زەڭگىر كوكتە داڭعىل جول اشىلدى، جىبەك جولىنا جاڭا ارنا قوسىلدى
− شينجياڭ باتىسقا ەسىك اشۋدىڭ ازيا - ەۆروپا اۋە تورابىن قالىپتاستىردى
□ انار بۇلت \ شينجياڭ گازەتىنىڭ ءتىلشىسى ما ينيڭ
6 - ايدىڭ 12 - كۇنى بايىنعولين بۇگۇر اۋەجايىندا تۇڭعىش ۇشاق قاتىنادى، شينجياڭداعى 29 - حالىقتىق تاسىمال اۋەجايى رەسمي ىسكە قوسىلىپ، شينجياڭنىڭ ”ءبىر وزەك، كوپ تارماقتى، نەگىزگى، تارماق جەلىلەرى تۇتاسقان“ اۆياتسيا تورابى جۇيەسىنە شەشۋشى بۋىن قوستى؛ بيىل الدىڭعى جارتى جىلدا ءۇرىمجى تيانشان حالىقارالىق اۋەجايىنىڭ جولاۋشى قابىلداۋ - جونەلتۋ مولشەرى جيىنى 13 ميلليون 820 مىڭ 500 ادامعا (رەت)، جۇك - پوچتا جولداماسىن قابىلداۋ - جونەلتۋ مولشەرى 157 مىڭ 700 تونناعا جەتىپ، سايكەس مەزگىلدەگىدەن جەكە - جەكە ％42. 4، ％28. 11 ارتتى... وسىلاردىڭ بارلىعى شينجياڭنىڭ اۆياتسيا ىستەرىنىڭ قارىشتاپ دامۋ جاعدايىن − توراپتىق قابىلەت دارەجەسىنىڭ ۇزدىكسىز جوعارىلاعاندىعىن، ”اۋەدەگى جىبەك جولىنىڭ“ اناعۇرلىم كەڭەيگەندىگىن دالەلدەدى.
جىبەك جولى ەكونوميكالىق بەلدەۋىنىڭ وزەكتى رايونى رەتىندە، شينجياڭ نەگىزگى جەلى تورابىنىڭ ساپاسىن جوعارىلاتۋ، تارماق جەلى اۋەجايلارىنىڭ تورىن توقۋ، حالىقارالىق ارنالاردى كەڭەيتۋ ارقىلى ”نەگىزگى جەلى مەن تارماق جەلى بىرلەسىپ قيمىلدايتىن، ءىش پەن سىرت تۇتاسقان، كاسىپ سالاسى مەن اۆياتسيا توعىسقان، اقىل - پاراسات ارقىلى قۋات ۇستەيتىن“ اۋەدەگى التىن ارنانى قالىپتاستىردى.
اۆياتسيا ارناسى جاپپاي كەڭەيدى
بۇگۇر اۋەجايى 4C دارەجەلى تارماق جەلى اۋەجايى، جوبالاۋ كورسەتكىشى بويىنشا، مەجەمەن 2030 - جىلعا بارعاندا، جولاۋشى قابىلداۋ - جونەلتۋ مولشەرى 300 مىڭ ادامعا (رەت)، جۇك - پوچتا جولدامالارىن قابىلداۋ - جونەلتۋ مولشەرى 600 تونناعا جەتەتىن بولىپ، تيانشاننىڭ وڭتۇستىك بوكتەرىندەگى بۇگۇر اۋدان وڭىرىندە حالىقتىق اۋەجاي بولماۋ بوستىعىن تولتىردى.
ۇشاق قاتىناعاننان كەيىن، بۇگۇر اۋدانىنىڭ ادام اعىمى، زات اينالىمى، قارجى اينالىمى، ينفورماتسيا اينالىمى جەدەل شوعىرلانىپ، بۇگۇر اق ورىگى، ساپالى سيىر، قوي ەتى سياقتى جەرگىلىكتى ەرەكشەلىككە يە اۋىل شارۋاشىلىق ونىمدەرى اۆياتسيالىق سۋىق تىزبەگىنە سۇيەنىپ جەدەل سىرتقا تاسىمالدانىپ، تاسىمالدىڭ زيانى زور دارەجەدە تومەندەيدى؛ ءار ۇلت حالقىنىڭ ءجۇرىس - تۇرىسىنا اناعۇرلىم قولايلى بولىپ، توراڭعى ورمانى سياقتى مادەنيەت - ساياحات بايلىقتارى شينجياڭنىڭ ءىشى - سىرتىنان ءتىپتى دە كوپ ساياحاتشىنى باۋرايدى.
بۇگۇر اۋەجايى شينجياڭداعى تارماق جەلى اۋەجاي قاتارىنىڭ ۇزدىكسىز كوبەيگەندىگىنىڭ ىقشام كورىنىسى. قازىر شينجياڭنىڭ حالىقتىق تاسىمال اۋەجايلارىنىڭ سانى بۇكىل ەل بويىنشا الدىڭعى ورىندى يەلەپ، سولتۇستىك شينجياڭدى اينالعان، وڭتۇستىك شينجياڭدى اينالعان، وڭتۇستىك − سولتۇستىك شينجياڭدى تۇتاستىراتىن ”اۋە الەۋمەتتىك قاتىناس“ تورى قالىپتاسىپ، ايماق، وبلىس، قالالاردى جاپپاي قامتۋ، ءتۇيىندى اۋدانداردى تۇتاستىرۋ جۇزەگە اسىرىلدى. ءارقايسى اۋەجايلار تاعى ورتا جولدا تۇنەۋ، جىلدام ۇشاق اۋىستىرۋ سياقتى حالىققا ءتيىمدى قىزمەت وتەۋدى تەڭ قادامدا اتقارىپ، جولاۋشىلاردىڭ ءجۇرىس - تۇرىسىنا جۇمسالاتىن ۋاقىتتى ازايتىپ، ”اۆياتسيا + مادەنيەت - ساياحات“ سىندى تەز ساياحات، باياۋ ساياحات جاڭا ۇلگىسىن جارىققا شىعاردى.
”بۇرىن شينجياڭعا ساياحاتتاي كەلگەندە ۇشاق اۋىستىرۋدان قاتتى الاڭدايتىنمىن، قازىر ۇشاقتان تۇسكەننەن كەيىن شينجياڭ ىشىندە ۇشاتىن كەزەكشى ۇشاققا اۋىسىپ، ءبىر اپتادا وڭتۇستىك − سولتۇستىك شينجياڭداعى وزەكتى كورىنىس وڭىرلەرىن ارالاپ شىعۋىما بولادى“. شاڭحايلىق ساياحاتشى لي يجياڭنىڭ اسەرى شينجياڭعا اۆياتسيالىق ساپارىنداعى كورنەكتى وزگەرىستىڭ تىكە بەينەسى.
شينجياڭ ”شىعىسپەن بىرلەسكەن“ ەل ىشىندەگى تىرەكتى اۆياتسيا ارناسىن ۇزدىكسىز بەكەمدەدى، ءۇرىمجىنى بەيجيڭ، تيانجين، حىبەي، چاڭجياڭ اتىراۋى، گۋاڭدۇڭ − شياڭگاڭ − اۋمىن ۇلكەن شىعاناق رايونى، چىڭدۋ، چۇڭچيڭ سياقتى قالالار شوعىرىنىڭ وزەكتى تورابىمەن ىركىلىسسىز تۇتاستىرىپ، ەكونوميكالىق اينالىسقا تۇساۋ بولاتىن شەشۋشى بوگەتتەردى اشىپ، تاۋار فاكتورلارى بايلىعىنىڭ اناعۇرلىم كەڭ كولەمدە ىركىلىسسىز اعىلۋىن جەبەدى. الدىڭعى 5 ايدا ءۇرىمجى تيانشان حالىقارالىق اۋەجايى ەل ىشىندە جالپى 201 جولاۋشى تاسىمال اۋە جەلىسىن ىسكە قوستى، مۇنىڭ ىشىندە شينجياڭنىڭ سىرتىنا توتە ۇشاتىن اۋە جەلىسى 144 بولىپ، شينجياڭنىڭ ىشىندەگى 23 قالا مەن شينجياڭنىڭ سىرتىنداعى 78 قالاعا قاتىنادى. بۇكىل شينجياڭداعى ورتا، شاعىن اۋەجايلار شينجياڭ ىشىندە ءوزارا ۇشاتىن جالپى 128 اۋە جەلىسىن ىسكە قوستى، حىجيڭ بايىنبۇلاق اۋەجايىنان سىرت، قالعان ورتا، شاعىن اۋەجايلار اراسىندا ءوزارا ۇشاتىن اۋە جەلىسى اشىلدى، تارماق جەلى اۋەجايلارىنىڭ شينجياڭ سىرتىنداعى اۋە جولى تورابى ۇزدىكسىز كەمەلدەندى.
جيىلەندىرىلگەن اۋىسىپ ۇشۋ جەلىسى شينجياڭ مادەنيەت - ساياحاتىنىڭ كومەسكى كۇشىن ۇزدىكسىز اشىپ، شينجياڭعا كىرىپ - شىعۋدىڭ ”كوپ كىرەتىن، كوپ شىعاتىن“ اۆياتسيا ارناسى جاپپاي كەڭەيىپ، جەر - جەردەگى ساياحاتشىلار تيانشان الابىن ەمىن - ەركىن ارالاپ، شينجياڭنىڭ الۋان ءتۇرلى جاراتىلىستىق كورىنىستەرى مەن حالىقتىق سالت - ساناسىنان مەيلىنشە ءلاززاتتاندى.
ەۆروپا − ازيا ورتا جەلىسى جەدەل قالىپتاستى
3 - كەزەكتى ءۇرىمجى حالىقارالىق اۆياتسيا تورابى قۇرىلىسى جينالىسىندا ”جۇڭگو شينجياڭ − قازاقستان تەز اۋە جەلىسى“ شەكارا اتتاعان اۆياتسيا سەلبەستىك نىسانى باستالدى، مۇنداعى ماقسات جۇڭگو − قازاقستان اراسىنداعى جولاۋشى تاسىمالى، جۇك تاسىمالى كەزەكشى ۇشاعىن كوبەيتىپ، ەكى ەلدىڭ ورتا جولدا ۇشاق اۋىستىرۋ بارىسىن ساپالىلاندىرىپ، ورتا ازياداعى وزەكتى اۋە جەلىلەرىنىڭ ىركىلىسسىزدىگىن جوعارىلاتۋ.
”وزگەشە جاعراپيالىق ورىنمەن بىرگە شينجياڭ ەركىن ساۋدا سىناق رايونى ساياساتىنىڭ پايداسى قوسىلىپ، ءۇرىمجىنى وزەكتى ءتۇيىن ەتكەن ازيا − ەۆروپا ورتا جەلىسى جەدەل قالىپتاسۋدا، الەمدىك اۆياتسيا مەكەمەسى ازيا − ەۆروپا قۇرلىعىنىڭ ورتا جەلىسى ارناسىنا تاسىمال قۋاتىن ىرىقتىلىقپەن وتكەردى“. جۇڭگو اۆياتسيا تاسىمال قوعامىنىڭ باسالقاسى ۋاڭ چاڭشۇن مىنالاردى ءبىلدىردى: حالىقارالىق اۋە جەلىسىن قايتا قۇرۋ ورايىن مىقتى يگەرىپ، ازيا − ەۆروپا اۋە ءدالىزىن كەڭەيتىپ، اۆياتسيا ۇقىعىن اشىق ۇستاۋ ساياساتىنا بەلسەنە قول جەتكىزىپ، ورتا ازيا، باتىس ازيا، كاۆكاز جانە ەۆروپا باعىتىنداعى حالىقارالىق اۋە جەلىسىن ءتۇيىندى تۇردە كەڭەيتەمىز.
قازىر شينجياڭنىڭ ”باتىسقا شىعارۋ“ حالىقارالىق اۆياتسيا ارناسى ىركىلىسسىز، ءتارتىپتى بولىپ، حالىقتىق اۆياتسيا حالىقارالىق اۋە جەلىسىن اشۋ تەبىنىن ارتتىردى. بەيجيڭ − ءۇرىمجى − باكۋ، قاشقار − وش سياقتى اۋە جەلىلەرى جاڭادان اشىلدى؛ ۇرىمجىدەن تبيليس، باكۋ، ستامبول، ەريۆەن، بانگكوكقا باراتىن اۋە جەلىسى كەزەكشى ۇشاعى ۇزدىكسىز كوبەيتىلدى. اۋە جەلىسى تورى ورتا ازياداعى 5 ەلدى، سونداي - اق پاكيستان، گرۋزيا، يران قاتارلى 18 مەملەكەتتىڭ 22 قالاسىن قامتىدى.
6 - ايدىڭ 1 - كۇنى گۋاڭجوۋ − ءۇرىمجى − فرانكفۋرد حالىقارالىق اۋە جەلىسى رەسمي اشىلىپ، ەلىمىزدىڭ باتىس سولتۇستىك وڭىرىندەگى گەرمانياعا توتە باراتىن تۇڭعىش قۇرلىق ارالىق جولاۋشى تاسىمال اۋە جەلىسىنە اينالدى. بۇل اۋە جەلىسى گۋاڭدۇڭ − شياڭگاڭ − اۋمىن ۇلكەن شىعاناق رايونىن، جىبەك جولى ەكونوميكالىق بەلدەۋىنىڭ وزەكتى رايونىن جانە ەۆروپانىڭ ىشكى ءوڭىرىن تۇتاستىرىپ، جوعارى ءونىمدى، ىركىلىسسىز ازيا − ەۆروپا كەڭىستىگىندەگى ۇلاسۋ - تۇتاسۋ ارناسىن قۇردى.
جولاۋشى تاسىمال تورابىنىڭ سيىمدىلىعىن ارتتىرىپ ساپاسىن جوعارىلاتۋمەن بىرگە، اۋەدەگى ساۋدا ءدالىزى جەدەل كەڭەيىپ، اۆياتسيا زات اينالىمى ”ارنالىق قىزمەت وتەۋدەن“ ”توراپ ەكونوميكاسىنا“ قاراي بۇرىلىس جاسادى.
الدىڭعى 5 ايدا بۇكىل شينجياڭ بويىنشا جيىنى 30 نەشە حالىقارالىق جۇك تاسىمال اۆياتسيا جەلىسى ىسكە قوسىلدى، اۋە جەلىسى تۇركيا، يران، اراب بىرىككەن امىرلىگى سياقتى 20 نەشە مەملەكەتتى قامتىدى. 6 - ايدا ءۇرىمجى − شىعىس ميدلان تۇتاس جۇك ۇشاعى اۆياتسيا جەلىسى رەسمي اشىلىپ، شينجياڭعا ەۆروپا بازارىن تۇتاستىراتىن تاعى ءبىر جوعارى ءونىمدى اۆياتسيا جۇك تاسىمال ارناسى قوسىلدى.
ءۇرىمجى تيانشان حالىقارالىق اۋەجايىنىڭ جۇڭگونىڭ ورتا ازياعا، باتىس ازياعا، ەۆروپاعا باعىتتالعان وڭىرلىك ورىن قاقپاسى امبەباپ اۆياتسيا تورابى يقۋاتى ۇزدىكسىز كۇشەيىپ، ”ورتا ازياعا توتە باراتىن، ەۆروپا مەن ازيانى تۇتاستىراتىن، جۇڭگو مەن افريكا بىرلەسىپ قيمىلدايتىن“ ستەرەولدى اۆياتسيا جۇك تاسىمال تورىن العاشقى ادىمدا قالىپتاستىردى.
”شينجياڭ حالىقتىق اۆياتسياسى تۇتاس جۇك ۇشاعى اۋە جەلىسى تورىن قالىپتاستىرۋدى بەلسەنە ىلگەرىلەتىپ، اۆياتسيالىق زات اينالىمى مەن شەكارا اتتاعان ەلەكتروندى ساۋدانىڭ توعىسپالى دامۋىن ۇزدىكسىز جەبەپ، جۇك تاسىمال نەگىزدىك قۇرىلعىلارىنىڭ دارەجەسىن جوعارىلاتىپ، شەكارا وتكەلدەرىنىڭ قولايلىلانۋ دەڭگەيىن ءوسىرىپ، زەردەلى زات اينالىمى تۇعىرى قۇرىلىسىن جەدەلدەتىپ، باجىسىز ۇشاق مايى سياقتى ءتيىمدى ساياساتتاردان ويداعىداي پايدالانىپ، كوپ ءتۇرلى شارانى قاتار قولدانىپ، اۆياتسيا زات اينالىمىنىڭ وزىندىك قۇنىن تومەندەتىپ ونىمدىلىگىن ارتتىرۋدى ىلگەرىلەتىپ، ورتا ازياعا، ەۆروپاعا باعىتتالعان اۆياتسيا زات اينالىمى جيناۋ - جونەلتۋ ورتالىعىن تۇلعالاپ، ازيا − ەۆروپا التىن ارناسى مەن باتىسقا ەسىك اشۋدىڭ العى شەبى قۇرىلىسىنا جوعارى ساپامەن دەم بەرىپ، شينجياڭنىڭ سىرتقى ساۋداسىنىڭ دامۋىن تاعى دا تىڭ ساتىعا كوتەرۋگە قىزمەت وتەيمىز“، - دەدى جۇڭگو حالىقتىق اۆياتسياسى شينجياڭ باسقارۋ مەكەمەسىنىڭ 2 - دارەجەلى شارلاۋشىسى، تاسىمال ىستەرىن باسقارۋ باسقارماسىنىڭ باستىعى لي جۇنيان.
جاڭا ارتىقشىلىق جاڭا ومىرشەڭ كۇش قاۋلاتتى
تارام - تارام اۋە جەلىلەرى تيانشان تاۋىنىڭ زەڭگىر كوگىندە قاباتتاسىپ، ەلىمىزدە وندىرىلگەن كۇمىس ۇشاقتار ارلى - بەرلى سامعاپ، شينجياڭ ىشىندە قاتىناۋدىڭ ايبىندى كورىنىسىن قالىپتاستىردى.
C909 تارماق جەلى جولاۋشىلار ۇشاعى شينجياڭعا كىرگەن 3 جىلدان استام ۋاقىتتان بەرى، 35 ۇشاق شينجياڭ ىشىندەگى بارلىق حالىقتىق اۋەجايلاردى تۇتاستىرىپ، ”شينجياڭ ىشىندە اينالىپ ۇشۋدى، ءبىر كۇندە جەتۋدى“ جۇزەگە اسىردى. قازىر C909 ۇشاعى كۇنىنە ورتا ەسەپپەن 150گە جۋىق كەزەكتى ۇشاقتىڭ ۇشۋ مىندەتىن ورىندايدى، قىستا دا قاتىناي بەرەدى، شينجياڭداعى جولاۋشى تاسۋ مولشەرى جالپى 3 ميلليون 600 مىڭ ادامنان (رەت) استى.
شينجياڭ ەلىمىزدە وندىرىلگەن تارماق جەلى جولاۋشىلار ۇشاعىن كولەمدەندىرىپ ىسكە قوسۋدىڭ ماڭىزدى شەبىنە اينالدى.
چىڭدۋ اۆياتسيا شەكتى سەرىكتەستىگى پارتكومىنىڭ مۇشەسى، باس بۇعالتىر حۋاڭ لييىڭ بىلاي دەدى: ”كاسىپورىن شينجياڭنان ورتا، باتىس ازيا وڭىرىنە باراتىن حالىقارالىق قىسقا ارالىقتى اۋە جەلىسىن تىڭنان كوبەيتىپ، شينجياڭ ىشىندەگى ءارقايسى ساياحات قالالارىن قامتىعان ايقاسپالى اينالما جەلى ساياحات اۆياتسيا تورىن ءتۇيىندى تۇردە قۇرىپ، C909دىڭ ۇرىمجىدە ىسكە قوسىلۋ سەرپىنىن ارتتىرىپ، ءۇرىمجىنىڭ ەرەكشەلىككە يە، پارىقتى حالىقارالىق اۆياتسيا تورابىن قالىپتاستىرۋىنا دەم بەرۋدى جوسپارلادى“.
تۇتاس ءوڭىر بويىنشا ءجيى توقىلعان اۋە جەلىسى تورى اۆياتسيا تورابىنىڭ دامۋ نەگىزىن ۇزدىكسىز بەكەمدەدى. تارماق جەلى اۆياتسياسىنىڭ كولەمدەنگەن اينالىمى نەگىزىندە، شينجياڭ ەركىن ساۋدا سىناق رايونىنىڭ ۇزدىكسىز جارىققا شىققان ساياساتتىق پايداسىنا سۇيەنىپ، اۋەجاي ماڭى ەكونوميكاسى مەن اۆياتسيانىڭ سايكەستى كاسىبى قارىشتاپ دامىپ، اۆياتسيالىق جوندەۋ، تومەن كەڭىستىك مادەنيەت - ساياحاتى، زەردەلى اۋە پورتى سياقتى كوپ نەگىزدى جارىس جولدارى ەكونوميكالىق ارتۋدىڭ جاڭا قوزعالىس قۋاتتارىن بىرگە جەتىلدىردى.
6 - ايدىڭ 17 - كۇنى گرۋزيا CAMEX اۆياتسيا سەرىكتەستىگىنىڭ بوين 800 − 737 تيپتى جۇك ۇشاعى وڭتۇستىك اۆياتسيا ينجەنەرياسى تەحنولوگيا بولىمشە سەرىكتەستىگىنىڭ شينجياڭ بازاسىندا باجى الىنبايتىن جوندەۋ جۇمىسىن ورىندادى. بۇل بىلتىر 1 - ايدا تۇڭعىش باجى الىنبايتىن جوندەۋ كاسىبى ىرگە تەپكەننەن بەرى، وڭتۇستىك اۆياتسيا سەرىكتەستىگىنىڭ شينجياڭدا ىرگە تەپكەن 6 - رەتكى شەكارا سىرتى ۇشاعىن باجى الىنبايتىن جوندەۋ كاسىبى.
قازىر وڭتۇستىك اۆياتسيا ينجەنەريا تەحنولوگياسى شينجياڭ بازاسى كوپ ءتۇرلى كاسىپ سالاسىندا شەشۋشى قامال الۋدى جۇزەگە اسىردى − ۇشاقتى باجىدان اۋاشا جوندەۋ كاسىبىن شينجياڭداعى تۇڭعىش تياناقتاندىرىپ، قاراستى اۋماقتا تۇڭعىش ۇشاقتى بولشەكتەۋ جۇمىسىن ورىنداپ، شينجياڭداعى تۇڭعىش حالىقتىق اۆياتسيا ۇشاقتارىن وزگەرتىپ قۇراستىرۋ، جوبالاۋ، مىندەتتەۋ ورىندارىنىڭ ۋاكىلى (DMDOR) قۇرىلىمىن قۇرىپ، اۆياتسيالىق جوندەۋ جالپىلىق قۋاتىنىڭ ۇزدىكسىز جوعارىلاۋىن جۇزەگە اسىردى.
اۋەجاي ماڭى ەكونوميكاسىنىڭ قوزعالىس قۋاتى تاسقىنداپ، تومەن كەڭىستىك ەكونوميكاسىنىڭ ورلەۋى كوتەرىلدى.
تىك ۇشاقتا وتىرىپ الىسقا كوز سالساڭىز، نارات جايلاۋى سۋرەتتەي كوز تارتادى، تيانشان بوعدا كولىنىڭ كورىنىسى كوز قۇمارىڭدى قاندىرادى... ”تومەن كەڭىستىك + ساياحات“ جاڭا ۇلگىسى ءداستۇرلى ساياحات شەكاراسىن بۇزىپ، شينجياڭنىڭ مادەنيەت - ساياحات كاسىبىنىڭ قارىشتاپ دامۋىنا دەم بەردى.
قازىر شينجياڭدا تىزىمگە الىنعان ۇشاق قاتىناتاتىن 24 كاسىپورىن بار، 145 ءتۇرلى ۇشاق تىزىمگە الىنىپ، قىسقا ارالىقتى تاسىمال، كەڭىستىكتە ساياحاتتاۋ بازارىنىڭ سۇرانىسى ۇزدىكسىز ارتتى. 2025 - جىلى بۇكىل شينجياڭ بويىنشا كەڭىستىكتە ساياحاتتاۋعا قاتىناسقان ساياحاتشى مولشەرمەن 37 مىڭعا (رەت) جەتىپ، دامۋ كومەسكى كۇشى ۇزدىكسىز جارىققا شىقتى.
”الدا زەردەلى اۋەجاي قۇرىلىسىن زور كۇشپەن ىلگەرىلەتىپ، 5G ارناۋلى تورىنا سۇيەنىپ، ادامسىز، سيفرلانعان اينالىم جۇيەسىن قالىپتاستىرىپ، الاڭ ىشىندە ادامسىز جابدىق، زەردەلى سۇرىپتاۋ جۇيەسىن جاپپاي ورنالاستىرامىز“. شينجياڭ اۋەجاي (توبى) شەكتى جاۋاپكەرشىلىك سەرىكتەستىگى پارتكومىنىڭ شۋجيى، باس جورا تاۋ رۇنۋىن مىنالاردى ءبىلدىردى: شەكارا اتتاعان زات اينالىمى، اۆياتسيا مەن ساياحاتتى توعىستىرۋ، تومەن كەڭىستىك ەكونوميكاسى سياقتى سالالاردى ارقاۋ ەتىپ، ءۇرىمجى تيانشان حالىقارالىق اۋەجايىن ازيا − ەۆروپا مەن افريكانى تۇتاستىراتىن، بۇكىل جەر شارىنا قىزمەت وتەيتىن حالىقارالىق اۆياتسيا جاڭا تورابىنا اينالدىرامىز.
قولايلى ساتتەن پايدالانىپ العا ىلگەرىلەدى، كەڭىستىككە قاراي ۇمتىلدى. شينجياڭ اۆياتسيا تورابىن قۋاتتى قوزعالتقىش ەتىپ، جىبەك جولى ەكونوميكالىق بەلدەۋى وزەكتى رايونىنىڭ سىرتقا ەسىك اشۋى مەن وڭىرلىك جوعارى ساپالى دامۋىنىڭ جاڭا كارتيناسىن سالۋدا.
