”قۇلشىنا جاڭا تاريحي شۇعىلالى تابىستار جاراتايىق“!
− جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قۇتتىقتاۋ جينالىسىنان ەستەلىك
□ شينحۋا اگەنتتىگىنىڭ تىلشىلەرى جۋ جيچاي، جاڭ يان
مۇرات پەن بورىش جولىندا العان بەتىنەن قايتپاي، تىنباي كۇرەس جۇرگىزگەن ۇلى ساياسي پارتيا ءوزىنىڭ 105 جاسقا تولعان تۋعان كۇنىن قارسى الدى.
2026 - جىلى 7 - ايدىڭ 1 - كۇنى تۇستەن بۇرىن بەيجيڭ حالىق سارايىندا جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قۇتتىقتاۋ جينالىسى سالتاناتپەن وتكىزىلدى.
105 جىل بوران - شاشىن مەن جاپا - ماشاقاتتى باستان كەشىرىپ، سان سىننان ءوتىپ قۇرىشتاي شىڭدالىپ، جۇڭگو حالقىنىڭ داڭقى مەن ارمانىن ارقالادى!
105 جىلدا اۋەلگى ماقساتتى ۇمىتپاي، ۇدەرە العا تارتىپ، بۇرىنعىعا مۇراگەر، كەيىنگىگە بۇيداگەر بولىپ، جاڭا ۇزاق جورىقتى ويداعىداي باستى!
”’ۇلى ىستەر ۇلى ەرىك - جىگەردەن تۋىندايدى، ۇلى ىستەر قاجىماي - تالماي ەڭبەكتەنۋدەن كەلەدى‘. جاڭا ءداۋىردىڭ جاڭا جورىعىندا پارتيانىڭ بورىشىن، مىندەتىن جۇزەگە اسىرۋ بارلىق جۇڭگو كوممۋنيستەرىنەن سەنىمدى بەكەمدەپ، ۇزدىكسىز كۇرەس جۇرگىزىپ، ءداۋىر مەن حالىق ءۇمىتىن اقتايتىن تىڭ ناتيجەلەردى ۇزدىكسىز جاراتۋدى تالاپ ەتەدى“. باس شۋجي شي جينپيڭنىڭ ايبىندى جاريالاۋى 100 ميلليوننان استام جۇڭگو كوممۋنيستەرىنىڭ جۇرەگىن تەربەدى، ءبىر ميلليارد 400 ميلليوننان استام جۇڭگو حالقىنىڭ ىنتىماقتاسا كۇرەس جۇرگىزەتىن تەلەگەي كۇشىن ۇيىستىردى.
بوران - شاشىندا تەربەلگەن قىزىل قايىقتان جۇڭگوعا جول باستاعان ايبىندى الىپ كەمەگە دەيىن ەڭ العاشقى 50 نەشە ادامدىق ۇيىمنان دامىپ، دۇنيە جۇزىندەگى كەلەلى ىقپالعا يە ءبىرىنشى ءىرى بيلىك باسىنداعى پارتياعا اينالدى. دۇنيە ءجۇزى ”قالايشا جۇڭگو؟ قالايشا جۇڭگو كوممۋنيستىك پارتياسى؟“ دەپ تاڭعالعاندا، جاڭا داۋىردەگى توپ - توپ تاڭداۋلى ۇلگىلەر بۇل ماسەلەنى ءتۇسىنۋدىڭ ”كىلتىن“ ازىرلەدى.
بۇگىنگى كۇنى ولاردىڭ كورنەكتى ۋاكىلدەرى ەگىنجاي، اۋىل - قىستاقتاردان، قالا الەۋمەتتىك اۋماقتارىنان، زاۆود - سەحتاردان، عىلمي زەرتتەۋدىڭ ءبىرىنشى شەبىنەن، اسكەري بولىمدەردىڭ كازارمالارىنان، وتانىمىزدىڭ بايتاق دالاسىنان، سوتسياليستىك وسىزامانداندىرۋ قۇرىلىسىنىڭ ءارقايسى شەپتەرىنەن كەلىپ ءبىر ارادا باس قوسىپ، سالتاناتتى مەرەكەنى بىرگە تويلادى.
تۇستەن بۇرىن ساعات 9 مولشەرىندە جيڭشي قوناق ۇيىندە ”1 - شىلدە وردەنىنىڭ“ يەگەرلەرى قوناق كۇتۋ كولىگىنە توپتىق وتىرىپ، 21 قوناق كۇتۋ موتوتسيكلىنىڭ قورعاۋىندا حالىق سارايىنا جول الدى. مۇندا حالىقتىڭ قۇرمەتى قامتىلعان، ءداۋىردىڭ قۇرمەتى ايگىلەنگەن.
10 شاقىرىمدىق ۇزىن كوشە داڭعىل جولعا ۇلاستى؛ ءزاۋلىم عيماراتتار بوي كوتەرىپ، قانشاما زور وزگەرىستەردىڭ كۋاسى بولدى. كولىك اترەتى شينحۋامىن قاقپاسىنان وتكەندە قاقپا ىشىندەگى سۋرەتتى قابىرعاداعى ”حالىق ءۇشىن قىزمەت ىستەيىك“ دەگەن ۇلكەن جازۋ ەرەكشە كوز تارتىپ، 105 جاستاعى وسى ءىرى پارتيانىڭ قايدان كەلگەندىگىن، قايدا باراتىندىعىن، قالاي تابىسقا جەتكەندىگىن ءتۇسىندىرىپ تۇر.
حالىق سارايىنىڭ سولتۇستىك قاقپاسىندا قىزىل كىلەم توسەلىپ، قىزىل تۋلار جەلبىرەپ، قۇرمەت قاراۋىلى مىلتىقتارىن سەرت ۇستاپ، ۇلگىلەردى كۇتىپ، ەڭبەك سىڭىرگەندەرگە قۇرمەت ءبىلدىردى. كولىك جەتىپ، ەسىك اشىلدى، جۇرت ەلەۋلى ەڭبەك سىڭىرگەن پارتيا مۇشەلەرىنە نازار اۋدارىپ، ولاردىڭ باسپالداقپەن كوتەرىلىپ، حالىق سارايىنا كىرگەنىنە كوز الماي قاراپ تۇردى.
قارسى الامىز، قارسى الامىز، قىزۋ قارسى الامىز!“، ”قارسى الامىز، قارسى الامىز، سىزگە قۇرمەت بىلدىرەمىز“! جاستار مەن ورەندەر پارتيا تۋىن، مەملەكەت تۋىن جانە گۇل شوقتارىن بۇلعادى، الاقايلاعان داۋىستار تولاستامادى. جايقالا اشىلعان حۋديەلان، شامگۇل ەرەكشە كوز تارتادى، تەرەڭ سۇيىسپەنشىلىككە تولى «قىزىل تۋعا ماداق» اۋەنى شىرقالدى.
حالىق سارايىنىڭ 10 مىڭ ادامدىق ۇلكەن زالى شامدار سامالاداي جارقىراپ، دۋماندى بەينەگە شومدى. ءتوراعالار مىنبەسىنىڭ ارتىنداعى پەردەنىڭ ءدال ورتاسىنا جۇڭگو كوممۋنيستىك پارتياسىنىڭ جارقىراعان پارتيا گەربى، پارتيا گەربىنىڭ استىڭعى جاعىنا ”1921 − 2026“ دەگەن جازۋ بەلگىسى ىلىنگەن، 10 قىزىل تۋ ەكى جاعىنا ءبولىنىپ قويىلعان.
”1921 − 2026“ ايبىندى تاريحي كورىنىستەردى ايگىلەدى، وندا جان تەبىرەنتەرلىك ەرلىك جىرى جازىلعان ەدى.
ساعات سترەلكاسى تۇستەن بۇرىن ساعات 10دى كورسەتكەندە، دۋ قول شاپالاق ءۇنى كوتەرىلدى، باس شۋجي شي جينپيڭ قاتارلى پارتيا مەن مەملەكەت باسشىلارى ءماجىلىس الاڭىنا كىردى.
”قوزعال! قۇل بولعىسى كەلمەگەن جان! جان - تانىمىزبەن سوعايىق جاڭا قورعان!“ «ەرىكتىلەر مارشىنىڭ» ايبىندى اۋەنى زالدا اسقاقتادى −
ۇشقىننان جالىن قاۋلاعانعا دەيىن، تىڭعا تۇرەن سالۋدان وراسان زور وزگەرىستەرگە دەيىن، وتاندى، حالىقتى قۇتقارۋدان مەملەكەتتى قۇدىرەتتەندىرىپ، حالىقتى بايىتۋعا دەيىن، مەملەكەتتىڭ ءالسىز، بىلىققان جاعدايىنان ۇلتتىڭ گۇلدەنۋىنە دەيىن... 105 جىلدان بەرى، جۇڭگو كوممۋنيستىك پارتياسىنىڭ باسشىلىعىندا، قاھارمان جۇڭگو حالقى بىرتىندەپ ەڭسە كوتەردى، بايىدى، قۇدىرەتتەندى!
«جۇڭگو كوممۋنيستىك پارتياسى ورتالىق كوميتەتىنىڭ ”1 - شىلدە وردەنىن“ بەرۋ جونىندەگى قاۋلىسى» وقىلىپ بولعاندا الاڭدا شاپالاق سوعىلىپ، قۇرمەت ءبىلدىرىلدى.
تۋ ۇستاۋشى پارتيا تۋىن بيىك ۇستاپ، قۇرمەت قاراۋىلى نىق قادام تاستاپ، ”1 - شىلدە وردەنىن“ الىپ سالت وتكىزىلەتىن ورىنعا كەلدى.
باس شۋجي شي جينپيڭ”1 - شىلدە وردەنىنىڭ“ يەگەرلەرىنە وردەن تاعىپ، ولارعا پارتيا ىشىندەگى ەڭ جوعارى داڭقتى بەردى.
قاراپايىمدىلىقتان ۇلىلىق تۋادى، قاھارماندار حالىقتان كەلەدى. ايتىلعان تانىستىرۋلار ىقشام دا تەرەڭ سۇيىسپەنشىلىككە تولى بولىپ، ولاردىڭ ىزگى ىستەرى مەن وسكەلەڭ رۋحىن جەتكىزدى −
”بۇقاراعا قىزمەت وتەۋدىڭ، قايشىلىقتاردى شەشۋدىڭ ءبىرىنشى شەبىنەن تاپجىلماعان ’ۇزدىك جاراستىرۋشى‘ نەگىزگى ساتىداعى قايشىلىقتاردى جاراستىرۋ ۇلگىسىندە جانە بۇقارالىق قىزمەت ادىسىندە جاڭالىق اشىپ، مەيىر - سۇيىسپەنشىلىك ارقىلى حالىقتىڭ مۇڭ - مۇقتاجىن شەشىپ، شىن پەيىلىمەن جۇرت جۇرەگىن جىلىتتى، ونى بۇقارا شىن ىقىلاسپەن ’لاۋما‘ دەپ اتادى“. ءبىرىنشى بولىپ الدىعا ما شانشياڭ شىقتى، قادامى شيراقى ”لاۋما“ تەبىرەنە كوپشىلىككە قول بۇلعادى. باس شۋجي شي جينپيڭ ونىمەن ىقىلاسپەن قول الىسىپ، سالماقتى ”1 - شىلدە وردەنىن“ ونىڭ كەۋدەسىنە اسىپ، ونى قۇتتىقتادى.
”اتاق - ابىرويعا بەرىلمەگەن قاھارمان ساقا جاۋىنگەر، 18 جاسىندا اسكەري كازارماعا كىرىپ، ناعىز ونەرگە توسەلىپ، تالاي رەت ەلەۋلى ەڭبەك ءسىڭىردى، كاسىپ اۋىستىرعاننان كەيىن اۋەلگى ماقساتتى، بورىشتى ۇمىتپاي، اتاق - ابىرويعا بەرىلمەي، قاراپايىم قىزمەت ورنىندا ءۇن - ءتۇنسىز ۇلەس قوسىپ، پارتياعا ادال بولۋ اسقاق سەرتىن بەرىك ساقتادى“. 90 جاستاعى ساقا جاۋىنگەر ۋاڭ يۇيچاڭ دوڭگەلەكتى ورىندىققا وتىرىپ، تۋىسىنىڭ سۇيەمەلدەۋىندە ءتوراعالار مىنبەسىنىڭ ورتاسىنا جەتتى. باس شۋجي شي جينپيڭ ىقىلاسپەن ەڭكەيىپ، ونىڭ قوس قولىن مىقتاپ ۇستادى.
زالدىڭ ەكى جاعىنداعى ەكراندا ”1 - شىلدە وردەنىنە“ يە بولعانداردىڭ قىزمەت سۋرەتى كورسەتىلىپ تۇردى. قاس قاعىم ساتتەگى تۇسىرىلىمدەر − نەشە ونداعان جىل قاجىرلىلىقپەن ەڭبەك ەتكەن ”ۋاقىت قيىقتارى“ ەدى.
ول ءبىر جاسىل مانات ەدى. قىزاناق سامسىعان اتىزدا حىنان ولكەسى پۋياڭ اۋدانى شيشينجۋاڭ قىستاعى پارتيا ياچەيكاسىنىڭ شۋجيى لي ليانچىڭ شاتتانا كۇلدى. 2019 - جىلى مەملەكەتتىك ەكى ءماجىلىس كەزىندە ول باس شۋجي شي جينپيڭگە ”شارۋالاردىڭ سەگىز ارمانىن“ بەتپە - بەت ايتقان، قازىر ول اۋىلداستارىن باستاپ، بۇرىنعى كەنجە قالعان قىستاقتى مەملەكەتتىك وركەنيەتتى قىستاق ەتىپ دامىتتى.
ەكراننان كوسىلگەن قارلى دالا كورىندى. ازىناعان قارلى بوراندا وقاس سۇلەيمەن ءدارى قوبديىن ارقالاپ، تاياققا سۇيەنىپ، جەلگە قارسى قايسارلىقپەن ءجۇرىپ كەلەدى. ول كەزىندە بىلاي دەگەن: ”مالشىلار قاجەت ەتسە بولعانى، اسپاننان جەبە جاۋسا دا اتتانۋىم كەرەك“.
باس شۋجي شي جينپيڭ ولارعا وردەن تاققان كەزدە بۇكىل الاڭداعىلاردىڭ جانارى ولارعا قادالدى، قۇرمەت بىلدىرە سوعىلعان شاپالاق ءۇنى ءالسىن - ءالى كوتەرىلدى.
85 جاستاعى جاۋ يافۋ جاڭا توپىراقتىڭ ءيىسىن الا كەلدى، تاياۋدا ول جياڭسۋدىڭ جۇيرۇڭ قالاسى دايجۋاڭ قىستاعىنداعى اتىز جالدارىندا كۇرىشتىڭ ءوسۋ جاعدايىن تەكسەردى. قارتايعان شاعىندا وسى اگرونوم ءباز - باياعىسىنداي ءبىر جىلعى ۋاقىتىنىڭ ۇشتەن ەكىسىن اتىز باسىندا وتكىزەدى.
باس شۋجي شي جينپيڭ ىقىلاسپەن: ”دەنساۋلىعىڭىز قانداي“؟ - دەپ سۇرادى. جاۋ يافۋ اسەرلەنىپ: ”وتە جاقسى! باس شۋجيگە راقىمەت“! - دەدى
مەحانيكالىق ينجەنەريا سالاسىنداعى 90 جاستاعى مامان جۇڭ جۋە قىلشىلداعان جاس كەزىنەن ساماي شاشى اعارعانعا دەيىن نەشە ون جىل اۋەلگى ماقساتتان جازباي، باستان - اياق عىلمي زەرتتەۋدىڭ ءبىرىنشى شەبىندە ەرلىكپەن شايقاس جاسادى. باس شۋجي شي جينپيڭ دوڭگەلەكتى ورىندىقتا وتىرعان ونىمەن ەڭكەيىپ قول الىستى. ”باس شۋجي ءسىز وتە كوپ تەر توكتىڭىز، كوبىرەك كۇتىنىڭىز“، - دەدى جۇڭ جۋە.
تاريحتىڭ سان - ساناقسىز وزگەرىستەرىنە كۋا بولىپ، شەكسىز داڭققا بولەنگەن جۇڭ جۋە كوزىنە ىستىق جاس الىپ بىلاي دەدى: ”وتانىمىزدىڭ قازىرگى دامۋىنىڭ وسىنشاما جاقسى بولۋى پارتيا باسشىلىعىنىڭ ارقاسى. پارتيا بۇكىل ەل حالقىن ىنتىماقتاستىرىپ، قۇرىلعان كەزدەگى اۋەلگى ماقساتىن ەستە بەرىك ساقتاپ، قازىرگە دەيىن ۇزبەي كۇرەس جۇرگىزىپ، كەدەي، مەشەۋ مەملەكەتتى بۇقارا باقىت سەزىمىنە بولەنگەن مەملەكەت ەتىپ قۇرىپ شىقتى“.
داڭق بۇرىنعى ۇلەستەردى توعىستىرىپ، جاڭا كۇرەستەرگە شابىتتاندىرۋدا.
جينالىس مەملەكەتتىك ”ەكى تاڭداۋلى، ءبىر وزاتتاردى“ ماداقتادى - سيلادى. ”141 جولداسقا مەملەكەتتىك تاڭداۋلى كوممۋنيستىك پارتيا مۇشەسى“ اتاعى بەرىلدى، 8 جولداسقا وسى اتاق تولىقتاپ بەرىلدى؛ 150 جولداسقا ”مەملەكەتتىك تاڭداۋلى پارتيا ىستەرى قىزمەتكەرى“ اتاعى بەرىلدى؛ 399 نەگىزگى ساتى پارتيا ۇيىمىنا ”مەملەكەتتىك وزات نەگىزگى ساتى پارتيا ۇيىمى“ اتاعى بەرىلدى.
”ەكى تاڭداۋلى، ءبىر وزاتتار“ ۋاكىلدەرى مەدالدارىن اسىپ، كەۋدەلەرىنە قىزىل گۇل تاعىپ، ساحناعا شىعىپ، پارتيا مەن حالىقتىڭ ماراپاتىن قابىلدادى. ولاردىڭ اراسىندا تەمىر جول قىزمەتكەرى بار، پورت جۇمىسشىسى بار، ”جەدەل جەتكىزۋشى بار“، حالىق ساقشىسى بار... ولار سان مىڭداعان ەڭبەكشىلەرگە، سان سالالى كاسىپتىڭ كۇرەسكەرلەرىنە ۋاكىلدىك ەتەدى.
قىزىل ءتۇستى كاستيۋم - برۋلكا كيگەن ”1 - شىلدە وردەنى“ يەگەرلەرىنىڭ ۋاكىلى ۋ ياچين ورنىقتى قاداممەن ءسوز سويلەۋ مىنبەسىنە شىقتى.
2020 - جىلى 7 - ايدا باس شۋجي شي جينپيڭ ول تۇرعان چاڭچۇن قالاسى كۋانچىڭ رايونى تۋانشان كوشەسى چاڭشان حۋايۋان الەۋمەتتىك اۋماعىنا كەلىپ قىزمەت تەكسەرىپ، الەۋمەتتىك اۋماقتىڭ پارتيا قۇرىلىسى جاعدايىن ۇعىسقان ەدى.
”باس شۋجي سول جولى قىزمەت تەكسەرۋگە كەلگەندە، مەنى جالىنعا ۇقسايدى ەكەنسىڭ دەپ جاقسى ىستەۋگە شابىتتاندىردى، بۇل ءسوزىن مەن ءومىر بويى ۇمىتپايمىن. مەن بۇل جالىندى جالعىز ءوزىم عانا لاۋلاتپاعاندىعىمدى، پارتيانىڭ باۋلۋى، ۇيىمنىڭ سەنىمى، تۇرعىنداردىڭ قولداۋى حالىق ءۇشىن قىزمەت ەتۋدىڭ وسى جالىنىن بارعان سايىن لاۋلاتقاندىعىن ابدەن بىلەمىن“. ۋ ياچين تەبىرەنە بىلاي دەدى: ”كوممۋنيستىك پارتيا مۇشەسى رەتىندە، بۇقارا قايدا بولسا، مەنىڭ قىزمەت ورنىم سول جەردە بولادى. مەن ءومىر بويى نەگىزگى ساتىعا تامىر تارتىپ، بار كۇشىمدى سارقا جۇمساپ، ۇيىمنىڭ مەنى باۋلىعانىن اقتاپ، بۇقارانىڭ ۇمىتىنەن شىعامىن“.
ءبىر توپ ادامنىڭ، ءبىر ساياسي پارتيانىڭ تالپىنىسى ەڭ قالىڭ حالىقتىڭ ءتۇبىرلى مۇددەسىنە ۇيلەسسە، ول ات سالىسقان ىستەر تەرەڭ نەگىزگە، ۇشان - تەڭىز ارناعا، ماڭگىلىك مانگە يە بولادى.
ۋاقىت − ەڭ ۇلى جازۋشى، تاريح − ەڭ ادال ەستەلىككە الۋشى.
”105 جىلدىڭ الدىندا جۇڭگو حالقى مەن جۇڭحۋا ۇلتىنىڭ ۇلى ويانۋى بارىسىندا، ماركسيزم - لەنينيزمنىڭ جۇڭگو جۇمىسشىلار قوزعالىسىمەن تىعىز ۇشتاسۋى بارىسىندا جۇڭگو كوممۋنيستىك پارتياسى زامانعا قاراي دۇنيەگە كەلدى. سودان باستاپ جۇڭگو حالقى مەن جۇڭحۋا ۇلتى ەڭ سەنىمدى تىرەككە يە بولدى، ىشكى الاساپىراندىق پەن سىرتقى شاپقىنشىلىققا ۇشىراعان، كەدەي ءارى ءالسىز كۇيدەگى جۇڭگو جەر - كوكتى ءدۇر سىلكىندىرگەن تاريحي وراسان زور وزگەرىستەردى باستادى“.
”105 جىلدان بەرى، پارتيامىز جۇڭگو حالقىنىڭ باقىتىن كوزدەۋ، جۇڭحۋا ۇلتىنىڭ گۇلدەنۋىن كوزدەۋ سىندى اۋەلگى ماقساتتان، بورىشتان باستان - اياق جازباي، دۇنيە ءجۇزىنىڭ دامۋ اۋقىمىنا تەرەڭ كوز جىبەرىپ، ءارقايسى تاريحي مەزگىلدەردەگى قوعامداعى باستى قايشىلىقتى، وزگەرىستى دالمە - ءدال يگەرىپ، بۇكىل ەلدەگى ءار ۇلت حالقىن ىنتىماقتاستىرىپ، باستاپ، قاجىماي - تالماي كۇرەس جۇرگىزىپ، جاڭا دەموكراتيالىق توڭكەرىستىڭ، سوتسياليستىك توڭكەرىس پەن قۇرىلىستىڭ، رەفورما جاساۋ، ەسىك اشۋدىڭ جانە سوتسياليستىك وسىزامانداندىرۋ قۇرىلىسىنىڭ، جاڭا داۋىردەگى جۇڭگوشا سوتسياليزمنىڭ ۇلى تابىستارىن جاراتىپ، جۇڭحۋا ۇلتىنىڭ نەشە مىڭ جىلدىق تاريحىنداعى ەڭ ايبىندى ەپوستى جازدى“.
باس شۋجي شي جينپيڭ ماڭىزدى سوزىندە 105 جىلدان بەرى جۇڭگو كوممۋنيستىك پارتياسىنىڭ بۇكىل ەلدەگى ءار ۇلت حالقىن ىنتىماقتاستىرىپ، باستاپ، باسىپ وتكەن شۇعىلالى بارىسىن، جاراتقان ۇلى تابىستارىن جان - جاقتى ەسكە الدى جانە قورىتىندىلادى −
”105 جىل قاجىماي كۇرەس جۇرگىزىپ، جۇڭگو حالقىنىڭ بولاشاعىن، تاعدىرىن تۇبەگەيلى وزگەرتتى“.
”105 جىل قاجىماي كۇرەس جۇرگىزىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ دۇرىس جولىن اشتى“.
”105 جىل قاجىماي كۇرەس جۇرگىزىپ، ماركسيزمنىڭ قۇدىرەتتى ومىرشەڭ كۇشىن ايگىلەدى“.
”105 جىل قاجىماي كۇرەس جۇرگىزىپ، دۇنيە ءجۇزى تاريحىنىڭ اياق الىسىنا تەرەڭ ىقپال جاسادى“.
”105 جىل قاجىماي كۇرەس جۇرگىزىپ، قۇدىرەتتى جۇڭگو كوممۋنيستىك پارتياسىن سومدادى“.
”ەڭ سەنىمدى تىرەك“ ەڭ ۇلى حالىقتى ىنتىماقتاستىرىپ، باستاپ، ”ەڭ ايبىندى ەپوستى جازدى“. بۇگىنگى جۇڭگو ۇرپاقتار بويى جۇڭگو كوممۋنيستەرىنىڭ الدىڭعىلاردىڭ ءىزىن سوڭعىلار باسىپ قوسقان ۇلەسىن جانە قۇربان بەرگەنىن ۇمىتپايدى، 100 ميلليونداعان جۇڭگو حالقىنىڭ العان بەتىنەن قايتپاي ەرلىكپەن سايىسقانىن جانە كۇرەس جاساعانىن ۇمىتپايدى.
الاڭدا ماداقتالىپ - سيلانعان جاسى ەڭ ۇلكەن مەملەكەتتىك تاڭداۋلى پارتيا مۇشەلەرىنىڭ ۋاكىلى رەتىندە، 94 جاستاعى چىن حوۋچۇننىڭ شاشى كۇمىستەي جارقىراپ، ەرەكشە تەبىرەندى، ول پارتياعا رەسمي مۇشە بولعان سول كۇن، ياعني 1957 - جىلى 11 - ايدىڭ 17 - كۇنى كوكەيىندە سايراپ تۇر. ”ءدال سول كۇنى سوۆەت وداعىنا ساپارلاي بارعان ماۋ جۋشي ماسكەۋدە ءبىزدىڭ جۇڭگولىق وقۋشىلاردى قابىلدادى، ماۋ جۋشي ’ءۇمىت سىزدەردە‘، - دەدى، بۇل مەنىڭ ومىرلىك جاۋىنگەرلىك ۇرانىم بولدى. ءبىزدىڭ سول داۋىردەگى ارمانىمىز ەندىگارى قورلانبايتىن، باي - قۇدىرەتتى جۇڭگونى كورۋ ەدى، بۇل ارمانىمىز جۇزەگە اسۋدا! پارتيامىزدىڭ 105 جىلدىق تاريحي تابىسى پارتيامىزدىڭ اتى زاتىنا ساي ۇلى، داڭقتى، دۇرىس پارتيا ەكەندىگىن تولىق دالەلدەدى!
تاريح رەالدىقتى كورسەتەدى، جورىق ءالى اياقتامادى. ءبىز بۇرىن نە ءۇشىن تابىسقا جەتە العانىمىزدى ايقىن تۇسىنگەندە عانا بولاشاقتا قالاي ۇزدىكسىز تابىسقا جەتەتىنىمىزدى اڭعارا الامىز.
باس شۋجي شي جينپيڭ پارتيامىزدىڭ باسقا ساياسي پارتيالار جانە ساياسي كۇشتەر تەڭەسە المايتىن تاڭداۋلى قاسيەتىن 6 جاقتان تەرەڭ قورىتىندىلادى −
”اقيقاتقا تالپىنۋدى مۇرات ەتىپ، العا باسۋ بەتالىسىن باستان - اياق ءداپ باسىپ يگەردى“، ”حالىققا تەرەڭ تامىر تارتىپ، باستان - اياق بەرىك نەگىزگە يە بولدى“، ”تاريحي بورىشتى باتىلدىقپەن ارقالاپ، باستان - اياق ستراتەگيالىق ىرىقتىلىقتى يگەردى“، ”دامۋ اعىمىنا سايكەسىپ، باستان - اياق ءداۋىردىڭ الدىڭعى لەگىندە ءجۇردى“، ”باتىلدىقپەن كۇرەس جۇرگىزىپ، شەبەرلىكپەن كۇرەس جۇرگىزىپ، ءسوزسىز جەڭىسكە جەتۋ سەنىمىن باستان - اياق ساقتادى“، ”ءوزىن الۋەتتەندىرۋگە باسا ءمان بەرىپ، باستان - اياق جالىندى ومىرشەڭدىك كۇشكە تولى بولدى“.
”وسى تاڭداۋلى قاسيەتتەر جۇڭگو كوممۋنيستىك پارتياسىنىڭ نە ءۇشىن قولىنان كەلەتىنىنىڭ شەشۋشى شيفرى. ءبىز جاڭا ءىس جۇزىندىكپەن ۇشتاستىرىپ، پارتيانىڭ تاڭداۋلى قاسيەتىن ۇزدىكسىز كەڭىنەن ساۋلەلەندىرىپ، پارتيانىڭ ماڭگى قاسيەتىنىڭ وزگەرمەۋىنە، ءتۇسىنىڭ وزگەرمەۋىنە، سيپاتىنىڭ وزگەرمەۋىنە، باستان - اياق قۇدىرەتتى جاسامپازدىق قۋاتقا، ۇيىسۋ قۋاتىنا، جاۋىنگەرلىك قۋاتقا يە بولۋىنا شىنايى كەپىلدىك ەتۋىمىز كەرەك“. جاڭا داۋىردەگى جۇڭگو كوممۋنيستەرىنىڭ تاريحي سەنىمى مەن تاريحي ىرىقتىلىق رۋحى وسى ارادا تاسقىندادى.
پارتيامىزدىڭ جەڭىستەن جاڭا جەڭىسكە جەتۋى وسى قاسيەتتەردىڭ پارتيانىڭ گەنىنە سىڭگەندىگىنەن، پارتيانىڭ قان تامىرىندا اعىپ جاتقاندىعىنان.
باس شۋجي شي جينپيڭنىڭ قولىنان سالماقتى داڭق كۋالىگىن العان ”90 - جىلداردىڭ تۇلەگى“، مەملەكەتتىك تاڭداۋلى پارتيا ىستەرى قىزمەتكەرى ۋاڭ كىحاۋ جىگەرى تاسي بىلاي دەدى: ”باس شۋجي ءبىزدى ’ەڭبەكشىل بال اراسى‘، ’تاماشا تۇرمىستى جاراتۋشى‘ دەپ القادى. جەدەل جولداما جەتكىزۋشىلەر ەرىكتى قىزمەت وتەۋ اترەتى پارتيا ياچەيكاسىنىڭ شۋجيى رەتىندە، ءبىز پارتيا مۇشەسىندىك سالاۋاتىمىزدى اسقاقتاتىپ، كاسىپپەن شۇعىلدانۋشىلاردى ءتىپتى دە كوپ ۇيىمداستىرىپ، ۇيىستىرىپ، پارتيامەن تىلەكتەس بولىپ، پارتياعا ىلەسىپ كۇرەس جۇرگىزىپ، بار ىقىلاسپەن العا ۇمتىلىپ، بورىشتى، ءسوز جوق، ورىندايمىز“!
كەۋدەسىنە قىزىل گۇل تاققان جياڭسۋ ولكەسى شۇي - ي اۋدانى حۋاڭحۋاتاڭ قالاشىعى لۋگوۋ الەۋمەتتىك اۋماعى پارتيا باس ياچەيكاسىنىڭ شۋجيى شۇي ليڭ كوڭىلى تولقىپ، جۇڭگونىڭ تۇڭعىش اۆياماتكاسى لياۋنيڭ اتتى اۆياماتكانىڭ ايەل رولشىسىنان بۇگىنگى تاڭداعى اۋىل - قىستاقتى گۇلدەندىرۋ جولىنىڭ باستاماشىسى بولعانعا دەيىن، ونىڭ قاسيەتى وزگەرگەن جوق: ”باس شۋجي ماعان كۋالىك بەرگەن كەزدە، مەن باس شۋجيگە ءوز كەشىرمەلەرىمدى دوكلات ەتتىم، باس شۋجي مەنى ’كەرەمەت، ۇزدىكسىز قۇلشىن‘ دەپ شابىتتاندىردى. مەيلى ’تەرەڭ كوگىلدىر تەڭىز‘، الدە ’جاسىل اتىز - دالا‘ بولسىن، كوممۋنيستىك پارتيا مۇشەلەرى حالىق ءۇشىن قىزمەت ىستەيدى، ءبىز باس شۋجيدىڭ تاپسىرماسىن ەستە بەرىك ساقتاپ، دەن قويا قاجىرلىلىقپەن ىستەپ، كاسىپ سالاسىن شىنايى يگەرىپ، حالىق تۇرمىسىنداعى ناقتى ىستەردى ويداعىداي يگەرىپ، پارتيا تۋىن اۋىل - قىستاقتى جاپپاي گۇلدەندىرۋ شەبىندە اسقاق جەلبىرەتەمىز“.
شۇعىلالى تاريح ماقتانىش ەتەرلىك، جارقىن بولاشاق ادامدى ەكپىندەي ىلگەرىلەۋگە جەبەيدى. جاڭا تاريحي باستامادا باس شۋجي شي جينپيڭ بۇكىل جۇڭگو كوممۋنيستىك پارتياسى مۇشەلەرىنە جاڭا ارەكەت بۇيرىعىن بەردى −
”وسى عاسىردىڭ ورتا شەنىنە بارعاندا، جاپپاي سوتسياليستىك وسىزاماندانعان قۇدىرەتتى مەملەكەت قۇرىپ، ەكىنشى 100 جىلدىق كۇرەس نىساناسىن جۇزەگە اسىرۋىمىز كەرەك. ۋاقىت كۇتىپ تۇرمايدى! تاريح كۇتىپ تۇرمايدى! بۇكىل پارتياداعى جولداستار، ءسوز جوق، اۋەلگى ماقساتتى ۇمىتپاي، بورىشتى ەستە بەرىك ساقتاۋى، ءسوز جوق، كىشى پەيىل، بايسالدى بولىپ، قاجىرلىلىقپەن كۇرەس جۇرگىزۋى، ءسوز جوق، باتىلدىقپەن كۇرەس جۇرگىزۋى، شەبەرلىكپەن كۇرەس جۇرگىزۋى، بۇكىل ەلدەگى ءار ۇلت حالقىنا تىعىز سۇيەنىپ جانە ولاردى ىنتىماقتاستىرىپ، باستاپ، جاڭا جورىقتا ەكپىندەي ىلگەرىلەپ، جاڭا داۋىردە ۇلەس قوسىپ، قۇلشىنا جاڭا تاريحي شۇعىلالى تابىستار جاراتۋى كەرەك!
ايبىندى «ينتەرناتسيونال ءانى» حالىق سارايىندا اسقاقتادى، اسقاق تا تەرەڭ ماعىنالى اۋەن تاريحتى، رەالدىقتى، بولاشاقتى تۇتاستىردى: ”بىرلەس، ەرتەڭگە جەتكىز، ينتەرناتسيونال ىسكە اسادى، ءسوزسىز“...
وسى ساتتە 10 مىڭ ادامدىق ۇلكەن زالدىڭ توبەسىندە شىراقتار سامالاداي جارقىراپ، قالىڭ جۇلدىز سامسىعانداي كورىندى، الىپ بەس بۇرىشتى قىزىل جۇلدىز جۇڭگونى نۇرلاندىرۋدا، جورىققا جەتەلەۋدە.
(شينحۋا اگەنتتىگىنىڭ 7 - ايدىڭ 2 -كۇنى بەيجيڭنەن بەرگەن حابارى)
