8 ـ ايدىڭ 21 ـ كۇنى باستالادى، 16 كوماندادان شامامەن 14 مىڭ 600 ادام جارىسقا قاتىناسادى
اۆتونوميالى رايوندىق 15 ـ كەزەكتى سپورت جارىسى مەن 11 ـ كەزەكتى ۇلتتار ٴداستۇرلى دەنە تاربيە سپورت جارىسىنىڭ جارىس بەلگىسى.
اۆتونوميالى رايوندىق 15 ـ كەزەكتى سپورت جارىسى مەن 11 ـ كەزەكتى ۇلتتار ٴداستۇرلى دەنە تاربيە سپورت جارىسىنىڭ قۇت بەلگىسى − ”جۇنجۇن“ مەن ”ياڭياڭ“.
انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ 8 ـ ايدىڭ 17 ـ كۇنى ۇرىمجىدەن حابارلايدى. اۆتونوميالى رايوندىق دەنە تاربيە مەكەمەسى اشقان اقپارات جاريالاۋ ماجىلىسىنەن ۇعىسۋىمىزشا، اۆتونوميالى رايوندىق 15 ـ كەزەكتى سپورت جارىسى جانە 11 ـ كەزەكتى ۇلتتار ٴداستۇرلى دەنە تاربيە سپورت جارىسى 8 ـ ايدىڭ 21 ـ كۇنى قۇلجا قالاسىنداعى ىلە وليمپيادا سپورت ورتالىعىندا باستالادى، 9 ـ ايدىڭ 6 ـ كۇنى قاشقار قالاسى دەنە تاربيە ورتالىعىندا جابىلادى ەكەن.
بۇل شينجياڭنىڭ تۇڭعىش رەت اۆتونوميالى رايوندىق امبەباپ سپورت جارىسى مەن ۇلتتار ٴداستۇرلى دەنە تاربيە سپورت جارىسىن بىرىكتىرىپ وتكىزۋى. جارىستا كاسىپتىك باسەكەلەسۋ مەن شينجياڭ ەرەكشەلىگىن، وسى زامانعى باسەكەلەسۋ مەن ۇلتتاردىڭ ٴداستۇرلى دەنە تاربيەسىن جالعاستىرۋعا تەڭ ٴمان بەرىلىپ، جارىس گرۋپپالارى ساتىعا ٴبولىپ ورنالاستىرىلدى، ىلە، قاشقار قوس جارىس رايونى، سونداي ـ اق ات ويىندارىنىڭ كورلا بولىمشە جارىس الاڭى قۇرىلدى. بۇكىل رايونداعى 14 ايماق ـ وبلىس ـ قالادان، شىحىزى قالاسى مەن شينجياڭ ٴوندىرىس ـ قۇرىلىس بيڭتۋانى 3 ـ شىسىنان جيىنى 16 كوماندادان، شامامەن، 14 مىڭ 600 ادام جارىسقا قاتىناسادى.
ىلە جارىس رايونىندا جاستار مەن ورەندەردىڭ 18 باسەكەلىك دەنە تاربيە ٴتۇرى، 13 بۇقارالىق دەنە تاربيە جارىس قيمىلى ورنالاستىرىلادى؛ قاشقار جارىس رايونىنىڭ نەگىزگى جارىس الاڭىندا ۇلتتاردىڭ 13 ٴداستۇرلى دەنە تاربيە باسەكەلىك جارىس ٴتۇرى، ۇلتتاردىڭ 10 ٴداستۇرلى دەنە تاربيە ويىن ٴتۇرى (جەلىدە ورىندالاتىن 3 ويىن ٴتۇرىن قامتيدى) ورنالاستىرىلادى؛ ات ويىندارى كورلا بولىمشە جارىس الاڭىندا ۇلتتاردىڭ 3 ٴداستۇرلى دەنە تاربيە باسەكەلىك جارىس ٴتۇرى، ۇلتتاردىڭ 2 ٴداستۇرلى دەنە تاربيەدەن ويىن قويۋ ٴتۇرى ورنالاستىرىلادى.
باسەكەلىك دەنە تاربيە جاعىندا، وسى كەزەكتى سپورت جارىسىنىڭ جاستار مەن ورەندەردىڭ باسەكەلىك تۇرلەرى مەملەكەتتىك جارىس ولشەمىمەن ۇشتاستىرىلىپ U14 ،U16 ،U18 ،U20 سياقتى جاس قۇرامى بويىنشا گرۋپپالارعا ٴبولىنىپ، 600دەن استام جارىس شاعىن تۇرىنە جىكتەلىپ، ناقتى جارىس ارقىلى رايونىمىزداعى جاستار مەن ورەندەر ساڭلاقتارىنىڭ باسەكەلىك دەڭگەيى مەن پسيحيكالىق ساپاسىن جوعارىلاتىپ، بوكس، كۇرەس، نىسانا اتۋ، جەڭىل اتلەتيكا سياقتى باسىمدىققا يە تۇرلەرگە جاڭا كۇش ازىرلەيدى.
ۇلتتار ٴداستۇرلى دەنە تاربيە جارىسىنا جيىنى 2400دەن استام ٴار ۇلت سپورتشىلارى، تورەشىلەرى قاتىناسادى. التىباقان، بۇقا تارتىس، ۇلتتىق ات ونەرى، داۋاز، قىزقۋار سياقتى ٴداستۇرلى تۇرلەر ساقتاپ قالىنۋدان سىرت، وسى كەزەكتى جارىستا ايداعار قايىق، شىعىرىق اينالدىرۋ، جىپتەن سەكىرۋ، قوداسپەن كوكبار تارتۋ، ات دوپ، ايداعار ارىستان ٴبيى سياقتى تۇرلەر قوسلدى.
”تۇڭعىش رەت بىرىكتىرىپ وتكىزىلەتىن جارىس بۇكىل شينجياڭداعى دەڭگەيى ەڭ جوعارى، كولەمى ەڭ ۇلكەن امبەباپ دەنە تاربيە سالتاناتى بولۋمەن بىرگە، ٴار ۇلتتىڭ ٴداستۇرلى دەنە تاربيە كەلبەتىن ايگىلەيتىن، جۇڭحۋا ۇلتى ورتاق تۇلعا تانىمىن ناقتى، جاندى، ٴونىمدى بەكەمدەيتىن مادەنيەت سالتاناتى بولادى“، ـ دەدى اۆتونوميالى رايوندىق دەنە تاربيە مەكەمەسىنىڭ ورىنباسار باستىعى كاڭ يۇڭشين.
جارىس جۇڭحۋا ۇلتى ورتاق تۇلعا تانىمىن بەكەمدەۋدى جارىس وتكىزۋدىڭ جالپى بارىسىنا ٴسىڭىرىپ، ”ىنتىماقتاسۋ، العا باسۋ، ايانباي ايقاسۋ، ەكپىندەي ىلگەرىلەۋ“ سىندى جارىس وتكىزۋ باس ماقساتىن ۇستانىپ، ”ۇلتتار ىنتىماعىنىڭ سالتاناتتى جينالىسى، بۇقارالىق دەنە تاربيەنىڭ سالتاناتتى جينالىسى“ ورنىنا تاباندى بولىپ، اشىلۋ سالتىنا، جابىلۋ سالتىنا جانە ٴتۇرلى جارىستارعا سۇيەنىپ، ۇلتتار ىنتىماعىنىڭ ادام ەلىتە سەزىنە الاتىن جاعدايىن قالىپتاستىرىپ، ٴار ۇلت سپورتشىلارىنىڭ ٴبىر الاڭدا باسەكەلەسۋ، ٴوزارا اۋىس ـ كۇيىس جاساۋ تۇعىرىن ورناتادى.
وسى كەزەكتى سپورت جارىسىن اۆتونوميالى رايوندىق حالىق ۇكىمەتى ۇيىمداستىردى، اۆتونوميالى رايوندىق دەنە تاربيە مەكەمەسى، اۆتونوميالى رايوندىق ۇلت ىستەرى كوميتەتى، ىلە قازاق اۆتونوميالى وبلىستىق حالىق ۇكىمەتى، قاشقار ايماقتىق اكىمشىلىك مەكەمەسى، بايىنعولين موڭعۇل اۆتونوميالى وبلىستىق حالىق ۇكىمەتى مىندەتىنە الىپ وتكىزەدى.
