□ شينحۋا اگەنتتىگىنىڭ تىلشىلەرى پىڭ يۇنجيا، لي حىڭ
2026 ـ جىلى 8 ـ ايدىڭ 19 ـ كۇنى 9 ـ رەتكى جۇڭگو شيپاگەرلەر مەرەكەسى.
قالىڭ ەمدەۋ قىزمەتكەرلەرى − حالىقتىڭ باس اماندىعى مەن سالاماتتىعىنىڭ قورعاۋشىسى، دەنساۋلىق ساقتاۋ، سالاماتتىق ىستەرىنىڭ دامۋىن ىلگەرىلەتەتىن ماڭىزدى كۇش. قالىڭ ەمدەۋ قىزمەتكەرلەرىنە ٴتان وسى مەرەكە پارتيا مەن حالىقتىڭ ايبىندى قۇرمەتىن ارقالاعان، وندا باس شۋجي شي جينپيڭنىڭ شىنايى قامقورلىعى مەن شىنايى ٴۇمىتى قامتىلعان.
2018 ـ جىلعى تۇڭعىش جۇڭگو شيپاگەرلەر مەرەكەسى بايلانىسىمەن باس شۋجي شي جينپيڭ ماڭىزدى نۇسقاۋ بەرىپ، قالىڭ ەمدەۋ قىزمەتكەرلەرىنىڭ ”ٴومىردى قادىرلەيتىن، اجالعا اراشاشى، جارالىعا مەدەت بولاتىن، ٴوزىن ارناۋعا پەيىل، شەكسىز سۇيىسپەنشىلىك جەتكىزەتىن رۋحىن اسقاقتاتۋدى“ تۇراقتاندىرىپ، وسى قوسىننان ”زور توپتاعى مەديتسينا ماماندارى مەن حالىقتىڭ جاقسى شيپاگەرلەرى جارىققا شىقتى“ دەپ اتاپ كورسەتتى.
پارتيا 18 ـ قۇرىلتايىنان بەرى، باس شۋجي شي جينپيڭ ەمدەۋ ـ دەنساۋلىق ساقتاۋ ٴبىرىنشى شەبىنە تالاي رەت بارىپ، نەگىزگى ساتىداعى ەمدەۋ قىزمەتكەرلەرىمەن ىقىلاستى اڭگىمەلەسىپ، بۇكىل قوعامعا شيپاگەرلەردى قۇرمەتتەيتىن، دەنساۋلىق ساقتاۋعا ٴمان بەرەتىن ايقىن ۇلگى ورناتتى −
جياڭسۋ جىنجياڭ شىيە قالاشىقتىق شيپاحاناسىندا بىلاي دەپ اتاپ كورسەتتى: ٴار دارەجەلى پارتكوم مەن ۇكىمەت ەمدەۋ قىزمەتكەرلەرىنە كوڭىل ٴبولىپ جانە قامقورلىق جاساپ، ولارعا تاماشا قىزمەت ورتاسىن جاراتۋى كەرەك؛
حىبەيدىڭ تاڭشان قالاسىنداعى سالدانعاندار ساناتورياسىندا سول جەردەگى ەمدەۋ قىزمەتكەرلەرىن ”سىزدەردىڭ ىستەرىڭىز ەڭ ارداقتى، ەڭ قاسيەتتى“ دەپ شابىتتاندىردى؛
فۋجيان سانميڭ شاشيان اۋداندىق باس شيپاحاناسىندا ەمدەۋ رەفورماسىنىڭ حالىققا تيىمدىلىك جاساۋ جاعدايىن ناقتى ورىندا ۇعىسىپ، ”بۇل باتىلدىقپەن الدا ٴجۇرۋ رۋحى، حالىقتى بارىنەن جوعارى قويۋ، ٴومىردى بارىنەن جوعارى قويۋ ۇستانىمى سانالىلىعىمەن جاۋاپكەرشىلىك ارقالاۋ“ دەپ تولىق تۇراقتاندىردى؛
...
ٴاربىر مەيىرگە تولى ساتتەر، ٴار رەتكى جۇرەككە جىلۋ سيلايتىن تىلدەسۋلەر، باس شۋجيدىڭ ەمدەۋ قىزمەتكەرلەرىنە كوڭىل ٴبولۋى، قامقورلىق جاساۋى ”حالىقتى بارىنەن جوعارى قويۋ، ٴومىردى بارىنەن جوعارى قويۋ“ سىندى قۇن تالپىنىسىن ايگىلەدى.
2026 ـ جىلى 7 ـ ايدا جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قۇتتىقتاۋ جينالىسىندا باس شۋجي شي جينپيڭ شەكاراداعى مال شارۋاشىلىق وڭىرىنە تامىر تارتقان، مالشىلاردىڭ دەنساۋلىعىن نەشە ون جىل قورعاعان شينجياڭ شاعانتوعاي اۋداندىق مال شارۋاشىلىعى شيپاحاناسى ىشكى اۋرۋلار ٴبولىمىنىڭ بۇرىنعى تەتە اعا شيپاگەرى وقاس سۇلەيمەنگە ”1 ـ شىلدە وردەنىن“ بەرىپ، پارتيا ىشىندەگى ەڭ جوعارى داڭق ارقىلى نەگىزگى ساتىداعى اق حالاتتى قورعاۋشىلارعا قۇرمەت ٴبىلدىردى.
”ەمدەۋ قىزمەتكەرلەرىن قورعاۋدى، ولارعا قامقورلىق جاساۋدى، ولاردى ايالاۋدى كۇشەيتۋ كەرەك“، ”ەڭبەكاقى مامىلەسىن، دامۋ ٴورىسىن، كاسىپپەن شۇعىلدانۋ ورتاسىن، قوعامدىق ورنىن جوعارىلاتۋ سياقتى جاقتاردان ىسكە كىرىسىپ، ەمدەۋ قىزمەتكەرلەرىنىڭ دەنساۋلىعى مەن جان ساۋلىعىنا كوڭىل ٴبولۋ، ولاردى ايالاۋ كەرەك“... باس شۋجي شي جينپيڭنىڭ ماڭىزدى نۇسقاۋى بويىنشا، ەلىمىز «ەمدەۋ قىزمەتكەرلەرىن قورعاۋدىڭ، ولارعا قامقورلىق جاساۋدىڭ، ايالاۋدىڭ باياندى مەحانيزمىن ورناتۋ جونىندەگى جەتەكشى پىكىردى» شىعارىپ، ەمدەۋ قىزمەتكەرلەرىنىڭ كاسىپپەن شۇعىلدانۋىن قورعاۋ، كاسىپتىك اتاعىن ٴوسىرۋ، ماداقتاۋ ـ سيلاۋ، شابىتتاندىرۋ جۇيەسىن ۇزدىكسىز كەمەلدەندىرىپ، ەمدەۋ قىزمەتكەرلەرىنىڭ مىندەتىن الاڭسىز وتەۋىن اناعۇرلىم ويداعىداي قامتاماسىز ەتتى.
قامقورلىق جاسادى، تىپتەن، شىنايى ٴۇمىت ارتتى.
2020 ـ جىلى 2 ـ ايدا باس شۋجي شي جينپيڭ شوۋگاڭ شيپاحاناسىندا پراكتيكا ىستەپ جاتقان شيزاڭ داشۋەسى مەديتسينا شۋەيۋانىنىڭ وقۋشىلارىنا جاۋاپ حات جازىپ، ”قۇلشىنا پارتيا مەن حالىق سەنىم ارتاتىن جاقسى شيپاگەر بولايىق“، ”وقۋ تاۋىسقاننان كەيىن حالىق ەڭ قاجەت ەتكەن جەرلەرگە بارىپ، حالىقتى، اسىرەسە، نەگىزگى ساتىداعى بۇقارانى قايىرىمدىلىق، شيپاگەرلىك ونەر ارقىلى باقىتقا كەنەلتىڭىزدەر“ دەپ شىنايى شابىت بەردى؛ 2021 ـ جىلعى مەملەكەتتىك ەكى ٴماجىلىس كەزىندە ەمدەۋ، ٴدارى ـ دارمەك، دەنساۋلىق ساقتاۋ سالاسىنداعى، وقۋ ـ اعارتۋ سالاسىنداعى مۇشەلەرگە امانداسا بارعاندا، باس شۋجي بىلاي دەپ ىقىلاستى تاپسىرما بەردى: قالىڭ ەمدەۋ قىزمەتكەرلەرى شيپاگەرلىك ٴمورالدى، شيپاگەرلىك ستيلدى، شيپاگەرلىك جوسىندى ساقتاپ، شيپاگەرلىك ٴمورالدى جەتىلدىرىپ، شيپاگەرلىك ونەرىن ايگىلەپ، اۋرۋ ازابىنان قۇتقارۋ پەيىلىمەن حالىقتىڭ قالاۋلى شيپاگەرى بولۋى كەرەك.
”پارتيا مەن حالىق سەنىم ارتاتىن جاقسى شيپاگەر بولۋدان” “حالىقتىڭ قالاۋلى شيپاگەرى بولۋعا“ دەيىن، باس شۋجي شي جينپيڭ: شيپاگەرلەردە ەرەن شيپاگەرلىك ونەردى شىڭداۋمەن بىرگە، ونان دا ماڭىزدىسى، حالىق ٴۇشىن قايىرىمدى بولۋى كەرەك، ـ دەپ ايقىن باعدار كورسەتتى.
قازىر ”15 ـ بەسجىلدىق“ باستالدى، ٴبىز 2035 ـ جىلى سالاماتتى جۇڭگو قۇرۋدىڭ شەشۋشى كەزەڭىنە قادام تاستادىق. قالىڭ ەمدەۋ قىزمەتكەرلەرى سالاماتتى جۇڭگو قۇرىلىسىنىڭ تىرەكتى كۇشى، بورىش اۋىر، جاۋاپكەرشىلىك ارقامىزدا.
”حالىقتىڭ سالاماتتىعىن كۇشەيتۋگە ۇزدىكسىز تىڭ ۇلەس قوسىپ، سالاماتتى جۇڭگو قۇرىلىسىنىڭ جاڭا تاراۋىن جازىپ، ەلىمىزدىڭ دەنساۋلىق ساقتاۋ، سالاماتتىق ىستەرىنىڭ جاڭا جاعدايىن قۇلشىنا اشۋىن ٴۇمىت ەتەمىن“. باس شۋجي شي جينپيڭنىڭ تاپسىرماسىن ەستە بەرىك ساقتاپ، قالىڭ ەمدەۋ قىزمەتكەرلەرى نەگىزگى ساتى ٴبىرىنشى شەبىندە تاپجىلماي، مەديتسينانىڭ شىڭىنا باتىلدىقپەن شىعىپ، ميلليارد حالىقتىڭ باس اماندىعى مەن سالاماتتىعىن قورعاۋدىڭ ايبىندى ساپارىندا شىت جاڭا ٴداۋىر داستانىن جازۋدا.
(شينحۋا اگەنتتىگىنىڭ 8 ـ ايدىڭ 19 ـ كۇنى بەيجيڭنەن بەرگەن حابارى)
