شينحۋا اگەنتتىگىنىڭ 7 ـ ايدىڭ 3 ـ كۇنى كولومبودان بەرگەن حابارى (تىلشىلەر ۋ زىيۇي، چى حۇڭلياڭ). «شي جينپيڭ ەل باسقارۋ جونىندەنىڭ» 5 ـ تومى جۇڭگو − شريلانكا وقىرماندار ٴماجىلىسى 7 ـ ايدىڭ 3 ـ كۇنى شريلانكانىڭ استاناسى كولومبودا وتكىزىلدى.
ماجىلىسكە قاتىناسقان سيلى قوناقتار بىلاي دەپ قارادى: «شي جينپيڭ ەل باسقارۋ جونىندەنىڭ» 5 ـ تومى − شي جينپيڭ جاڭا ٴداۋىر جۇڭگوشا سوتسياليزم يدەياسىنىڭ ەڭ جاڭا جەتىستىكتەرىن جان ـ جاقتى، جۇيەلى بەينەلەگەن قۇزىرلى شىعارما، حالىقارالىق قوعامنىڭ جۇڭگو جولى، جۇڭگو باسقارۋى، جۇڭگو قاعيداسى جونىندەگى تۇسىنىكتى، تانىمدى ونان ارى تەرەڭدەتۋىنە ٴتيىمدى. ماجىلىسكە قاتىناسقان سيلى قوناقتار مىنانى ٴبىلدىردى: جۇڭگو مەن شريلانكا وسىزامانداندىرۋداعى ساپارلاستار، وسى رەتكى وقىرماندار ٴماجىلىسىنىڭ وتكىزىلۋى ەكى ەلدىڭ ٴتۇسىنىسۋدى نىعايتۋى، ورتاق تانىم ۇيىستىرۋى، سەلبەستىكتى تەرەڭدەتۋى، جۇڭگو − شريلانكا تاعدىرلاس ورتاق تۇلعاسىن قول ۇستاسا قۇرۋى جونىنەن ماڭىزدى ٴمان الادى.
شريلانكا پارلامەنتىنىڭ باستىعى جاگات ۆيكراماراتنا مىنالاردى ٴبىلدىردى: «شي جينپيڭ ەل باسقارۋ جونىندەنىڭ» 5 ـ تومى دۇنيە ٴجۇزىنىڭ جۇڭگونىڭ باسقارۋ جالپى جوباسىن، دامۋ وي جەلىسىن، جاڭالىق اشۋ ۇستانىمىن جانە حالىقارالىق سەلبەستىك دارىپتەمەسىن تۇسىنۋىنە قۇندى كورۋ اياسىن ازىرلەدى. بۇل شىعارمادا جۇڭگونىڭ دامۋ امالياتى، تاجىريبەسى ەستەلىككە الىنۋمەن بىرگە، جۇڭگونىڭ دۇنيە ٴجۇزىنىڭ بەيبىتشىلىگىن قورعاۋ جانە بىرگە گۇلدەنىپ ـ كوركەيۋدى جەبەۋ جونىندەگى تەرەڭ تولعانىسى دا بەينەلەنگەن. شريلانكا جۇڭگومەن ٴار سالاداعى اۋىس ـ كۇيىستى، سەلبەستىكتى ۇزدىكسىز كەڭەيتىپ، شريلانكا مەن جۇڭگونىڭ شىن ىقىلاسپەن ٴوزارا كومەكتەسۋ، ۇرپاقتار بويى دوس بولۋ ستراتەگيالىق سەلبەستىك سەرىكتەستىك قاتىناسىنىڭ ۇزدىكسىز تىڭ ىلگەرىلەۋشىلىككە قول جەتكىزۋىن ىلگەرىلەتۋدى قالايدى.
شريلانكانىڭ وقۋ ـ اعارتۋ جانە جوعارى وقۋ ـ اعارتۋ مينيسترلىگىنىڭ ورىنباسار مينيسترى ماتۋرا سەنەۋيراتنا مىنالاردى ٴبىلدىردى: «شي جينپيڭ ەل باسقارۋ جونىندەنىڭ» 5 ـ تومىندا جۇڭگو ۇلگىسىندەگى وسىزامانداندىرۋدىڭ ايقىن قۇرىلىمى سۇلبالانىپ، شارۋاشىلىقتى دامىتۋ، عىلىم ـ تەحنولوگيادا جاڭالىق اشۋ، وسى زامانعى وقۋ ـ اعارتۋ، سونداي ـ اق مادەنيەتتى جالعاستىرۋ جانە قورعاۋ سياقتى سالالار قامتىلعان. وسىزامانداندىرۋدى ىسكە اسىرۋدى ٴۇمىت ەتەتىن ٴارى تاريح تامىرىنان ايرىلۋدى قالامايتىن ٴارقانداي مەملەكەت ودان قۇندى شابىت الا الادى.
شريلانكا كوممۋنيستىك پارتياسىنىڭ باس شۋجيى گيگاناگا ۆيراسىنحا مىنالاردى ٴبىلدىردى: جۇڭگو كوممۋنيستىك پارتياسىنىڭ جاڭاشا وندىرگىش كۇشتەردى دامىتۋ، جوعارى ساپالى دامۋدى ىلگەرىلەتۋ، عىلىم ـ تەحنولوگيادا ٴوز كۇشىنە سۇيەنىپ ٴوزىن الۋەتتەندىرۋدى جۇزەگە اسىرۋ، ەكولوگيالىق وركەنيەت قۇرۋ سياقتى جاقتاردا قول جەتكىزگەن تابىستارى سوتسياليستىك ٴتۇزىمنىڭ وسىزامانداندىرۋ قۇرىلىسىن اناعۇرلىم جوعارى ونىمدىلىكپەن ۇيىمداستىرا الاتىندىعىن، ونىمدىلىك پەن ادىلدىككە اناعۇرلىم ويداعىداي تەڭ ٴمان بەرە الاتىندىعىن تولىق دالەلدەدى.
قيمىلدا جۇڭگو جاق شريلانكا جاقتىڭ سيلى قوناقتارىنا «شي جينپيڭ ەل باسقارۋ جونىندەنىڭ» 5 ـ تومىنىڭ اعىلشىن ٴتىلى نۇسقاسى، 2 ـ تومىنىڭ سەنحالا ٴتىلى نۇسقاسى كىتابىن ۇسىندى. ماجىلىسكە قاتىناسقان ماماندار ەل باسقارۋ، جاسىل دامۋ، اشىق سەلبەستىك، ”ٴبىر بەلدەۋ، ٴبىر جولدى“ بىرگە قۇرۋ سياقتى كەڭەستىك تاقىرىپتاردى ارقاۋ ەتىپ اۋىس ـ كۇيىس جاساسىپ، زەرتتەۋ تالقى وتكىزدى.
وسى رەتكى وقىرماندار ٴماجىلىسىنىڭ نەگىزگى تاقىرىبى − ”تاعدىرلاس بولۋ: جۇڭگو مەن شريلانكا وسىزامانداندىرۋ جولىندا بىرگە ٴجۇرۋ“، جۇڭگو مەملەكەتتىك كەڭەس اقپارات كەڭسەسى، جۇڭگو شەتەل تىلىندە باسىلىمدار شىعارۋ جانە تاراتۋ مەكەمەسى، جۇڭگونىڭ شريلانكادا تۇراتىن باس ەلشىلىگى بىرگە ۇيىمداستىرىپ وتكىزدى. جۇڭگو − شريلانكا ەكى ەلدىڭ ساياسي سالا، جوعارى مەكتەپ، اقىلماندار قويماسى، مەديا سياقتى ٴار سالاداعى قايراتكەلەرىنەن 300گە جۋىق ادام قيمىلعا قاتىناستى.
