گازەتىمىزدىڭ 8 ـ ايدىڭ 3 ـ كۇنى ۇرىمجىدەن بەرگەن حابارى. 8 ـ ايدىڭ 3 ـ كۇنى اۆتونوميالى رايوندىق پارتكومنىڭ شۋجيى چىن شياۋجياڭ، اۆتونوميالى رايوننىڭ ٴتوراعاسى ەركىن تۇنياز ۇرىمجىدە شينجياڭعا كەلىپ 2026 ـ جىلعى لاڭكەستىككە قارسى تۇرۋ حالىقارالىق زەرتتەۋ ـ تالقى ماجىلىسىنە قاتىناسقان جۇڭگولىق، شەتەلدىك سيلى قوناقتارمەن كەزدەستى.
چىن شياۋجياڭ جۇڭگو كوممۋنيستىك پارتياسى شينجياڭ ۇيعۇر اۆتونوميالى رايوندىق كوميتەتى، اۆتونوميالى رايوندىق حالىق ۇكىمەتى جانە شينجياڭ ٴوندىرىس ـ قۇرىلىس بيڭتۋانى اتىنان سيلى قوناقتاردى قارسى الاتىندىعىن ٴبىلدىردى. ول بىلاي دەدى: ٴتوراعا شي جينپيڭ مەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىنىڭ عىلمي جەتەكشىلىگىندە، شينجياڭ ەكونوميكالىق، قوعامدىق دامۋدا دۇنيە ٴجۇزىن جالت قاراتقان كەلەلى تابىستارعا قول جەتكىزىپ، دامۋى ەڭ جاقسى، وزگەرىس ەڭ زور، ٴار ۇلت بۇقاراسى ەڭ كوپ يگىلىككە كەنەلگەن تاريحي مەزگىلگە قادام تاستادى، بۇل جۇڭگو كوممۋنيستىك پارتياسىنىڭ باسقارۋىنىڭ، جۇڭگونىڭ باسقارۋىنىڭ كورنەكتى ارتىقشىلىعى مەن دامۋ ومىرشەڭ كۇشىن تولىق ايگىلەدى. جۇڭگونىڭ شينجياڭى − مەملەكەتتىڭ وڭىرلىك حاۋىپسىزدىگىن قورعاۋدىڭ ستراتەگيالىق قالتقىسى. ٴبىز قوعام ورنىقتىلىعىن قورعاۋدى ماڭداي الدى ورىنعا قويۋعا تاباندى بولىپ، لاڭكەستىككە قارسى تۇرىپ ورنىقتىلىقتى قورعاۋدى زاڭمەن باسقارۋدى، ۇدايىلاندىرۋدى ىشكەرىلەي ىلگەرىلەتىپ، زورلىقتى كۇش لاڭكەستىك قىلمىستارىنا زاڭ بويىنشا قاتاڭ سوققى بەرىپ، ٴىس جۇزىندىك جاعدايىمىزعا ۇيلەسەتىن لاڭكەستىككە قارسى تۇرۋدىڭ جانە ۇشقارىلىقتى الاستاۋدىڭ ٴونىمدى جولى جونىندە بەلسەنە ىزدەنىس جاساپ، حالىقارالىق قوعامنىڭ جاپپاي مويىنداۋىنا جانە قولداۋىنا يە بولدىق. لاڭكەستىك − بۇكىل ادامزاتتىڭ ورتاق جاۋى، لاڭكەستىككە قارسى تۇرۋ، ۇشقارىلىقتى الاستاۋ − حالىقارالىق قوعامنىڭ ورتاق جاۋاپكەرشىلىگى. ٴبىز ٴتوراعا شي جينپيڭ العا قويعان الەمدىك حاۋىپسىزدىك باستاماسىن مۇقيات دايەكتىلەندىرىپ، ٴار ەلدىڭ جەرگىلىكتى ورىندارىمەن لاڭكەستىككە قارسى تۇرۋ، ورنىقتىلىقتى قورعاۋ سالاسىندا تاجىريبە اۋىستىرۋ مەن ناقتى سەلبەستىكتى ۇزدىكسىز كۇشەيتەمىز. قوناقتاردىڭ كاسىپتىك ارتىقشىلىقتارىن ساۋلەلەندىرىپ، اناعۇرلىم كوپ لاڭكەستىككە قارسى تۇرۋ، ۇشقارىلىقتى الاستاۋ نازارياسى مەن امالياتتىق جەتىستىكتەرىن زەرتتەپ العا قويىپ، حالىقارالىق لاڭكەستىككە قارسى تۇرۋ، حاۋىپسىزدىك سالاسىنداعى ەكى جاقتى، كوپ جاقتى سەلبەستىكتى بەلسەنە جەبەپ، لاڭكەستىكتى بىرگە تەجەپ جانە وعان سوققى بەرىپ، ۇشقارى يدەيادان ساقتانىپ جانە وعان قارسى تۇرىپ، ٴوڭىردىڭ بەيبىتشىلىگىن، ورنىقتىلىعىن قورعاۋعا، ٴار ەل حالقىنىڭ ٴومىر ٴسۇرۋ ۇقىعى، دامۋ ۇقىعى سياقتى نەگىزگى ۇقىقتارىن قامتاماسىز ەتۋگە ۇلەس قوسۋىن ٴۇمىت ەتەمىن.
سىرتقى ىستەر مينيسترلىگىنىڭ ۋاكىلى، جۇڭگو ۇكىمەتىنىڭ ورتا شىعىس ماسەلەسى بويىنشا توتەنشە ۋاكىلى جاي جۋان، جۇڭگو قوعامدىق عىلىمدار اكادەمياسىنىڭ ورىنباسار باستىعى لي شۋەسۇڭ ٴسوز سويلەپ مىنالاردى ٴبىلدىردى: وسى رەتكى زەرتتەۋ ـ تالقى ٴماجىلىسىنىڭ ماقساتى − حالىقارالىق لاڭكەستىككە قارسى تۇرۋ ورتاق تانىمىن ۇيىستىرىپ، وركەنيەتتەردىڭ ٴوزارا ۇلگى الۋىن تەرەڭدەتۋ. شينجياڭنىڭ لاڭكەستىككە قارسى تۇرۋ جانە ۇشقارىلىقتى الاستاۋ ناتيجەسى كورنەكتى بولدى، لاڭكەستىككە قارسى تۇرۋداعى زاڭمەن باسقارۋ امالياتى ارقىلى حالىقارالىق قوعامعا پايدالى تاجىريبەلەر توپتادى. حالىقارالىق لاڭكەستىكتىڭ قايتا باس كوتەرۋى الدىندا جۇڭگو جاق ورتاق تانىم ۇيىستىرۋعا، تىزە قوسا سەلبەسۋگە ۇندەيدى. سىرتقى ىستەر مينيسترلىگى، جۇڭگو قوعامدىق عىلىمدار اكادەمياسى سياقتى قاتىستى ورىندار شينجياڭنىڭ لاڭكەستىككە قارسى تۇرۋ جاعىندا حالىقارالىق اۋىس ـ كۇيىس، سەلبەستىك ورىستەتۋىن ۇزدىكسىز قولداپ، دۇنيە ٴجۇزىنىڭ بەيبىتشىلىگىن، تىنىشتىعىن بىرگە قورعايدى.
سەربيا ٴىسلام ورتاق تۇلعاسىنىڭ ٴتوراعاسى دۋديچ ٴسوز سويلەپ بىلاي دەدى: لاڭكەستىك پەن ۇشقارىلىق − بۇكىل ادامزات ٴدوپ كەلگەن ورتاق قاتەر. وسى سايىسقا توتەپ بەرۋ حالىقارالىق قوعامنىڭ شىنايى سەلبەسىپ، وقۋ ـ اعارتۋدىڭ، مادەنيەتتىڭ، وتباسىنىڭ جانە ٴدىن، مادەنيەت ۇيىمدارىنىڭ رولىن ساۋلەلەندىرىپ، ٴوزارا سەنەتىن، ٴوزارا قۇرمەت ەتەتىن قوعام قۇرۋىن قاجەت ەتەدى. وسى رەتكى ٴماجىلىستىڭ لاڭكەستىككە قارسى تۇرۋداعى حالىقارالىق سەلبەستىكتى تەرەڭدەتۋگە جاڭا كوپىر سالىپ، دۇنيە ٴجۇزىنىڭ بەيبىتشىلىگى مەن ورنىقتىلىعىنا ۇلەس قوسۋىن ٴۇمىت ەتەمىن.
ۋاڭ جيانشين، جاڭ يىڭچۇن، ۋاڭ گاڭ، پان شي، ورتالىق پەن مەملەكەتتىڭ قاتىستى مينيسترلىكتەرىندەگى، كوميتەتتەرىندەگى جولداستار، اۆتونوميالى رايوننىڭ قاتىستى تاراۋلارىنداعى جاۋاپتى جولداستار كەزدەسۋگە قاتىناستى.
