دەنە تاربيەدە قۋاتتى ەل قۇرىلىسىنىڭ جاڭا جورىعىندا جەلكەن جايىپ ەكپىندەي ىلگەرىلەدى
□ شينحۋا اگەنتتىگىنىڭ تىلشىلەرى جي جيادۇڭ، لين دىرىن
”دەنە تاربيە مەملەكەتتى قۇدىرەتتەندىرۋ، ۇلتتى گۇلدەندىرۋ ارمانىن ارقالاپ وتىر. دەنە تاربيە كۇشەيسە، جۇڭگو قۇدىرەتتەنەدى، مەملەكەت گۇلدەنسە، دەنە تاربيە گۇلدەنەدى“.
دەنە تاربيەدە قۋاتتى ەل قۇرۋ − جۇڭحۋا ۇلتىنىڭ گۇلدەنۋ جورىعىنداعى مىزعىماس تالپىنىسى. پارتيا 18 - قۇرىلتايىنان بەرى، باس شۋجي شي جينپيڭ دەنە تاربيە ىستەرىنىڭ دامۋىنا ايرىقشا ءمان بەرىپ، دەنە تاربيەنى دامىتۋ قىزمەتىن ماڭىزدى كۇن تارتىپكە قويىپ، دەن قويا جوسپارلاپ، تياناقتاندىرۋدى مىقتى يگەرىپ، ەلىمىزدىڭ دەنە تاربيە ىستەرى دامۋىنىڭ جاڭا جاعدايىن ۇزدىكسىز اشىپ، ەلىمىزدى دەنە تاربيەدە قۋاتتى ەل ەتىپ جەدەل قۇرىپ شىعۋدى باسا دارىپتەدى.
ءجۇز نەشە جىلدىڭ الدىنداعى سالماقتى ”وليمپيادا سپورت جارىسى جونىندەگى ءۇش سۇراۋدان“ جاڭا داۋىردەگى ”قوس وليمپيادا قالاسى“ سىندى شەكسىز داڭققا، ودان جالپى حالىقتىق دەنە تاربيەنىڭ قارىشتاپ دامۋ شىت جاڭا جاعدايىنا دەيىن، جۇڭگونىڭ دەنە تاربيە ىستەرىنىڭ العا باسۋ قادامى ەكپىندى، پارمەندى بولىپ، مەملەكەتتىڭ قۇدىرەتتەنىپ گۇلدەنۋىن، ءداۋىر رۋحىن ايگىلەگەن جاندى تۇسىندىرمەگە اينالدىرىپ، جۇڭحۋا ۇلتىنىڭ ۇلى گۇلدەنۋىنە تەلەگەي قوزعالىس قۋاتىن ۇستەدى.
”15 - بەسجىلدىق“ باستالعان شەشۋشى كەزەڭدە دەنە تاربيەدە قۋاتتى ەل قۇرىلىسى ىشكەرىلەي ىلگەرىلەتىلدى، جالپى حالىقتىق دەنە شىنىقتىرۋ، باسەكەلىك دەنە تاربيە، دەنە تاربيە كاسىپ سالاسى سىندى 3 ۇلكەن سالا سايكەسە كۇش سالىپ، تەرەڭ توعىستى، جالپى حالىق قاتىناساتىن، جالپى ءوڭىر بويىنشا دامىعان، جاپپاي ساپانى جوعارىلاتاتىن دەنە تاربيە ىستەرى دامۋىنىڭ جاڭا كارتيناسى جۇڭگونىڭ بايتاق دالاسىندا باياۋ جايىلۋدا.
جالپى حالىقتىق دەنە شىنىقتىرۋ ورلەۋى كوتەرىلدى:
دەنە تاربيەدە قۋاتتى ەل قۇرۋ مەن سالاماتتى جۇڭگو نەگىزى بەرىك ورناتىلدى
80 جاستاعى گو داۋنيڭ ”گۋاڭجوۋ ارمانى“ ۆەلوسيپەدشىلەر اترەتىنىڭ مۇشەسى. بيىل 4 - ايدا ول سەرىكتەرىمەن بىرگە گۋاڭجوۋدان اتتانىپ، 12 كۇندە ۆەلوسيپەدپەن 1200 كيلومەتر جول باسىپ، سان - ياداعى 6 - كەزەكتى ازيا جاعاجاي سپورت جارىسى الاڭىنا كەلىپ جارىسقا دەم بەردى. 10 نەشە جىلدان بەرى، ورتا جاس، قارت ۆەلوسيپەد اۋەسكەرلەرىن نەگىز ەتكەن وسى اترەتتەگىلەر كوپ كەزەكتى وليمپيادا سپورت جارىسىنىڭ، ازيا سپورت جارىسىنىڭ، مەملەكەتتىك سپورت جارىسىنىڭ الاڭدارىنا ۆەلوسيپەدپەن باردى. ”ءبىز ءىس جۇزىندىك ارەكەتىمىزبەن جارىسقا مەدەت بەرىپ، دۇنيە جۇزىنە جۇڭگونىڭ دەنە شىنىقتىرۋ اۋەسكەرلەرىنىڭ اقاۋسىز ورگە ۇمتىلعان، بەلسەندىلىكپەن العا ىلگەرىلەگەن بەت - بەينەسىن ايگىلەيمىز“، - دەدى گو داۋنيڭ.
گو داۋنيڭ − بۇكىل ەلدەگى سان ميلليون دەنە شىنىقتىرۋ اۋەسكەرلەرىنىڭ ءبىرى ءارى جالپى حالىقتىق دەنە شىنىقتىرۋ مەملەكەت ستراتەگياسىن ۇزدىكسىز ىلگەرىلەتۋدىڭ يگىلىگىن كورۋشى.
باس شۋجي شي جينپيڭ بىلاي دەپ باسا دارىپتەدى: دەنە تاربيەدە قۋاتتى ەل قۇرۋدى جەدەلدەتۋدە حالىقتى وزەك ەتۋ يدەياسىنا تاباندى بولىپ، حالىقتى دەنە تاربيە ىستەرىن دامىتۋداعى نەگىزگى تۇلعا، حالىقتىڭ دەنە شىنىقتىرۋ سۇرانىسىن قاناعاتتاندىرۋدى، ادامنىڭ جان - جاقتى دامۋىن جەبەۋدى دەنە تاربيە قىزمەتىنىڭ شىعار ءتۇيىنى مەن تابان تىرەر تياناعى ەتىپ، جالپى حالىقتىق دەنە شىنىقتىرۋ سىندى مەملەكەت ستراتەگياسىن تياناقتاندىرىپ، حالىقتىڭ سالاماتتىق دەڭگەيىن ۇزدىكسىز جوعارىلاتۋ كەرەك.
”جالپى حالىقتىق دەنە شىنىقتىرۋ ارەكەتىن جاپپاي ورىستەتۋدى“ ىركەس - تىركەس پارتيا 19 - قۇرىلتايىنىڭ، 20 - قۇرىلتايىنىڭ باياندامالارىنا جازۋدان «دەنە تاربيەدە قۋاتتى ەل قۇرۋ قۇرىلىسى باعدارلاماسى»، «جالپى حالىقتىق دەنە شىنىقتىرۋ الاڭ - قۇرىلعىلارى قۇرىلىسىن كۇشەيتىپ، بۇقارالىق دەنە تاربيەنى دامىتۋ جونىندەگى پىكىر»، «جالپى حالىقتىق دەنە شىنىقتىرۋ بويىنشا اناعۇرلىم جوعارى دەڭگەيدەگى الەۋمەتتىك قىزمەت وتەۋ جۇيەسىن ورناتۋ جونىندەگى پىكىر» سياقتى حۇجاتتاردىڭ شىعارىلۋىنا دەيىن جالپى حالىقتىق دەنە شىنىقتىرۋ جۇيەلى، جان - جاقتى تۇزىمدىك قامتاماسىزدىققا يە بولدى.
2024 - جىلعا دەيىن بۇكىل ەل بويىنشا دەنە تاربيە الاڭدارىنىڭ جەر اۋدانى 4 ميلليارد 230 ميلليون شارشى مەترگە جەتىپ، ”13 - بەسجىلدىقتىڭ“ سوڭىنداعىدان ءبىر ميلليارد 131 ميلليون شارشى مەتر ارتىپ، بۇقارانىڭ دەنە شىنىقتىرۋى اناعۇرلىم قولايلى بولدى. جالپى 3 ميلليون 710 مىڭ قوعامدىق دەنە تاربيە جەتەكشىسى ءبىرىنشى شەپتە بەلسەندىلىك تانىتىپ، دەنە شىنىقتىرۋعا عىلمي ءجون سىلتەۋ APP ، قىسقا بەينەجازبا جانە تىكە تاراتۋ بولمەلەرى ارقىلى سان مىڭ وتباسىنا جەتتى. ۇنەمى دەنە شىنىقتىرۋعا قاتىناساتىن ادامداردىڭ سالىستىرماسى ％52. 38كە جەتتى؛ تۇرعىنداردىڭ ورتاشا مەجەلى عۇمىرى 79 جاسقا جەتىپ، 2020 - جىلداعىدان 1. 1 جاس جوعارىلادى.
بۇگىنگى تاڭدا حۋاشيانىڭ بايتاق دالاسىندا جالپى حالىقتىق دەنە شىنىقتىرۋ ورلەۋى قالا - اۋىلداردى شارپىدى: جۇگىرۋ جارىستارى ۇدايىلاندىرا ورىستەتىلدى، مۇز - قار سپورتى وڭىرلىك بۇعاۋدى تالقانداپ، بۇكىل ەلگە كەڭىنەن تارالدى، ”قىستاق ەرەن فۋتبول جارىسى“، ”قىستاق باسكەتبول جارىسى“، ”جياڭسۋ ولكەسى قالالار ارا فۋتبول بىرلەسكەن جارىسى“ سياقتى حالىقتىق جارىستار ءدۇمپۋ تۋدىرىپ جۇرتقا تانىلدى... بارلىق ادام سپورتتى جاقسى كورۋ، بارلىق ادام سالاماتتىقتان يگىلىكتەنۋ داعدىعا اينالىپ، دەنە تاربيەدە قۋاتتى ەلدىڭ، سالاماتتى جۇڭگونىڭ ەڭ بەرىك حالىق تۇرمىسى نەگىزى بەكەمدەلدى.
مەملەكەتتىك دەنە تاربيە باس مەكەمەسى مىنانى ءبىلدىردى: الداعى 5 جىلدا دەنە تاربيە ىستەرى حالىق ءۇشىن بولۋدى كۇشەيتۋ جاعىندا اناعۇرلىم كوپ جارىس قيمىلدارىن، الاڭ - ورىن قۇرىلعىلارىن، قىزمەت وتەۋ بايلىعىن بۇقارانىڭ جانىنا جەتكىزىپ، كوپشىلىكتىڭ شىن مانىندە كورە الۋىنا، پايدالانا الۋىنا، ويناي الۋىنا مۇمكىندىك جاساپ، ”15 مينۋت دەنە شىنىقتىرۋ شەڭبەرىن“ حالىق بۇقاراسىنىڭ ”باقىتتى تۇرمىس شەڭبەرىنە“ اينالدىرىپ، ”قىستاق باسكەتبول جارىسى“، ”قالا ەرەن فۋتبول جارىسى“ سياقتى بۇقارا ۇناتاتىن دەنە تاربيە قيمىلدارىن بارلىق جەردە شەشەك اتتىرىپ، دەنە تاربيەنىڭ دامۋ جەتىستىكتەرىن حالىق بۇقاراسى سەزىنە الاتىن، قولجەتىمدى باقىت سەزىمىنە اينالدىرامىز.
باسەكەلىك دەنە تاربيە كۇشەيدى:
كوكىرەك كەرە ەكپىندەي العا ۇمتىلۋ بەينەسى ايگىلەندى
باسەكەلىك دەنە تاربيە − ءبىر مەملەكەتتىڭ دەنە تاربيە جالپىلىق قۋاتىنىڭ ماڭىزدى ولشەۋىشى ءارى حالىق رۋحىنىڭ جاندى دانەكەرى. جاڭا داۋىردەن بەرى، جۇڭگونىڭ دەنە تاربيە ساڭلاقتارى سىن - سايىستان تايسالماي، ەرلىكپەن ناتيجە جاراتىپ، تاريحي رەكوردتاردى قايتا - قايتا جاڭالاپ، دۇنيە ءجۇزى دەنە تاربيە كارتاسىندا جۇڭگو داڭقىن ورنەكتەدى.
بيىل 2 - ايدا ميلان قىسقى وليمپيادا سپورت جارىسىنىڭ مۇزدا جىلدام سىرعاناۋ بويىنشا ەرلەردىڭ 1500 مەترلىك جارىسىندا جۇڭگو شەبەرى نيڭ جۇڭيان امەريكانىڭ ايگىلى شەبەرى ستورستى زور باسىمدىقپەن جەڭىپ اعا جۇلدەگەرلىككە قول جەتكىزىپ، ءبىر عاسىردان بەرگى ەۆروپا، امەريكا شەبەرلەرىنىڭ وسى جارىس تۇرىندە التىن مەدالدى مونوپولداۋىن تالقاندادى. اعا جۇلدەگەرلىكتى العاننان كەيىن، 26 جاستاعى نيڭ جۇڭيان جارىس الاڭىندا كوز جاسىنا ەرىك بەردى، ”اسقار تاۋدان اسىپ وتسەڭ، وزگەشە اسەم كورىنىس بار“ دەگەن اسەرلى ءسوزى ونىڭ ءوزىنىڭ ارمانعا قانات قاعۋداعى جۇرەك ءۇنى، تىپتەن، جۇڭگونىڭ باسەكەلىك دەنە تاربيەسىنىڭ ۇزدىكسىز تىڭ ناتيجەلەرگە قول جەتكىزۋىنىڭ جاندى بەينەسى ەدى.
2024 - جىلى پاريج وليمپيادا سپورت جارىسىندا پان جانلى ەرلەردىڭ 100 مەتر ارالىقتا ەركىن ءجۇزۋىنىڭ دۇنيە جۇزىلىك رەكوردىن اسقاق ەرلىكپەن جاڭالادى؛ جۇڭگو كومانداسى تۇڭعىش رەت ەرلەردىڭ 100 × 4 مەترلىك ارالاس ءجۇزۋ ۇتىلامالى جارىسىنىڭ التىن مەدالىن قانجىعاعا بايلاپ، امەريكا كومانداسىنىڭ وسى تۇردەگى 40 جىلدان بەرگى مونوپوليالاۋىن تالقاندادى؛ جىڭ چينۋىن مىقتى قارسىلاسىن ىركەس - تىركەس جەڭىپ، ەلىمىزدىڭ وليمپيادا سپورت جارىسىنا قاتىناسقاننان بەرگى جەكەلەردىڭ تور دوپتاعى تۇڭعىش التىن مەدالىنا قول جەتكىزدى... سەنا وزەنىنىڭ بويىندا ايبىندى «ەرىكتىلەر مارشى» قايتا - قايتا ورىندالىپ، جۇڭگو دەنە تاربيە ۋاكىلدەر ۇيىرمەسى 40 التىن مەدالدى، 27 كۇمىس مەدالدى، 24 قولا مەدالدى قورجىنعا سالىپ، شەكارا سىرتىندا جازعى وليمپيادا سپورت جارىسىنا قاتىناسۋدا تاريحتان بەرگى ەڭ جاقسى ناتيجەگە قول جەتكىزدى.
پاريج وليمپيادا سپورت جارىسىنان كەيىن، باس شۋجي شي جينپيڭ داڭقپەن ورالعان وليمپيادا سپورت جارىسىنىڭ ساڭلاقتارىن قابىلداعاندا، بىلاي دەپ اتاپ كورسەتتى: جۇڭگو دەنە تاربيە ۋاكىلدەر ۇيىرمەسىنىڭ ۇزدىك ناتيجەلەرى − ءارى ەلىمىز دەنە تاربيە ىستەرى دامۋىنىڭ، العا باسۋىنىڭ شوعىرلى بەينەسى، ءارى جۇڭگو ۇلگىسىندەگى وسىزامانداندىرۋ قۇرىلىسى تابىسىنىڭ ىقشام كورىنىسى، ول جاڭا داۋىردەگى جۇڭگونىڭ كۇش - قۋاتىن تولىق ايگىلەدى.
تىڭ ناتيجەلەر تەك وليمپيادا جارىس الاڭىندا عانا بولعان جوق −
وليمپيادا سپورت جارىسىنا جاتپايتىن دەنە تاربيە تۇرلەرىن وزەك ەتكەن چىڭدۋ دۇنيە جۇزىلىك سپورت جارىسىندا جۇڭگو دەنە تاربيە ۋاكىلدەر ۇيىرمەسى 36 التىن مەدال، 17 كۇمىس مەدال، 11 قولا مەدال − جالپى 64 مەدال الىپ، تۇڭعىش رەت التىن مەدال تاقتاسى مەن مەدال تاقتاسىندا 1 - ورىنعا ءوتتى؛
دۇنيە جۇزىلىك 1 - دارەجەلى فورمۋلا جارىس ماشيناسى جۇلدەلى جارىسى (F1) جۇڭگونىڭ تۇڭعىش رەسمي شەبەرى جوۋ گۋانيۇيدى كۇتىپ الدى؛
سنوك الەمدىك جۇلدەلى جارىسىندا جاۋ شينتۇڭ، ۋ يزى ىركەس - تىركەس اعا جۇلدەگەر بولدى؛
دۇنيە جۇزىلىك ەرەن موتوتسيكل جۇلدەلى جارىسىندا جۇڭگونىڭ ”جاڭ شۋە موتوتسيكىلىنە“ تاۋەلدى شەبەر وسى جارىس ماۋسىمىندا اعا جۇلدەگەرلىكتى 6 رەت قانجىعاسىنا بايلاپ، ەۆروپا، امەريكا، جاپونيا ماركالارىنىڭ نەشە 10 جىلعا جالعاسقان مونوپوليالاۋىن تالقاندادى...
”14 - بەسجىلدىق“ مەزگىلىندە جۇڭگونىڭ دەنە تاربيە ساڭلاقتارى بۇكىل جەر شارىنداعى جارىس الاڭدارىندا جارىسقا ءتۇسىپ، جالپى 665 رەت دۇنيە جۇزىلىك اعا جۇلدەگەرلىككە قول جەتكىزىپ، 91 رەت دۇنيە جۇزىلىك رەكوردتى جاڭالادى. جۇڭگونىڭ باسەكەلىك دەنە تاربيەسى كوپ تۇيىندە سەرپىلىس جاساپ، جاپپاي شەشەك اتىپ، قۋاتتى ناقتى كۇشى مەن اسقاق بەينەسىن ايگىلەدى.
كوز تارتارلىق ناتيجەلەر عىلىم - تەحنولوگيا ارقىلى قۋات ۇستەۋ جانە تۇزىمدىك قامتاماسىز ەتۋ سىندى قوس باعىتتا كۇش سالۋدان كەلگەن. جەل تۋنەلى تاجىريبەحاناسى قار - مۇز سپورتشىلارىنا ەلىكتەمەلى جاتتىعۋ ورتاسىن ازىرلەدى، ”AI + 3D“ جۇڭگو سۋعا سەكىرۋ كومانداسىنىڭ كەڭىستىكتەگى قيمىلدارىن جاقسارتۋ جونىندە تالداۋ جاساۋىنا كۇش ۇستەدى... عىلىم - تەحنولوگيا دەنە تاربيە باسەكەسىن اناعۇرلىم ناقتى قۋاتقا، اناعۇرلىم مول سەنىمگە يە ەتتى. «جۇڭحۋا حالىق رەسپۋبليكاسىنىڭ دەنە تاربيە زاڭىنا» اراعا 27 جىلعا تاياۋ ۋاقىت سالىپ ءبىرىنشى رەت جاپپاي، جۇيەلى تۇزەتۋ ەنگىزىلىپ، دەنە تاربيەدەگى تورەلىك ايتۋ ءتۇزىمى تياناقتانىپ، باسەكەلىك دەنە تاربيەنىڭ ولشەمدى دامۋىنىڭ زاڭمەن باسقارۋ نەگىزى بەكەمدەلدى.
”15 - بەسجىلدىقتى“ بەتكە الا ەلىمىز باسەكەلىك دەنە تاربيە ءتۇزىلىس - مەحانيزمى، جاتتىعۋ، جارىس جان - جاقتى رەفورماسىن ۇزدىكسىز تەرەڭدەتىپ، كوپ نەگىزدى دارىندى تاربيەلەۋ جۇيەسىن قۇلشىنا ورناتىپ، ىنتالاندىرۋ جانە ىرىكتەۋ مەحانيزمىن ساپالىلاندىرىپ، عىلىم - تەحنولوگيادا جاڭالىق اشۋ ۇسىنىلىمىن ۇزدىكسىز ارتتىرادى. بولاشاقتا ۇستەل دوپ، سۋعا سەكىرۋ، گيمناستيكا سياقتى 6 ۇلكەن ءداستۇرلى باسىمدىققا يە تۇرلەردى ۇزدىكسىز بەكەمدەپ، جەڭىل اتلەتيكادا، جۇزۋدە، سۋ ءۇستى 3 نەگىزدىك ۇلكەن تۇرىندە كەلەلى سەرپىلىس جاساپ، فۋتبول، باسكەتبول، ۆولەيبول ”ءۇش ۇلكەن دوپتى“ بار كۇشپەن وركەندەتە دامىتۋدى ىلگەرىلەتىپ، جۇڭگونىڭ باسەكەلىك دەنە تاربيەسىنىڭ ۇزدىكسىز بيىككە كوتەرىلۋىن، تاعى دا شۇعىلالى تابىستارعا قول جەتكىزۋىن ىلگەرىلەتەدى.
دەنە تاربيە كاسىپ سالاسى كوركەيدى:
ەكونوميكانى ارتتىرۋدىڭ جاڭا قوزعالىس قۋاتى جەتىلدىرىلدى
”شىعىس سولتۇستىك فۋتبول بىرلەسكەن جارىسى“ وسى جازدى دۋمانعا بولەدى. 5 - ايدىڭ 23 - كۇنى 2026 - جىلعى شىعىس سولتۇستىك ءوڭىر قالالار ارا فۋتبول بىرلەسكەن جارىسى چاڭچۇن، شىنياڭ، حاربين، كوكحوت − 4 قالادا ءبىر ۋاقىتتا باستالدى، جارىس باستالعان العاشقى كۇنى 100 مىڭنان استام كورەرمەندى جارىستى ۇستىندە كورۋگە باۋرادى. الاڭ ىشىنەن الاڭ سىرتىنا دەيىن ءبىر رەتكى جارىس جالپى حالىقتى بىردەي قۋانىشقا بولەدى. جارىسقا قاتىناسقان فۋتبولشىلار وقۋشى، جەدەل جەتكىزۋشى، كاسىپورىن قىزمەتكەرلەرى سياقتى بۇقارا قاۋىمىن قامتىدى؛ 9. 19 يۋاندىق حالىققا ءتيىمدى بەلەت باعاسى فۋتبول جارىسىن كورۋدى اپتا سوڭىنداعى قولجەتىمدى كوڭىل اشۋعا اينالدىردى؛ فۋتبول جانكۇيەرلەرى بەلەت تۇبىرشىگىمەن مادەنيەت - ساياحات، اس - سۋ، قونالقى سياقتى تۇتىنۋ يگىلىكتەرىنە قول جەتكىزە الادى...
بۇكىل ەل كولەمىندە ”قىستاق ەرەن فۋتبول جارىسى“، ”قىستاق باسكەتبول جارىسى“، ”جىجياڭ باسكەتبول جارىسى“، ”جياڭسۋ ولكەسى قالالار ارا فۋتبول بىرلەسكەن جارىسى“، ”حۋنان ەرەن فۋتبول جارىسى“، ”جياڭشي ولكەسى قالالار ارا فۋتبول بىرلەسكەن جارىسى“ سياقتى بۇقارالىق دەنە تاربيە جارىستارى بىرىنەن سوڭ ءبىرى قىزۋ ورلەۋ كوتەرىپ، جەر - جەردىڭ مادەنيەت، ساياحات، ساۋدا كاسىپ سالاسىنىڭ توعىسا دامۋىن جەبەدى.
دەنە تاربيە − ”ەكونوميكانىڭ، قوعامنىڭ دامۋىن جەبەيتىن ماڭىزدى قوزعاۋشى كۇش“، ”بۇقارالىق دەنە تاربيەنىڭ، باسەكەلىك دەنە تاربيەنىڭ، دەنە تاربيە كاسىپ سالاسىنىڭ سايكەستى دامۋىن ىلگەرىلەتۋ كەرەك“، ”مۇزدى القاپ، قارلى دالا دا باعالى بايلىق“... باس شۋجي شي جينپيڭنىڭ دەنە تاربيە جونىندەگى ءبىر قىدىرۋ ماڭىزدى بايىمداۋلارى ەلىمىزدىڭ دەنە تاربيە كاسىپ سالاسىنىڭ جوعارى ساپالى دامۋىنا ايقىن بەتالىس نۇسقاپ، جوبا كەسكىندەدى.
وتكەن بىرنەشە جىلدا دەنە تاربيە كاسىپ سالاسى بۇرىن بولماعان تەرەڭدىكپەن، كەڭدىكپەن جانە قارقىنمەن ەكونوميكالىق، قوعامدىق دامۋدىڭ كەلەلى جاعدايىمەن توعىستى. بۇكىل ەلدىڭ دەنە تاربيە كاسىپ سالاسىنىڭ جالپى كولەمى 2020 - جىلعى 2 تريلليون 730 ميلليارد يۋاننان ارتىپ، 2024 - جىلى 3 تريلليون 840 ميلليارد يۋانعا جەتىپ، سوڭعى 5 جىلداعى ورتاشا ارتۋ قارقىنى ％10تەن استى؛ مۇنىڭ ىشىندە قار - مۇز كاسىپ سالاسى ۇشقان قۇستاي دامىپ، جالپى كولەمى 381 ميلليارد 100 ميلليون يۋاننان تەز ورلەپ، 980 ميلليارد يۋانعا جەتىپ، جىلدىق ورتاشا ارتۋ قارقىنى ％6.26كە جەتتى. دەنە تاربيە مادەنيەت - ساياحاتپەن، ساۋدامەن، سالاماتتىق كۇتىنۋمەن تەرەڭ توعىسىپ، كاسىپ سالاسى تىزبەگى ۇزدىكسىز ۇزارىپ، ىشكى سۇرانىستى ارتتىرۋدا، تۇتىنۋدى جەبەۋدە بارعان سايىن ماڭىزدى رول اتقاردى.
شاڭعى تەبۋدى ايرىقشا ۇناتاتىن جاڭجياكوۋلىق چۇي شياۋتۇڭ كاسىپ سالاسى دامۋىنىڭ پايداسىنا، شىنىمەن، كۋا بولدى. 5 جىلدىق كاسىپپەن اينالىسۋ تاجىريبەسى بار قار - مۇز ىلەسپە فوتوگرابى رەتىندە، ونىڭ قاريدارلار شوعىرى ۇزدىكسىز ۇلعايىپ، كاسىپ بولاشاعى جاقسارا ءتۇستى. ول بىلاي دەدى: بەيجيڭ − تيانجين − حىبەيدىڭ سايكەستى دامۋى سانسىز وراي سيلاپ وتىر، قار - مۇز كاسىپ سالاسى تىزبەگى ۇزدىكسىز ۇزارىپ، قاراپايىم ادامدارعا دا اناعۇرلىم كەڭ كاسىپ ساحناسىن ازىرلەدى.
قازىرگى تاڭدا ەلىمىزدىڭ دەنە تاربيە كاسىپ سالاسى ستراتەگيالىق وراي مەزگىلىندە تۇر، ىشكى سۇرانىستى ۇلعايتۋ، بىرگە بايۋ سياقتى مەملەكەت ستراتەگيالارىمەن ىشكەرىلەي سايكەسىپ، اسا زور كولەمدەگى بازار، كەمەلدى كاسىپ سالاسى جۇيەسى، جالپى حالىقتىق دەنە شىنىقتىرۋ ورلەۋى سياقتى ابزالدىلىقتاردى سۇيەنىش ەتسە، دامۋ كەڭىستىگى كەڭ، كومەسكى كۇشى زور بولادى. مەملەكەتتىك كەڭەس كەڭسەسى باسىپ تاراتقان قاتىستى جوبالارعا نەگىزدەلگەندە، 2030 - جىلعا بارعاندا ەلىمىزدىڭ دەنە تاربيە كاسىپ سالاسىنىڭ جالپى كولەمى 7 تريلليون يۋاننان اسىپ، جاڭا دامۋ ارناسىن قالىپتاستىرۋ بارىسىندا اناعۇرلىم زور رول اتقارادى ەكەن.
ارمان قانشا الىس بولسا دا، سوڭىنا تۇسكەن ادام جەتە الادى؛ ارمان قانشا جاپالى بولسا دا، تاباندىلىق كورسەتكەن ادام ورىنداي الادى.
”15 - بەسجىلدىقتىڭ“ جاڭا جورىعىنا قادام باسقان جۇڭگو دەنە تاربيەسى باستان - اياق اۋەلگى ماقساتتان اينىماي، ەرلىكپەن العا ۇمتىلىپ، جالپى حالىقتىق دەنە شىنىقتىرۋمەن حالىق تۇرمىسىنا مەيىر جەتكىزىپ، باسەكەلىك دەنە تاربيەمەن وتانعا داڭق اپەرىپ، دەنە تاربيە كاسىپ سالاسىمەن دامۋعا قۋات ۇستەپ، جاپپاي سوتسياليستىك وسىزاماندانعان مەملەكەت قۇرۋعا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋعا سارقىلماس دەنە تاربيە كۇش - قۋاتىن ۇيىستىرادى.
(شينحۋا اگەنتتىگىنىڭ 6 - ايدىڭ 21 - كۇنى بەيجيڭنەن بەرگەن حابارى)
