7 - ايدىڭ 10 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن چاۋشيان ەڭبەك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەت ىستەرى كوميتەتىنىڭ ورىنباسار باستىعى، بيلىك كەڭسەسىنىڭ زۇڭليى پياۋ تايچىڭمەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن
شينحۋا اگەنتتىگىنىڭ 7 - ايدىڭ 10 - كۇنى بەيجيڭنەن بەرگەن حابارى (ءتىلشى ساۋ جيايۋە). 7 - ايدىڭ 10 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن چاۋشيان ەڭبەك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەت ىستەرى كوميتەتىنىڭ ورىنباسار باستىعى، بيلىك كەڭسەسىنىڭ زۇڭليى پياۋ تايچىڭمەن كەزدەستى.
شي جينپيڭ بىلاي دەپ اتاپ كورسەتتى: وتكەن ايدا مەن چاۋشياندا مەملەكەتتىك ساپاردا بولدىم، باس شۋجي جين جىڭىنمەن جۇڭگو مەن چاۋشياننىڭ ءداستۇرلى دوستىعىن بەكەمدەۋ جانە دامىتۋ ءارى وعان ۇزدىكسىز جاڭا داۋىرلىك ءمان ۇستەۋ ءۇشىن ستراتەگيالىق جەتەكشىلىك ەتتىك. ۇرپاقتان - ۇرپاققا جالعاسقان دوستىق، تاعدىرلاستىق، ءوزارا قارايلاسۋ باستان - اياق جۇڭگو − چاۋشيان قاتىناسىنىڭ ايقىن ەرەكشەلىگى بولىپ كەلەدى. «جۇڭگو − چاۋشيان دوستىق سەلبەستىك، ءوزارا كومەكتەسۋ شارتى» ەكى ەل حالقىنىڭ ىستىق قانىمەن ۇيىسقان جاۋىنگەرلىك دوستىعىن بەكەمدەۋگە ماڭىزدى ساياسي، زاڭدىق نەگىز قالادى. باس شۋجي جين جىڭىن ەكەۋىمىز شارتقا قول قويىلعاندىعىنىڭ 65 جىلدىعىن بىرگە سالتاناتپەن ەسكە ءتۇسىرۋدى وراي ەتىپ، ەكى پارتيانىڭ، ەكى ەلدىڭ اعا بۋىن باسشىلارىنىڭ اۋەلگى ماقساتىن، باس ماقساتىن ۇمىتپاي، ەكى ەل حالقىن جۇڭگو مەن چاۋشياننىڭ ءداستۇرلى دوستىعىن جالعاستىرۋعا جانە اسقاقتاتۋعا جەتەكتەپ، ەكى ەل قاتىناسىنىڭ جاڭا تاريحي داۋىردە ۇزدىكسىز جالىندى تىرشىلىك تىنىسىن قاۋلاتۋىنا مۇمكىندىك جاساۋعا ءبىر اۋىزدان قوسىلدىق.
شي جينپيڭ بىلاي دەپ باسا دارىپتەدى: قازىر حالىقارالىق جاعدايدا وزگەرىس پەن بىلىقپالىق قاباتتاستى. جۇڭگو − چاۋشيان ەكى ەل ستراتەگيالىق تۇراقتىلىقتى ساقتاپ، ستراتەگيالىق ءوزارا سەنىمدىلىكتى كۇشەيتىپ، باس شۋجي جين جىڭىن ەكەۋىمىز كەلىسكەن ورتاق تانىمدى جەدەل تياناقتاندىرىپ، ەكى پارتيا، ەكى ەل قاتىناسىنىڭ داۋىرمەن بىرگە العا باسىپ، باستان - اياق وزدەرىنىڭ سوتسياليزم ىستەرىن بەكەمدەۋىنە ءتيىمدى، ءوز ەلدەرىنىڭ وسىزامانداندىرۋ قۇرىلىسىن جەبەۋىنە پايدالى بەتالىسقا قاراي دامۋىنا شىنايى كەپىلدىك ەتۋى كەرەك. ناقتى ىستەر سەلبەستىگىن ورنىقتى ىلگەرىلەتىپ، حالىق رايى نەگىزىن ۇزدىكسىز بەكەمدەپ، ورتاق قىزىل ەستەمە مەن قىزىل بايلىقتان ويداعىداي پايدالانىپ، ەكى ەل جاستارىنىڭ جۇڭگو حالىق ەرىكتىلەر ارمياسىنىڭ تاريحي ەڭبەگىن ەستە بەرىك ساقتاۋىنا، جۇڭگو − چاۋشيان ۇلى دوستىعىن ۇرپاقتار بويى جالعاستىرۋىنا مۇمكىندىك جاساۋى كەرەك. ستراتەگيالىق ىستەستىكتى كۇشەيتىپ، وزدەرىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعاپ، ەكى ەلدىڭ ءوز مەملەكەت جاعدايىنا ۇيلەسەتىن سوتسياليزم جولىمەن ويداعىداي جۇرۋىنە ءتيىمدى سىرتقى ورتا ازىرلەۋى كەرەك.
پياۋ تايچىڭ الدىمەن باس شۋجي جين جىڭىننىڭ باس شۋجي شي جينپيڭگە جولداعان ىقىلاستى سالەمىن جەتكىزىپ، «چاۋشيان − جۇڭگو دوستىق سەلبەستىك، ءوزارا كومەكتەسۋ شارتىنا» قول قويىلعاندىعىنىڭ 65 جىلدىعى بايلانىسىمەن باس شۋجي جين جىڭىن باس شۋجي شي جينپيڭنىڭ جۇڭگو پارتياسى مەن حالقىنا باسشىلىق ەتۋ وسكەلەڭ ىسىندە ۇزدىكسىز تىڭ تابىستارعا قول جەتكىزۋىن تىلەگەندىگىن ءبىلدىردى.
پياۋ تايچىڭ مىنالاردى ءبىلدىردى: جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قىزۋ قۇتتىقتايمىن، باس شۋجي شي جينپيڭنىڭ جۇڭگو حالقىنا باسشىلىق ەتىپ، ۇلى دامۋ تابىستارىنا قول جەتكىزگەندىگىن قۇتتىقتايمىن. باس شۋجي شي جينپيڭ بيىل تۇڭعىش ساپارىندا چاۋشياندى تاڭدادى، ەكى پارتيانىڭ، ەكى ەلدىڭ ەڭ جوعارى باسشىلارى تاريحي سيپاتتى ديدارلاسىپ، ەكى جاقتى قاتىناستىڭ جاڭا بەلەسىن ورناتىپ، چاۋشيان − جۇڭگو دوستىعىنىڭ حالىق رايى نەگىزىن ونان ارى بەكەمدەدى. «چاۋشيان − جۇڭگو دوستىق سەلبەستىك، ءوزارا كومەكتەسۋ شارتى» ەكى ەل قاتىناسىنىڭ دامۋىن ىلگەرىلەتۋگە ستراتەگيالىق تۇرعىدان، ۇزاق بولاشاقتىق تۇرعىدان پارمەندى زاڭدىق قامتاماسىزدىق ازىرلەدى. چاۋشيان − جۇڭگو ەكى ەل شارت رۋحى بويىنشا ءوزارا قارايلاسىپ، سوتسياليزم ىستەرىنىڭ دامۋىن بىرگە ىلگەرىلەتىپ، ءوڭىردىڭ جانە دۇنيە ءجۇزىنىڭ بەيبىتشىلىگىن قول ۇستاسا قورعادى. ەكى ەل شارتقا قول قويىلعاندىعىنىڭ 65 جىلدىعىن ەسكە ءتۇسىرۋ قيمىلىن سالتاناتپەن وتكىزىپ، چاۋشيان − جۇڭگو دوستىعىنىڭ حالىقارالىق اۋمالى - توكپەلى جاعدايدىڭ سىنىنان وتكەندىگىن، وسكەلەڭ ستراتەگيالىق سيپاتقا يە ەكەندىگىن تاعى ءبىر رەت ايگىلەدى. باس شۋجي جين جىڭىن چاۋشيان − جۇڭگو قاتىناسىن ەڭ پارمەندى ستراتەگيالىق قاتىناس ەتىپ دامىتۋدى تالاپ ەتتى. چاۋشيان جاق ەكى پارتيانىڭ، ەكى ەلدىڭ ەڭ جوعارى باسشىلارى كەلىسكەن ماڭىزدى ورتاق تانىمدى باتىل تياناقتاندىرىپ، جۇڭگو جاقتىڭ تايۋان سياقتى ماسەلەلەردە وزەكتى مۇددەسىن قورعاۋىن باتىل قولداپ، چاۋشيان مەن جۇڭگو ىنتىماعىنىڭ، دوستىعىنىڭ جانە سوتسياليزم ىستەرىنىڭ تىڭ دا اناعۇرلىم جوعارى ساتىعا كوتەرىلۋىن بار كۇشپەن ىلگەرىلەتەدى.
ۋاڭ ي كەزدەسۋگە قاتىناستى.
