ٴۇرىمجى تيانشان حالىقارالىق اۋەجايىندا
الدىڭعى جارتى جىلدا جولاۋشى، جۇك تاسىمال مولشەرى بىردەي جوعارىلاپ، كوپ تۇردە رەكورد جاڭالاندى
انار بۇلت \ شينجياڭ گازەتىنىڭ ٴتىلشىسى ما ينيڭ 7 ـ ايدىڭ 3 ـ كۇنى ۇرىمجىدەن حابارلايدى. الدىڭعى جارتى جىلدا ٴۇرىمجى تيانشان حالىقارالىق اۋەجايىنىڭ تۇتاس تۇلعالىق اينالىم جاعدايى ورنىقتىلىق بارىسىندا جاقسارىپ، جالپى 13 ميلليون 820 مىڭ 500 جولاۋشى (رەت) قابىلداعان ـ جونەلتكەن، 157 مىڭ 700 توننا جۇك ـ پوچتا جولدامالارىن قابىلداعان ـ جونەلتكەن، 97 مىڭ 700 كەزەك ۇشاق ۇشىپ ـ قونعان، بۇل سايكەس مەزگىلدەگىدەن جەكە ـ جەكە %4.42، %11.28، %5.38 ارتقان.
6 ـ ايدىڭ 26 ـ كۇنى ٴۇرىمجى تيانشان حالىقارالىق اۋەجايىنىڭ ٴبىر كۇندىك جولاۋشى قابىلداۋ ـ جونەلتۋ مولشەرى بيىل تۇڭعىش رەت 100 مىڭ ادامدىق (رەت) ۇلكەن وتكەلدەن ٴوتىپ، 661 كەزەك ۇشاقتىڭ ۇشىپ ـ قونۋىن قامتاماسىز ەتىپ، ۇشاق قاتىناعاننان بەرگى ٴبىر كۇندىك ەڭ جوعارى رەكورد جاراتقان. قازىر ٴۇرىمجى تيانشان حالىقارالىق اۋەجايى ”شىعىستا ەل ىشىمەن، باتىستا ەۆروپا − ازيامەن تۇتاساتىن“ اۋە جەلىسى تورىن قالىپتاستىردى، حالىقارالىق جولاۋشى تاسىمال اۋە جەلىسى حالىقارادا 24 قالامەن تۇتاستى، ورتا ازياداعى اۋە قاتىناس تۇيىندەرىنىڭ سانى مەملەكەت بويىنشا الدىڭعى قاتارعا ٴوتتى، شەكارا اتتاعان ادامداردىڭ بارىس ـ كەلىسى بارعان سايىن جيىلەي ٴتۇستى.
جولاۋشى تاسىمالىنان سىرت، جۇك تاسىمال جۇمىسىنىڭ كوپ ٴتۇرلى رەكوردى ىركەس ـ تىركەس جاڭالاندى. 6 ـ ايدىڭ 18 ـ كۇنى ٴبىر كۇندىك جۇك ـ پوچتا جولدامالارىن قابىلداۋ ـ جونەلتۋ مولشەرى 1848.09 تونناعا جەتىپ، ٴبىر كۇندىك جۇك تاسىمالىنىڭ تاريحي رەكوردىن جاڭالادى. 6 ـ ايدا 40 مىڭ 500 توننا جۇك تاسىمالدانعان، بۇل سايكەس مەزگىلدەگىدەن %30.25 ارتىپ، ۇشاق قاتىناعاننان بەرگى ايىنا قابىلدانعان ـ جونەلتىلگەن جۇك ـ پوچتا جولدامالارىنىڭ تاريحتاعى ەڭ جوعارى دەڭگەيىن جاراتتى. مۇنىڭ ىشىندە حالىقارالىق جۇك تاسىمالىنىڭ ارتۋ قارقىنى ٴتىپتى دە كورنەكتى بولىپ، ٴبىر ايدا قابىلدانعان ـ جونەلتىلگەن حالىقارالىق جۇك ـ پوچتا جولدامالارى 15 مىڭ توننا بولىپ، سايكەس مەزگىلدەگىدەن %66.32 ارتىپ، ازيا − ەۆروپا شەكارا اتتاعان اۆياتسيا زات اينالىمى تورابىنىڭ ارتىقشىلىعى ۇزدىكسىز كورنەكتىلەندى. قازىر ٴۇرىمجى تيانشان حالىقارالىق اۋەجايىنىڭ حالىقارالىق جۇك تاسىمال لەنياسى 23 مەملەكەتتى قامتىپ، تۇتاس جۇك ۇشاعى كەزەكشى ۇشاعى ۇدايىلاندىرىلىپ جۇمىس جۇرگىزىپ، ازيا − ەۆروپا اۆياتسيا زات اينالىمىنداعى وتكەرمەلەۋ ٴتۇيىنى ورنى اناعۇرلىم بەكەمدەلدى.
بۇكىل شينجياڭدا كەزەكشى ۇشاق مولشەرى 7 ـ ايدىڭ سوڭىنان 8 ـ ايدىڭ ورتا شەنىنە دەيىن تۇتاس جىلدىق قاۋىرت مەزگىلدى قارسى الادى. قازىر وسى اۋەجاي ٴارقايسى ٴىرى اۆياتسيا مەكەمەلەرىمەن بىرلەسىپ، تاسىمال قۋاتىن ارتتىرىپ، اۋە لەنياسىنىڭ ورنالاسىمىن ساپالىلاندىردى، سونىمەن بىرگە قىزمەت وتەۋدى جان ـ جاقتى جوعارىلاتىپ، جولاۋشىلاردىڭ حاۋىپسىز، قولايلى، جايلى ٴجۇرىس ـ تۇرىسىن قامتاماسىز ەتتى.
