەدى“، - دەدى ول.
كلينيكالىق سىناق مەزگىلىندە ازىرلەيتىن ەمدەۋ سانى شەكتى بولسا دا، ناۋقاس پەن وتباسىنداعىلار اۆتوكولىكتى قورالاپ ماڭىنان كەتكىسى كەلمەدى.
تىعىز بايلانىسقان اۋدان ءوڭىرى ەمدەۋ ورتاق تۇلعاسىنىڭ تىڭعىلىقتى ىلگەرىلەتۋىندە، ساربۇيا قالاشىعى سەنترلى شيپاحاناسى جەدەل دامۋ كەزەڭىن قارسى الدى. 2025 - جىلى شيپاحانا بولىمدەردى تىنىس جولى اۋرۋلارى ءبولىمى، سىرتقى اۋرۋلار ءبولىمى، سۇيەك اۋرۋلارى ءبولىمى، شۇعىل ەمدەۋ ءبولىمى سياقتى 16 بولىمگە ءبولىپ، دياگنوز قويۋ، ەمدەۋ قۋاتى توڭىرەكتەگى كوپتەگەن اۋىل - قالاشىقتاردى شارپىپ، كۇندىك ناۋقاس كورۋ مولشەرى 600دەن استام ادامعا (رەت) جەتتى.
توڭىرەكتەگى بۇيرەك اۋرۋىنا شالدىققانداردىڭ قاجەتىن كەڭ كولەمدە يگەرگەننەن كەيىن، بىلتىر جىل سوڭىندا وسى سەنترلى شيپاحانا تۇڭعىش رەت 2 ەمدەۋ قىزمەتكەرىن قاشقار قالاسىنا بۇيرەك اۋرۋىن ەمدەۋ تەحنولوگياسىن ۇيرەنۋگە جىبەرىپ، شيپاحانادا قان ءسۇزۋ بولمەسىن قۇرۋدى جوسپارلادى.
گو جيە بىلاي دەپ تانىستىردى: قازىر قاشقار ايماعىنداعى قان سۇزدىرەتىن ناۋقاستاردىڭ ％60ى اۋدان، قالا ەكى دارەجەلى ەمدەۋ قۇرىلىمدارىندا ەمدەلۋدە، اۋىل - قالاشىق شيپاحانالارى سياقتى 1 - دارەجەلى ەمدەۋ قۇرىلىمدارىنىڭ دياگنوز قويۋ، ەمدەۋ قابىلەتىن ءالى دە جوعارىلاتۋعا تۋرا كەلەدى، ”نەگىزگى ساتىدا دارىندىلار تاپشى، ەمدەۋ جابدىقتارى جەتكىلىكسىز، شەت - شالعاي اۋىل - قىستاق اۋدان ورتالىعىنان الىس بولۋداي رەال جاعدايدا، جىلجىمالى قان ءسۇزىپ ەمدەۋ ۇلگىسى شيپاحانانىڭ ەمدەۋ بايلىعىنىڭ پايدالى تولىقتاۋشىسى“.
لۋ رىنحۋا بىلاي دەدى: كەلەسى قادامدا نىسان گرۋپپاسى 4 − 6 ادامدىق اۆتوكولىك تۇرپاتىن اشىپ، ءاربىر اۆتوكولىككە ءبىر سەسترا ورنالاستىرىپ، ەمدەۋ بايلىعىنان پايدالانۋ ونىمدىلىگىن جوعارىلاتادى. سونىمەن بىرگە ۇجىم ءوزى دايىنداعان گەنەراتور مەن سۋدى اينالمالى پايدالانۋ جابدىقتارىن زەرتتەپ جاساپ، نەگىزگى ساتىنىڭ كۇن سايىن كەمەلدەنگەن ينتەرنەت نەگىزدىك قۇرىلعىلارىمەن ۇشتاستىرىپ، وسى تەكتەس جىلجىمالى ەمدەۋ جابدىقتارىنىڭ ءتىپتى دە كوپ وڭىرلەردە تياناقتانۋىن ىلگەرىلەتەدى.
شاڭحاي قالاسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابىنىڭ باس قولباسشىسى بي گۇيپيڭ بىلاي دەدى: ”جىلجىمالى زەردەلى قان ءسۇزۋ اۆتوكولىگى ناۋقاستاردىڭ جانىنا تىكە جەتىپ، ناۋقاستاردىڭ شاڭحايدىڭ ساپالى ەمدەۋ قىزمەت وتەۋىنە يە بولۋىنا مۇمكىندىك جاسادى، بۇل شاڭحايدىڭ شينجياڭعا كومەكتەسىپ حالىق تۇرمىسىنا تىعىز جاناسۋعا، شينجياڭنىڭ جوعارى ساپالى دامۋىن ىلگەرىلەتۋگە تاباندى بولۋداعى ناقتى شاراسى جانە جاڭالىق اشۋ ىزدەنىسى. الداعى جەردە شاڭحاي شينجياڭعا كومەكتەسۋدە جىلجىمالى زەردەلى قان ءسۇزۋ اۆتوكولىگىن قاشقار ايماعىندا جالپىلاستىرۋدى ۇزدىكسىز ىلگەرىلەتۋ ارقىلى ءتىپتى دە كوپ بۇقارانى يگىلىككە كەنەلتەدى“.
