جۇڭگو جۇمىسشى - شارۋا قىزىل ارمياسى باتىس باعىت ارمياسىنىڭ شينجياڭعا جورىق جاساۋ ەسكەرتكىش سارايى:
شيڭشيڭشياداعى ۇشقىن جاڭا قوزعالىس قۋاتىن تاسقىنداتتى
□ انار بۇلت \ شينجياڭ گازەتىنىڭ ءتىلشىسى ليۋ شياڭ
كۇن شۋاعى قۇمىل قالاسىنىڭ شىعىسىنداعى كوشە بويىنداعى ءشوپ - اعاشتاردى ءوپتى، جاسىل اعاشتارمەن كومكەرىلگەن جۇڭگو جۇمىسشى - شارۋا قىزىل ارمياسى باتىس باعىت ارمياسىنىڭ شينجياڭعا جورىق جاساۋ ەسكەرتكىش سارايى جىم - جىرت قاسقايىپ تۇر. اۋلا ىشىندەگى ەسكەرتكىشتە چىن يۇن جولداس جازعان ”قىزىل ارميا باتىس باعىت ارمياسىنىڭ شينجياڭعا جورىق جاساۋ ەسكەرتكىشى“ دەگەن ۇلكەن جازۋ جاندى دا ايبىندى كورىنەدى؛ الاڭدا قىزىل ارميا جاۋىنگەرىنىڭ ۇلكەن قىلىش اسىنىپ، مىلتىق ۇستاعان قولا ءمۇسىنى ايبىندى دا ايباتتى قاسقايىپ تۇر.
80 نەشە جىل ءوتىپ، قۇمدى بوران سوعىس ءورتىنىڭ ىس - تۇتەگىن اكەتكەنىمەن، اۋىر جاعدايدا ومىرگە تالپىنعان، سەنىم الاۋى لاۋلاعان قىزىل ەستەمەلەردى وشىرە المادى.
بۇل ارا باتىس باعىت ارمياسىنىڭ قولباسىلارى مەن جاۋىنگەرلەرىنىڭ قان كەشىپ قورشاۋدى بۇزىپ شىعىپ، تىعىرىقتان جول تاۋىپ قايتا تىرىلگەن جەرى، جۇمىسشى - شارۋا قىزىل ارمياسىنىڭ قۇرىلىم بويىنشا شينجياڭعا جورىق جاساۋداعى تۇڭعىش بەكەتى، سونداي - اق ءار ۇلت كادرلارى مەن بۇقاراسىنىڭ قىزىل قان تامىردى جالعاستىرىپ، قايراتتانا ەكپىندەي ىلگەرىلەيتىن رۋحاني مەكەنى.
قۇبا تۇزدەگى ۇشقىن اۋەلگى ماقساتتى جالعاستىردى
ەسكەرتكىش سارايى كورمە زالىنىڭ قاقپاسىن اشقاندا، سارعايعان كونە سۋرەتتەر، ەسكىرگەن سيىر تەرىسى سۋ تورسىعى، جاماۋ - جاماۋ كونە كيىم - كەشەكتەر، جاۋىنگەرلەر وزدەرى جاساعان قاراپايىم قارۋ - جاراقتار سياقتى ناقتى زاتتار رەتىمەن ءتىزىلىپ، 1937 - جىلعى سول ءبىر جاپالى دا ايبىندى جىلداردان ءۇنسىز سىر شەرتۋدە.
1936 - جىلى قوڭىر كۇزدە باتىس باعىت ارمياسىنىڭ 20 مىڭنان استام قولباسى مەن جاۋىنگەرى حۋاڭحى وزەنىنىڭ باتىسىنا ءوتىپ، حىشي دالىزىندە وزدەرىنەن نەشە ەسە ارتىق جاۋمەن ولىسپەي - بەرىسپەيتىن قاندى شايقاس جۇرگىزدى. ازىق - تۇلىك، كيىم - كەشەك، وق - ءدارى كەمشىل بولعاندىقتان، اسكەري ءبولىم قالىڭ جاۋمەن جەكە دارا شايقاسىپ، سانسىز ادام باتىسقا جورىق جاساۋ جولىندا مەرت بولدى.
مۇشكىل جاعدايدا لي شياننيان، چىڭ شىساي سول تارماق اترەتىنىڭ جاۋىنگەرلەرىن باستاپ، تايسالماي قار جامىلىپ، مۇز قۇرسانعان چيليانشانعا كىردى. ولار قار - مۇزداردان ءوتىپ، ءشوپ تامىرىن اۋجال ەتىپ، قايىس بەلبەۋدى قايناتىپ جەپ، قاقاعان ايازدا جاياۋلاتا قورشاۋدى بۇزىپ، جاراقاتتارىن، اۋرۋلارىن ەلەڭ عۇرلى كورمەي جالعىز ۇمىتكە − شيڭشيڭشياعا قاراي ماشاقاتپەن العا ىلگەرىلەدى.
”كوپتەگەن جاۋىنگەردە ءبۇتىن اياق كيىم دە جوق، قۇبا تۇزدە، قيىرشىق تاستاردا جالاڭ اياق ءجۇردى، تۇلا بويىن جاراقات باسقان كۇندە دە بىردە - ءبىر ادام قوسىننان قالمادى، بىردە - ءبىر ادام تىزە بۇكپەدى“. ەسكەرتكىش سارايىندا ءتۇسىندىرۋ قىزمەتىمەن 20 نەشە جىل شۇعىلدانعان ھاۋاگۇل پارعۇزات ءار جولى قالپىنا كەلتىرىلگەن كورىنىس الدىندا وسى تاريحتى ايتقاندا قاتتى اسەرلەنەدى.
جۇڭگو كوممۋنيستىك پارتياسى ورتالىق كوميتەتى باتىس باعىت ارمياسىنىڭ اماندىعىنا ەرەكشە كوڭىل ءبولىپ، كوپ جاقتان امالىن تاۋىپ قۇتقاردى. 1937 - جىلى 4 - ايدىڭ سوڭىندا تالاي جاپا - ماشاقاتتى باستان وتكەرگەن قىزىل ارميا جاۋىنگەرلەرى اقىرى شيڭشيڭشياعا جەتكەندە، 420 نەشە ادام عانا قالادى. 5 - ايدىڭ باس شەنىندە چىن يۇن، تىڭ داييۋان پارتيا ورتالىق كوميتەتىنىڭ جىبەرۋىمەن شيڭشيڭشيادا باتىس باعىت ارمياسىنىڭ قالدىق اسكەري ءبولىمىنىڭ الدىنان شىقتى.
ۇشى - قيىرسىز قۇبا ءتۇز، ەلسىز قۋ دالادا پارتيا ورتالىق كوميتەتى جىبەرگەن كومەككە كەلگەن قوسىن شىعا كەلگەندە، اۋىر جاعدايدى باستان وتكەرگەن جاۋىنگەرلەر، اقىرى، قايتا تىرىلگەندەي بولدى.
قوسىن قىسقا ۋاقىت تىنىعىپ، رەتتەلىپ، قۇمىلدان وتكەندە، جەرگىلىكتى ورىنداعى ءار ۇلت بۇقاراسى استىق جانە سۋ اكەلىپ، جارالانعان، ناۋقاستانعان جاۋىنگەرلەرگە قارايلاسىپ، سوعىس ءورتى لاۋلاعان جىلداردا ارميا مەن حالىق تىلەكتەستىگىنىڭ، ۇلتتار ىنتىماعىنىڭ اسەرلى تاراۋىن قاراپايىم ىزگى نيەتپەن جازدى.
تىعىرىقتان شىققان قولباسىلار مەن جاۋىنگەرلەر وسىدان كەيىن باتىس باعىت ارمياسىنىڭ باس تارماق اترەتى (سىرتقا قاراتا ”جاڭا اسكەرلەر يىڭى“ دەپ اتالدى) بولىپ قايتا ۇيىمداسىپ، اۆياتسيا، زەڭبىرەكشى اسكەرلەر، حابارلاسۋ، اۆتوموبيل تەحنولوگياسى سياقتى كاسىپتىك شەبەرلىكتەردى جۇيەلى ۇيرەنىپ، جاڭا جۇڭگوداعى ەڭ العاشقى ءبىر توپ اۋە ارمياسى تىرەكتىلەرى مەن اسكەري تەحنولوگيا دارىندىلارىنا اينالدى. قۇبا تۇزدەگى قيىن جاعدايدان شىققان توڭكەرىس ۇشقىنى ەڭ سوڭىندا تاۋ - وزەندەردە جالىنداپ، بولاشاقتى نۇرلاندىردى.
”جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قۇتتىقتاۋ جينالىسىندا باس شۋجي شي جينپيڭ 105 جىلدان بەرى، ءبىزدىڭ قول جەتكىزگەن بارلىق تابىسىمىز نەشە ۇرپاق جۇڭگو كوممۋنيستەرىنىڭ جۇڭگو حالقىن ىنتىماقتاستىرىپ، باستاپ، قاجىماي - تالماي كۇرەس جۇرگىزۋىنىڭ ناتيجەسى ەكەندىگىن اتاپ كورسەتتى“. ھاۋاگۇل بىلاي دەدى: ”وسى جاۋىنگەرلەردىڭ ورتاشا جاسى نەبارى 20 نەشە جاس قانا، ولار جاستىق ورالدارى مەن سەنىمدەرى ارقىلى ءبىزدىڭ بۇگىنگى باقىتتى تۇرمىسىمىز ءۇشىن جول سالدى. مەنىڭ وسى اڭگىمەنى اناعۇرلىم كوپ ادامعا ايتىپ، اناعۇرلىم كوپ ادامنىڭ ۇلتتىڭ تاۋەلسىزدىگى، حالىقتىڭ ازاتتىعى جانە مەملەكەتتىڭ بايۋى، قۇدىرەتتەنۋى، حالىقتىڭ باقىتى جولىندا الدىڭعىلاردىڭ ءىزىن كەيىنگىلەر باسىپ، قۇربان بەرىپ، ءوزىن ارناعان توڭكەرىستىك ارداگەر قۇربانداردى، ارداگەر ازاماتتاردى ماڭگى ەستە ساقتاۋىنا مۇمكىندىك جاساۋ جاۋاپكەرشىلىگىم بار“.
وتتى سوندىرمەدى، قان تامىردى جالعاستىردى
بۇگىنگى تاڭداعى جۇڭگو جۇمىسشى - شارۋا قىزىل ارمياسى باتىس باعىت ارمياسىنىڭ شينجياڭعا جورىق جاساۋ ەسكەرتكىش سارايى جالاڭ تاريحي ماتەريالدار كورمە سارايى عانا ەمەس. بۇل ارا مەملەكەتتىك وتانشىلدىق تاربيەدەن ۇلگى كورسەتۋ بازاسى، سانسىز پارتيا مۇشەلەرىنىڭ، كادرلاردىڭ، جاستار مەن ورەندەردىڭ اۋەلگى ماقسات جونىندە ىزدەنىس جاسايتىن قىزىل ساباقحاناسى.
”قۇمدى بوران كۇشتى، جول جاعدايىنا كوڭىل بولىڭىزدەر“. قۇمىل قالالىق قوعام حاۋىپسىزدىگى مەكەمەسى شيڭشيڭشيا قوعام حاۋىپسىزدىگى تەكسەرۋ پۋنكتىنىڭ تەكسەرۋ ارناسىندا حالىق ساقشىلارى تەكسەرۋ ءتارتىبىن اتقارعاننان كەيىن، وتكىزۋگە رۇقسات ەتۋدەن بۇرىن ۇنەمى وسىلاي دەپ مۇقيات قاداعالاپ تاپسىرادى. بۇل ارانىڭ جازى شىلىڭگىر ىستىق، قىسى قاقاعان اياز، ءبىر جىلدىڭ ءتورت ماۋسىمىندا قۇمدى بوران ازىناپ تۇرادى، مۇنداي ناشار ورتا شيڭشيڭشياداعى ”وتكەلدى قورعاۋشىلاردى“ مۇقالتا المايدى.
ءار جىلى چيڭميڭ كەزىندە شيڭشيڭشيا قوعام حاۋىپسىزدىگى تەكسەرۋ پۋنكتىنىڭ پارتيا ياچەيكاسى حالىق ساقشىلارىن، كومەكشى ساقشىلاردى ەسكەرتكىش سارايىنداعى باتىس باعىت ارمياسى ەسكەرتكىشى الدىنا بارىپ، توڭكەرىستىك ارداگەر قۇربانداردى ساعىنا ەسكە الىپ، پارتياعا كىرۋ سەرتىن قايتا ەسكە تۇسىرۋگە ۇيىمداستىرادى، تۇتاس پۋنكتتەگى حالىق ساقشىلارىن، كومەكشى ساقشىلاردى توڭكەرىستىك ارداگەر قۇربانداردى ۇلگى ەتىپ، باتىس باعىت ارمياسىنىڭ رۋحىن جالعاستىرىپ، شينجياڭنىڭ ”شىعىس قاقپاسىن“ قورعاۋ قىزمەت جاۋاپكەرشىلىگىن، بورىشىن اناعۇرلىم ويداعىداي ارقالاۋعا ۇندەيدى.
جىل سايىن ەسكەرتكىش الدىندا ادامدار توقتاۋسىز اعىلادى، كەيبىرەۋلەر ايالداپ تەرەڭ ويعا باتادى، كەيبىرەۋلەر كوز جاسىن كولدەتىپ قۇرمەت بىلدىرەدى، شۇعىلالى وتكەن ىستەردەن ادالدىقتىڭ نە ەكەندىگىن، تاباندىلىقتىڭ نە ەكەندىگىن، سەنىمنىڭ نە ەكەندىگىن تۇسىنەدى. سول جىلدارى قۇمىلدىڭ بايتاق دالاسىنا شاشىلعان قىزىل ۇشقىن الدەقاشان تەرەڭ تامىر تارتىپ، ۇرپاقتار بويى جالعاسىپ كەلەدى.
”وتكەندە سوعىس ءورتى ىشىندە العا ىلگەرىلەگەن قىزىل ارمياداعى وسپىرىمدەر سەنىمى بەرىك ’توڭكەرىسشىل ۇرپاق‘ ەدى؛ بۇگىن قاھارمان قۇربانداردىڭ ىزگى ىستەرى جونىندە ۇگىت لەكسيا جاساپ، قىزىل گەندى جالعاستىرعان بىزدەر قان تامىردى جالعاستىرىپ، ۇزدىكسىز كۇرەس جۇرگىزەتىن جاڭا داۋىردەگى ’توڭكەرىسشىل ۇرپاق‘“، - دەدى ەسكەرتكىش سارايىنىڭ قىزىل گالستۋكتى ءتۇسىندىرۋشىسى، قۇمىل قالالىق 12 - باستاۋىش مەكتەپتىڭ وقۋشىسى گاۋ زىحان.
”ەسكەرتكىش سارايى قىزىل گالستۋكتى تۇسىندىرۋشىلەر قوسىنىن دەن قويا جەتىلدىردى، بالالار بالعىن دا باتىل ۇنمەن توڭكەرىستىك اڭگىمەلەردى بايانداپ، قىزىل گەندى جاس ۇرپاقتاردىڭ جۇرەگىنە تەرەڭ ۇيالاتتى، سونداي - اق قىزىل مادەنيەتتىڭ تارالۋ جولىن بارعان سايىن كەڭەيتتى“، - دەدى ەسكەرتكىش سارايىنىڭ ورىنباسار باستىعى نيۋ مۋ.
باتىس باعىت ارمياسىنىڭ قولباسىلارى مەن جاۋىنگەرلەرى قان كەشىپ قورشاۋدى بۇزىپ شىعىپ، شيڭشيڭشيادا كەزدەسكەن ايبىنى مەن تاباندىلىعى؛ اراتۇرىكتى قورعاۋ شايقاسىندا ارميا مەن حالىق ءبىر نيەتتە بولىپ، 40 كۇن ولىسپەي - بەرىسپەي كۇرەس جاساعاندىعى سىندى ادالدىعى؛ اسكەري تىڭ يگەرۋشى جاۋىنگەرلەردىڭ تىڭ يگەرىپ شەكارانى قورعاۋ سىندى ءۇن - ءتۇنسىز ۇلەس قوسۋى... تاۋ - وزەندەر قاھارمانداردىڭ جىگەرىن ۇمىتپايدى، ءبىز وسى ۇرپاق ادال نيەتتى ماڭگى ساقتايمىز، ءار ۇرپاق ارداگەر قۇربانداردى ۇلگى ەتىپ، تاباندىلىق پەن جاۋاپكەرشىلىكتى قىزمەت ورنىندا ايگىلەدى، ارەكەتىندە تياناقتاندىردى.
جەل وتىندە، قۇبا تۇزدە حالىق ساقشىلارى، كومەكشى ساقشىلار كۇندى - تۇنگە جالعاپ ”شىعىس قاقپانى“ قورعادى؛ اۋىل - قىستاقتىڭ ءبىرىنشى شەبىندە نەگىزگى ساتى كادرلارى اۋىل - قىستاقتى گۇلدەندىرۋگە تاباندىلىقپەن دەم بەردى؛ نىسان جۇمىس باسىندا ينجەنەريا قۇرىلىسشىلارى قيىندىقتاردان قامال الىپ، باتىلدىقپەن اتويلاپ، باتىلدىقپەن ىستەپ، شەكارانى گۇلدەندىرۋ كۇشتى ءۇنىن اسقاقتاتتى؛ ءار ۇلت بۇقاراسى تاتۋ - ءتاتتى ءوتىپ، ءوزارا قارايلاسىپ، سول جىلدارداعى ارميا مەن حالىق ءبىر نيەتتە بولاتىن، ىنتىماقتاسا ەكپىندەي ىلگەرىلەيتىن تاڭداۋلى ءداستۇردى جالعاستىرۋدا... ۇرپاقتان - ۇرپاققا جالعاسقان قىزىل رۋح وسى ىرىستى توپىراقتى نارلەندىرىپ، ۇزىلمەي جالعاسۋدا، اقاۋسىز ءوسىپ - جەتىلۋدە.
تامىرعا مۇراگەرلىك ەتىپ، تولقىن جارىپ، تىڭ تاراۋ باستادى
قۇمىل − جىبەك جولى ەكونوميكالىق بەلدەۋى وزەكتى رايونىنىڭ ماڭىزدى قاتىناس تورابىنا جانە قۇرلىقتىق پورت تيبىندەگى مەملەكەتتىك زات اينالىمى تورابىنا تىرەك بولعان قالا، وزگەشە وڭىرلىك ورىن ارتىقشىلىعىنا مول ەنەرگيا بايلىعى، مىعىم كاسىپ سالاسى نەگىزى قاباتتاسىپ، ونىڭ شينجياڭنىڭ مەملەكەتتىڭ باتىسقا ەسىك اشۋ كەلەلى جاعدايىنا قىزمەت وتەۋ بارىسىندا اۋىر مىندەت ارقالاۋىنا، الدا جۇرۋىنە بەرىك نەگىز قالادى.
جىبەك جولى ەكونوميكالىق بەلدەۋى وزەكتى رايونى قۇرىلىسىمەن، جۇڭگو − موڭعۇليا − رەسەي ەكونوميكالىق ءدالىزى قۇرىلىسىمەن جانە بۇكىل شينجياڭنىڭ ”شەكارا وتكەلى ەكونوميكالىق بەلدەۋىنىڭ“ تۇتاس تۇلعالىق ورنالاستىرۋىمەن ىرىقتىلىقپەن توعىسىپ، شينجياڭنىڭ ازيا − ەۆروپا التىن ارناسىن جانە باتىسقا ەسىك اشۋدىڭ الدىڭعى شەبىن قۇرۋىنا دەم بەردى؛ ”ءبىر بەلدەۋ، ءبىر جولدى“ بىرگە قۇراتىن ەلدەرمەن ەكونوميكا، مادەنيەت - ساياحات سياقتى سالالاردا، اسىرەسە، ەنەرگيا، جابدىق جاساۋ، كەن اشۋ سياقتى كاسىپ سالالارىندا تەرەڭ سەلبەستىكتى كۇشەيتتى؛ قۇرلىقتىق پورت تيبىندەگى مەملەكەتتىك زات اينالىمى تورابى فۋنكتسياسىن ۇزدىكسىز كۇشەيتىپ، تاس جول، تەمىر جول بىرلەسپە تاسىمالى، شوعىرلى جيناۋ، شوعىرلى تاسىمال ءبىر تۇلعالانعان زات اينالىمى جۇيەسىن كەمەلدەندىرىپ، جۇڭگو − ەۆروپا (ورتا ازيا) كەزەكشى پويەزى شوعىرلانۋ ورتالىعى قۇرىلىسىن تەرەڭدەتىپ، ەل ىشىندەگى زاتتاردى باتىسقا شىعارۋ، ورتا ازيا بايلىعىن شىعىسقا جەتكىزۋ سىندى قوس باعىتتى اينالىم ارناسىن اشتى... شىعىس تيانشان تاۋىنىڭ ەتەگىندەگى قۇمىل ارىنداي ءتۇستى.
بۇرىن سارى قۇمى اسپان اياسىن تورلاپ، قىلتان ءشوپ ارەڭ كوزگە شالىناتىن قۇبا ءتۇز، قۋاڭ دالادا قازىر جەل گەنەراتورلارى بوي كوتەرىپ، فوتوۆولت تاقتالارى تەڭىزى قالىپتاستى.
مەملەكەتتىك ”قۇمدى ءشول، قۇبا ءتۇز، قۋاڭ دالا“ ءىرى ەنەرگيا بازاسىنىڭ وزەكتى كوتەرىمدىلىك اۋماعى جانە ”شينجياڭ ەلەكترىن سىرتقا شىعارۋ“ ستراتەگيالىق تورابى رەتىندە، قۇمىل قالاسى وزگەشە جەل، جارىق بايلىعىنا سۇيەنىپ، جاسىل ەلەكتردە ”جالپى گەنەراتورىن تىڭ ساتىعا كوتەرۋ، جاڭا ەنەرگيا ارقىلى تىڭ قامال الۋعا جەتەكشىلىك ەتۋ“ سىندى قوس سەكىرىستى جۇزەگە اسىردى.
5 - ايدىڭ باس شەنىنە دەيىن قۇمىل قالاسىنىڭ جەلىگە قوسىلعان ەلەكتر گەنەراتورى 50 ميلليون كيلوۆاتتان استى. مۇنىڭ ىشىندە جاڭا ەنەرگيا گەنەراتورى 38 ميلليون كيلوۆاتقا جەتىپ، يەلەگەن سالىستىرماسى ％33. 74 بولدى. سارقىلماس تازا ەلەكتر قۋاتى وسى ارادان شىعارىلىپ، الىس قالالارداعى سان مىڭ وتباسىنىڭ شىراقتارىن جارقىراتتى ءارى جەرگىلىكتى كاسىپ سالالارىنىڭ جاسىل تيپ جاڭالاۋىنا دا دەم بەردى.
قالا دامۋىنىڭ ساپاسى جوعارىلاپ، قارقىنى تەزدەپ، حالىق تۇرمىسى قۇت - ىرىسى ۇزدىكسىز ارتتى.
”قازىر ماسەلە بولسا توركوزدەندىرۋ قىزمەتكەرىنە تەلەفون بەرسەك، تەز ارادا جاۋاپ قايتارادى، تۇرمىسىمىز بارعان سايىن جايلى بولا ءتۇستى“. قۇمىل قالاسى يجوۋ رايونى دۇڭحى ءمالىسى اقيەر الەۋمەتتىك اۋماعىنىڭ قيمىل ۇيىندە تۇرعىن زاڭ ميڭي الەۋمەتتىك اۋماقتى باسقارۋدان تۋىنداعان وزگەرىستەردى كۇلىمسىرەي اڭگىمەلەدى. سوڭعى جىلدارى قۇمىل قالاسى پارتيا قۇرىلىسى ارقىلى جەتەكشىلىك ەتۋگە تاباندى بولىپ، ”تولىق جاۋاپ قايتارۋ“ الەۋمەتتىك اۋماقتى باسقارۋ جۇيەسىن جاسامپازدىقپەن ورناتىپ، بۇقارانىڭ تالاپ - تىلەكتەرىندە ”بارلىق ءىستى باسقاراتىن ادام بولۋدى، بارلىق ىسكە جاۋاپ قايتارۋدى“ جۇزەگە اسىردى.
قالالارداعى ءاربىر وزگەرىس، ءاربىر حالىق تۇرمىسى جەتىستىگى تۇگەلدەي توڭكەرىستىك ارداگەر قۇربانداردىڭ ادالدىعى، اۋەلگى ماقساتى جونىندەگى ەڭ جاقسى جۇباتۋ، سونداي - اق قىزىل رۋحتىڭ ۇرپاقتان - ۇرپاققا جالعاسۋىنىڭ ەڭ تاماشا ايعاعى. تاريحقا قايىرىلا قاراۋ العا باسۋ جولىنا اناعۇرلىم ويداعىداي اتتانۋ ءۇشىن بولىپ تابىلادى. قىزىل ءتۇستى جەلكەن، كۇرەستى ەسكەك ەتكەن قۇمىل جاڭا جورىق تولقىنىندا ەرلىكپەن العا تارتۋدا!
